28 nō ’Ēperēra–4 nō Mē : « Tā’u nei ture nō te fa’atere i tā’u nei ’Ēkālesia »

Te Ha’api’ira’a Tumu ’e te mau Fafaura’a 41–44

’Ua tupu ’oi’oi te ’Ēkālesia i te matahiti 1830 ’e 1831, i te taime iho ā rā ’a putuputu mai ai te melo ’āpī i Kirtland, Ohio. E mea fa’ahiahia mau ’e te fa’aitoito ho’i teie tupura’a nō te feiā mo’a, tē vai ato’a rā te ha’atāfifira’a. Nāhea ’ia tāhō’ē i te hō’ē pupu ta’ata fa’aro’o e tupu vitiviti ra ? ’Ia pāpū maita’i, e aha tā ’outou e rave ’ia hōpoi ana’e mai rātou i te ha’api’ira’a tumu ’e te mau ravera’a o tā rātou ha’apa’ora’a na mua a’e ? ’Ei hi’ora’a, i te taera’a Iosepha Semita i Kirtland i te ’ōmuara’a nō ’āva’e Fepuare 1831, ’ua ’ite atu ’oia i te mau melo ’āpī e ’ōpere ra i tā rātou mau tao’a ’āmui, i roto i te hō’ē tāmatara’a mau e pe’e i te mau keresetiāno nō te Faufa’a ’Āpī (hi’o Te mau ’Ohipa 4:32–37). ’Ua rave te Fatu i te tahi mau fa’a’āfarora’a faufa’a rahi ’e te mau ha’apāpūra’a nō ni’a i te reira tumu parau ’e te tahi atu. ’Ua nā reira ’oia i te rahira’a maoti te hō’ē heheura’a tei pāpa’ihia i roto Te Ha’api’ira’a Tumu ’e te mau Fafaura’a 42 ’o tāna i pi’i « Tā’u ture nō te fa’aterera’a i tā’u nei ’Ēkālesia » (’īrava 59). I roto i teie heheura’a, e ha’api’i mai tātou i te mau parau mau niu nō te ha’amaura’a i te ’Ēkālesia a te Fatu i te mau mahana hope’a nei. ’E e ha’api’i mai tātou ē, te vai atu ā te mau mea e ti’a ’ia ha’api’i mai : « Mai te mea e ani mai ’outou », ’ua parau fafau mai te Fatu, « e fāri’i ïa ’outou i te heheura’a nā ni’a i te heheura’a, te ’ite nā ni’a i te ’ite » (Te Ha’api’ira’a Tumu ’e te mau Fafaura’a 42:61).

Hi’o ato’a Te feiā mo’a, 1:114–19.

Mana’o nō te ’apo i te ha’api’ira’a i te ’utuāfare ’e i te fare purera’a

Te Ha’api’ira’a Tumu ’e te mau Fafaura’a 41

« ’O ’oia ’o tē fāri’i i tā’u nei ture ma te ha’apa’o ho’i i te reira, ’o ’oia ïa tā’u nei pipi ».

I te ’ōmuara’a o te matahiti 1831, tē ha’amata ra te feiā mo’a i te ha’aputuputu i Ohio. ’Ua hīa’ai rahi rātou e fāri’i i te ture ’o tā te Atua i parau fafau e heheu mai ’oia i te reira (hi’o Te Ha’api’ira’a Tumu ’e te mau Fafaura’a 38:32). Nā mua rā, ’ua ha’api’i te Fatu nāhea tāna mau pipi i te fa’aineine ia rātou nō te fāri’i i tāna ture. E aha te mau parau tumu tā ’oe i ’ite mai i roto Te Ha’api’ira’a Tumu ’e te mau Fafaura’a 41:1–6 ’o te nehenehe e tauturu i te feiā mo’a ’ia fāri’i i te ture a te Atua ? Nāhea teie mau parau tumu e nehenehe ai e tauturu ia ’oe ’ia fāri’i i te mau arata’ira’a nā ’ō mai iāna ra ?

Te Ha’api’ira’a Tumu ’e te mau Fafaura’a 42

’Ua hōro’a mai te Fatu iā’u i te mau fa’auera’a nō te mea ’ua here ’oia iā’u.

