31 nō Māti–6 nō ’Ēperēra : « E ha’aputuputu mai Iesu Mesia i tōna ra mau ta’ata »

Te Ha’api’ira’a Tumu ’e te mau Fafaura’a 29

Noa atu ē ’ua fa’anahohia Te ’Ēkālesia a Iesu Mesia i te matahiti 1830, e rave rahi parau mau o te ’evanelia tei ’ore ā i heheuhia mai, ’e e rave rahi melo mātāmua o te ’Ēkālesia e uira’a tā rātou. ’Ua tai’o rātou i te mau parau tohu i roto i te Buka a Moromona nō ni’a i te ha’aputuputura’a o ’Īserā’ela ’e te patura’a ia Ziona (hi’o 3 Nephi 21). Nāhea te reira e tupu ai ? Te mau heheura’a tā Hiram Page i parau ’ua fāri’i ’oia e fa’ahiti ra i ni’a i te reira tumu parau, nā te reira i fa’arahi roa atu ā te ānoenoe [curiosite] o te mau melo (hi’o Te Ha’api’ira’a Tumu ’e te mau Fafaura’a 28). ’Ua uiui te mana’o o te tahi mau ta’ata nō ni’a i te hi’ara’a o Adamu ’e o Eva ’e nō te pohe pae vārua. ’Ua fāri’i poupou te Fatu i teie mau uira’a i te matahiti 1830, ’e tē fāri’i poupou nei ’oia i tā tātou mau uira’a i teie mahana. « ’O tā ’outou e ani mai nā roto i te fa’aro’o », ’ua parau ’oia i te mau feiā mo’a, « ma te tāhō’ēhia i te pure mai te au i tā’u ra fa’auera’a, e fāri’i ïa ’outou i te reira » (Te Ha’api’ira’a Tumu ’e te mau Fafaura’a 29:6). ’Oia ïa, mai tā teie heheura’a maita’i o te ha’api’ira’a tumu i roto i Te Ha’api’ira’a Tumu ’e te mau Fafaura’a 29 e fa’a’ite nei, e pāhono mai te Fatu i te tahi taime i tā tātou mau uira’a ma te hōro’a mai ia tātou i te parau mau ’e te ’ite hau atu i te mea tā tātou i ani atu.

Mau mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 29

E fa’anahora’a tā te Metua i te ao ra nō te fa’aorara’a i tāna mau tamari’i.

Tē ha’api’i nei Te Ha’api’ira’a Tumu ’e te mau Fafaura’a 29 e rave rahi parau mau nō ni’a i te fa’anahora’a a te Atua nō ’oe. ’A tai’o noa ai ’oe, ’a mā’imi mai i te mau parau mau tā ’oe i ’apo mai nō ni’a i te mau tuha’a tāta’itahi i muri nei nō tāna fa’anahora’a :

• Te orara’a hou te tāhuti nei (hi’o te mau ’īrava 36–37)

• Te poietera’a (hi’o te mau ’īrava 31–33)

• Te hi’ara’a o Adamu ’e o Eva (hi’o te mau ’īrava 40–41)

• Te orara’a tāhuti nei (hi’o te mau ’īrava 39, 42–45)

• Te tāra’ehara a Iesu Mesia (hi’o te mau ’īrava 1, 42–43, 46–50)

• Te ti’afa’ahoura’a (hi’o te mau ’īrava 13, 26)

• Te ha’avāra’a hope’a (hi’o te mau ’īrava 12–13, 27–30)

E aha te mau ha’amāramaramara’a tā ’oe i roa’a mai ? Mai te mea e tauturu te reira ia ’oe, e nehenehe ’oe e pāpa’i i te reira i te vāhi i fa’ata’ahia ’e te mau hōho’a i te pae hope’a o teie arata’i ha’api’ira’a. Nāhea teie mau parau mau i fa’auru i tō ’oe orara’a ?

Hi’o ato’a Topics and Questions [Mau tumu parau ’e mau uira’a], « Fa’anahora’a o te fa’aorara’a », Gospel Library.

Fa’ata’ara’a maita’i nō roto mai te Come Unto Me [Haere mai iā’u nei], nā Jenedy Paige

Te Ha’api’ira’a Tumu ’e te mau Fafaura’a 29:1–28

Tē ani manihini mai nei Iesu Mesia iā’u ’ia tauturu i te ha’aputuputu mai i tōna nuna’a hou tōna ho’i-piti-ra’a mai.

