« Te mau reo o te fa’aho’i-fa’ahou-ra’a mai : Te ha’aputuputura’a i Ohio », Mai, pe’e mai—nō te ’utuāfare ’e te fare purera’a : Te Ha’api’ira’a Tumu ’e te mau Fafaura’a 2025 (2025)
« Te ha’aputuputura’a i Ohio », Mai, pe’e mai—nō te ’utuāfare ’e te fare purera’a : 2025
Te mau reo o te fa’aho’i-fa’ahou-ra’a mai
Te ha’aputuputura’a i Ohio
Kirtland Village [Te ’oire iti nō Kirtland], nā Al Rounds
Phebe Carter
I roto i te rahira’a feiā mo’a tei ha’aputuputu mai i Ohio i te mau matahiti 1830 ra, tē vai ra ’o Phebe Carter. ’Ua tomo mai ’oia i roto i te ’Ēkālesia i te pae apato’erau hiti’a o te rā nō te fenua Marite, i te piti-’ahuru-ti’ahapa-ra’a o tōna matahiti, ’aita ra tōna nā metua. ’Ua pāpa’i ’oia i muri iho nō ni’a i tāna fa’aotira’a e fa’anu’u atu i Ohio nō te ’āmui atu i te feiā mo’a :
« ’Ua fa’ahiahia roa tō’u mau hoa i tō’u rāterera’a mai, tē vai ra rā hō’ē mea i roto iā’u e tūra’i nei iā’u ’ia tāmau ā. Te ’oto o tō’u metua vahine i te mana’ora’a e fa’aru’e au i te fare, ’ua fa’atata roa e’ita tā’u e nehenehe e fa’a’oroma’i fa’ahou ; ’e ’āhani ’aita te vārua i roto iā’u, ’ua fa’aea vau i reira. ’Ua nā ’ō mai tō’u metua vahine ē, e mea maita’i a’e nāna e huna iā’u i roto i te repo, i te haerera’a ’o vau ana’e i roto i terā ao aroha ’ore.
« [‘E Phebe] ’ua parau ’oia iā’u ma te huru māere, ‘e ho’i mai ānei ’oe mai te mea e ’ite ’oe e mea hape te ha’apa’ora’a momoni ?’
« ’Ua pāhono atu vau : ‘’ē māmā ; e ho’i mai au’ […] ’Ua tāmarū tā’u pāhonora’a i tōna pe’ape’a ; ’ua fa’a’oto rahi rā te reira ia māua nō te ta’a-’ē-ra’a. I te taera’a mai te taime nō tō’u revara’a, ’aita i ti’a iā’u ’ia parau atu i tō’u aroha ia rātou ; nō reira ’ua pāpa’i au i tā’u fa’atau aroha ia rātou tāta’itahi, ’ua vaiiho atu i te reira i ni’a i te ’aira’amā’a, ’ua pou vitiviti mai na te ’ē’a ’e ’ua tomo atu i roto i te pere’o’o. Mai te reira tō’u fa’aru’era’a i te ’utuāfare iti o tō’u vai-tamari’i-ra’a, nō te tā’amu atu i tō’u orara’a i tō te feiā mo’a a te Atua ».
I roto i te hō’ē poro’i fa’atau aroha, ’ua pāpa’i Phebe :
« Tō’u nā metua here iti ē—tē fa’aru’e nei au i teienei i te tāpo’i o tō’u fare metua nō te hō’ē tau…’aita vau i ’ite e aha te maorora’a—e ’ere rā ma te māna’o māuruuru ’ore nō te hāmani maita’i tā’u i fāri’i mai tō’u tamari’ira’a ē tae roa mai i teienei—e au ra ē, tē fa’aue mai rā te Ra’i e taui i te reira i teienei. E vaiiho ana’e te reira i roto i te rima o te Ra’i ’e e ha’amāuruuru ana’e nō te fa’ati’ara’a mai ia tātou ’ia ora ’āmui ē ’ia maoro atu ā i roto i te mau huru tupura’a fa’ahiahia a’e i tā tātou e ora nei, ma te ti’aturi e riro ’ei maita’i nō tātou mai te mea ’ua here tātou i te Atua nā ni’a a’e i te mau mea ato’a. E mata na tātou i te ’ite ē, e nehenehe tātou e pure i te hō’ē Atua ’ōtahi ’o tē fa’aro’o nei i te mau pure ateate o tāna mau poietera’a ato’a ’e e hōro’a mai ia tātou i te mea maita’i roa a’e nō tātou […]
« Māmā, tē ti’aturi nei au ē ’o te hina’aro teie o te Atua nō’u, ’ia haere au i te pae to’o’a o te rā ’e ’ua pāpū roa iā’u ē nō te hō’ē tau roa. I teienei, ’ua mātara te ’ē’a […] tē ti’aturi nei au ē nā te vārua o te Fatu i nā reira, ’ua rava’i te reira nō te mau mea ato’a. ’Eiaha e ha’ape’ape’a nō tā ’ōrua tamari’i ; e tāmāhanahana te Fatu iā’u. Tē ti’aturi nei au ē e aupuru mai te Fatu iā’u ’e e hōro’a mai iā’u i te mea maita’i roa a’e nō’u […] Tē haere nei au nō te mea tē pi’i mai nei tō’u Fatu iā’u—’ua ha’apāpū mai ’oia i tā’u hōpoi’a ».