Abril 28–Mayo 4: “Akong Balaod sa Pagdumala sa Akong Simbahan”

Doktrina ug mga Pakigsaad 41–44

Ang Simbahan paspas nga mitubo niadtong 1830 ug 1831, ilabi na ang pag-apil sa dakong grupo sa bag-ong mga miyembro didto sa Kirtland, Ohio. Kini nga pagtubo nakapaikag ug nakapadasig sa mga Santos, apan nakahatag usab kini og pipila ka hagit. Unsaon nimo sa paghiusa ang paspas nga midaghan nga grupo sa mga tumutuo? Labi na, unsa ang imong buhaton kon nagdala sila og mga doktrina ug mga tulumanon gikan sa ilang miaging tinuohan? Pananglitan, sa dihang miabot si Joseph Smith sa Kirtland sa sayo nga bahin niadtong Pebrero 1831, iyang nasuta nga ang bag-ong mga miyembro nagbahin sa komon nga kabtangan uban sa tinuoray nga tinguha sa pagsundog sa mga Kristiyano sa Bag-ong Tugon (tan-awa sa Mga Buhat 4:32–37). Ang Ginoo mihimo og pipila ka importante nga mga pagkorehir ug mga pagklaro bahin niini ug sa ubang mga hilisgotan. Siya mihimo niini sa kinatibuk-ang paagi pinaagi sa usa ka pagpadayag nga nahisulat diha sa Doktrina ug mga Pakigsaad 42 nga Iyang gitawag og “akong balaod sa pagdumala sa akong simbahan” (bersikulo 59). Niini nga pagpadayag, atong makat-onan ang mga kamatuoran nga mahinungdanon sa pag-establisar sa Simbahan sa Ginoo sa ulahing mga adlaw. Ug atong mahibaloan nga aduna pay daghan nga angay natong makat-onan: “Kon kamo mangayo,” ang Ginoo misaad, “kamo makadawat og pagpadayag ug dugang nga pagpadayag, kahibalo ug dugang nga kahibalo” (Doktrina ug mga Pakigsaad 42:61).

Tan-awa usab sa Mga Santos, 1:130–36.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 41

“Siya nga nakadawat sa akong balaod ug nagbuhat niini, ang mao akong tinun-an.”

Sa sayo sa 1831, ang mga Santos nagsugod sa pagpundok didto sa Ohio. Matinguhaon sila nga makadawat sa balaod nga gisaad sa Dios nga ipadayag didto (tan-awa sa Doktrina ug mga Pakigsaad 38:32). Apan una, Siya mitudlo kon sa unsang paagi nga ang Iyang mga disipulo maandam sa pagdawat sa Iyang balaod. Unsa nga mga baroganan ang imong nakita diha sa Doktrina ug mga Pakigsaad 41:1–6 nga makatabang unta sa mga Santos nga madawat ang balaod sa Dios? Sa unsang paagi nga kining mga baroganan makatabang nimo sa pagdawat og mga panudlo gikan Kaniya?

Tan-awa usab sa “A Bishop unto the Church [Usa ka Bishop ngadto sa Simbahan],” diha sa Konteksto sa mga Pagpadayag [Revelations in Context], 77–83.

Doktrina ug mga Pakigsaad 42

Ang Ginoo naghatag kanako og mga sugo tungod kay nahigugma Siya kanako.

Ang mga Santos mikonsiderar sa pagpadayag nga makita diha sa Doktrina ug mga Pakigsaad 42:1–72 nga usa sa labing importante nga nadawat sa Propeta. Usa kadto sa unang mga pagpadayag nga gimantala. Sa daghang katuigan, ang mga Santos mitawag lang niini og “ang balaod.” Bisan kon kini nga seksiyon wala maglakip sa tanang sugo o balaod sa Ginoo, angay kining pamalandongan kon ngano nga kini nga mga baroganan importante alang sa bag-ong gipahiuli nga Simbahan. Nganong importante kini alang kanato karon?

Tungod kay ang seksiyon 42 medyo taas, mahimo nimong ikonsiderar ang pagtuon sa mas gamay nga bahin niini, sama sa mosunod. Ilha ang mga baroganan nga gitudlo diha sa matag usa, ug ikonsiderar kon sa unsang paagi nga kini nga mga balaod usa ka timailhan sa gugma sa Ginoo alang sa Iyang katawhan.

• Mga bersikulo 4–9, 11–17, 56–58

• Mga bersikulo 18–29

• Mga bersikulo 30–31

• Mga bersikulo 40–42

• Mga bersikulo 43–52

Ngano nga ang Dios naghatag kanato og mga balaod ug mga sugo? Sa unsang mga paagi nga ikaw napanalanginan pinaagi sa pagkahibalo ug pagsunod niini nga mga sugo?