’Ua fa’ariro te feiā mo’a i te heheura’a e vai ra i roto Te Ha’api’ira’a Tumu ’e te mau Fafaura’a 42:1–72 mai te hō’ē o te mau heheura’a faufa’a roa a’e tei fāri’ihia e te peropheta. Teie te hō’ē o te mau heheura’a mātāmua tei piahia. E rave rahi matahiti tō te feiā mo’a pi’ira’a i te reira ma te ’ōhie « te ture ». Noa atu ’aita teie tuha’a i tu’uhia i roto i te tā’āto’ara’a o te mau fa’auera’a ’aore rā o te mau ture a te Fatu, e mea ho’ona mau ’ia feruri nō te aha e mea faufa’a teie mau parau tumu nō te ’Ēkālesia tei fa’aho’i-’āpī-hia mai. Nō te aha e mea faufa’a rahi te reira nō tātou i teie mahana ?

Nō te mea e mea roa mau te tuha’a 42, e nehenehe ’oe e feruri e ’imi maita’i i te reira ma te tātuha’a i te reira, mai teie i muri nei. ’A ’ite mai i te mau parau tumu i ha’api’ihia i roto i te tuha’a tāta’itahi, ’e ’a feruri nāhea teie mau ture i te rirora’a ’ei tāpa’o nō te here o te Fatu i tōna mau ta’ata.

• Mau ’īrava 4–9, 11–17, 56–58

• Mau ’īrava 18–29

• Mau ’īrava 30–31

• Mau ’īrava 40–42

• Mau ’īrava 43–52

Nō te aha te Atua i hōro’a mai ai i te mau ture ’e te mau fa’auera’a ia tātou ? Mea nāhea ’oe i te ha’amaita’ira’ahia i te ’itera’a ’e i te pe’era’a i te mau fa’auera’a ?

Te Ha’api’ira’a Tumu ’e te mau Fafaura’a 42:30–42

« ’A ha’amana’o i te feiā veve ».

’Ei tuha’a nō te ture i heheuhia mai i roto te tuha’a 42, ’ua ha’api’i te Fatu i tāna feiā mo’a nāhea rātou e nehenehe ai e « ’āmui-tāhō’ē i tā rātou mau mea ato’a », mai te feiā pe’e i te Mesia i tahito ra (Te mau ’Ohipa 2:44 ; 4 Nephi 1:3), e « ’aore e ta’ata veve i rotopū ia rātou » (Mose 7:18). E aha tā ’oe i ha’api’i mai nā roto mai Te Ha’api’ira’a Tumu ’e te mau Fafaura’a 42:30–42, mea nāhea te feiā mo’a i te orara’a i te ture nō te ha’amo’ara’a ? (Te aura’a o te ha’amo’ara’a ’o te tu’ura’a ïa i te hō’ē mea i te hiti nō te hō’ē ’ōpuara’a mo’a).

Noa atu ā ’aita tātou i « ’āmui-tāhō’ē i te mau mea ato’a » i teie mahana, i roto i te mau hiero tē fafau nei te feiā mo’a i te mau mahana hope’a nei ’ia ora i te ture nō te ha’amo’ara’a. Nāhea ’oe e nehenehe ai e ha’amo’a i te mea tā te Atua i hōro’a nā ’oe nō te ha’amaita’i i te ta’ata i roto i te fifi ? Penei a’e te hīmenera’a i te hō’ē hīmene mai « Nō te mea ’ua rahi te mau ha’amaita’ira’a » (Te mau Hīmene, N°130), e nehenehe e hōro’a mai ia ’oe te mau mana’o ’āpī.

Hi’o ato’a Sharon Eubank, « Te pure nei au ’ia fa’a’ohipa ’oia ia tātou », Liahona, Novema 2021, 53–56 ;

Christ and the Rich Young Ruler [Te Mesia ’e te ha’apa’o ture tao’a rahi], nā Heinrich Hofmann

Te Ha’api’ira’a Tumu ’e te mau Fafaura’a 42:61, 65–68 ; 43:1–16

E hōro’a mai te Atua i te heheura’a nō te arata’i i tāna ’Ēkālesia—’e nō te arata’i iā’u.

