“Mantswe a Tsosoloso: Basokologi ba Pele” Tlayang, Ntshalang Morago—Ya Legae le Kereke: Dithuto le Dikgolagano 2025 (2025)

“Basokologi ba Pele,” Tlayang, Ntshalang Morago—Ya Legae le Kereke: 2025

Mantswe a Tsosoloso

Basokologi ba Pele

Le pele ga Kereke e rulaganngwa ka Moranang 1830, Morena o ne a bolela gore, “Tshimo e setse e le tshweu go robiwa” (Dithuto le Dikgolagano 4:4). Polelo ena e itshupile e le boammaaruri mo dikgweding tse di neng tsa latela, fa ba bantsi ba ba batlang boammaaruri ba ne ba gogiwa ke Mowa wa Modimo go bona Kereke e e tsosolositsweng ya ga Jeso Keresete.

Bontsi jwa basokologi ba pele e ne e le di dirisiwa mo go theyeng motheo wa Tsosoloso, mme dipolelo tsa bone tsa tshokologo di na le boleng mo go rona gompieno. Tumelo e ba e supileng ke yone tumelo eo e re e tlhokang gore re sokologele mo efangeleng ya ga Jeso Keresete.

Abigail Calkins Leonard

Fa Abigail Calkins Leonard a le mo dingwageng tse di bogareng ga masome a mararo, o ne a batla go itshwarelwa dibe tsa gagwe. Ka nako dingwe o ne a bala Baebele, mme batho go tswa mo dikerekeng tsa Sekeresete ba ne ba mo etela kwa lwapeng, mme o ne a tsiediwa ke gore ke eng se se dirang gore kereke e le nngwe e farologane mo go e nngwe. “Mo mosong mongwe,” o ne a re, “Ke ne ka tsaya Baebele ya me mme ka ya kwa sekgweng, fa ke khubama ka mangole a me.” O ne a rapela Morena ka tlhwaafalo. “Mme ka tshoganetso ponatshegelo ya feta fa pele ga matlho a me,” o ne a re, “mme ditlhopa tse di farologanyeng tsa feta gaufi le nna e nngwe morago ga e nngwe, mme lentswe la mpitsa, le re: ‘Tsena di agetswe papadi.’ Ke gone, go feta, ke ne ka bona lesedi le legolo, mme lentswe go tswa kwa godimo la goa: ‘Ke tlaa godisa batho, bao ke tlaa kgatlhegang go ba rua le go ba segofatsa.’” Ka bokhutswane moragonyana, Abigail a utlwalela ka ga Buka ya ga Momone. Le fa ntswa a ne a ise a nne le moriti wa yone, o ne a batla go “itse boammaaruri jwa buka e, ka neo le thata ya Mowa o o Boitshepo,” mme “ka ponyo ya leitlho a utlwa boleng teng jwa one.” Fa kwa pheletsong a kgona go bala Buka ya ga Momone. O ne a “iketleeleditse go e amogela.” Ene le monna wa gagwe, Lyman, ba ne ba kolobediwa ka 1831.

Thomas B. Marsh

Fa Thomas B. Marsh e ne e le lekawana, o ne a ithuta baebele mme a ikgolaganya le Kereke ya Bakeresete. Mme o ne a sa kgotsafale, kwa bofelong a tswa mo dikerekeng. “Ke ne ke na le selekanyo sa mowa wa perofeso,” o ne a re, “mme a bolelela [moeteledipele wa tumelo] gore ke ne ke solofetse gore kereke e ntsha e gole, e e tlaa nnang le boammaruri mo boitshepong jwa one. E seng lobaka morago ga se, Thomas o ne a nna le tlhotlheletso ya semowa gore a tloge mo legaeng la gagwe mo Boston, Massachusetts, mme a ye kwa bophirima. Fa a sena go nna kgwedi tse tharo mo bophirima jwa New York a sa bone se a neng a se batla, o ne a simolola go ya gae. Mo tseleng, mosadi o ne a botsa Thomas fa a ne a utlwile ka ga “Buka ya Gauta e e bonweng ke monana yo o bidiwang Joseph Smith.” A gapilwe ke kakanyo e, Thomas ka tshoganetso o ne a ya kwa Palmyra mme a kopana le Martin Harris kwa lebentleng la kgatiso, fela jaaka ditsebe tsa ntlha tse di 16 tsa Buka ya ga Momone di ne di tswa mo kgatisong. Thomas o ne a letlelelwa go tsaya moriti wa ditsebe tseo tse 16, mme a di tlisa gae kwa mosading wa gagwe, Elizabeth. “O ne a itumeletse thata” buka, o ne a gakologelwa, “a dumela gore ke tiro ya Modimo.” Thomas le Elizabeth morago ba fudugela kwa New York le bana ba bone mme ba ne ba kolobediwa. (Go itse go feta fa ka Thomas B. Marsh, bona Dithuto le Dikgolagano 31.)

