Oforisuo 7– 13:“Momma Mo Nne So Mpaeɛ mu nka M’Asɛmpa”

Nkyerɛkyerɛ ne Apam 30–36

Na Parley P. Pratt ayɛ Asɔre no ba bɛyɛ bosome baako berɛ a wɔfrɛɛ no “kɔɔ ɛserɛ no so ” sɛ ɔnkɔka asɛmpa no (Nkyerɛkyerɛ ne Apam 32:2). Na Thomas B. Marsh ayɛ asɔreba mmerɛ a ɛsua mpo sene saa berɛ a wɔka kyerɛɛ no sɛ, “W’asɛmpatrɛ adwuma dɔn no aba” (Nkyerɛkyerɛ ne Apam 31:3). Orson Pratt, Edward Partridge, ne afoforɔ bebree na na wɔn asubɔ nkyɛree berɛ a wɔn asɛmpatrɛ adwuma frɛ baeɛ. Ebia adesua bi wɔ saa nhyehyɛeɛ yi mu ma yɛn ɛnnɛ: sɛ wonim dodo sɛ wonam asubɔ so bɛgye asɛmpa a wɔasan de aba no ato mu a, wonim dodo a wo ne afoforɔ bɛkyɛ. Ɛwom, berɛ biara yɛpɛ sɛ yɛn nimdeɛ wɔ asɛmpa no mu nyini, nanso Onyankopɔn ntwentwɛnn ne nan ase sɛ ɔbɛfrɛ deɛ “ɔnsuaa adeɛ” sɛ ɔbɛka N’asɛmpa (Nkyerɛkyerɛ ne Apam 35:13). Nokwasɛm, Ɔto nsa frɛ yɛn nyina, “Bue w’ano na pae mu ka m’asɛmpa no” (Nkyerɛkyerɛ ne Apam 30:5). Na yɛyɛ saa yie a ɛnyɛ yɛn ara nyansa ne suahunu na mmom “ɛnam Honhom [no] tumi so” (Nkyerɛkyerɛ ne Apam 35:13).

San hwɛ “Thomas Marsh Gyidie ne Ahweaseɛ,” “Ezra Thayer: From Skeptic to Believer,” “Orson Pratt’s Call to Serve,” wɔ Revelations in Context, 54–69.

Nsusuiɛ ma Efie ne Asɔre Adesua

Nkyerɛkyerɛ ne Apam 30–36

Wɔafrɛ me sɛ memmɛyɛ Yesu Kristo danseni.

Sɛ wowɔ ɔfrɛ sɛ asɛmpatrɛni wɔ krataa so anaasɛ wonni bie no, wobɛtumi ayɛ Yesu Kristo danseni “berɛ nyinaa, ne nneɛma nyiinaa mu, wɔ mmea nyinaa” (Mosiah 18:9). Berɛ a wokenkan Nkyerɛkyerɛ ne Apam 30–36no, twerɛ deɛ wosua fa akwanya a wowɔ sɛ wode bɛkyɛ asɛmpa no. Twerɛ nneɛma ahodoɔ a Awurade bisa firi wo hɔ ne nneɛma a Awurade hyɛ ho bɔ berɛ a wokyɛ asɛmpa no (nhwɛsoɔ, hwɛ Nkyerɛkyerɛ ne Apam 30:8; 31:3–5; 32:1, 5; 35:13–15, 24). Wobɛtumi nso ahwehwɛ nnyinasosɛm a ɛbɛtumi aboa ama woakyɛ asɛmpa no. Deɛn na wohunu a ɛkanyan wo ma wo “pae mu ka anigyeɛ kɛseɛ amannebɔ no”? (Nkyerɛkyerɛ ne Apam 31:3).

Elder Gary E. Stevenson kyerɛɛ sɛ asɛmpa no dawurubɔ “bɛtumi aba mu ɛnam nnyinasonsɛm ntiawa a wɔn nteaseɛ nyɛ den a wɔkyerɛɛ yɛn mu biara firi mmɔfra ase: dɔ, kyɛ, na to nsa frɛ” (“Ɔdɔ, Kyɛ, To nsa frɛ,” Liahona, Kɔtɔnima 2022, 85). Dwene ho sua ne nkrasɛm berɛ a woredwene wɔn a wonim wɔn, wo nnamfonom, ne w’abusua ho. Deɛn nsusuiɛ ahodoɔ na wowɔ fa sɛdeɛ wobɛtumi ne wɔn akyɛ “deɛ [wo] dɔ fa Yesu Kristo asɛmpa no ho”? Wɔ akwan bɛn so na wobɛtumi ato nsa frɛ wɔn sɛ “bra na bɛhwɛ,” “bra na bɛsom,” ne “bra na bɛka ho”? Berɛ a woto anaasɛ wotie “Mɛkɔ Baabi A Wopɛ Sɛ Mekɔ” (Nnwom, no. 270) anaasɛ dwom a ɛne no wɔ twaka no, wobɛtumi abisa wo ho, “Deɛn na Awurade pɛ sɛ meka na meyɛ sɛdeɛ mɛtumi akyɛ N’asɛmpa?”

