Detalye gikan sa Saints Move to Kirtland [Mga Santos Mibalhin ngadto sa Kirtland], ni Sam Lawlor

Abril 21–27: “Kon Kamo Dili Magkahiusa Kamo Dili Ako”

Doktrina ug mga Pakigsaad 37–40

Alang sa nahaunang mga Santos, ang Simbahan labaw pa sa usa ka dapit aron madungog ang pagsangyaw sa Dominggo. Ang mga pagpadayag migamit og mga pulong sama sa kawsa, gingharian, Zion, ug, kasagaran, buhat. Nga nahimong kabahin sa unsay nakapadani sa mga tawo ngadto sa gipahiuli nga Simbahan. Sama sa ilang pagmahal sa doktrina, daghan usab ang gusto og butang nga balaan nga ilang ikapahinungod ang ilang mga kinabuhi. Bisan pa, ang pagsunod sa 1830 nga sugo sa Ginoo nga magpundok ngadto sa Ohio dili sayon. Alang sa kadaghanan, nagpasabot kini nga mobiya sa komportable nga mga panimalay alang sa usa ka dili pamilyar nga dapit (tan-awa sa “Voices of the Restoration: Gathering to Ohio”). Karon klaro natong makita nga kadtong mga Santos nga nagtan-aw gamit lang ang mata sa hugot nga pagtuo: ang Ginoo adunay mga panalangin nga naghulat alang kanila didto sa Ohio.

Ang panginahanglan sa pagpundok ngadto sa Ohio dugay nang milabay, apan ang mga Santos karon maghiusa gihapon libot sa samang kawsa, sa samang buhat: sa “pagpadayag sa Zion” (Doktrina ug mga Pakigsaad 39:13). Sama niadtong unang mga Santos, kita gidapit sa pagbiya “ang mga kabalaka sa kalibotan” (Doktrina ug mga Pakigsaad 40:2) ug mosalig sa saad sa Ginoo: “Ikaw makadawat … usa ka panalangin nga hilabihan ka mahinungdanon nga ikaw wala pa sukad makahibalo” (Doktrina ug mga Pakigsaad 39:10).

Tan-awa usab sa Mga Santos,, 1:124–26.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 37–38

Ang Dios nagpundok kanato aron sa pagpanalangin kanato.

Ang mga miyembro sa Simbahan sa Fayette, New York, kinahanglan nga mohimo og malisod nga mga sakripisyo aron mobalhin ngadto sa Ohio (labaw sa 400 ka kilometro) sa tingtugnaw niadtong 1831. Samtang ikaw magbasa sa sugo sa Ginoo diha sa Doktrina ug mga Pakigsaad 37:3–4, mahimong hunahunaon nimo ang mga sakripisyo nga gisugo sa Ginoo kanimo. Dayon, samtang imong tun-an ang Doktrina ug mga Pakigsaad 38: 1–33, pangitaa ang mga kamatuoran mahitungod sa Manluluwas nga makahatag nimo og hugot nga pagtuo sa pagsunod sa Iyang tambag. Unsay imong nakat-onan gikan sa mga bersikulo 11–33 mahitungod sa mga panalangin sa pagpundok isip mga sumusunod ni Jesukristo?

Doktrina ug mga Pakigsaad 38:22

“Mopatalinghug sa akong tingog ug mosunod kanako.”

Sa unsang paagi nga si Jesukristo mahimo nimong “magbabalaod”? Sa unsang paagi ang pagsunod sa Iyang mga balaod makapahimo nato nga “usa ka gawasnong mga katawhan”?

Tan-awa usab sa 2 Nephi 2:26–27.

Doktrina ug mga Pakigsaad 38:30

Kon ako andam, ako dili kinahanglan nga mahadlok.

Kon makasinati kamo sa baroganan nga gipadayag sa Ginoo diha sa Doktrina ug mga Pakigsaad 38:30: “Kon kamo andam dili kamo mahadlok”? Samtang ikaw magtuon sa seksiyon 38, obserbahi giunsa sa Ginoo pag-andam ang Iyang mga Santos aron sila makaatubang sa umaabot uban ang kaisog. Sa unsa nga paagi nga Siya gusto nimo nga mag-andam alang sa umabot aron nga ikaw dili kinahanglan nga mahadlok?

Tan-awa usab sa David A. Bednar, “Kita Mosulay Kanila Dinhi,” Liahona, Nob. 2020, 8–11.

Doktrina ug mga Pakigsaad 38:24–27

Ang Dios gusto nga kita “magkahiusa.”

