Independence, Missouri, 1831, ni Al Rounds

Hunio 2–8: “Siaanep a Makiraman iti Nasayaat nga Aramid”

Doktrina ken Katulagan 58–59

Idi immuna a nakita dagiti elder ti Simbaan ti disso a pagpatakderan iti siudad ti Zion—Independence, Missouri—saan daytoy ti kas iti ninamnamada. Impagarup dagiti dadduma a masarakanda ti nadur-as, naganetget a komunidad a pagindegan ti natibker a grupo dagiti Santo. Ngem ketdi, nasarakanda ti manmano ti matagtagitaona a lugar, nga awan ti sibilisasion a nakairuamanda ken nagnaedan dagiti nariribuk nga agindeg imbes a dagiti Santo. Nagbalin a di laeng indawat ti Apo kadakuada nga umayda iti Zion—tinarigagayanna kadakuada a mangbangon iti Zion.

No saan a mapasamak dagiti namnamaentayo, malagiptayo no ania ti imbaga ti Apo kadagiti Santo idi 1831: “Diyo makita iti gagangay a matayo, para iti agdama a panawen, ti plano ti Diosyo … ken ti gloria a sumaruno kalpasan ti adu a panagtutuok” (Doktrina ken Katulagan 58:3). Wen, napno ti biag iti panagtutuok, uray pay ti kinadangkes, ngem kabaelantayo ti “agipatungpal iti adu a kinalinteg; ta adda [kadatayo] ti bileg” (dagiti bersikulo 27–28).

Kitaen met iti Saints, 1:127–33.

Dagiti Kapanunotan iti Panagsursuro iti Pagtaengan ken iti Simbaan

Doktrina ken Katulagan 58:1–5; 59:23

“Kalpasan ti adu a panagtutuok umay dagiti bendision.”

Awan duadua a ninamnama dagiti Santo a bayat ti unos ti panagbiagda, dumur-asto ti Jackson County nga agbalin a Zion, maysa a lugar a mabalin a paguummongan dagiti amin a Santo. Nupay kasta, ti panawenda iti Jackson County ket napno iti panagtutuok. Iti uneg ti sumagmamano a tawen, napilitanda a pumanaw ket “aguray iti bassit a panawen para iti pannakasubbot ti Zion” (Doktrina ken Katulagan 105:9).

Ania ti masursurom maipapan iti panagtutuok wenno karit manipud kadagiti balikas ti Apo iti Doktrina ken Katulagan 58:1–5? Apay nga iti panagkunam a sumangbay laeng ti sumagmamano a bendision kalpasan ti panagtutuok? Ania dagiti bendision a naawatyo kalpasan ti panagtutuok?

Ania ti masursuroyo manipud iti Doktrina ken Katulagan 59:23 a mangisangbay kadakayo iti namnama?

Doktrina ken Katulagan 58:26–29

Kabaelak nga “ipatungpal iti adu a kinalinteg” iti “bukodko a pagayatan.”

Kas paset ti panagadalyo kadagitoy a bersikulo, nalabit a makaaramidkayo iti listaan ti sumagmamano a banag a “siaanep a makiraman[kayo].” “Nasayaat nga [ar]-aramid” kadi amin dagitoy? Utobenyo no ania ti maaramidanyo nga “agipatungpal iti adu a kinalinteg”—ket ibilangyo ti panangituding kadagiti panggep a tun-oyen a mangaramid iti daytoy.

Apay iti panagkunayo a kayat ti Apo nga agaramidkayo iti “adu a banag iti bukod[yo] a pagayatan”? Ania koma ti bungana no “mapilpilit[kayo] iti amin a banag”? Ania ti mainayon ti 2 Nephi 2:27 iti pannakaawatyo iti daytoy a pagbatayan?

Kitaen met iti Dale G. Renlund, “Choose You This Day,” Liahona,” Nob. 2018, 104–6.

Doktrina ken Katulagan 58:42–43

Pakawanennak ti Apo no agbabawiak.

Ti kari ti Apo iti Doktrina ken Katulagan 58:42 a naan-anay a pakawanenna dagiti agbabawi ket makaparegta, nupay mangpataud met iti sumagmamano a saludsod: Ania ti kaipapanan ti panagbabawi? Kasano nga ammok no nakapagbabawiak? Pagsayaatanna, intuloy ti Apo, “Babaen iti daytoy maammuanyo…” (bersikulo 43).