San hwɛ Marcos A. Aidukaitis, “Ma W’akoma So na di Ahurusie,” Liahona, Kɔtɔnima 2022, 40–43; Tinsɛm ne Nsɛmmisa, “Reto nsa afrɛ Obiara sɛ Wɔnnye Yesu Kristo Asɛmpa no,” “Resom sɛdeɛ Agyenkwa no Som,” Asɛmpa Akoraeɛ; “Reto nsa afrɛ Obiara sɛ Wɔmmra Kristo nkyɛnt: Rekyɛ Asɛmpa nol” (sini), Asɛmpa Akoraeɛ.

Inviting All to Come unto Christ: Sharing the Gospel

When Junior, a young man in a small Florida branch, decided he didn’t want to be alone in his belief in Christ, he invited a friend. One friend joined, then another, and another . . .

Nkyerɛkyerɛ ne Apam 31:1–2, 5–6, 9, 13

Awurade bɛtumi aboa me wɔ m’abusua ayɔnkofa mu.

Mmusuafoɔ a na wɔwɔ hɔ 1830 mu peree nsɛm bebree mu te sɛ deɛ ɛnnɛ mmusua hunu yi. Deɛn akwankyerɛ ne bɔhyɛ na Awurade de maa Thomas B. Marsh fa n’abusua ho wɔ Nkyerɛkyerɛ ne Apam 31? (hwɛ titire nkyekyɛmu 1–2, 5–6, 9, 13). Sɛn na Ne nsɛm bɛtumi aboa wo wɔ w’abusua ayɔnkofa mu?

Sɛ wopɛ nsɛm bebree afa Thomas B. Marsh ho a, hwɛ Ahotefoɔ, 1:79–80, 119–20.

Nkyerɛkyerɛ ne Apam 32–33; 35

Awurade siesie me ma adwuma a Ɔpɛ sɛ meyɛ.

Woresua nkorɔfoɔ a wɔkaa wɔn ho asɛm wɔ Nkyerɛkyerɛ ne Apam 32–33; 35 bɛtumi aboa wo ama woahunu sɛdeɛ Awurade resiesie wo ama N’adwuma. Nhwɛsoɔ, wobɛtumi akenkan afa ayɔnkofa a ɛda Parley P. Pratt ne Sidney Rigdon ntam wɔ “Mmaeɛ bio no Nne: Kane Adwensakyerafoɔ.” Sɛn na saa ayɔnkofa yi hyira Onyankopɔn mma? (hwɛ Nkyerɛkyerɛ ne Apam 35).

Nhwɛsoɔ foforɔ nie: Ezra Thayer twerɛɛ sɛ berɛ bi ansa na ɔrebɛbɔ asu no, ɔnyaa anisoadehunu a ɛmu no “ɔbarima bi baae na ɔde krataa bi a wɔabobɔ brɛɛ no, ne totorobɛnto nso na ɔka kyerɛɛ no sɛ [ɔmmɔ]. Meka kyerɛɛ no sɛ me [mmɔɔ] bi da wɔ m’abrabɔ mu. Ɔkaa sɛ wobɛtumi [abɔ], sɔ hwɛ Ɛmaa nnyegyeɛ kamakama bi a mentee bi da” (“Adiyisɛm, Ahinime 1830–B, Adiyisɛm Nwoma 1,” abakɔsɛm nnianim, josephsmithpapers.org). Berɛ a Joseph Smith nyaa adiyisɛm maa Ezra Thayer ne Northrop Sweet, a seesei wɔatwerɛ ato hɔ sɛ Nkyerɛkyerɛ ne Apam 33no, Ezra kyerɛɛ adiyisɛm no mu sɛ krataa a wɔabobɔ no wɔ n’anisoadehunu mu. Sɛn na na Awurade resiesie Ezra ama adwuma a Ɔde maa no wɔ Nkyerɛkyerɛ ne Apam 33:1–13?

Deɛn adanseɛ na wohunu sɛ na Awurade nsa wɔ saa kane Asɔremma yi so? Hwan na Awurade de no ato w’abrabɔ mu sɛ ɔmmoa ma wommra Kristo hɔ? Sɛn na Ɔresiesie wo ma woahyira afoforɔ ɛnam wo nokorɛdie, ɔdɔ, anaasɛ wo frɛ so?

San hwɛ “A Mission to the Lamanites,” wɔ Revelations in Context, 45–49.

Nkyerɛkyerɛ ne Apam 33:12–18

Sɛ mesi m’abrabɔ wɔ Agyenkwa no asɛmpa so a, merenhwe ase.

Nkyerɛkyerɛ ne Apam 33 kɔ maa Northrop Sweet ne Ezra Thayer, Asɔre no mma afoforɔ baanu. Wɔde saa adiyisɛm yi maeɛ ankyɛre koraa na Northdrop gyaee Asɔre no. Ezra somm nokorɛ mu wɔ berɛ tiawa bi mu, nanso awieeɛ no ɔhwee ase. Worekenkan fa wɔn ho wɔ saa ɔfa yi mu bɛtumi akae wo ma woadwene sɛdeɛ woatintim “wɔ ɔbotan [no] so” (nkyekyɛmu 13) wɔ asɛmpa no mu. Deɛn nokorɛ na ɛwɔ saa nkyekyɛmu yeinom mu a ɛbɛtumi aboa ma woadi nokorɛ ama Agyenkwa no?