Doktrina ug mga Pakigsaad 42:30–42

“Maghinumdom sa mga kabos.”

Isip kabahin sa balaod nga gipadayag diha sa seksiyon 42, ang Ginoo mitudlo sa Iyang mga Santos kon sa unsang paagi nga sila, sama sa mga sumusunod ni Kristo sa karaang panahon, nga “gipanag-usahan sa pag-ambit ang tanang mga butang” (Mga Buhat 2:44; 4 Nephi 1:3), nga “walay kabos taliwala kanila” (Moises 7:18). Unsa ang imong nakat-onan gikan sa Doktrina ug mga Pakigsaad 42:30–42 mahitungod kon giunsa mga Santos sa pagtuman ang balaod sa pagpahinungod? (Ang pagpahinungod nagpasabot nga paggahin sa usa ka butang alang sa usa ka sagrado nga katuyoan.)

Bisan kon kita sa pagkakaron walay “gipanag-usahan sa pag-ambit ang tanang mga butang”, diha sa mga templo ang mga Santos sa Ulahing mga Adlaw nakigsaad nga motuman sa balaod sa pagpahinungod. Sa unsang paagi nga ikaw makapahinungod sa unsay gihatag sa Dios kanimo sa pagpanalangin sa mga tawo nga nanginahanglan? Tingali ang pagkanta og usa ka awit sama sa “Kay Gihatagan Ko og Daghan” (Mga Himno, nu. 132) makahatag nimo og mga ideya.

Tan-awa usab sa Sharon Eubank, “Ako Nag-ampo nga Siya Mogamit Kanato,” Liahona, Nob. 2021, 53–56; “The Law [Ang Balaod],” diha sa Konteksto sa mga Pagpadayag [Revelations in Context], 93–95.

Christ and the Rich Young Ruler [Si Kristo ug ang Adunahan nga Batan-ong Magmamando], ni Heinrich Hofmann

Doktrina ug mga Pakigsaad 42:61, 65–68; 43:1–16

Ang Dios naghatag og pagpadayag sa paggiya sa Iyang Simbahan—ug sa paggiya kanako.

Hunahunaa nga nakig-istorya ka sa bag-ong miyembro sa Simbahan nga naghinamhinam nga masayod nga ang Simbahan gigiyahan pinaagi sa pagpadayag. Unsaon nimo sa paggamit ang Doktrina ug mga Pakigsaad 43:1–16 aron matabangan siya nga makahibalo mahitungod sa pamaagi sa Ginoo sa paggiya sa Iyang Simbahan pinaagi sa Iyang propeta? Unsaon nimo sa paggamit ang Doktrina ug mga Pakigsaad 42:61, 65–68 sa pagtudlo mahitungod sa pagdawat og personal nga pagpadayag?

Unsa ang pipila ka “malinawon nga mga butang” ug makapalipay nga mga butang nga imong nadawat gikan sa Ginoo pinaagi sa Iyang Espiritu?

Sa pagkat-on mahitungod kon unsaon sa mga lider sa Simbahan sa pagpaminaw sa tingog sa Ginoo, mahimo nimong tan-awon ang usa sa mga bidyo sa “Paminaw Kaniya” nga koleksiyon diha sa Gospel Library. Ikonsiderar ang paghimo og imong kaugalingong bidyo, nagpasabot kon sa unsang paagi nga ang Ginoo nakighinabi kanimo.

Tan-awa usab sa Russell M. Nelson, “Pagpadayag alang sa Simbahan, Pagpadayag alang sa atong mga Kinabuhi,” Liahona, Mayo 2018, 93–96; “All Things Must Be Done in Order [Ang Tanan nga mga Butang Kinahanglan Gayod nga Himoon sa Kahusay],” diha sa Konteksto sa mga Pagpadayag [Revelations in Context], 50–53.

Gamit og mga leksiyon nga naggamit og butang. Ang mga leksiyon nga naggamit og butang o mga biswal nga tabang makatabang sa mga tawo nga imong gitudloan nga masabtan ang mga kamatuoran sa ebanghelyo ug mas mahinumdoman kini og dugay. Pananglitan, mahimo ka nga mogamit og usa ka puzzle, itipon ang piraso ngadto sa usa ka piraso, sa pagtudlo mahitungod sa pagdawat og “pagpadayag ug dugang nga pagpadayag, kahibalo ug dugang nga kahibalo” (Doktrina ug mga Pakigsaad 42:61).

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Edward Partridge

• Makasaysayanon nga Kirtland

• Pagpahinungod ug Pagkatinugyanan

• Bishop

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 41:5

Ang usa ka disipulo mao ang usa ka tawo kinsa nagdawat sa balaod sa Dios ug nagsunod niini.