Adtoy ti sumagmamano a nayon a saludsod dagiti tao no dadduma maipapan iti panagbabawi. Ania ti insuro ti Espiritu kadakayo bayat ti panagadalyo kadagiti naisingasing a resources a naipaay iti baba?

Kasano a tulonganak nga agbabawi ti panangipudno iti basbasolko? Kitaen iti Salmo 32:1–5; Proverbios 28:13; Mosiah 27:34–37; Alma 39:12–13.

Ikarkarigatak ti mangikkat kadagiti basolko, ngem agtultuloyak nga agaramid kadagiti biddut. Balido kadi pay laeng ti panagbabawik? Kitaen met iti Bradley R. Wilcox, “Worthiness Is Not Flawlessness,” Liahona, Nov. 2021, 61–67; “Daily Restoration” (video), Gospel Library.

Daily Restoration

Elder Dieter F. Uchtdorf and Church members compare drifting in life to the circles walked by test participants in a dense forest. Shadows creep in off the path, but we can chase away darkness and come back.

Kasano a masiguradok a pinakawannak ti Mangisalakan? Kitaen iti Tad R. Callister, “The Atonement of Jesus Christ,” Liahona, Mayo 2019, 85–87, nangnangruna iti benneg a napauluan iti “2. Basol.”

Masarakanyo ti ad-du pay a nalawag a pannakammo ken pannakaawat iti “Questions and Answers” maipapan iti panagbabawi iti Para iti Pigsa dagiti Agtutubo: Maysa a Pangiwanwan (dagiti panid 8–9).

Kitaen met iti Topics and Questions, “Repentance,” Gospel Library.

Doktrina ken Katulagan 59

Asino ni Polly Knight?

Ni Polly Knight ken ti asawana, ni Joseph Knight Sr., ti sumagmamano kadagiti immuna a namatpati iti napadtuan a calling ni Joseph Smith. Nangted da Polly ken Joseph iti napateg a suporta iti Propeta iti aramid a panagipatarus iti Libro ni Mormon. Pimmanaw ti pamilia Knight iti Colesville, Nueva York, tapno makiummong kadagiti Santo iti Ohio ket kalpasanna nabilinda nga umakar iti Jackson County, Missouri. Bayat ti panagdaliasatda, nangrugi a kimmapuy ti salun-at ni Polly, ngem determinado a makitana ti Zion sakbay a pumusay. Nagtalinaed iti Missouri iti sumagmamano laeng nga aldaw sakbay a pimmusay (kitaen iti Saints, 1:127–28, 132–33). Naawat tiDoktrina ken Katulagan 59 iti aldaw ti ipupusayna, ken kasla maitudo dagiti bersikulo 1 ken 2 a naipangpangruna kenkuana.

Doktrina ken Katulagan 59:4–19

Maysa a bendision dagiti katulagan.

Ania ti panangkunayo a kayat a sawen ti “makoronaandanto … kadagiti bilin”? (bersikulo 4). Ibilang no kasano a bendisionannakayo ti Apo no ikagumaanyo a tungpalen ti tunggal maysa kadagiti bilin iti bersikulo 5–19.

Ibinglayyo no ania dagiti masursuroyo. Iti adu a kaso, dagiti naespirituan a pannakaammo ken pannakaawat a maawatyo bayat ti panagadalyo kadagiti nasantuan a kasuratan ket mabalin a mangpapigsa iti pammati ti pamiliayo, gagayyem, ken miembro ti ward. Ibinglayyo kadakuada dagiti padas, rikna, ken pammaneknekyo maipapan ken ni Jesucristo.

Doktrina ken Katulagan 59:9–19

Ti Sabbath ti aldaw ti Apo.

Kalpasan ti panagkari a bendisionanna dagiti Santo iti Zion “kadagiti bilin a saan la a bassit,” inted ti Apo ti naisangsangayan a panangyunay-unay iti maysa a kangrunaan a bilin: ti bilin a mangdayaw iti “nasantuan nga aldawna” (Doktrina ken Katulagan 59:4, 9). Bayat ti panagadalyo iti Doktrina ken Katulagan 59:9–19, utoben no apay a ti panagdayaw iti Sabbath ket nagbalin a nakapatpateg unay kadagitoy a Santo bayat ti panangpadasda a bangonen ti Zion. Apay a napateg daytoy kadakayo?

