Detalye halin sa Saints Move to Kirtland [Mga Santos Nagsaylo sa Kirtland], ni Sam Lawlor

Abril 21–27: “Kon Indi Kamo Isa Indi Kamo Akon”

Doktrina kag mga Kasugtanan 37–40

Para sa nauna nga mga Santos, ang Simbahan masobra pa sa lugar sa pagpamati sang pagpangwali kon Domingo. Ang mga rebelasyon naggamit sang mga tinaga pareho sang kawsa, ginharian, Sion, kag, kasami, buluhaton. Mahimo nga bahin ina sang nag-engganyo sa mga tawo sa ginpanumbalik nga Simbahan. Pareho sang pagpalangga nila sa doktrina, kadamo man sang gusto maghimo sang balaan nga butang nga pwede nila dedikaran sang ila mga kabuhi. Wala sapayan sini, ang pagtuman sang sugo sang Ginuo sang 1830 nga magtipon sa Ohio nangin indi mahapos. Para sa kadam-an, nagakahulugan ini sang pagbiya sang komportable nga mga puluy-an para sa indi pamilyar nga teritoryo (tan-awa sa “Mga Tingug sang Pagpanumbalik: Pagtipon sa Ohio”). Sa karon maathag naton nga makita kon ano ang makita sang mga Santos gamit lamang ang ila pagtuo: may dalagko nga mga bugay ang Ginuo nga nagahulat sa ila sa Ohio.

Ang kakinahanglan nga magtipon sa Ohio madugay na nga nagligad, pero ang mga Santos sa karon padayon nga nagatipon sa pareho nga kawsa: sa “pagpahanabo sang Sion” (Doktrina kag mga Kasugtanan 39:13). Pareho sadtong mga nauna nga mga Santos, ginaagda kita nga talikdan “ang mga kabalaka sa kalibutanon nga mga butang” (Doktrina kag mga Kasugtanan 40:2) kag magsalig sa promisa sang Ginuo: “Mabaton [ninyo] … ang pagpakamaayo nga tuman kadako nga wala pa [ninyo] matilawan” (Doktrina kag mga Kasugtanan 39:10).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 37–38

Ginatipon kita sang Dios para bugayan kita.

Ang mga miyembro sang Simbahan sa Fayette, New York, kinahanglan maghimo sang mabudlay nga mga sakripisyo para magsaylo sa Ohio (sobra 400 ka kilometro ang kalayuon) sang tigtulugnaw sang 1831. Samtang ginabasa mo ang parte sa sugo sang Ginuo sa Doktrina kag mga Kasugtanan 37:3–4, pwede mo hunahunaon ang mga sakripisyo nga ginapahimo sang Ginuo sa imo. Dayon, samtang ginabasa mo ang Doktrina kag mga Kasugtanan 38:1–33, pangitaa ang mga kamatuoran parte sa Manluluwas nga nagahatag sa imo sang pagtuo nga sundon ang Iya laygay. Ano ang natun-an mo sa bersikulo 11–33 parte sa mga bugay sang pagtipon bilang mga sumulunod ni Jesucristo?

Doktrina kag mga Kasugtanan 38:22

“Magpamati sa akon tingug kag magsunod sa akon.”

Paano mo himuon si Jesucristo nga imo “manughatag sang kasugoan”? Paano ka ginahimo nga “hilway nga katawhan” sa pagsunod sang Iya mga layi?

Tan-awa man sa 2 Nefi 2:26–27.

Doktrina kag mga Kasugtanan 38:30

Kon ako handa, indi ko kinahanglan nga mahadlok.

San-o mo naeksperiyensyahan ang prinsipyo nga ginpahayag sang Ginuo sa Doktrina kag mga Kasugtanan 38:30: “Kon handa kamo indi kamo mahadlok”? Samtang ginatun-an mo ang seksyon 38, pat-ini kon paano ginahanda sang Ginuo ang Iya mga Santos para maatubang nila ang palaabuton nga may kaisog. Ano ang gusto Niya nga obrahon mo para handaan ang kabudlayan para indi ka na makulbaan?