Ang mga Santos nga nagpundok sa Ohio nagagikan sa nagkadaiyang mga sitwasyon. Tingali pareho usab sa mga tawo sa imong ward. Apan ang Ginoo misugo sa Iyang katawhan nga “maghiusa” (bersikulo 27). Unsaon nga makatuman kita niini nga matang sa panaghiusa? Unsa nga mga ideya ang mosulod sa hunahuna samtang ikaw magbasa sa Doktrina ug mga Pakigsaad 38:24–27? Ngano nga kita kinahanglan nga magkahiusa aron mahimong katawhan sa Dios?

Ang pagbasa niini nga mga bersikulo makapadasig usab kanimo sa paghunahuna mahitungod sa imong mga relasyon—pananglitan, uban sa mga sakop sa pamilya, mga miyembro sa ward, ug mga sakop sa korum o klase. Unsa kaha ang makapugong nimo gikan sa pagkahiusa diha ni Kristo? Sa unsang paagi ang Manluluwas makatabang ninyo nga “magkahiusa”? Ang mga bidyo “A Friend to All” [Usa ka Higala sa Tanan] o “Love in Our Hearts” [Gugma sa Atong mga Kasingkasing] (Gospel Library) makatabang ninyo nga matubag kini nga mga pangutana. Mahimong makakita usab ikaw og mga ideya sa mensahe ni Elder Dale G. Renlund “Ang Kalinaw ni Kristo Makawagtang sa Pagdumot,” Liahona, Nob. 2021, 83–85.

A Friend to All

Elder Ulisses Soares talks of the need for kindness and acceptance.

Love in Our Hearts

Sister Christina B. Franco discusses the importance of inclusion and respect.

Unsaon nimo sa pagtabang kini nga mga grupo nga mas magkahiusa? Pananglitan, ikonsiderar ang pagpadala o pag-text og mabinationg mubo nga sulat ngadto sa mga sakop sa imong korum, klase, o pamilya. Kinsa ang imong gibati nga tabangan?

Unsa ang nakapadasig nimo mahitungod sa ehemplo sa Manluluwas diha sa Mga Taga-Efeso 2:14, 18–22; 2 Nephi 26:24–28?

Tan-awa usab sa Quentin L. Cook, “Mga Kasingkasing Nabugkos diha sa Pagkamatarong ug Pagkahiusa,” Liahona, Nob. 2020, 18–21; “Maghigugmaay,” Mga Himno, nu. 196; Topics and Questions [Mga Hilisgotan ug mga Pangutana], “Belonging in the Church of Jesus Christ [Ang Pagkahisakop diha sa Simbahan ni Jesukristo],” Gospel Library.

Doktrina ug mga Pakigsaad 38:39; 39–40

Ang Amahan nagtinguha nga mohatag kanako og mga katigayonan sa kahangtoran.

Sa imong opinyon, unsa ang kalainan tali “sa mga katigayonan sa yuta” ug “sa mga katigayonan sa kahangtoran”? (Doktrina ug mga Pakigsaad 38:39). Unsa nga mga kasinatian ang nakatudlo nimo sa bili sa mga katigayonan sa kahangtoran?

Ibutang kini sa hunahuna samtang ikaw magbasa mahitungod ni James Covel diha sa mga seksiyon 39–40 (lakip sa makasaysayanong kaagi diha sa mga ulohan sa seksiyon). Ikonsiderar sa unsa nga paagi nga kini nga kasinatian imong magamit. Pananglitan, hunahunaa ang mga higayon sa dihang ang imong “kasingkasing … matarong diha sa atubangan sa [Dios]” (Doktrina ug mga Pakigsaad 40:1). Sa unsang paagi nga ikaw napanalanginan tungod sa imong pagkamatinud-anon? Paghunahuna usab kon unsa nga “mga kabalaka sa kalibotan” ang imong giatubang. Sa unsa nga paagi kini makapugong kanimo sa pagdawat sa pulong sa Dios “uban ang kalipay”? (Doktrina ug mga Pakigsaad 39:9; 40:2). Unsay imong nakit-an niini nga mga seksiyon nga makapadasig nimo nga mas magmakanunayon sa pagkamasulundon ngadto sa Dios?

Tan-awa usab sa Mateo 13:3–23.