Parley le Thankful Pratt

Jaaka Thomas Marsh, Parley and Thankful Pratt ba tsibogela mokwelekwele wa semowa go tloga mo tshimong ya bone e e mo Ohio ka maikaelelo a go rera efangele jaaka ba e tlhaloganya go tswa mo Baebele. Jaaka Parley a ne a bolelela morwaraagwe, “ Mowa wa dilo tse o ne o dirile ka thata jalo mo tlhaloganyong ya me mo bosheng mo ke neng ke sa kake ka ikhutsa.” Fa ba fitlha mo botlhaba jwa New York, Parley o ne a nna le tlhotlheletso go nna lobakanyana mo kgaolong. Ka letlhogonolo, ba dira tswetso, gore ba tlaa tswelela pele kwa ntle ga gagwe. “Ke na le tiro e ke tshwanetseng go e dira mo kgaolong e ya lefatshe,”Parley a mmolelela, “le gore ke eng, kgotsa, gore e tlaa tsaya lobaka lo lo kae go e dira, ga ke itse; mme ke tla tlaa fa e dirwa.” Ke teng koo kwa Parley lantlha a utlwileng ka Buka ya ga Momone. “Ke ne ka nna le kgatlhego e e makatsang mo bukeng,” o ne a re. O ne a kopa moriti mme a bala bosigo jotlhe. Ka phakela, o ne a itse gore buka e boammaaruri, a e tsaya e le botlhokwa “go feta dikhumo tsotlhe tsa lefatshe.” Mo malatsing a se kae Parley o ne a kolobediwa. Ke gone a boela kwa go Thankful, yo le ene a neng a kolobeditswe. (Ka kitso tlaleletso ka ga Parley P. Pratt (bona Dithuto le Dikgolagano 32.))

Parley Pratt a bala — Parley P. Pratt o bala Buka ya ga Momone, ka Jeffrey Hein

Sidney and Phebe Rigdon

Mo tseleng ya gagwe go tswa kwa New York go ya thomong kwa Missouri, Parley Pratt le badiri ka ene ba ema mo Mentor, Ohio, kwa lwapeng la ga Sidney le Phebe Rigdon—ditsala tsa ga Parley tsa bogologolo tse a di itsitseng go tswa malatsi a gagwe mo Ohio. Sidney e ne le modiredi wa Mokeresete mme Parley o kile a nna leloko la phuthego ya gagwe mme o ne a mo tsaya jaaka morutuntshi wa gagwe wa semowa. Parley ka tlhwaafalo o ne a bolelela ditsala tsa gagwe ka ga Buka ya ga Momone le Tsosoloso ya efangele ya ga Jeso Keresete. Sidney ka boene o ne a ntse a batla tsosoloso ya Kereke ya boammaaruri e a e boneng e tlhalositswe mo Kgolaganong e Ntsha, le fa ntswa a ne a belaela ka ga Buka ya ga Momone kwa ntlheng. “Mme ke tlaa bala buka ya gago,” o ne a bolelela tsala ya gagwe Parley, “mme ke tlaa leka go rurifatsa, gore a ke tshenolo go tswa kwa Modimong kgotsa nnyaa.” Morago ga beke tse pedi ya go ithutuntsho le thapelo, botlhe ene le Phebe ba ne ba dumela gore buka e boammaaruri. Mme Sidney le gone o ne a itse gore go ikgolaganya le Kereke e tlaa bo e le setlhabelo se segolo sa lelwapa la gagwe. Go ne go papametse gore o tlaa latlhegelwa ke tiro ya gagwe e le modiredi, ga mmogo le boemo jwa gagwe mo morafeng. Jaaka ene le Phebe ba ne ba buisanya ka kgonagalo e, Phebe o ne a bolela, “ke badile ditshenyegelo, ebile … ke keletso ya me go dira go rata ga Modimo, kgorogo ya botshelo kgotsa kgorogo loso.”