Kubvumbi 14–20: “Ndini Iye Mupenyu, Ndini Iye Akauraiwa”

Isita

Kubvumbi 3, 1836, yakanga iri Svondo yeIsita. Mushure mekubatsira kuropafadza nokupa sakaramende kuVatendi muTemberi yeKirtland yakanga ichangobva mukutsaurwa, Joseph Smith naOliver Cowdery vakawana nzvimbo yakanyarara kuseri kwechidzitiro uye vakakotama mumunamato wakanyarara. Zvino, pazuva rinoera iri apo vaKristu kwose kwose pavakanga vachirangarira Kumuka Kuvakafa kwaJesu Kristu, Muponesi akamuka Iye pachake akazviratidza mutemberi Yake, achiti, “Ndini Iye Mupenyu, Ndini Iye Akauraiwa” (Dzidziso neZvibvumirano 110:4).

Zvinorevei kuti Jesu Kristu ndiye “iye mupenyu”? Hazvingoreva chete kuti Akamuka kubva mubwiro uye akazviratidza kuvadzidzi Vake muGarirea. Zvinoreva kuti Mupenyu nhasi. Anotaura kuburikidza nevaporofita nhasi. Anotungamirira Chechi Yake nhasi. Anorapa mweya yakakuvara nemwoyo yakatyoka nhasi. Nokudaro tinokwanisa kudzokorora mashoko euchapupu hwakasimba hwaJoseph Smith ekuti: “Mushure meuchapupu hwakawanda hwakapuwa pamusoro pake, uhwu ndihwo uchapupu … hwatinopa pamusoro pake: Kuti mupenyu!” (Dzidziso neZvibvumirano 76:22). Tinokwanisa kunzwa inzwi Rake mune zvakazarurwa izvi, kuona ruoko Rwake muupenyu hwedu, uye nokunzwa “mufaro unopuwa nemutsetse uyu: ‘Ndinoziva kuti Mununuri wangu mupenyu!’” (Hymns, nhamba. 74).

Mazano eKudzidza Kumba uye kuChechi

Jesu Kristu mupenyu.

Vazhinji vedu hatisati tamboona Jesu Kristu sezvakaita Muporofita Joseph Smith. Asi tinokwanisa kuziva, sezvaakaita, kuti Muponesi mupenyu, kuti Anoziva budiriro dzedu nematambudziko edu, uye kuti Anozotibatsira munguva dzatinoda rubatsiro. Funga pamusoro peuchapupu hwako hwaKristu mupenyu apo paunofungisisa mibvunzo iri pazasi uye nokunzvera zvinyorwa zvinoenderana nayo.

• Jesu Kristu ndiani? Sei tichiMunamata? (ona “The Living Christ: The Testimony of the Apostles”).

• Mweya unondidzidzisei pamusoro pezviitiko zvaJoseph Smith nevamwe avo vakaona Muponesi? Uchapupu hwavo hwunosimbisa sei hwangu? (ona Dzidziso neZvibvumirano 76:11–14, 20–24; 110:1–10; Joseph Smith—Nhoroondo:17).

• Chii chandinodzidza pamusoro pebasa nehumwari hweMuponesi kubva mumashoko Ake pachake? (ona Dzidziso neZvibvumirano 29:5; 38:7).

• Muponesi anokwanisa kundibatsira sei nhasi? (ona Muporofita Isaya 53:3–5; VaHebheru 2:17–18; Mosaya 3:7; Aruma 7:11–13; 36:3; Eta 12:27; Mosesi 5:10–12).

Simba rinouya kubva mukudzidza nomusoro. Gosa Richard G. Scott vakatsanangura kuti: “Simba guru rinokwanisa kubva mukudzidza zvinyorwa zvitsvene nomusoro. Kudzidza chinyorwa chitsve nomusoro kuumba ushamwari hutsva. Zvakafanana nekuwana munhu mutsva anokwanisa kubatsira munguva inodikanwa rubatsiro, kupa femero nenyaradzo, uye kuva manyuko ekurudziro yeshanduko inodiwa” (“The Power of Scripture,” Ensign, Mbudzi 2011, 6). Kana ukawana chinyorwa chitsvene pamusoro poMuponesi chakanyanya kukosha kwauri—pamwe icho chinokwanisa kukupa nyaradzo munguva dzaunoda rubatsiro—funga pamusoro pokuchidzidza nomusoro.