’A feruri na ē tē paraparau ra ’oe i te hō’ē melo ’āpī o te ’Ēkālesia tei ’oa’oa i te ’itera’a ē, tē arata’ihia nei te ’Ēkālesia nā roto i te heheura’a. Nāhea ’oe i te fa’a’ohipa Te Ha’api’ira’a Tumu ’e te mau Fafaura’a 43:1–16 nō te tauturu iāna ’ia ha’api’i mai i te hōho’a fa’anahora’a a te Fatu, nō te arata’ira’a i tāna ’Ēkālesia nā roto mai i tāna peropheta ? Nāhea ’oe i te fa’a’ohipa Te Ha’api’ira’a Tumu ’e te mau Fafaura’a 42:61, 65–68 nō te ha’api’i nō ni’a i te fāri’ira’a i te heheura’a o te ta’ata iho ?

E aha te tahi o « te mau mea hau » ’e te mau mea ’oa’oa ’o tā ’oe i fāri’i nō ’ō mai i te Fatu ra nā roto mai i tōna Vārua ?

Nō te ha’api’i mai e mea nāhea tō te feiā fa’atere o te ’Ēkālesia fa’aro’ora’a i te reo o te Fatu, e nehenehe ’oe e māta’ita’i i te hō’ē o te mau vidéo i roto i te ha’aputura’a « Hear Him » i roto Gospel Library. ’A feruri i te hāmani i tā ’oe iho vidéo, ma te fa’ata’ara’a mea nāhea te Fatu i te paraparau mai ia ’oe.

Hi’o ato’a Russell M. Nelson, « Heheura’a nō te ’Ēkālesia, heheura’a nō tō tātou orara’a », Liahona, Mē 2018, 93–96.

Fa’a’ohipa i te mau ha’api’ira’a tao’a. E nehenehe te mau ha’api’ira’a tao’a ’aore rā te mau hōho’a e tauturu i te mau ta’ata tā ’oe e ha’api’i rā ’ia māramarama a’e i te mau parau mau o te ’evanelia ’e ’ia ha’amana’o maoro atu ā i te reira. ’Ei hi’ora’a, e nehenehe ’oe e fa’a’ohipa i te hō’ē puzzle, te tāpirira’a i te mau tuha’a tāta’itahi, nō te ha’api’i i ni’a i te fāri’ira’a i te « heheura’a nā ni’a i te heheura’a, te ’ite nā ni’a i te ’ite » (Te Ha’api’ira’a Tumu ’e te mau Fafaura’a 42:61).

Mana’o nō te ha’api’i i te tamari’i

Te Ha’api’ira’a Tumu ’e te mau Fafaura’a 41:5

Hō’ē pipi ’o te hō’ē ïa ta’ata ’o tē fāri’i i te mau ture a te Atua ’e ’o tē ha’apa’o i te reira.

• Nō te tauturu i tā ’outou mau tamari’i ’ia ’ite e aha te aura’a ’ia riro ’ei pipi nā Iesu Mesia, e nehenehe ’outou e pāpa’i Te Ha’api’ira’a Tumu ’e te mau Fafaura’a 41:5 i ni’a i te hō’ē ’api parau, ma te tūmā i te vāhi e vai rā te ta’o pipi. I muri iho, e nehenehe rātou e hi’o mai i roto i te ’īrava 5 te ta’o tei mo’e. ’Ia au i teie ’īrava, e aha te aura’a te rirora’a ’ei pipi nā Iesu Mesia ? Nāhea tātou i te tāmatara’a ’ia riro ’ei mau pipi maita’i a’e nā te Mesia ?

Te Ha’api’ira’a Tumu ’e te mau Fafaura’a 42:2

E ’oa’oa vau ’ia ha’apa’o āna’e au i te parau a te Fatu.

• E au paha tā ’outou mau tamari’i ’ia ha’uti i te hō’ē ha’uti ’o tē tītau ia rātou ’ia fa’aro’o maita’i ’e ’ia pe’e i te mau arata’ira’a. E nehenehe ’outou e fa’a’ohipa i teie ha’uti nō te paraparau nō ni’a i te aura’a « ’a ha’apa’o mai ’e ’a fa’aro’omai ’e ’a auraro » i te Fatu (Te Ha’api’ira’a Tumu ’e te mau Fafaura’a 42:2). E aha te mau arata’ira’a tā te Fatu i hōro’a mai ia tātou ? Nāhea tātou i te ha’amaita’ihia nā roto i te ha’apa’ora’a i tāna mau ture ’e tāna mau fa’auera’a ?

