Oforisuo 28–Kɔtɔnima 4: “Me Mmara a Mede Bɛbu M’Asɔre”

Nkyerɛkyerɛ ne Apam 41–44

Asɔre no nyinii ntɛmntɛm wɔ 1830 ne 1831 mu, titire ne asɔremma afoforɔ a wɔbaa mu wɔ Kirtland, Ohio. Saa nyini yi yɛɛ ahosɛpɛ ne nkuranhyɛ maa Ahotefoɔ no, nanso ɛde ɔhaw bi baeɛ. Sɛn na wobɛka agyidifoɔ a wɔretrɛ ntɛmntɛm abom? Titire, deɛn na wobɛyɛ berɛ a wɔde nkyerɛkyerɛ ne nneyɛɛ firi wɔn gyidie dada mu reba? Nhwɛsoɔ, berɛ a Joseph Smith duruu Kirtland wɔ Ogyefuo ahyɛaseɛ wɔ 1831 mu no, ɔhunuu asɔremma afoforɔ a wɔretu anammɔn akyɛ agyapadeɛ korɔ de asua Apam Foforɔ mu Akristofoɔ (hwɛ Asomafoɔ 4:32–37). Awurade yɛɛ nsiesie a ɛmu da hɔ wɔ yei ne tinsɛm afoforɔ ho. Ɔyɛɛ yei ne kɛseɛ de nam adiyisɛm a wɔatwerɛ wɔ Nkyerɛkyerɛ ne Apam 42 a Ɔfrɛɛ no “me mmara a mede bɛbu m’asɔre” (nkyekyɛmu 59). Wɔ adiyisɛm yi mu, yɛsua nokorɛ ahodoɔ a ɛyɛ fapem wɔ Awurade Asɔre no kyekyere ho. Na yɛsua sɛ yɛwɔ bebree bɛsua: “Sɛ wobɛbisa a,” Awurade hyɛ bɔ, “wobɛnya adiyisɛm mu adiyisɛm, nimdeɛ mu nimdeɛ” (Nkyerɛkyerɛ ne Apam 42:61).

San hwɛ Ahotefoɔ, 1:114–19.

Nsusuiɛ ma Efie ne Asɔre Adesua

Nkyerɛkyerɛ ne Apam 41

“Obiara a ɔgye me mmara na ɔdi soɔ no, onii korɔ no yɛ me suani.”

1830 ahyɛaseɛ no, Ahotefoɔ no hyɛɛ aseɛ boaa wɔn ho ano wɔ Ohio. Na wɔn ho pere wɔn sɛ wɔbɛnya mmara a Onyankopɔn ahyɛ bɔ sɛ ɔbɛyi akyerɛ wɔ hɔ no (hwɛ Nkyerɛkyerɛ ne Apam 38:32). Nanso ɛdi kan no, Ɔkyerɛɛ N’asuafoɔ no sɛdeɛ wɔbɛsiesie wɔn ho agye Ne mmara no. Deɛn nnyinasosɛm na wohunu wɔ Nkyerɛkyerɛ ne Apam 41:1–6 a anka ɛbɛtumi aboa Ahotefoɔ no ama wɔagye Onyankopɔn mmara no? Sɛn na saa nnyinasosɛm yi bɛboa wo ama woagye nkyerɛkyerɛ afiri Ne hɔ?

San hwɛ “Ɔhwɛsofoɔ ma Asɔre no,” wɔ Revelations in Context, 77–83.

Nkyerɛkyerɛ ne Apam 42

Awurade ma me mmaransɛm ɛfiri sɛ Ɔdɔ me.

Ahotefoɔ no dwenee adiyisɛm a ɛwɔ Nkyerɛkyerɛ ne Apam 42:1–72 sɛ ɛyɛ adiyisɛm no baako a ɛho hia pa ara a Nkɔmhyɛni no nyaeɛ. Na ɛyɛ adiyisɛm a ɛdi kan a wɔtintimiiɛ no mu baako. Mfeɛ bebree mu, Ahotefoɔ no frɛɛ no “mmara no.” Berɛ a ɔfa no mfa Awurade mmaransɛm anaasɛ mmara nka ho no, ɛfata sɛ yɛdwene ho sɛnti a na saa nnyinasosɛm yi ho hia ma Asɔre foforɔ a wɔasan de aba no. Adɛn nti na ɛho hia ma yɛn ɛnnɛ?

Ɛfiri sɛ sɛ wɔde ho a ɔfa 42 ware, wobɛtumi adwene ho asua no nketenkete te sɛ deɛ ɛdidi soɔ yi. Kyerɛ nnyinasosɛm a wɔkyerɛ wɔ ebiara mu, na dwene ho sɛdeɛ saa mmara yi yɛ nsɛnkyerɛnneɛ ma Awurade dɔ a ɔwɔ ma Ne nkorɔfoɔ.