Tē parau nei Iesu Mesia nō te ha’aputuputura’a i tōna nuna’a « mai tā te moa e ha’aputuputu i tāna mau fanau’a i raro a’e i tōna pererau » (Te Ha’api’ira’a Tumu ’e te mau Fafaura’a 29:2). E aha tā teie fa’aaura’a e ha’api’i nei ia ’oe nō ni’a ia Iesu Mesia ? E aha te tahi atu mau mana’o ’aore rā mau fa’aurura’a i tae mai ia ’oe ’a ’imi maita’i ai ’oe i te fa’ahōho’ara’a o te hō’ē moa ufa ’e te mau fanau’a i roto i teie arata’i ha’api’ira’a ? ’A feruri na i te mea tā ’oe i putapū i te ha’aputuputura’a Iesu Mesia ia ’oe ’e te parurura’a ia ’oe.

’A tai’o ai ’oe Te Ha’api’ira’a Tumu ’e te mau Fafaura’a 29:1–11, ’a ’imi mai i te mau mana’o nō ni’a :

• ’O vai te ha’aputuputuhia.

• E aha te aura’a ’ia « ha’aputuputu mai » i te Mesia.

• Nō te aha tātou e ha’aputuputu ai iāna ra.

’A feruri na, nō te aha ’oe e hina’aro ai i te tahi atu mau ta’ata ’ia ha’aputuputu mai ia Iesu Mesia ra. E aha tā ’oe e putapū nei e fa’auruhia e rave nō te tauturu ?

E nehenehe ’oe e uiui ia ’oe iho i taua ā mau uira’a ra ’a māta’ita’i ai i te video « A Witness of God » (Gospel Library) ’aore rā te tai’ora’a ’aore rā te fa’aro’ora’a i te hō’ē hīmene nō ni’a i te ha’aputuputura’a, mai te « Pi’i mai ra te Atua » (Te mau Hīmene, N°7). I tō ’oe mana’o, e aha tā te Fatu e tāmata nei i te ha’api’i ia ’oe nō ni’a i tāna ’ohipa nō te ha’aputuputura’a ?

A Witness of God

Elder Neil L. Andersen describes how all of God's children are pieces of a large puzzle in preparation for the Second Coming of Jesus Christ.

’Ua parau te peresideni Russell M. Nelson : « I teienei rā, tē tupu nei te ha’aputuputura’a i roto i te mau fenua tāta’itahi. ’Ua fa’aoti te Fatu i te ha’amaura’a o Ziona i roto i te bāsileia i reira ’oia i te hōro’ara’a i tāna feiā mo’a i tō rātou fānaura’a ’e tō rātou ti’ara’a bāsileia » (« Te ha’aputuputura’a ia ’Īserā’ela i ha’apurara-’ē-hia », Liahona, Novema 2006, 81). Nāhea teie ha’aputuputura’a i te tauturu ia tātou « ’ia fa’aineinehia nō ni’a i te mau mea ato’a ra » nō te tae-piti-ra’a mai o te Fa’aora ? (’īrava 8 ; hi’o ato’a ’īrava 14–28).

Hi’o ato’a Russell M. Nelson ’e Wendy W. Nelson,« Ti’aturira’a nō Ziona » (purera’a nā te feiā ’āpī ’ati ti’a i te ao, 3 nō Tiunu 2018), Vaira’a buka ’evanelia ; D. Todd Christofferson, « Te ha’api’ira’a tumu nō te rirora’a », Liahona, Novema 2022, 53–56 ; Topics and Questions [Mau tumu parau ’e mau uira’a], « Gathering of Israel [Ha’aputuputura’a o ’Īserā’ela] », Gospel Library.

Te Ha’api’ira’a Tumu ’e te mau Fafaura’a 29:31–35

« Nō te pae vārua te mau mea ato’a iā’u nei ».

’A ’imi maita’i ai ’oe Te Ha’api’ira’a Tumu ’e te mau Fafaura’a 29:31–35, ’a ui ia ’oe iho, « mai te aha te mau fa’auera’a ato’a e riro ai ’ei mea pae vārua ? » E nehenehe ’oe e tāpura i te tahi mau fa’auera’a ’e e feruri i te mau parau mau pae vārua e tū’ati ia rātou tāta’itahi. E tauturu te hi’o-fa’ahou-ra’a te Nō te pūai o te feiā ’āpī : E arata’ira’a nō te ravera’a i te mau mā’itira’a—tē ha’api’i nei te reira i te tahi o te mau parau mau mure ’ore i muri mai e rave rahi mau fa’auera’a a te Atua.