• E nehenehe ’outou e fa’aoti i te ’api fa’a’ana’anataera’a o teie hepetoma ’e tā ’outou mau tamari’i. E nehenehe ato’a ’outou e hīmene i te hō’ē hīmene nō ni’a i te ha’apa’ora’a i te mau ture a te Atua, mai te « Ora vau i te parau mau » (Buka hīmene nā te mau tamari’i, 72). ’A feruri ’ia fa’a’ite mai te tahi ’e te tahi, mea nāhea te ha’apa’ora’a i te mau ture a te Atua i te hōpoira’a mai ia ’outou te ’oa’oa.

  

Te Ha’api’ira’a Tumu ’e te mau Fafaura’a 42:38

Tē tāvini nei au ia Iesu Mesia ’ia tāvini ana’e au ia vetahi ’ē.

• I muri a’e i te tai’o-’āmui-ra’a Te Ha’api’ira’a Tumu ’e te mau Fafaura’a 42:38, ’a tauturu i tā ’outou mau tamari’i ’ia feruri i te mau rāve’a e nehenehe ai rātou e tāvini ia Iesu ma te tāvinira’a ia vetahi ’ē. E nehenehe rātou e ’ite mai i te tahi mau mana’o nā roto mai i te vidéo « Pass It On » (ChurchofJesusChrist.org). E nehenehe ato’a rātou e hi’o atu i te mau hōho’a o te Fa’aora e tauturu ra ia vetahi ’ē, te fa’aorara’a i tei ma’ihia ’aore rā te hāmani-maita’i-ra’a i te mau tamari’i (hi’o Buka hōho’a o te ’evanelia, N°42, 47).

  Pass It On

  Children around the world have taken President Thomas S. Monson's counsel to find a way to serve others.

  

• E nehenehe ’outou e fa’a’ite atu i tā ’outou mau tamari’i i te hō’ē ’api parau nō te tuha’a ’ahuru ’e te tahi atu mau ō, ’e e fa’ata’a atu nāhea ’ia fa’a’ohipa i te reira nō te hōro’a i te mea tā tātou e vai ra nō te ha’amaita’i ia vetahi ’ē.(hi’o ato’a « Te tuha’a ’ahuru ’e te tahi atu mau ō i ni’a i te natirara »).

Te Ha’api’ira’a Tumu ’e te mau Fafaura’a 43:1–7

’O te peropheta ana’e tē nehenehe e fāri’i i te heheura’a nō te ’Ēkālesia tā’āto’a.

• E ani i tā ’outou mau tamari’i ’ia feruri na ē, e ti’a mai te hō’ē ta’ata i ni’a i te hō’ē purera’a nō te ’itera’a pāpū ’e e parau i tō te pāroita ē, ’ua fāri’i ’oia i te hō’ē heheura’a nō te ’Ēkālesia tā’āto’a (’ei hi’ora’a, te hō’ē heheura’a ē ’eiaha fa’ahou tātou e ’amu i te taroti ’aore rā, ’ia hōroi i tō tātou rima i te ū ’eiaha i te pape). Tē parau nei ’oia ē, e ti’a ia tātou ’ia fa’aro’o i te mea tāna e parau ’eiaha rā i tā te peropheta. E aha te mea ’aita e tano ra i te reira ? E nehenehe ’outou i muri iho e ’imi ’āmui maita’i Te Ha’api’ira’a Tumu ’e te mau Fafaura’a 43:1–7 nō te ’ite mai, mea nāhea te Fatu ’ia hōro’a i te mau fa’auera’a i tāna ’Ēkālesia.

• E nehenehe ato’a ’outou e fa’a’ite atu i te hō’ē hōho’a o te peropheta ora, ’e e ani i te mau tamari’i ’ia fa’a’ite mai i te hō’ē mea tāna i ha’api’i ’aita i maoro a’e nei. Mai te mea e hina’aro rātou i te tauturu, ’a fa’a’ite i te hō’ē vidéo poto ’aore rā, e tai’o i te hō’ē parau poro’i nō te ’āmuira’a rahi i ma’iri a’e nei. Nō te aha e riro ai ’ei ha’amaita’ira’a ’ia vai mai te hō’ē peropheta ora i teie mahana ?

Nō te tahi atu mau mana’o, ’a hi’o te ve’a Hoa nō teie ’āva’e.

Joseph Smith Preaching [Iosepha Semita e poro haere ra], nā Sam Lawlor