• Afa 4–9, 11–17, 56–58

• Afa 18–29

• Afa 30–31

• Afa 40–42

• Afa 43–52

Adɛn nti na Onyankopɔn ma yɛn mmara ahodoɔ ne mmaransɛm? Wɔ akwan bɛn so na wɔahyira wo berɛ a worehunu na woredi mmaransɛm no so?

Nkyerɛkyerɛ ne Apam 42:30–42

“Kae ahiafoɔ.”

Sɛdeɛ mmara no fa da no adie wɔ ɔfa 42no, Awurade kyerɛɛ N’ahotefoɔ no sɛdeɛ tete Kristo akyidifoɔ nyaa “nneɛma nyinaa pɛpɛɛpɛ” (Asomafoɔ 2:44; 4 Nephi 1:3), a “na wɔnni ohiani” (Moses 7:18). Deɛn na wosua firi Nkyerɛkyerɛ ne Apam 42:30–42 fa sɛdeɛ Ahotefoɔ no dii ahosohyira mmara no so? (Hyira wo ho so kyerɛ sɛ woretu biribi asi hɔ ama botaeɛ kronkron bi.)

Ɛwɔ mu sɛ yɛnni “nneɛma nyinaa pɛpɛɛpɛ” ɛnnɛ, wɔ tɛmpol ahodoɔ mu Nna a ɛdi akyire Ahotefoɔ pam sɛ wɔbɛdi ahosohyira mmara no so. Sɛn na wobɛsi atu biribi a Onyankopɔn de ama wo asi hɔ de ahyira nkorɔfoɔ a wɔhia mmoa? Ebia dwom bi toɔ te sɛ “Esiane Sɛ Wɔama Me Dodo Nti” (Nnwom, no. 219) bɛtumi ama wo nsusuiɛ.

San hwɛ Sharon Eubank, “Mebɔ Mpaeɛ sɛ Ɔde Yɛn Bɛyɛ Adwuma,” Liahona, Obubuo 2021, 53–56; “Mmara no,” wɔ Revelations in Context, 93–95.

Kristo ne Ɔbabunu Defoɔ no hɔ, ɛfiri Heinrich Hofmann hɔ

Nkyerɛkyerɛ ne Apam 42: 61, 65–68; 43:1–16

Onyankopɔn de adiyisɛm ma de kyerɛ N’Asɔre kwan—na wakyerɛ me kwan.

Fa no sɛ wo ne Asɔreba foforɔ bi redi nkɔmmɔ a n’ani agye pɛ sɛ ɔhunu sɛ adiyisɛm na wɔde kyerɛ Asɔre no kwan. Sɛn na wobɛsi de Nkyerɛkyerɛ ne Apam 43:1–16 aboa no ama wasua adeɛ fa Awurade nhyehyɛeɛ a ɔwɔ ma N’Asɔre de fa Ne nkɔmhyɛfoɔ so? Sɛn na wobɛsi de Nkyerɛkyerɛ ne Apam 42:61, 65–68 akyerɛ afa sɛdeɛ wo ankasa bɛnya adiyisɛm?

Deɛn “asomdwoeɛ nneɛma” ne anigyesɛm bi na wonam Honhom no so anya afiri Awurade hɔ?

Sɛdeɛ wobɛsua afa sɛdeɛ Asɔre akannifoɔ ate Awurade nne ho no, wobɛtumi ahwɛ sini ahodoɔ a ɛwɔ “Tie No” mmoano mu wɔ Asɛmpa Akoraeɛ. Dwene ho yɛ w’ankasa sini, akyerɛkyerɛ sɛdeɛ Awurade ne wo di nkutaho mu.

San hwɛ Russell M. Nelson, “Adiyisɛm de ma Asɔre no, Adiyisɛm de ma Yɛn Abrabɔ,” Liahona, Kɔtɔnima 2018, 93–96; “Ɛwɔ sɛ Wɔyɛ Nneɛma Nyinaa wɔ ne Kwan so,”,” wɔ Revelations in Context, 50–53.

Fa adesua nneɛma di adwuma. Adesua nneɛma anaasɛ nneɛma a yɛhunu tumi boa ma nkorɔfoɔ a wokyerɛ wɔn adeɛ te asɛmpa nokorɛ ahodoɔ no ase yie na wɔkae no mmerɛ tenten. Nhwɛsoɔ, wobɛtumi de ahodwirideɛ, ahyehyɛ no mmaako mmaako, de akyerɛ afa “adiyisɛm mu adiyisɛm, nimdeɛ mu nimdeɛ” ho (Nkyerɛkyerɛ ne Apam 42:61).

Nsusuiɛ ma Nkwadaa Adekyerɛ

Nkyerɛkyerɛ ne Apam 41:5

Okyidifoɔ yɛ obi a ɔgye Onyankopɔn mmara na ɔdi soɔ.

