“Ainikien Jepļaaktok eo: Rioktak tok ro Jinointata,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Rioktak tok ro Jinointata,” Itok, Ļoor Eō—N̄an M̧weeo im Kabun̄ in: 2025
Ainikien ko an Jepļaaktok eo
Rioktak ro Jinointata
Men̄e jān an Kabun̄ in kar ejaak ilo Eprōl 1830 eo, Irooj ekar kean̄ “Meļaaj eo emouj epojak n̄an m̧adm̧ōd” (Katak im Bujen Ko 4:4). Enaan in ekar kam̧ool m̧ool eo ilo allōn̄ ko ālkin wōt, kōnke elōn̄ rikappukōt m̧ool eo raar tōl jān Jetōb eo an Anij n̄an kappukōt Kabun̄ eo an Jisōs Kraist ekar jepļaaktok.
Elōn̄ iaan rioktak rein jinointata raar m̧ōttan eo eaorōk n̄an ejaake pedped eo an Jepļaaktok eo, im bwebwenato in oktak ko aer raorōk n̄an kōj rainin. Tōmak eo raar kwaļo̧ke ejjeļo̧k oktak jān tōmak eo jej aikuji n̄an erom̧ rioktak ro n̄an gospel eo an Jisōs Kraist.
Abigail Calkins Leonard
Ke Abigail Calkins Leonard eaar tōpar jiln̄uul jim̧a iiō dettan, eaar kōņaan bwe jerawiwi ko an ren jako. Emakijkij an riit jān Baibōļ eo, im armej ro jān m̧ōn jar ko an Rikūrijin kar loļo̧k m̧weo im̧ōn, bōtaab liin eaar pok kōn ta eo ekar kōm̧m̧an bwe juon kabun̄ en oktak bar jān eo juon. “Juon jibbon̄,” liin eaar ba, “Iaar bōk Baibōļ eo aō im ilo̧k n̄an wōjke ko, ke iaar jubukwe ioon bukiiō.” Liin eaar dim ilo an kar jar n̄an Irooj. “Ilo iien eo em̧ōkaj iaar lo juon visōn,” liin eaar ba, “im kabun̄ ko roktak raar eļļaļo̧k juon ālkin eo juon jān n̄a, im juon ainikien eaar kūr eō, ba: ‘Men kein kar jutak n̄an bōk bun̄bun̄.’ Innām, m̧aanļo̧k wōt, imaron̄ in kar lo juon meram eļap, im juon ainikien jān lan̄ kwaļo̧k: ‘Inaaj kotak juon armej, eo inaaj lo̧udin̄din̄ n̄an bōke im kōjeraam̧m̧an.’” Jidik iien tokālik, Abigail eaar ron̄ kōn Bok in Mormon. Men̄e ejjan̄in kar wōr juon an kape, liin eaar kappukōt n̄an “jeļā m̧ool eo kōn bok in, kōn menin letok eo im kajoor eo an Jetōb Kwojarjar,” im liin “ilo iien eo em̧ōkaj tata ekar en̄jake jetōbin.” Āliktata ke liin eaar maron̄ riiti Bok in Mormon, liin eaar “pojak in bōke.” Liin im ļeo pāleen, Lyman, rekar peptaij ilo 1831 eo.
Thomas B. Marsh
Ke Thomas B. Marsh eaar juon rūm̧m̧an ded, eaar ekkatak kōn Baibōļ im kar kobaļo̧k ilo juon kabun̄ an Rikūrijin. Bōtaab eaar jab jubūruwōn, āliktata eaar bōjrak jān aolep kabun̄ ko. “Ekar wōr jidik ippa jetōb in kanaan,” eaar ba, “im kar jiron̄ [juon ritōl in kabun̄] iaar kōtmene bwe juon kabun̄ kāāl enaaj kar jutak, eo enaaj pād ie m̧ool eo an ekwojarjar.” Ejjab to ālkin iien in, Thomas ekar en̄jake jetōb n̄an em̧m̧akūt jān m̧weo im̧ōn ilo Boston, Massachusetts, im ilo̧k iturilikļo̧k. Ālkin joļo̧k jilu allōn̄ ko ilo iturilik in New York ilo an jab lo ta eo eaar kappukōte, eaar jino jibadōk m̧weo im̧ōn. Ilo iaļ eo ļo̧k, juon kōrā eaar kajjitōk ippān Thomas eļan̄n̄e ekar ron̄ kōn “Bok eo Jeje ilo Pileij Kooļ kar loe jen juon jodikdik ņaetan Josep Smith.” Kar reel kōn ļōmņak in, Thomas ekar m̧ōkaj in ilo̧k n̄an Palmyra n̄an ioon Martin Harris ilo jikin būriin eo, ilo an peij ko 16 jinointata an Bok in Mormon kar diwōjļo̧k jān kein būriin eo. Kar kōtļo̧k an Thomas bōk juon kape in peij ko 16, im kar būki ippānļo̧k n̄an m̧eim̧ōn n̄an lio pāleen, Elizabeth. “Liin ekar kanooj in m̧ōņōņō” ippān bok eo, eaar ba, “tōmak bwe ej jerbal in Anij.” Thomas im Elizabeth tokālik raar em̧m̧akūtļo̧k n̄an New York ippān ļo̧k ajri ro nejier im kar peptaij. (N̄an eļapļo̧k meļeļe ko kōn Thomas B. Marsh, lale Katak im Bujen Ko 31.)
