“Mmaeɛ bio no Nne: Kane Adwensakyerafoɔ” Bra, Di M’akyi—De ma Efie ne Asɔre: Nkyerɛkyerɛ ne Apam 2025 (2025)
“Kane Adwensakyerafoɔ,” Bra, Di M’akyi—De ma Efie ne Asɔre: 2025
Mmaeɛ bio no Nne
Kane Adwensakyerafoɔ
Mpo ansa na wɔrebɛhyehyɛ Asɔre no wɔ Oforisuo 1830 no, Awurade paee mu kaa sɛ, “Afuo no ahoa dada sɛ wɔtwa;” (NKYerɛkyerɛ ne Apam 4:4). Saa nsɛm yi baa mu nokorɛ mu wɔ abosome a ɛtoaa so no, berɛ a bebree no a wɔrehwehwɛ nokorɛ no Onyankopɔn honhom dii wɔn anim maa wɔhunuu Yesu Kristo asɔre a wɔasan de aba no.
Saa kane adwenakyerafoɔ yi mu dodoɔ no dii akotene wɔ Mmaeɛ bio no fapemtoɔ mu, na wɔn adwensakyera abasɛm no som bo ma yɛn ɛnnɛ. Gyidie a wɔdaa no adie no yɛ gyidie korɔ no a yɛhia de sakyera kɔ Yesu Kristo asɛmpa no mu.
Abigail Calkins Leonard
Berɛ a Abigail Calkins Leonard wɔ ne mfeɛ aduasa mu no, ɔpɛɛ sɛ ɔnya ne bɔne ho bɔnefakyɛ. Na ɔtaa kenkan Twerɛ Kronkron no, na nkorɔfoɔ a wɔfiri Kristo nsɔre mu kɔsraa ne fie, nanso n’adwene mu yɛɛ no keserenee ɛfa deɛ ɛma asɔre baako da nso firi ɔfoforɔ ho. “Anɔpa bi,” ɔkaeɛ, “Mefaa me Twerɛ Kronkron na mewuraa nnua no mu, na mebuu nkotodwe.” Ɔbɔɔ mpaeɛ dendeeden kyerɛɛ Awurade. “Ntɛm ara anisoadehunu bi faa m’ani so,” ɔkaeɛ, “na akuo no twaa me ho mmaako mmaako, na ɛnne bi frɛɛ me a ɛreka sɛ: ‘Wɔyɛɛ yeinom sɛ wɔrepɛ mfasoɔ.’ Afei, akyire yi no, metumi hunuu hann kɛseɛ bi, na ɛnne bi firi soro teaa mu: ‘Mɛpagya nkorɔfoɔ bi, m’ani bɛku wɔn ho na wɔbɛyɛ medea na mahyira wɔn.’” Berɛ tiawa bi akyire no, Abigail tee Mormon Nwoma no nka. Ɛwom sɛ na ɔnnyaa nwoma no bi deɛ, nanso ɔhwɛɛ sɛ “ɔbɛhunu nokorɛ a ɛwɔ nwoma yi ho ɛnam Sunsum Kronkron no tumi akyɛdeɛ so,” na “ntɛm ara ɔhunuu bi.” Berɛ a awieeɛ no ɔtumi kenkann Mormon Nwoma no, ɔyɛɛ “krado sɛ ɔbɛgye bi.” Ɔne ne kunu, Lyman, bɔɔ asu wɔ 1831.
Thomas B. Marsh
Berɛ a na Thomas B. Marsh yɛ ɔbabunu no, ɔsuaa Twerɛ Kronkron no ɛna ɔdɔmm Kristo asɔre bi. Nanso ansɔ n’ani, awieeɛ no ɔtwee ne ho firii nsɔre nyinaa ho. “Na menyaa nkɔmhyɛ honhom no kakra,” ɔkaeɛ, “na ɔka kyerɛɛ [ɛsom kannifoɔ bi] sɛ mehwɛɛ kwan sɛ asɔre foforɔ bi bɛsɔre, a ɛbɛwɔ nokorɛ no wɔ ne teneneeyɛ mu.” Yei akyi ankyɛ koraa, Thomas nyaa honhom mu nkanyan sɛ ɔmfiri ne fie wɔ Boston, Massachusetts, na ɔntu kwan nkɔ atɔeɛ. Abosome mmiɛnsa akyi a wanhunu deɛ na ɔrehwehwɛ wɔ New York atɔeɛ fam no, ɔhyɛɛ aseɛ sɛ ɔrekɔ fie. Wɔ ɔkwan no so, ɔbaa bi bisaa Thomas sɛ wate “Sika kɔɔ Nwoma no a ɔbabunu bi a wɔfrɛ no Joseph Smith anya no nka a.” Saa nsusuiɛ yi faa no nnɔmmum, ntɛm ara Thomas tuu kwan kɔɔ Palmyra na ɔhyiaa Martin Harris wɔ nwoma tintim adwuma mu, berɛ a na Mormon Nwoma nkrataafa 16 refiri hɔ aba. Wɔmaa thomas kwan maa ɔde saa nkrataafa 16 no baa fie de maa ne yere, Elizabeth. “N’ani gyee yie” wɔ nwoma no ho, ɔkaeeɛ, “gye dii sɛ ɛyɛ Onyame adwuma.” Akyire yi Thomas ne Elizabeth ne wɔn mma tu kɔɔ New York na wɔbɔɔ wɔn asu. (Sɛ wopɛ nsɛm bebree afa Thomas B. Marsh ho a, hwɛ Nkyerɛkyerɛ ne Apam 31.)