• Sɛdeɛ wobɛboa wo nkwadaa ama wɔahunu deɛ ɛkyerɛ sɛ obi yɛ Yesu Kristo suani no, wobɛtumi atwerɛ Nkyerɛkyerɛ ne Apam 41:5 wɔ krataa asinasin so, agya baabi ato hɔ a asɛmfua osuani bɛwɔ hɔ. Afei wɔbɛtumi ahwɛ nkyekyɛmu 5 apɛ asɛmfua a ayera no. Deɛn na saa nkyekyɛmu yi kyerɛ sɛ Yesu Kristo suani ase kyerɛ? Mmɔdemmɔ bɛn na yɛrebɔ sɛ yɛbɛyɛ Kristo asuafoɔ papa?

Nkyerɛkyerɛ ne Apam 42:2

M’ani gye berɛ a meyɛ setie ma Awurade.

• Wo nkwadaa ani bɛgye sɛ wɔdi agorɔ a ɛbɛhia sɛ wɔtie yie na wɔdi nkyerɛkyerɛ so. Wobɛtumi de saa agorɔ yi adi nkɔmmɔ afa deɛ “tie na te na yɛ setie” ma Awurade asekyerɛ ho (Nkyerɛkyerɛ ne Apam 42:2). Nkyerɛkyerɛ bɛn na Ɔde ama yɛn? Sɛn na wɔahyira yɛn berɛ a yɛayɛ setie ma Ne mmara ne mmaransɛm?

• Wobɛtumi ne wo nkwadaa awie nnawɔtwe yi dwumadie krataafa no. Wobɛtumi nso ato dwom afa Onyankopɔn mmara so die ho, te sɛ “Mepɛ sɛ Medi Asɛmpa no so” (Nkwadaa Nnwomnwoma, 148). Dwene ho na mo ne mo ho nkyɛ sɛdeɛ Onyankopɔn mmara so die de anigyeɛ abrɛ mo.

  

Nkyerɛkyerɛ ne Apam 42:38

Meresom Yesu Kristo berɛ a mesom afoforɔ.

• Moakenkan Nkyerɛkyerɛ ne Apam 42:38abom akyi no,boa wo nkwadaa ma wɔnnwene ho akwan a wɔbɛtumi afa so asom Yesu berɛ a wɔsom afoforɔ. Wɔbɛtumi anya nsusuiɛ no bi afiri sini “Pass It On” (ChurchofJesusChrist.org). Wɔbɛtumi nso ahwɛ mfonini a Agyenkwa no reboa afoforɔ, resa ayarefoɔ yareɛ, anaasɛ ɔreyɛ nkwadaa ayamyɛ (hwɛ Gospel Art Book, nos. 42, 47).

  Pass It On

  Children around the world have taken President Thomas S. Monson's counsel to find a way to serve others.

  

• Wobɛtumi de Ntotosoɔ du du ne Afɔrebɔdeɛ Afoforɔ krataa akyerɛ wo nkwadaa na moadi nkɔmmɔ afa sɛdeɛ wɔbɛsi de deɛ wɔwɔ no ama de ahyira afoforɔ (san hwɛ “Tithing and Donations Online”).

Nkyerɛkyerɛ ne Apam 43:1–7

Nkɔmhyɛni no nko ara na ɔbɛtumi anya adiyisɛm de ma Asɔre no nyinaa.

• Ma wo nkwadaa mfa no sɛ obi asɔre agyina hɔ wɔ adansedie nhyiamu ase na waka akyerɛ wɔɔdo no sɛ wanya adiyisɛm ama Asɔre no nyinaa (nhwɛsoɔ, adiyisɛm sɛ mma yɛnni karɔto bio anaasɛ yɛmfa mirike nhohoro yɛn nsa na mmom ɛnyɛ nsuo.) Ɔka sɛ yɛntie deɛ ɔka no na ɛnyɛ nkɔmhyɛni no deɛ. Deɛn na ɛbɛha adwene wɔ ho? Afei wobɛtumi asua Nkyerɛkyerɛ ne Apam 43:1–7 abom de ahwehwɛ sɛdeɛ Awurade ma N’Asɔre mmaransɛm.

• Wobɛtumi nso de nkɔmhyɛni a ɔte ase mfonini akyerɛ nkwadaa na woama wɔakyɛ biribi a wakyerɛ wɔn a ɛnkyɛreɛ. Sɛ wɔhia mmoa a, kyerɛ wɔn sini anaasɛ amansan nhyiamu nkrasɛm bi a ɛnkyɛreɛ. Adɛn nti na ɛyɛ nhyira sɛ yɛnya nkɔmhyɛni teasefoɔ ɛnnɛ?

Wopɛ nsusuiɛ bebree a, hwɛ bosome yi Adamfoɔ nsɛmma nwoma mu.

Joseph Smith Preaching, ɛfiri Sam Lawlor hɔ