Tan-awa man sa David A. Bednar, “Tilawan Naton Sila sa Sini,” Liahona, Nob. 2020, 8–11.

Doktrina kag mga Kasugtanan 38:24–27

Gusto sang Dios nga “mangin isa” kita.

Ang mga Santos nga nagtipon sa Ohio naghalin sa lainlain nga mga sirkumstansya. Laban-laban nga amo man sini ang mga tawo sa inyo ward. Pero ginsugo sang Ginuo ang Iya katawhan nga “mangin isa” (bersikulo 27). Paano naton malab-ot ini nga klase sang pag-isa? Ano nga mga ideya ang imo madumduman samtang ginabasa mo ang Doktrina kag mga Kasugtanan 38:24–27? Ngaa kinahanglan naton nga mangin isa para mangin katawhan sang Dios?

Ang pagbasa sining mga bersikulo mahimo nga magainspirar man sa imo nga hunahunaon ang imo mga relasyon—halimbawa, sa mga miyembro sang pamilya, mga miyembro sang ward, ukon mga miyembro sang mga korum ukon klase. Ano ayhan ang nagapugong sa imo nga mangin isa kay Cristo? Paano makabulig sa imo ang Manluluwas nga “mangin isa”?

A Friend to All

Elder Ulisses Soares talks of the need for kindness and acceptance.

Love in Our Hearts

Sister Christina B. Franco discusses the importance of inclusion and respect.

Paano mo mabuligan ang ini nga mga grupo nga mas mangin isa? Halimbawa, pamensara nga magpadala ukon mag-text sang manami nga mensahe sa mga miyembro sang imo korum, klase, ukon pamilya. Sin-o ang nabatyagan mo nga dapat mo padalhan?

Ano ang nagainspirar sa imo parte sa ehemplo sang Manluluwas sa Mga Taga-Efeso 2:14, 18–22; 2 Nefi 26:24–28?

Tan-awa man sa Quentin L. Cook, “Mga Tagipusuon nga Nabugkos sa Pagkamatarong kag Pag-isa,” Liahona, Nob. 2020, 18–21.

Doktrina kag mga Kasugtanan 38:39; 39–40

Gusto sang Amay nga Langitnon nga hatagan ako sang mga manggad sang wala katapusan.

Sa imo opinyon, ano ang kinalain sang “mga manggad sang duta” kag sang “mga manggad sang wala’y katapusan”? (Doktrina kag mga Kasugtanan 38:39). Ano nga mga eksperiyensya ang nagtudlo sa imo nga hatagan balor ang mga manggad sang wala katapusan?

Dumduma ini samtang ginabasa mo ang parte kay James Covel sa mga seksyon 39–40 (pati na ang kasaysayan sini sa mga tig-ulo sang seksyon). Pamensara kon paano magamit ang iya eksperiyensya sa imo. Halimbawa, hunahunaa ang tinion sang ang imo “tagipusuon … nangin matarong sa panulok sang [Dios]” (Doktrina kag mga Kasugtanan 40:1). Paano ka ginbugayan tungod sang imo pagkamatinuohon? Hunahunaa man kon ano nga “mga kabalaka sa kalibutanon nga mga butang” ang imo ginaatubang. Paano ayhan ini makapugong sa imo nga batunon ang pulong sang Dios “sing malipayon”? (Doktrina kag mga Kasugtanan 39:9; 40:2). Ano ang imo nakita sa sining mga seksyon nga nakainspirar sa imo nga mas magsige-sige sa pagtuman sa Dios?

Tan-awa man sa Mateo 13:3–23.

