Marso 31–Abril 6: “Si Jesucristo Magatipon sang Iya Katawhan”

Doktrina kag mga Kasugtanan 29

Bisan nga naorganisar na ang Simbahan ni Jesucristo sang 1830, kadamo pa sang mga kamatuoran sang ebanghelyo nga wala pa mapahayag, kag ang pila sa una nga mga miyembro sang Simbahan may mga pamangkot. Nabasa nila ang mga propesiya sa Libro ni Mormon parte sa pagtipon sang Israel kag sang pagpahamtang sang Sion (tan-awa sa 3 Nefi 21). Paano ina matabo? Ang mga rebelasyon nga nabaton kuno ni Hiram Page nagtandog sinang topiko, nga nagpadugang lamang sang pagkamausisa sang mga miyembro (tan-awa sa Doktrina kag mga Kasugtanan 28). Ang iban nga tawo naligban parte sa Pagkahulog ni Adan kag ni Eva kag sa espirituhanon nga kamatayon. Ginbaton sang Ginuo ina nga mga pamangkot sang 1830, kag ginabaton Niya ang aton mga pamangkot sa karon. “Kon ano man ang inyo pangayuon sa pagtuo,” siling Niya sa mga Santos, “nga nagaisa sa pagpangamuyo suno sa akon sugo, pagabatunon ninyo” (Doktrina kag mga Kasugtanan 29:6). Sa matuod, pareho sa puno-sing-doktrina nga rebelasyon nga makita sa Doktrina kag mga Kasugtanan 29, kon kaisa ginasabat sang Ginuo ang aton mga pamangkot paagi sa paghatag sa aton sang kamatuoran kag ihibalo nga sobra pa sa aton ginapangayo.

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 29

Ang Amay nga Langitnon may plano para sa kaluwasan sang Iya mga anak.

Ang Doktrina kag mga Kasugtanan 29 nagatudlo sang madamo nga kamatuoran parte sa plano sang Dios para sa imo. Samtang ginabasa mo, pangitaa ang mga kamatuoran nga imo matun-an parte sa tagsa sang masunod nga mga parte sang Iya plano:

• Kabuhi antes sa duta (tan-awa sa mga bersikulo 36–37)

• Pagtuga (tan-awa sa mga bersikulo 31–33)

• Ang Pagkahulog ni Adan kag Eva (tan-awa sa mga bersikulo 40–41)

• Mortal nga kabuhi (tan-awa sa mga bersikulo 39, 42–45)

• Ang Pagbayad-Sala ni Jesucristo (tan-awa sa mga bersikulo 1, 42–43, 46–50)

• Ang Pagkabanhaw (tan-awa sa mga bersikulo 13, 26)

• Ang Katapusan nga Paghukom (tan-awa sa mga bersikulo 12–13, 27–30)

Ano nga mga ideya ang imo nabaton? Kon makabulig sa imo, pwede mo ini isulat sa ispasyo nga gintigana upod sa mga imahe sa punta sining outline. Paano nagaimpluwensya ining mga kamatuoran sa imo kabuhi?

Detalye halin sa Come Unto Me [Magpalapit sa Akon], ni Jenedy Paige

Doktrina kag mga Kasugtanan 29:1–28

Ginahagad ako ni Jesucristo nga magbulig tipon sang Iya katawhan antes sang Iya Ika-duha nga Pagkari.

Si Jesucristo nagahambal parte sa pagtipon sang Iya katawhan “pareho sang munga nga nagatipon sang iya mga piso sa idalom sang iya pakpak” (Doktrina kag mga Kasugtanan 29:2). Ano ang ginatudlo sa imo sining paanggid parte kay Jesucristo? Ano nga dugang nga mga panghunahuna ukon impresyon ang nag-abot sa imo samtang ginatun-an mo ang drowing sang munga kag mga piso sa sining outline? Hunahunaa kon paano mo nabatyagan si Jesucristo nga nagatipon kag nagaprotekta sa imo.