­Muvhidhiyo inonzi “My Spiritual Goal,” mumwe musikana wechidiki anosarudza kudzidza nomusoro “The Living Christ” (Gospel Library). Chii chinokufadza pamusoro pechiitiko chake? Chii chaunonzwa kufemerwa kuti uite kuitira kuti ugamuchire chokwadi chiri “muKristu Mupenyu” mumwoyo nepfungwa dzako?

Let Your Goals Be Guided by the Spirit

Ashley’s spiritual goal was to grow closer to Christ. So she made a plan, wrote it down, and set a completion date. Setting goals has increased Ashley’s ability to accomplish things she feels inspired to do.

Kuti udzidze zvimwe zvakawanda pamusoro pemaropafadzirwo atinoitwa neMuponesi nhasi, unokwanisa kunzvera, kuteerera, kana kuimba “Ndinoziva Mununuri Wangu Mupenyu” (Nziyo neDzevana Vadiki, nhamba. 74). Zvinokwanisa kuva zvinokurudzirakutsvaka zvokwadi murwiyo urwu izvo zvinodzidziswawo muDzidziso neZvibvumirano 6:34; 84:77; 98:18; 138:23.

­

Nokuda kwaJesu Kristu, ndinozomuka kuvakafa.

Joseph Smith aiziva manzwiro azvinoita kuchema rufu rwevadikanwi, kusanganisira baba vake nemukoma nemunun’una wake. Joseph naEmma vakaviga vatanhatu vevana vavo, mumwe nomumwe wavo ari pasi pemakore maviri ekuzvarwa. Kubva kuzvakazarurwa zvakapuwa naMwari, Joseph naEmma vakawana maonero ekusingaperi.

Tsvaka zvokwadi pamusoro perufu nechirongwa chaMwari chokusingaperi muDzidziso neZvibvumirano 29:26–27; 42:45–46; 63:49; 88:14–17, 27–31; 93:33–34. Zvokwadi izvi zvinoshandura sei nzira yaunoona nayo rufu? Zvinoshandura sei nzira yaunorarama nayo?

Onawo 1 VaKorinte 15; Teachings of Presidents of the Church: Joseph Smith2007 (2007), 174–76; Easter.ChurchofJesusChrist.org.

Jesu Kristu akandizadzikisira “rudzikinuro rwakarurama”.

Imwe nzira yekunangisa pfungwa paMuponesi nayo panguva yeIsita ndeye kunzvera zvakazarurwa muDzidziso neZvibvumirano zvinodzidzisa pamusoro perudzikinuro rwekuzvipira Rwake. Zvimwe zvinokwanisa kuwanikwa muDzidziso neZvibvumirano 18:10–13; 19:16–19; 45:3–5; 76:69–70. Funga pamusoro pokuita mudorongodzwa wezvokwadi izvo zvaunowana mundima idzi. Kudzamisa kunzvera kwako, unokwanisa kuwedzera kumudorongodzwa wako kuburikidza nekutsvagurudza Ruka 22:39–44; 1 Johane 1:7; 2 Nifai 2:6–9; Mosaya 3:5–13, 17–18; Moronai 10:32–33.

Heino mimwe mibvunzo inokwanisa kutungamira kunzvera kwako:

• Chii chinonzi Rudzikinuro rwaJesu Kristu?

• Sei Jesu Kristu akasarudza kutitamburira nokutifira?

• Chii chandinofanira kuita kuti ndigamuchire maropafadzo ekuzvipira Kwake?

• Ndinonzwa sei pamusoro paJesu Kristu mushure mokuverenga ndima idzi?

Onawo Nhungamiro kuMagwaro Matsvene, “Rudzikinuro,” Raibhurari yeVhangeri; “The Savior Suffers in Gethsemane (Muponesi Anotambura muGetsemane)” (vhidhiyo), Gospel Library.