Paggamit sang balaan nga mga kasulatan sa imo kabuhi. “Isa ka paagi nga mabuligan mo ang mga nagatuon nga makita ang kaimportante sang [balaan nga mga kasulatan] amo ang pagpamangkot pareho sang “Paano ini makabulig sa imo sa imo ginaeksperiyensyahan karon?” “Ngaa importante nga mahibal-an mo ini?” “Ano ang kinalain nga mahimo sini sa imo kabuhi?” (Pagtudlo sa Paagi sang Manluluwas, 23). Ang mga pamangkot sa sining aktibidades parte sa Doktrina kag mga Kasugtanan 39–40 dugang nga mga halimbawa sang mga pamangkot nga makabulig sa aton nga gamiton ining mga rebelasyon sa aton mga kabuhi.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan

Mga Ideya para sa Pagtudlo sang mga Kabataan

Doktrina kag mga Kasugtanan 37; 38:31–33

Ginatipon kita sang Dios para bugayan kita.

• Ang mapa kag pahina sang kahiwatan sa katapusan sining outline makabulig sa imo kabataan nga maintiendihan kon ano ang ginsugo sang Dios sa Doktrina kag mga Kasugtanan 37:3. Basi pwede mo sila buligan nga pangitaon ang mga lugar nga ginhambal sa sining mga rebelasyon. Pwede mo man sila buligan nga magpangita sang dinalan sa Doktrina kag mga Kasugtanan 38:31–33 nga nagalaragway kon ngaa gusto sang Dios nga magtipon ang Iya katawhan.

Doktrina kag mga Kasugtanan 38:24–27

Gusto sang Dios nga “mangin isa” kita.

• Samtang ginabasa mo ang Doktrina kag mga Kasugtanan 38:24–25 upod sa imo kabataan, hambali kon ano ang buot silingon sang kabigon ang imo utod nga pareho sang imo kaugalingon (tan-awa man sa Mateo 7:12). Buligi sila nga suliton ining balaan nga kasulatan, nga ginabuslan ang “iya utod” sang ngalan sang kada isa.

• Tudloi ang imo kabataan kon ano ang buot silingon sang “mangin isa” (Doktrina kag mga Kasugtanan 38:27), pwede mo sila buligan nga magdrowing sang dako nga numero 1 kag dekorahan ini sang mga ngalan kag drowing ukon litrato sang kada tawo sa inyo pamilya ukon klase. Sa tupad sang 1, pwede ninyo isulat ang mga butang nga inyo himuon para mas mangin isa.

• Pamensara nga maggamit sang object lesson nga nagapakita kon paano tingbon ukon isahon ang mga bagay, pareho sang mga retaso sang tela nga pwede mangin habol ukon mga sangkap nga makahimo sang isa ka tinapay. Ano ang ginatudlo sa aton sining mga halimbawa parte sa pag-isa bilang katawhan sang Dios?

Doktrina kag mga Kasugtanan 38:30

Kon ako handa, indi ko kinahanglan nga mahadlok.

• Samtang ululupod ninyo nga ginabasa ang Doktrina kag mga Kasugtanan 38:30, pwede ninyo hambalan sang imo kabataan ang inyo mga eksperiyensya sang sini lang nga nagpangayo sang preparasyon. Dayon pwede mo pamangkuton ang imo kabataan parte sa mga butang nga gusto sang Amay nga Langitnon nga aton handaan. Iistorya sa imo kabataan ang isa ka eksperiyensya kon diin ang paghanda nakabulig sa imo nga indi makulbaan.

Men's Hearts Shall Fail Them

Elder Russell M. Nelson shares a personal story to give encouragement for when we feel "weak in the heart."

Doktrina kag mga Kasugtanan 39:6, 23

Nabaton ko ang dulot sang Balaan nga Espiritu sang ginkompirma ako.

• Pamensara nga magpakita sang litrato sang tawo nga ginakompirma. Ipalaragway sa imo kabataan kon ano ang nagakatabo sa litrato. Pwede mo man ipatudlo sa ila ang litrato kon mabatian nila ang mga tinaga nga Balaan nga Espiritu sa Doktrina kag mga Kasugtanan 39:6, 23. Mag-istoryahanay kon paano kamo nabugayan sang dulot sang Balaan nga Espiritu.

Para sa dugang nga mga ideya, tan-awa sa isyu sang Abyan nga magasin sini nga bulan.