Samtang ginabasa mo ang Doktrina kag mga Kasugtanan 29:1–11, magpangita sang mga ideya parte sa:

• Kon sin-o ang tipunon.

• Ano ang buot silingon sang “tipunon” kay Cristo.

• Kon ngaa nagatipon kita sa Iya.

Binagbinaga kon ngaa gusto mo nga magtipon ang iban nga tawo kay Jesucristo. Ano ang ginainspirar sa imo nga himuon mo para magbulig?

Pwede mo pamangkuton ang imo kaugalingon sang amo man sini nga mga pamangkot samtang nagabasa ukon nagapamati sang kanta parte sa pagtipon. Ano sa banta mo ang gusto itudlo sa imo sang Ginuo parte sa Iya buluhaton nga pagtipon?

A Witness of God

Elder Neil L. Andersen describes how all of God's children are pieces of a large puzzle in preparation for the Second Coming of Jesus Christ.

Siling ni Pangulong Russell M. Nelson: “Nagakatabo ang pagtipon sa tagsa ka nasyon. Ginsugo sang Ginuo ang pagpahamtang sang Sion sa tagsa ka lugar kon diin Niya ginhatagan ang Iya mga Santos sang ila natawhan kag nasyonalidad” (“The Gathering of Scattered Israel,” Liahona, Nob. 2006, 81). Paano kita ginabuligan sang pagtipon sa sini nga paagi nga mangin “handa sa tanan nga butang” para sa Ika-duha nga Pagkari sang Manluluwas? (bersikulo 8; tan-awa man sa mga bersikulo 14–28).

Tan-awa man sa “Ang Doktrina sang Pagkalakip,” Liahona, Nob. 2022, 53–56.

Doktrina kag mga Kasugtanan 29:31–35

“Ang tanan nga butang espirituhanon sa akon.”

Samtang ginatun-an mo ang Doktrina kag mga Kasugtanan 29:31–35, pamangkuta ang imo kaugalingon, “Sa ano nga bagay ang tanan nga kasuguan nangin espirituhanon?” Pwede mo ilista ang pila ka kasuguan kag binagbinaga ang espirituhanon nga mga kamatuoran nga konektado sa kada isa. Mahimo nga makabulig ang pagrebyu sang Para sa Kusog sang mga Lamharon: Giya sa Paghimo sang mga Pagpili—nagatudlo ini sang pila ka wala katapusan nga mga kamatuoran sa likod sang pila ka mga kasuguan sang Dios.

Paano ang paghibalo nga “ang tanan … espirituhanon” nakaapekto sa pagtan-aw mo sang mga kasuguan sang Dios? Pamensara ang pagpangita sang espirituhanon nga kahulugan ukon katuyuan sa iban man nga aspeto sang imo kabuhi.

Tan-awa man sa 2 Nefi 9:39.

Magtutok kay Jesucristo. “Kabiga ang tagsa ka topiko sang ebanghelyo [nga] oportunidad sa pagtudlo kag pagtuon parte kay Jesucristo” (Pagtudlo sa Paagi sang Manluluwas, 6). Ano ang imo matun-an parte sa Iya mga kinaiya, sa Iya mga papel, kag sa Iya ehemplo samtang ginabasa mo ang Doktrina kag mga Kasugtanan 29?

Doktrina kag mga Kasugtanan 29:36–50

Ginatubos kita ni Jesucristo halin sa Pagkahulog.

Paano mo gamiton ang Doktrina kag mga Kasugtanan 29:36–50 para ipaathag kon ngaa kinahanglan naton sang pagtubos paagi kay Jesucristo?

