Eprōļ 7–13: “Kotak Ainikiōmi … n̄an Kwaļo̧k Gospel eo Aō”

Katak im Bujen Ko 30–36

Parley P. Pratt ekar juon uwaan Kabun̄ in ium̧win juon allōn̄ ke ekar kūr “ļo̧k ilo āne jem̧aden” n̄an kwaļo̧k gospel eo (Katak im Bujen Ko 32:2). Thomas B. Marsh ekar juon membōr ium̧win em̧ool jidik iien ke kar jiron̄ e, “Awa eo an mijen eo am emoottok” (Katak im Bujen Ko 31:3). Orson Pratt, Edward Partridge, im ebar lōn̄ ro jet āinwōt rej kab tōn kar peptaij ke kūr ko aer raar itok. Bōtaab ewōr juon katak ilo jon̄ak in n̄an kōj rainin: eļan̄n̄e kwojeļā jidik n̄an bōk gospel eo kar kōjepļaaktok kōn peptaij, ebwe am̧ jeļā n̄an kwaļo̧ke ippān ro jet. Aaet, aolep iien jej kōņaan kōļapļo̧k jeļāļo̧kjeņ eo ad kōn gospel eo, bōtaab Anij ejjan̄in kar itweļo̧k n̄an kūr ioon “ro rej jab rijeļāļo̧kjeņ” n̄an kwaļo̧k gospel eo (Katak im Bujen Ko 35:13). Ilo m̧ool, Ej kūr kōjwōj aolep, “Kōpeļļo̧ke lo̧n̄ūm n̄an kwaļo̧k gospel eo Aō” (Katak im Bujen Ko 30:5). Im jej kōm̧m̧ane men jab in ilo em̧m̧an tata ejjab jān māletlet eo ad make im en̄jake eo ak “jān kajoor in Jetōb [eo]” (Katak im Bujen ko 35:13).

Bar lale “The Faith and Fall of Thomas Marsh [Tōmak eo im Wōtļo̧k eo an Thomas Marsh],” “Ezra Thayer: From Skeptic to Believer [Ezra Thayer: Jān Ripere n̄an Rittōmak],” “Orson Pratt’s Call to Serve [Kūr eo n̄an Jerbal an Orson Pratt],” ilo Revelations in Context, 54–69.

Ļōmnak ko n̄an Ekkatak ilo M̧weeo im ilo Kabun̄ in

Katak im Bujen Ko 30–36

Ij kūr n̄an erom juon rikam̧ool an Jisōs Kraist.

Men̄e aaet ak jaab kwojjab bōk juon kūr jeļā kake āinwōt juon mijenede, kwomaron̄ erom juon rikam̧ool an Jisōs Kraist “ilo aolep iien otemjeļo̧k, im ilo aolep men otemjeļo̧k, im ilo aolep jikin ko” (Mosaia 18:9). Ilo ami ekkatak Katak im Bujen Ko 30–36, ļo̧o̧ke ta eo kom̧ij katak kōn iien ko ami rem̧m̧an n̄an kwaļo̧k gospel eo. Kwomaron̄ kōm̧m̧ane juon laajak in men ko Irooj ej kajjitōk ippam̧ ak bar juon kōn laajrak in kallim̧ur ko Irooj ej kōm̧m̧ani ilo am̧ kwaļo̧k gospel eo (n̄an waanjon̄ak, lale Katak im Bujen Ko 30:8; 31:3–5; 32:1, 5; 35:13–15, 24). Kwomaron̄ barāinwōt kappukōt pedped in katak ko me remaron̄ ̄jipan̄ eok kwaļo̧k gospel eo. Ta eo kwoj loe me ej im̧we eok n̄an “kwaļo̧k naan ko rem̧m̧an naan in lan̄lōn̄ eļap”? Katak im Bujen Ko 31:3).

Elder Gary E. Stevenson ekar katakin bwe kwaļo̧k gospel eo “emaron̄ tōprak ilo katak ko reļem waan, pidodo meļeļe kaki kar katakin kōj kajjojo jān ke jaar ajri: iakwe, kwaļo̧k, im karuwainene” (“Iakwe, Kwaļo̧k, Karuwainene,” Liaona, Māe 2022, 85). Ļōmņak in ekkatak ennaan eo an ilo am̧ ļōmņak kōn ro kwojeļā kajjier, ro m̧ōttam̧, im baam̧le eo. Ta ļōmņak ko rej itok n̄an eok kōn ekōjkan am̧ maron̄ kwaļo̧ke ippāer “ta eo [kwoj] iakwe kōn gospel eo an Jisōs Kraist”? Ilo wāween ta ko kwomaron̄ karuwaineneik er n̄an “itok im loe,” “itok im jerbal,” im “itok im uwaan”? Ilo ami al ak ron̄jake “I’ll Go Where You Want Me to Go” (Hymns, nō. 270) ak juon al eiookļo̧k, kwomaron̄ kajjitōk ippam̧ make, “Ta eo Irooj ekōņaan bwe in ba im bwe in maron̄ kwaļo̧k gospel eo An?”