Nāhea te ’itera’a ē « te mau mea ato’a… e mea pae vārua » i te fa’atupu mai i ni’a ia ’oe i tā ’oe huru hi’ora’a i te mau fa’auera’a a te Atua ? ’A feruri ato’a ’ia mā’imi i te hō’ē aura’a ’aore rā te hō’ē tumu pae vārua i roto i te tahi atu mau tuha’a o tō ’oe orara’a.

Hi’o ato’a 2 Nephi 9:39.

Rōtahi i ni’a ia Iesu Mesia. « Te mau tumu parau ato’a o te ’evanelia ’o te hō’ē ïa rāve’a nō te ha’api’i ’e nō te ’apo mai nō ni’a ia Iesu Mesia » (Ha’api’ira’a mai tā te Fa’aora, 6). E aha tā ’oe i ha’api’i mai nō ni’a i tōna mau huru maita’i, tōna mau ti’ara’a, ’e tōna hi’ora’a maita’i ’a tai’o ai ’oe Te Ha’api’ira’a Tumu ’e te mau Fafaura’a 29 ?

Te Ha’api’ira’a Tumu ’e te mau Fafaura’a 29:36–50

’Ua ho’o mai Iesu Mesia ia tātou i te hi’ara’a.

Nāhea ’oe ’ia fa’a’ohipa Te Ha’api’ira’a Tumu ’e te mau Fafaura’a 29:36–50 nō te fa’ata’a atu, nō te aha tātou e tītau ai i te tāra’ehara nā roto ia Iesu Mesia ?

’Ua hōpoi mai te hi’ara’a o Adamu ’e o Eva i te pohe ’e te hara i te ao nei, terā rā ’ua fa’aineine ato’a te reira i te ’ē’a nō te tāra’ehara ’e te ’oa’oa nā roto i te Mesia. Mā te tāpe’ara’a i te reira i roto i te ferurira’a, ’a tai’o te mau ’īrava 39–43 ’e ’a pāpa’i i te mau ta’o ’e te mau pereota ’o tē hōro’a mai i te ’oa’oa ia ’oe. E aha te mea tā ’oe e fa’ahiahia nei nō ni’a i te mea tā Adamu ’e tā Eva i parau nō ni’a i te hi’ara’a i roto te Mose 5:10–12 ?

Hi’o ato’a « Why We Need a Savior » (video), Gospel Library.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

Nō te tahi atu mau mana’o, ’a hi’o te mau ve’a Liahona ’e Nō te pūai o te feiā ’āpī nō teie ’āva’e.

Mana’o nō te ha’api’i i te mau tamari’i

Te Ha’api’ira’a Tumu ’e te mau Fafaura’a 29

E fa’anahora’a tā te Metua i te ao ra nō te fa’aorara’a i tāna mau tamari’i.

• Nō te ha’amata i te hō’ē ’āparaura’a nō ni’a i te fa’anahora’a a te Metua i te ao ra nō tātou, e nehenehe ’outou ’e tā ’outou mau tamari’i e paraparau nō ni’a i te hō’ē taime ’a fa’atupu ai ’outou i te hō’ē fa’anahora’a, mai te hō’ē tere ’aore rā te fa’aotira’a i te hō’ē ’ohipa. E nehenehe ato’a ’outou e fa’a’ite atu i te mau hi’ora’a nō te mau fa’anahora’a, mai te hō’ē tārena ’e te mau ’ohipara’a tei pāpa’ihia i ni’a iho, ’aore rā, te mau arata’ira’a nō te hāmani i te hō’ē ’ohipa. Nō te aha e mea faufa’a te mau fa’anahora’a ? E nehenehe ’outou i muri iho e paraparau nō ni’a i te mea tā te Metua i te ao ra e hina’aro nei e rave fa’aoti ’e e nāhea tāna fa’anahora’a i te tauturu ia tātou ’ia rave fa’aoti i te reira.