The Savior Suffers in Gethsemane

Jesus, Peter, James, and John retire to the Garden of Gethsemane. Jesus submits to the Father's will and begins to suffer for the sins and afflictions of mankind. He is then betrayed and arrested. Matthew 26:36–57

­

Mazano eKudzidzisa Vana

Nokuda kwaJesu Kristu, ndinozomuka kuvakafa.

• Kuti udzidzise vana vako pamusoro pokumuka kuvakafa, unokwanisa kutanga nekuvaratidza mifananidzo yekufa neKumuka Kuvakafa kweMuponesi. Ita kuti vana vako vagovere izvo zvavanoziva pamusoro pezviitiko izvi. ­ ­

• Funga pamusoro pechidzidzo chinoshandisa zvinhu zvinobatwa icho chinokwanisa kubatsira vana vako kunzwisisa zvinoitika patinofa (mweya yedu nemiviri yedu zvinoparadzana) uye apo patinomuka kuvakafa (mweya yedu nemiviri zvinobatana zvakare pamwechete, uye miviri yedu yakarurama uye haizofi). Semuenzaniso, chii chinoitika patinobvisa bhatiri kubva mutochi kana chubhu yeingi kubva mubhiro? Chii chinoitika apo pazvinobatanidzwa zvakare? (Ona Aruma 11:44–45.)

• Vana vako vanoziva mumwe munhu akafa here? Ita kuti vagovere zvishoma pamusoro pevanhu ava, uye zvino moverenga pamwechete Dzidziso neZvibvumirano 138:17. Tauriranai pamusoro pamanzwiro anotinoita kuziva kuti vadikanwi vedu vanozomuka kuvakafa uye vagova nemiviri zvakare.

• Kana uine vana vakura, unogona kuvakoka kuti vatsvage ndevo dzinotaura shoko reIsita mundima dzinotevera: Dzidziso neZvibvumirano 63:49; 88:14–17, 27; 138:11, 14–17. Vanokwanisa kuita zvimwechetezvo nevhidhiyo inoti “Because He Lives (Nokuda Kwokuti Mupenyu)” (Gospel Library). Tingagoverana sei shoko iri navamwe?

Muporofita Joseph Smith akaona Jesu Kristu.

• Iwe nevana vako mungafarira kuverenga pamusoro penguva nhatu dzakasiyana idzo Jesu Kristu dzaakazviratidza kuna Joseph Smith nevamwe, sekunyorwa kwazvakaitwa muJoseph Smith—Nhoroondo 1:14–17; Dzidziso neZvibvumirano 76:11–24; 110:1–10. Vana vako vanokwanisawo kutarisa pamifananidzo yezviitiko izvi mupeji yechiitwa yevhiki rino. Tinodzidzei pamusoro paJesu Kristu kubva kune chimwe nechimwe chezviitiko izvi? Sei riri ropafadzo kuziva kuti Joseph Smith nevamwe vakaona Muponesi akamuka?

Nokuda kwaJesu Kristu, ndinokwanisa kuregererwa zvivi zvangu.

• Zvokwadi zvakadzidzwa naJoseph Smith pamusoro peruregerero kuburikidza naKristu zvinokwanisa kupa vana vako tariro yekuti vanokwanisa kuregererwa pazvikanganiso nepazvivi zvavo. Funga pamusoro pokukoka vana vako kuti vagadzire chati ine misoro yakaita seiyi: Zvandakaitirwa neMuponesi uye Zvandinofanira kuita kuti ndigamuchire ruregerero Rwake. Batsira vana vako kutsvagurudza ndima dzinotevera kuti vawane zvinhu zvinofanira kuva pasi pemisoro yenyaya iyi: Dzidziso neZvibvumirano 18:10–13; 19:16–19; 45:3–5; 58:42–43. Goveranai mufaro wenyu nerutendo rwenyu rwezvatakaitirwa neMuponesi.

• Unokwanisawo kuona vhidhiyo inonzi “The Shiny Bicycle” nevana vako (Gospel Library) uye mogoverana zviitiko apo pamakanzwa ruregerero rweMuponesi pamaitendeuka.

The Shiny Bicycle

Everybody makes mistakes, and even though it's not easy, with the help of Heavenly Father and Jesus Christ we can receive forgiveness for our sins.

­i.

Christ and Mary at the Tomb [Kristu naMaria paBwiro], naJoseph Brickey