Bar lale Marcos A. Aidukaitis, “Kotak Būruōm̧ im Lan̄lōn̄,” Liaona, Māe 2022, 40–43; Topics and Questions, “Inviting All to Receive the Gospel of Jesus Christ [Karuwaineneik Aolep n̄an Bok Gospel eo an Jisōs Kraist],” “Ministering as the Savior Does [Jerbal in Karejar āinwōt an Rilo̧mo̧o̧r eo kar Kōm̧m̧ane],” Gospel Library eo; “Inviting All to Come unto Christ: Sharing the Gospel” (pija in alooj eo), Gospel Library eo.

Inviting All to Come unto Christ: Sharing the Gospel

Katak im Bujen Ko 31:1–2, 5–6, 9, 13

Irooj emaron̄ jipan̄ eō kōn kadkad ko an baam̧le eo aō.

Baam̧le ko ilo 1830 ko raar kakkōt kōn elōn̄ ejja men ko wōt me baam̧le ko rej jelm̧ae rainin. Ta tōl eo im kallim̧ur ko Irooj ekar liļo̧k n̄an Thomas B. Marsh kōn baam̧le eo an ilo Katak im Bujen Ko 31? (lale eļap tata eoons 1–2, 5–6, 9, 13). Ekōjkan an naan ko An maron̄ jipan̄ eok ilo kadkad ko an baam̧le eo am̧?

N̄an elōn̄ļo̧k meļeļ kōn Thomas B. Marsh, lale Armej ro Rekwojarjar, 1:79–80, 119–20.

Katak im Bujen Ko 32–33; 35

Irooj ej kōpooj eō n̄an jerbal eo E ej kōņaan bwe in kōm̧m̧ane.

Ekkatak kōn mour ko an armej ro kar kōnono kaki er ilo Katak im Bujen Ko 32–33; 35 maron̄ jipan̄ eok kile ekōjkan an Irooj kōpooj eok n̄an jerbal eo An. N̄an waanjon̄ak, kom̧ maron̄ riit kōn jemjerā eo ikōtaan Parley P. Pratt im Sidney Rigdon ilo “Ainikien ko an Jepļaaktok eo: Rioktak ro Jinointata.” Ekōjkan an jemjerā in kōjeraam̧m̧an ajri ro nejin Anij? (lale Katak im Bujen Ko 35).

En̄in bar juon waanjon̄ak: Ezra Thayer eaar jeik bwe jet iien m̧okta jān an kar peptaij, eaar wōr juon an visōn eo me “juon em̧m̧aan eaar itok im bōktok n̄an eō juon peba lemlem im kar letok n̄an n̄a, im barāinwōt juon kein kōjan̄jan̄ robba im kar jiron̄ eō n̄an [kōjan̄] e. Iaar jiron̄ e bwe ijjan̄in kar [kōjan̄jan̄] robba ilo mour eo aō. Eaar ba kwomaron̄ [kōjan̄] e, kajjieon̄ e. … Eaar kōm̧m̧an ainikien ekanooj aiboojoj ijjan̄in kar ron̄” (“Revelation, October 1830–B, Revelation Book 1,” historical introduction, josephsmithpapers.org). Tokālik ke Josep Smith ej bōk revelesōn eo n̄an Ezra Thayer im Northrop Sweet, kiiō kar je āinwōt Katak im Bujen Ko 33, Ezra eaar kōmeļeļeik revelesōn eo āinwōt peba lemlem eo ilo visōn eo an. Ekōjkan an Irooj kar kōpooj Ezra n̄an mijen eo E ekar leļo̧k n̄an e ilo Katak im Bujen Ko 33:1–13?

Ta kein kam̧ool eo jej loe bwe pein Irooj eaar pād ilo mour ko an membōr ro an Kabun̄ in jinoin tata? Wōn eo Irooj ekar likūt ilo mour am̧ n̄an jipan̄ eok itok n̄an Kraist? Ekōjkan An kōpooj eok n̄an kōjeraam̧m̧an ro jet kōn tiljek eo am̧, iakwe, ak kūr?

Bar lale “A Mission to the Lamanites [Juon Mijen n̄an Rileman ro],” ilo Revelations in Context, 45–49.

Katak im Bujen Ko 33:12–18

Eļan̄n̄e ij kalōk mour eo aō ioon gospel eo an Rilo̧mo̧o̧r, Ijjamin naaj wōtlo̧k.

Katak im Bujen Ko 33 Ekar iookļo̧k Northrop Sweet im Ezra Thayer, ruo membōr kāāl an Kabun̄ in. Northrop kar ilo̧k jān Kabun̄ in ejjab to ālkin an revelesōn in kar leļo̧k. Ezra eaar jerbal tiljek ium̧win jet iien ko, bōtaab eaar barāinwōt āliktata wōtlo̧kļo̧k. Riit kake er ilo jekjōk in maron̄ im̧we eok n̄an ļōmņak in kajjitōk ewi jon̄an kijin̄en̄e in am̧ kalōk “ioon ejm̧aan [eo]” (eoon 13) an gospel eo. Ta m̧ool ko ilo eoon kein remaron̄ jipan̄ eok pād wōt ilo tiljek n̄an Rilo̧mo̧o̧r eo?