• E nehenehe ’outou e fa’a’ohipa i te mau hōho’a i te pae hope’a o teie arata’i nō te tauturu i tā ’outou mau tamari’i ’ia ’ite mai i te mau ’īrava i roto i Te Ha’api’ira’a Tumu ’e te mau Fafaura’a 29, ’o tē ha’api’i nei nō ni’a i te mau tuha’a rau o te fa’anahora’a a te Metua i te ao ra. E nehenehe ato’a ’outou e tāpūpū i te mau hōho’a ’e e ani i tā ’outou mau tamari’i ’ia fa’anaho tano maita’i i te reira. Nō te aha tātou e māuruuru ai ’ia ’ite ē, e fa’anahora’a tā te Metua i te ao ra nō tātou ? Nāhea te ’itera’a nō ni’a i te reira i te fa’auru i tō tātou orara’a tāmāhana ?

Te Ha’api’ira’a Tumu ’e te mau Fafaura’a 29:1–2, 7–8

E ha’aputuputu Iesu Mesia i tōna nūna’a hou ’oia ’a ho’i fa’ahou mai ai.

• E nehenehe te fa’ahōho’ara’a i raro nei nō te hō’ē moa e ha’aputuputu ra i tāna mau fanau’a ’aore rā, i te video « Chicks and Hens » (ChurchofJesusChrist.org), e tauturu i tā ’outou mau tamari’i ’ia hi’o i te fa’aaura’a i roto Te Ha’api’ira’a Tumu ’e te mau Fafaura’a 29:1–2. I muri iho e nehenehe ’outou e tai’o ’āmui i teie mau ’īrava ’e ’ia ’āparau te tahi ’e te tahi mea nāhea te hō’ē moa ufa e pāruru i tāna mau fanau’a, ’e nāhea te reira e tū’ati ai i te mea tā te Fa’aora e nehenehe e rave nō tātou.

  Chicks and Hens

  

  I Would Gather Thee [E ha’aputuputu vau ia ’oe’, nā Liz Lemon Swindle

• E aha te mea e fa’auru i tā ’outou mau tamari’i ’ia hina’aro e tauturu i te Fa’aora ’ia ha’aputuputu i tōna nūna’a ? Penei a’e e hina’aro rātou e fa’aro’o i te ’ohipa i tupu nō te hō’ē ta’ata tei « ha’aputuputu mai » ia Iesu Mesia ma te ’āmuira’a mai i tāna ’Ēkālesia. ’Ei hi’ora’a, nā vai i vauvau mai i tō ’outou ’utuāfare te ’Ēkālesia ? Nāhea tātou i te ha’amaita’ira’ahia ma te fāri’ira’a i te pi’ira’a a te Fa’aora ’ia ha’aputuputu mai iāna ra ? Nāhea tātou i te tauturu ia vetahi ’ē ’ia ha’aputuputu mai iāna ra ? (Hi’o « A Message for Children from President Russell M. Nelson [E parau poro’i nā te mau tamari’i nā roto mai i te peresideni Russell M. Nelson] » [vidéo], ChurchofJesusChrist.org).

  Video: A Message for Children from President Russell M. Nelson

  In the 2021 Friend to Friend event, President Russell M. Nelson gave this message to children around the world.

Te Ha’api’ira’a Tumu ’e te mau Fafaura’a 29:11

E ho’i fa’ahou mai Iesu Mesia.

• E nehenehe te hō’ē hōho’a nō te ho’i-piti-ra’a mai o te Fa’aora (mai te Buka hōho’a o te ’evanelia N°66) ’aore rā, hō’ē hīmene nō ni’a i te reira (mai te « I tōna ho’ira’a mai, » Buka hīmene nā te mau tamari’i, 46–47) e tauturu ia ’outou ’e i tā ’outou mau tamari’i ’ia ’āparau Te Ha’api’ira’a Tumu ’e te mau Fafaura’a 29:11. E tauturu i tā ’outou mau tamari’i ’ia hi’o maita’i i te mau pereota i roto i te pāpa’ira’a mo’a e tū’ati i te hō’ē mea i roto i te hōho’a ’aore rā, i te hīmene. ’Ia fa’a’ite mai te tahi ’e te tahi i te mea tā rātou i putapū nō ni’a i te ho’i-fa’ahou-ra’a mai o Iesu Mesia i te fenua nei.

Nō te tahi atu mau mana’o, ’a hi’o te ve’a Hoa nō teie ’āva’e.