Ang Pagkahulog ni Adan kag Eva nagdala sang kamatayon kag sala sa kalibutan, pero ginhanda man sini ang alagyan para sa pagtubos kag kalipay paagi kay Cristo. Nga ginapanumdom ina, basaha ang mga bersikulo 39–43 kag pat-ini ang mga tinaga kag dinalan nga nagadala sa imo sang kalipay. Ano ang nanamian mo sa ginhambal ni Adan kag Eva parte sa Pagkahulog sa Moises 5:10–12?

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 29

Ang Amay nga Langitnon may plano para sa kaluwasan sang Iya mga anak.

• Para sugdan ang paghambalanay parte sa plano sang Amay nga Langitnon para sa aton, pwede ninyo hambalan sang imo kabataan ang panahon nga naghimo kamo sang plano, pareho sang bakasyon ukon pagtapos sang isa ka hilimuon. Pwede ka man magpakita sang mga halimbawa sang plano, pareho sang kalendaryo nga may nasulat nga aktibidades ukon mga instruksyon para himuon ang isa ka butang. Ngaa mapuslanon ang mga plano? Pwede ninyo dayon hambalan kon ano ang gusto tapuson sang Amay nga Langitnon kag kon paano nagabulig ang Iya plano nga matuman naton ini.

• Pwede mo gamiton ang mga imahe sa katapusan sining outline para pangitaon ang mga bersikulo sa Doktrina kag mga Kasugtanan 29 nga nagatudlo sang lainlain nga parte sang plano sang Amay nga Langitnon. Pwede mo man guntingon ang mga imahe kag pangabayon ang imo kabataan nga pasunuron ini. Ngaa nagapasalamat kita nga makahibalo nga may plano ang Amay nga Langitnon para sa aton? Paano nagaimpluwensya ining ihibalo sa aton adlaw-adlaw nga pagpangabuhi?

Doktrina kag mga Kasugtanan 29:1–2, 7–8

Ginatipon ni Jesucristo ang Iya katawhan antes Sia magbalik liwat.

• Ang drowing sa idalom parte sa manok nga nagatipon sang iya mga piso (ChurchofJesusChrist.org) makabulig sa imo kabataan nga mapanan-aw ang paanggid sa Doktrina kag mga Kasugtanan 29:1–2. Dayon pwede ninyo upod nga basahon ining mga bersikulo kag hambalan kon paano ginaprotektahan sang manok ang iya mga piso kag kon paano ini makumparar sa pwede himuon sang Manluluwas para sa aton.

  Chicks and Hens

  

  I Would Gather Thee [Tipunon Ko Kamo], ni Liz Lemon Swindle

• Ano ang magainspirar sa imo kabataan nga maghandum sa pagbulig sa Manluluwas nga tipunon ang Iya katawhan? Basi gusto nila magpamati sang eksperiyensya sang isa ka tawo nga “nagtipon” sa Iya paagi sa pagpamiyembro sa Iya Simbahan. Halimbawa, sin-o ang nagpakilala sang inyo pamilya sa Simbahan? Paano kita nabugayan sang nagbaton kita sang tawag sang Manluluwas nga magtipon sa Iya? Paano naton buligan ang iban nga magtipon sa Iya? ChurchofJesusChrist.org.)

  Video: A Message for Children from President Russell M. Nelson

  In the 2021 Friend to Friend event, President Russell M. Nelson gave this message to children around the world.

Doktrina kag mga Kasugtanan 29:11

Mabalik liwat si Jesucristo.

• Ang litrato sang Ika-duha nga Pagkari sang Manluluwas (pareho sang Libro sang mga Larawan nga Pang-Ebanghelyo, no. 66) ukon kanta parte sini makabulig sa imo kag sa imo kabataan nga hambalan ang Doktrina kag mga Kasugtanan 29:11. Buligi ang imo kabataan nga makita ang mga dinalan nga konektado sa litrato ukon kanta. Iistorya sa isa kag isa ang inyo mga nabatyagan parte sa pagbalik ni Jesucristo sa duta.

Para sa dugang nga mga ideya, tan-awa sa isyu sang Abyan nga magasin sini nga bulan.