Gamita ang mga kasulatan nganha sa imong kinabuhi. “Usa ka paagi ikaw makatabang sa mga tigkat-on nga makakita sa kaimportante [sa mga kasulatan] mao ang pagpangutana sama sa ‘Unsaon nga kini makatabang kanimo sa usa ka butang nga imong nagsinati karon?” ‘Nganong importante alang kanimo nga masayod niini?’ ‘Unsa ang kalainan nga mahimo niini diha sa imong kinabuhi?’” (Pagtudlo sumala sa Pamaagi sa Manluluwas, 23). Ang mga pangutana niini nga kalihokan mahitungod sa Doktrina ug mga Pakigsaad 39–40 mao ang ubang mga ehemplo sa mga pangutana nga makatabang nato sa paggamit niini nga mga pagpadayag sa atong mga kinabuhi.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: James Covel

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 37; 38:31–33

Ang Dios nagpundok kanato aron sa pagpanalangin kanato.

• Ang mapa ug ang pahina sa kalihokan sa kataposan niini nga latid makatabang sa inyong mga anak nga makasabot unsa ang gisugo sa Dios diha sa Doktrina ug mga Pakigsaad 37:3. Tingali makatabang kita kanila sa pagpangita sa mga dapit nga gihisgotan niini nga mga pagpadayag. Makatabang usab ikaw kanila sa pagpangita og hugpong sa mga pulong gikan sa Doktrina ug mga Pakigsaad 38:31–33 nga naghulagway ngano nga ang Dios gusto nga ang Iyang katawhan magpundok.

Doktrina ug mga Pakigsaad 38:24–27

Ang Dios gusto nga kita “magkahiusa.”

• Samtang ikaw magbasa sa Doktrina ug mga Pakigsaad 38:24–25 uban sa mga bata, hisgoti unsa ang gipasabot sa pagmahal sa imong igsoong lalaki o igsoong babaye sama sa imong kaugalingon (tan-awa usab sa Mateo 7:12). Tabangi sila sa pagsulti og balik sa kasulatan, nagpuli sa “iyang igsoong lalaki” sa mga ngalan sa usag usa.

• Tudloi ang imong mga bata unsa ang gipasabot nga “magkahiusa” (Doktrina ug mga Pakigsaad 38:27), mahimong tabangan nimo sila sa pagdrowing og dako nga numero 1 ug pagbutang niini og mga ngalan ug mga drowing o mga litrato sa matag tawo sa imong pamilya o klase. Tupad sa 1, mahimong isulat nimo ang mga butang nga imong mahimo aron mas magkahiusa.

• Pakigbahin og leksyon nga naggamit og butang nga naghulagway kon sa unsa nga paagi nga ang mga butang matipon o mahiusa aron mahimong usa, sama sa mga piraso sa panapton nga mahimong usa ka quilt o mga sangkap sa pagluto nga makahimo og usa ka tibuok pan. Unsa ang gitudlo kanato niini nga mga ehemplo mahitungod sa pagkahimong usa isip katawhan sa Dios?

Doktrina ug mga Pakigsaad 38:30

Kon ako andam, ako dili kinahanglan nga mahadlok.

• Samtang magbasa ka sa Doktrina ug mga Pakigsaad 38: 30, ikaw ug ang imong mga anak mahimong maghisgot sa bag-ong mga kasinatian nga nagkinahanglan og pagpangandam. Dayon mahimo nimong pangutan-on ang imong mga anak mahitungod sa mga butang nga gusto sa Langitnong Amahan nga atong andamon. Ipakigbahin sa imong mga anak ang usa ka kasinatian diin ang pagkaandam nakatabang nimo nga dili magmahadlokon. Mahimo usab nga manan-aw kamo og bidyo “Men’s Hearts Shall Fail Them” [Ang mga Kasingkasing sa mga Tawo Mopakyas Kanila] (Gospel Library).

Men's Hearts Shall Fail Them

Elder Russell M. Nelson shares a personal story to give encouragement for when we feel "weak in the heart."

Doktrina ug mga Pakigsaad 39:6, 23

Madawat nako ang gasa sa Espiritu Santo kon ako kompirmahan.

• Ikonsiderar ang pagpakita og litrato sa usa ka tawo nga gikompirmahan. Hangyoa ang imong mga anak sa paghulagway unsay nahitabo diha sa litrato. Mahimo usab nga dapiton nimo sila sa pagtudlo ngadto sa litrato kon sila makadungog sa mga pulong Espiritu Santo sa Doktrina ug mga Pakigsaad 39:6, 23 (o sa usa ka kanta sama sa “Ang Espiritu Santo,” Songbook sa mga Bata, 56). Pagpakigbahin sa usag usa sa unsa nga paagi nga ang gasa sa Espiritu Santo nakapanalangin nimo.

Alang sa dugang nga mga ideya, tan-awa ang isyu karong bulana sa Higala nga magasin.