• Aron matabangan ang imong mga anak nga mahibalo kon unsa ang ipasabot nga mahimong usa ka disipulo ni Jesukristo, mahimo nimong isulat ang Doktrina ug mga Pakigsaad 41:5 diha sa usa ka piraso nga papel, ipabiling blangko kon asa nahimutang ang pulong nga disipulo. Dayon pangitaon nila diha sa bersikulo 5 ang nawala nga pulong. Sumala niini nga bersikulo, unsa ang ipasabot nga mahimong usa ka disipulo ni Jesukristo? Unsaon nato sa pagpaningkamot nga mahimong mas maayo nga mga disipulo ni Kristo?

Doktrina ug mga Pakigsaad 42:2

Ako malipayon kon ako mosunod sa Ginoo.

• Ang imong mga anak tingali malingaw nga magdula og usa ka dula nga nagkinahanglan kanila sa pagminaw og maayo ug sa pagsunod sa mga instruksiyon. Mahimo nimong gamiton kini nga dula sa paghisgot mahitungod kon unsay ipasabot sa “patalinghog ug paminaw ug pagsunod” sa Ginoo (Doktrina ug mga Pakigsaad 42:2). Unsa nga mga instruksiyon ang Iyang gihatag kanato? Sa unsang paagi nga kita napanalanginan pinaagi sa pagsunod sa Iyang mga balaod ug mga sugo?

• Mahimo nimong kompletohon ang pahina sa kalihokan karon nga semana uban sa imong mga bata. Mahimo usab ninyong kantahon ang usa ka awit mahitungod sa pagsunod sa mga balaod sa Dios, sama sa “Gusto Ko nga Mosunod sa Ebanghelyo” (Songbook sa mga Bata, 72). Ikonsiderar ang pagpakigbahin sa usag usa kon sa unsang paagi nga ang pagsunod sa mga balaod sa Dios nakahatag kaninyo og kalipay .

  

Doktrina ug mga Pakigsaad 42:38

Nagserbisyo ako ni Jesukristo kon ako nagserbisyo sa uban.

• Human sa pagbasa og dungan sa Doktrina ug mga Pakigsaad 42:38, tabangi ang imong mga anak sa paghunahuna og mga paagi nga sila makaserbisyo ni Jesus pinaagi sa pagserbisyo sa uban. Makakita sila og pipila ka ideya gikan sa bidyo nga “Pass It On [Ipasa Kini]” (ChurchofJesusChrist.org). Mahimo usab sila nga motan-aw og mga hulagway sa Manluluwas nga nagtabang sa uban, nag-ayo sa mga masakiton, o nagmabination sa mga bata (tan-awa sa Pakete sa mga Hulagway sa Ebanghelyo, mga nu. 42, 47).

  Pass It On

  Children around the world have taken President Thomas S. Monson's counsel to find a way to serve others.

  

• Mahimo usab nimong ipakita sa mga bata ang piraso nga papel sa Ikapulo ug Ubang mga Halad ug maghisgot mahitungod kon unsaon kini sa paggamit aron mohatag sa unsay anaa kanato sa pagpanalangin sa uban (tan-awa usab sa “Ikapulo ug mga Donasyon sa Online”).

Doktrina ug mga Pakigsaad 43:1–7

Ang propeta lamang ang makadawat og pagpadayag alang sa tibuok Simbahan.

• Dapita ang imong mga anak sa paghanduraw nga adunay usa ka tawo nga nagbarog sa panagtigom alang sa pagpamatuod ug miingon sa ward nga nakadawat siya og pagpadayag alang sa tibuok Simbahan (pananglitan, usa ka pagpadayag nga kinahanglang dili na kita mokaon og mga carrot o kinahanglang manghugas kita sa atong mga kamot gamit ang gatas imbes tubig.) Nag-ingon siya nga kita kinahanglan maminaw ngadto sa unsay iyang isulti kay sa ngadto sa propeta. Unsa kaha ang sayop niana? Mahimo dayon kamong magtuon og dungan sa Doktrina ug mga Pakigsaad 43:1–7 aron mahibaloan kon sa unsang paagi nga ang Ginoo mohatag og mga sugo ngadto sa Iyang Simbahan.

• Mahimo usab ka nga mopakita og litrato sa buhi nga propeta ug modapit sa mga bata sa pagpakigbahin og usa ka butang nga iyang gitudlo bag-ohay lang. Kon nagkinahanglan sila og tabang, ipakigbahin ang usa ka mubo nga bidyo o tudling gikan sa bag-ohay nga mensahe sa kinatibuk-ang komperensiya. Nganong usa kini ka panalangin nga adunay buhi nga propeta karon?

Alang sa dugang nga mga ideya, tan-awa ang isyu karong bulana sa Higala nga magasin.

Joseph Smith Preaching [Si Joseph Smith Nagsangyaw], ni Sam Lawlor