Parley im Thankful Pratt
Āinwōt Thomas Marsh, Parley im Thankful Pratt rekar uwaake en̄jake ko rekajoor ilo jetōb n̄an ilo̧k jān jikin kallūb eo aer ejeraam̧m̧an ilo Ohio kōn kōttōpar eo n̄an kwaļo̧k gospel eo āinwōt aer kar meļeļe kake jān Baibōļ eo. Ke Parley eaar jiron̄ļo̧k būratōr eo an, “Jetōb eo an men kein ekar kanooj in kajoor an jerbal ilo ļōmņak eo aō jon̄an rum̧ij eo bwe iaar jab maron̄ in kakkije.” Ke raar tōkāākļo̧k iturear in New York, Parley eaar wōr juon an im̧we n̄an bar pād jidik ke eaar pād ilo eria eo. Thankful, raar kāālet, naaj kar wōnm̧aanļo̧k wōt ijelo̧kin ļein. “Ewōr juon aō jerbal n̄an kōm̧m̧ane ilo jikin in,” Parley eaar jiron̄ e, “im ta jerbal eo, ak ewi aitokan in naaj kōm̧m̧ane, ijjab jeļā; bōtaab inaaj iwōj n̄e ejerbal.” Ekar ilo ijo me Parley eaar kein kajuon in an ron̄ kōn Bok in Mormon. “Iaar en̄jake juon ikdeelel eoktak ilo bok eo,” eaar ba. Ekar kajjitōk kōn juon kape im kar riiti ilo aolepān bon̄ōn eo. Ke ej jibbon̄, ekar jeļā bok eo eaar m̧ool, kar kaorōke “eļapļo̧k jān aolep m̧weie ko an laļ in.” Ilowaan wōt jet raan ko Parley eaar peptaij. Innām eaar bar jepļaakļo̧k n̄an Thankful, eo eaar barāinwōt peptaij. (N̄an eļapļo̧k meļeļe kōn Parley P. Pratt, lale Katak im Bujen Ko 32.)
Parley P. Pratt ej Riiti Bok in Mormon, jān Jeffrey Hein
Sidney im Phebe Rigdon
Ilo iaļ eo an ļo̧k jān New York n̄an juon mijen ilo Missouri, Parley Pratt im rijerbal ro m̧ōttan raar bōjrak ilo Mentor, Ohio, ilo m̧weo im̧ōn Sidney im Phebe Rigdon—ro m̧ōttan Parley jān etto kar jeļā kajien jān raan ko an ilo Ohio. Sidney eaar juon rikwaļo̧k in Kabun̄, im Parley eaar ilo juon iien juon uwaan jarlepju eo an im kar watōke juon rūkaki ilo jetōb. Parley ekar kijooror in jiron̄ ro m̧ōttan kōn Bok in Mormon im Jepļaaktok eo an gospel eo an Jisōs Kraist. Sidney make eaar kappukōt jepļaaktok eo an Kabun̄ eo em̧ool me ekar lo kar kōmeļeļe kake ilo Kallim̧ur Ekāāl, men̄e jinoin ekarekar kōrraate Bok in Mormon. “Bōtaab inaaj riiti bok eo am̧,” eaar jiron̄ eo m̧ōttan Parley, “im naaj kajjieon̄ pukōte, jekdo̧o̧n enaaj kōn juon revelesōn jān Anij ak jaab.” Ālkin ruo wiik in ekkatak im jar, jim̧or e im Phebe raar tōmak bok eo ej m̧ool. Bōtaab Sidney eaar barāinwōt jeļā bwe kobaļo̧k ilo Kabun̄ in enaaj kar juon kaarmejete kileplep n̄an baam̧le eo an. Ealikkar enaaj kar luuji jerbal eo an āinwōt juon rikwaļo̧k, ippānļo̧k paotok ko an ilo jukjuk in pād eo. Ke e im Phebe rekar kōnono kōn menin emaron̄ in waļo̧k, Phebe eaar kwaļo̧k, “Iaar ļōmņak kōn men ko renaaj jako, im … ej aō ikdeelel n̄an kōm̧m̧ane ankilan Anij, men̄e mour ak men̄e mej.”