Bar lale Hilamōn 5:12.

N̄an ļōmņak ko reļļapļo̧k, lale ennaan eo an allōn̄ in an Liaona eo im N̄an Kōkajoorļo̧k Jodikdik ro māākjiin ko.

Ļōmņak ko n̄an Katakin Ajri ro

Katak im Bujen Ko 30:1–2

Ej aikuj ļapļo̧k aō kalimjōk wōt men ko an Anij jān wūj waan ko an laļ in.

• Emaron̄ in kaitoktok limo n̄an ajri ro nejūm̧ n̄an kajjieon̄ kōm̧m̧ane ruo jerbal ko ilo juon wōt iien, eo āinwōt ba naan ko n̄an juon al em̧m̧an tata ilo aer je āt ko etan aolep ro uwaan baam̧le eo ko aer. Etke epen n̄an kōm̧m̧ane ruo men ilo juon wōt iien? Innām kom̧ maron̄ riiti Katak im Bujen Ko 30:1–2 ippān doon. Ta jet iaan “men ko an laļ” me remaron̄ kōm̧ad kōj jān keememej Jisōs Kraist im gospel eo An? Ekōjkan ad maron̄ dāpij kalimjōkļo̧k wōt ilo E?

Katak im Bujen Ko 33:2–3, 6–10

Imaron̄ kwaļo̧k gospel eo an Jisōs Kraist.

• N̄an jipan̄ ajri ro nejūm̧ meļeļe Katak im Bujen Ko 33:8–10, kwomaron̄ karuwaineneik er n̄an kajjieon̄ ba juon naan kōn lo̧n̄ier an kilōk ilo am̧ ak bar juon ajri kajididiek ta eo rej ba. Riiti eoon 8–10 im kajjitōk ippāer n̄an kōpeļļo̧k lo̧n̄ier kajjojo iien naan eo “kōpeļļo̧k lo̧n̄iūmiro” ej ālij. Etke Jemedwōj Ilan̄ ekōņaan bwe jen kōpeļļo̧k lo̧n̄iid im kwaļo̧k gospel eo n̄an ro jet? Ta eo jemaron̄ jiron̄ baam̧ļe eo ad im ro m̧ōttad kōn Rilo̧mo̧o̧r eo ak gospel eo An? Kwomaron̄ al juon al kōn kwaļo̧k gospel eo, eo āinwōt, “We’ll Bring the World His Truth” (Children’s Songbook, 172–73).

• Ļōmņak in kwaļo̧k en̄jake ko ewōr ippam̧ reiookļo̧k pedped in katak ko ak kallim̧ur ko ilo Katak im Bujen Ko 30–34. Ta eo kwar katak ak en̄jake kōn Rilo̧mo̧o̧r eo am̧ im jerbal eo An ilo am̧ jerbal n̄an E?

Elōn̄ wāween ko n̄an kwaļo̧k gospel eo.

Kam̧ool kōn kōjeraam̧m̧an ko kar kallim̧ur kaki. N̄e kwoj kajjitōk ippān ajri ro n̄an mour kōn juon pedped in katak an gospel eo, kwomaron̄ kwaļo̧k kallim̧ur ko me Anij ekar kōm̧m̧ani n̄an armej ro n̄an mour kōn pedped in katak jab eo. N̄an waanjon̄ak, kwomaron̄ kwaļo̧k naan in kam̧oool eo kōn kōjeraam̧m̧an ko me Irooj ej litok n̄an kōj me rej kōpeļļo̧k lo̧n̄iid n̄an kwaļo̧k gospel eo.

Katak im Bujen Ko 33:12–13

Imaron̄ kalōk mour eo aō ioon gospel eo an Jisōs Kraist.

• Kwomaron̄ bōk ajri ro nejūm̧ n̄an nam̧ōj n̄an lo pedped eo an m̧weo im̧wer ak m̧weo im̧ōņ Kabun̄ in im kajjitōk ippāer n̄an kōmeļeļeik. Etke juon em̧ aikuji juon pedped epen, kijin̄en̄e? Riit ippāer Katak im Bujen Ko 33:12–13., im kwaļo̧k n̄an doon en̄jake ko am̧ etke Irooj ekōņaan bwe jen kalōk mour ko ad ioon gospel eo An? Etke “dekā” eo ej juon naan em̧m̧an n̄an kōmeļeļeik gospel eo? Ekōjkan ad maron̄ kalōk mour ko ko ad ioon dekā eo an gospel eo? Matu 7:24–29).

N̄an ļōmņak ko reļļapļo̧k, lale ennaan eo an allōn̄ in an Jera māākjin eo.

Ilo̧k n̄an Āne Jem̧aden, jān Robert T. Barrett