“Mantswe a Tsosoloso: Go Phuthegela kwa Ohio,” Tlayang, Ntshalang Morago—Ya Legae le Kereke: Dithuto le Dikgolagano 2025 (2025)
“Phuthegela kwa Ohio,” Tlayang, Ntshalang Morago—Ya Legae le Kereke: 2025
Mantswe a Tsosoloso
Phuthegela kwa Ohio
Kirtland Village, ka Al Rounds
Phebe Carter
Gareng ga Baitshepi ba ba phuthegetseng kwa Ohio ka bo 1830 e ne e le Phebe Carter. O ne a nna leloko la Kereke kwa bokone botlhaba jwa United States a le gare ga masome a mabedi a dingwaga, le ntswa batsadi ese maloko. Kgabagare o ne a kwala ka tshwetso ya gagwe ya go fudugela kwa Ohio go ikopanya le Baitshepi:
“Ditsala tsa me di ne tsa gakgamalela mosepele wa me, fela jaaka nna, fela sengwe mo go nna sa nkgothatsa go tswelela. Go lela ga ga mme ka go tsamaya ga me ke ne ke sa kgone go go itshokela, fa ene e se ka ntlha ya mowa mo go nna ke ka bo ke reteletswe. Mmê o ne a re go ne go le botoka go mpona ke fitlhilwe go na le go tsamaya ke le nosi mo lefatsheng le le senang pelo.
“‘[Phebe],’ o ne a re, mo go gwetlhang, ‘a o tlaa boela kwa go nna fa o bona Bomomone e se boammaaruri?’
“Ka araba, ‘ee, mmê, ke tla bowa.’ … Karabo ya me ya golola matshwenyego a gagwe, mme gone ga re hutsafatsa rotlhe go kgaogana. Fa nako ya go tsamaya ga me e goroga, ke ne ke sa itshephe go ba sadisa sentle; jalo ka kwalela mongwe le mongwe go ba sadisa sentle, mme ka a tlogela mo tafoleng, mme ka ya kwa tlase ka tlolela mo kareng. Jaana ka tlogela legae la me le le rategang lwa bonana jwa me go kopanya botshelo jwa me le baitshepi ba Modimo.”
Mo melaetseng eo ya go sadisa sentle, Phebe a kwala:
“Batsadi ba ba Rategang—Jaanong ke tloga ke tlogela borulelo jwa batsadi ba me ka sebakanyana … ga ke itse gore lebaka le le kae—mme e seng ka maikutlo a go tlhoka go lebogela bopelontle jo ke bo amogetseng go tswa bonyenyaneng jwa me go fitlha gompieno—mme Motlamedi go lebega a rulaganya ka tsela e sele go na le jaaka gone gontse. A re neele tsotlhe tse mo diatleng tsa Motlamedi le go lebogela gore re letleletswe go nna mmogo sebaka se se kana ka fa tlase ga maemo a a siameng jaaka go nnile, re dumela gore dilo tsotlhe di diragalela molemo fa re rata Modimo godimodimo. A re lemogeng gore re ka rapela Modimo a le mongwe yo o tlaa utlwang dithapelo tsa tlhwaafalo tsa dibopiwa tsotlhe tsa gagwe le go re neela mo gore siametseng. …
“Mme Ke dumela mo ke go rata ga Modimo mo go nna go ya bophirimatsatsi mme Ke ne ke tlhatswegile pelo gore e ne e le ka nako e telele. Jaanong tsela e bulegile … ; ke dumela gore ke mowa wa Morena o o se dirileng yo o lekanetseng dilo tsotlhe. O se tshwenyege ka ngwana wa gago; Morena o tlaa nkgomotsa. Ke dumela gore Morena o tlaa ntlhokomela le go neela seo se se molemo. … Ke a tsamaya gonne Mong wa me o a bitsa—o tlhamaladitse tiro ya me.”