Parley ne Thankful Pratt
Te sɛ Thomas Marsh, Parley ne Thankful Pratt tiee honhom nkanyan sɛ wɔnnya wɔn afuo a na ayɛ prɔprɔm wɔ Ohio hɔ na wɔnyɛ wɔn adwene sɛ wɔbɛka nsɛmpa no sɛdeɛ wɔtee aseɛ firii Twerɛ Kronkron no mu. Sɛdeɛ Parley ka kyerɛɛ ne nua no, “saa nneɛma yi honhom afa m’adwene tumi so nnansa yi a mannya ahotɔ.” Berɛ a wɔduruu New York apueɛ no, Parley nyaa nkanyan sɛ ɔntena hɔ kakra. Wɔsii gyinaeɛ sɛ Thankful bɛtoa so, a ɔnka ho. “Mewɔ adwuma yɛ wɔ saa ɔman yi mantam mu,” Parley ka kyerɛɛ no, “na sɛdeɛ ɛteɛ, anaasɛ mmerɛ tenten a ɛbɛdie deɛ, mennin; nanso mɛba berɛ a mawie no.” Ɛhɔ na Parley dii kan tee Mormon Nwoma no ho asɛm. “Menyaa anigyeɛ sononko bi wɔ nwoma no ho,” ɔkaeɛ. Ɔgyee baako na ɔkan no anadwo no nyinaa. Adeɛ kyeeɛ no, na ɔnim sɛ nwoma no yɛ nokorɛ, de obuo maa no “sene wiase ahonyadeɛ nyinaa .” Parley bɔɔ asu wɔ nna kakra bi ntam. Afei ɔsan kɔɔ Thankful hɔ, a ɔno nso bɔɔ asu. (Sɛ wopɛ nsɛm bebree afa Parley P. Pratt ho a, hwɛ Nkyerɛkyerɛ ne Apam 32.)
Parley P. Pratt Kenkan Mormon Nwoma no, ɛfiri Jeffrey Hein hɔ
Sidney ne Phebe Rigdon
Wɔ kwan so firi New York rekɔ asɛmpatrɛ adwuma mu wɔ Missouri no, Parley Pratt ne ne mfɛfoɔ apaafoɔ gyinaa wɔ Mentor, Ohio, wɔ Sidney ne Phebe Rigdon fie—nnamfoɔ dada a na Parley nim wɔn firi ne Ohio nna mu. Na Sidney yɛ Kristoni somfoɔ, a na Parley yɛ n’asɔreba berɛ bi a atwam na ɔhunuu no sɛ ne honhom mu fotufoɔ. Parley de ahopereɛ kaa Mormon Nwoma no ne Yesu Kristo asɛmpa no Mmaeɛ bio ho asɛm kyerɛɛ ne nnamfonom. Na Sidney ankasa rehwehwɛ nokorɛ Asɔre no mmaeɛ bio a wɔaka ho asɛm wɔ Apam Foforɔ mu no, mmom na ɔgye Mormon Nwoma no ho akyinnyeɛ kane no. “Nanso mɛkenkan wo nwoma no,” ɔka kyerɛɛ n’adamfo Parley, “na mɛhwɛ ahunu sɛ ɛyɛ yikyerɛ a ɛfiri Onyankopɔn anaasɛ ɛmfiri no.” Nnawɔtwe mmienu adesua ne mpaebɔ akyi, ɔne Phebe nyinaa gye too mu sɛ nwoma no yɛ nokorɛ. Na Sidney nso nim sɛ ɔredɔm Asɔre no bɛyɛ aforebɔ kɛseɛ ama n’abusua. Na ɛda adi pefee sɛ ɔbɛhwere n’adwuma sɛ ɔsomfoɔ ne n’asetena mu dibrɛ wɔ kuro no mu. Berɛ a ɔne Phebe pɛnsɛmpɛnsɛm yei a ɛbɛtumi asie ho no, Phebe paee mu kaa sɛ, “Mawe aboɔ de nsuo agu so, na ɛyɛ me pɛ sɛ mɛyɛ deɛ Onyankopɔn pɛ, sɛ nkwa mu anaasɛ owuo mu.”