San hwɛ Helaman 5:12

Worepɛ nsusuiɛ bebree a, hwɛ bosome yi Liahona ne De ma Mmabunu Ahoɔden nsɛmma nwoma mu.

Nsusi maNkwadaa Adekyerɛ

Nkyerɛkyerɛ ne Apam 30:1-2

Ɛwɔ sɛ mede m’ani si Onyankopɔn nneɛma so sene wiase nneɛma.

• Ɛbɛyɛ anigyeɛ ama wo nkwadaa sɛ wɔbɔ mmɔden yɛ nnwuma mmienu prɛkopɛ, te sɛ wɔrekenkan dwom a wɔn ani gye ho mu nsɛm na wɔretwerɛ wɔn abusuafoɔ din ato hɔ. Adɛn nti na ɛyɛ den sɛ yɛyɛ nneɛma mmienu prɛko? Afei mobɛtumi akenkan Nkyerɛkyerɛ ne Apam 30:1–2 abom. Deɛn ne “wiase nneɛma no bi” a ɛbɛtumi atwe yɛn adwene afiri so sɛ yɛbɛkae Yesu Kristo ne N’asɛmpa no? Sɛn na yɛbɛsi de yɛn ani asi Ne so?

Nkyerɛkyerɛ ne Apam 33:2–3, 6–10

Mɛtumi akyɛ Yesu Kristo asɛmpa no.”

• Sɛdeɛ wobɛboa wo nkwadaa ma wɔate Nkyerɛkyerɛ ne Apam 33:8–10ase no, wobɛtumi ama wɔaka kasasin bi a wɔmmue wɔn ano na wo anaasɛ wo nkwadaa no asusu deɛ wɔreka no. Kenkan nkyekyɛmu 8–10 na ma wɔmmue wɔn ano berɛ biara a wɔti kasasin “mommue mo ano” mu. Adɛn nti na Ɔsoro Agya pɛ sɛ yɛbue yɛn ano na yɛne afoforɔ kyɛ asɛmpa no? Deɛ na yɛbɛtumi aka akyerɛ yɛn abusua ne nnamfoɔ fa Agyenkwa no anaasɛ N’asɛmpa ho? Mobɛtumi nso ato dwom fa asɛmpa no kyɛ ho, te sɛ “Yɛde Ne Nokorɛ bɛbrɛ Ewiase” (Nkwadaa Nnwomnwoma, 172–73).

• Dwene ho kyɛ suahunu a woanya a ɛne nnyinasonsɛm anaasɛ bɔhyɛ no wɔ twaka wɔ Nkyerɛkyerɛ ne Apam 30–34. Deɛn na wosuaeɛ anaasɛ wotee nka faa Agyenkwa no ne N’adwuma ho berɛ a wosomm No?

Akwan bebree wɔ hɔ a wɔfa so kyɛ asɛmpa no.

Di nhyira a wɔahyɛ ho bɔ no ho adanseɛ. Sɛ woka sɛ nkwadaa nni asɛmpa no nnyinasosɛm bi so a, wobɛtumi akyɛ bɔhyɛ a Onyankopɔn de ahyɛ nkorɔfoɔ a wɔdi saa nnyinasosɛm no so. Nhwɛsoɔ, wobɛtumi adi adanseɛ wɔ nhyira a Ɔde ma yɛn berɛ a yɛbue yɛn ano na yɛkyɛ asɛmpa no.

Nkyerɛkyerɛ ne Apam 33:12–13

Mɛtumi akyekyere m’abrabɔ wɔ Yesu Kristo asɛmpa no so.

• Wobɛtumi de wo nkwadaa no akɔ abɔnten akɔhwɛ wɔn fie anaasɛ Asɔre fapem na woama wɔn akyerɛkyerɛ sɛdeɛ ɛteɛ. Adɛn nti na ɛdan hia fapem a ɛyɛ den? Wo ne wɔn nkenkan Nkyerɛkyerɛ ne Apam 33:12–13, na mo ne mo ho nkyɛ mo atenka fa deɛ nti a Awurade pɛ sɛ yɛkyekyere yɛn abrabɔ wɔ N’asɛmpa no so. Adɛn nti na “ɔbotan” yɛ asɛmfua papa sɛ wɔde kyerɛkyerɛ asɛmpa no? Sɛn na yɛbɛsi akyekyere yɛn abrabɔ wɔ asɛmpa no botan so? (san hwɛ Mateo 7:24–29).

Wopɛ nsusuiɛ bebree a, hwɛ bosome yi Adamfoɔ nsɛmma nwoma mu.

Monkɔ Ɛserɛ no so, ɛfiri Robert T. Barrett hɔ