Mabalinyo met nga utoben dagiti saludsod no us-usarenyo ti aldaw ti Sabbath iti wagas a pinanggep ti Apo. Kasano a matulongannak ti panangngilinko a nasantuan ti aldaw ti Sabbath nga agtalinaedak nga “awanan mulit iti lubong”? (bersikulo 9). Ania ti maaramidko tapno maitedko ti “panagdaydayawko iti Kangatuan”? (bersikulo 10).

Mabalin a madlawyo nga inusar ti Apo dagiti balikas a kas iti “agrag-o,” “narag-o,” ken “naragsak” a mangisuro maipapan iti aldaw ti Sabbath. Ania ti mamagbalin a naragsak ti Sabbath kadakayo? Kasano nga ilawlawagyo iti maysa a tao no apay a pilienyo a dayawen ti aldaw ti Apo?

Ania ti masursuroyo manipud iti himno “Gently Raise the Sacred Strain” (Hymns, no. 146) maipapan kadagiti panggep ken bendision ti Sabbath?

Kitaen met iti Genesis 2:2–3; Isaias 58:13–14; Russell M. Nelson, “The Sabbath Is a Delight,” Liahona, Mayo 2015, 129–32.

Para iti ad-adu pay a kapanunotan, kitaen dagiti isyu ti magasin a Liahona ken Para iti Pigsa dagiti Agtutubo iti daytoy a bulan.

Dagiti Kapanunotan para iti Panangisuro kadagiti Ubbing

Doktrina ken Katulagan 58:26–28

Inikkannak ti Nailangitan nga Ama iti bileg nga agpili.

• Ti aggigiddan a panangbasa iti Doktrina ken Katulagan 58:26–28 makaited kadakayo ken kadagiti annakyo iti gundaway a mapagsaritaan maipapan iti bileg nga inted kadatayo ti Nailangitan nga Ama a mangpili nga agaramid iti naimbag. Mabalin nga ibagayo iti tunggal maysa ti maipapan kadagiti nadumaduma a pili nga inaramidyo ken no ania ti napasamak kas bungana. Mabalin a kayat dagiti annakyo ti agdrowing iti ladawan ti padasda.

• Mabalinyo nga isurat ti pili iti maysa a bangir ti maysa a papel ken bunga iti sabali ken usaren daytoy a papel a mangiladawan a saan nga agsina dagiti pilitayo ken dagiti bunga dagitoy. Nalabit a mabalin nga ilista dagiti annakyo ti sumagmamano a pagpilian ken pagsaritaanda dagiti pagbanagan nga agtaud kadagitoy. Kalpasanna mabalinyo nga aggigiddan a basaen ti Doktrina ken Katulagan 58:27–28 ket pagsasaritaan maipapan kadagiti pili a “mangipatungpal iti adu a kinalinteg” wenno dagiti nasayaat a bunga. Kasano a “gunggonaan” wenno bendisionannatayo ti Apo no ikagumaantayo ti agbalin a napudno? (bersikulo 28).

Doktrina ken Katulagan 59:7, 18–21

“Agyamankayo iti Apo a Diosyo iti amin a banag.”

• Ibilangyo ti panangbasa kadagitoy a bersikulo kabayatan ti panagpasiaryo a kadua dagiti annakyo wenno panagbuya kadagiti ladawan ti nakaparsuaan, a kumitkita kadagiti banag a “mangparagsak iti mata … mangparag-o iti puso (bersikulo 18). Mabalinyo pay a kitaen dagiti umasping a banag iti maysa a kanta a kas iti “My Heavenly Father Loves Me” (Children’s Songbook, 228–29). Wenno mabalinyo nga awisen dagiti annakyo a mangidrowing kadagiti ladawan dagiti banag a pagyamananda ket bay-an ida a mangisarita kadakayo maipapan kadagiti ladawanda. Kasano a maipakitatayo ti panagyamantayo kadagitoy a banag?

Adu ti pinarsua ti Apo a napipintas a banag a mangyeg kadatayo iti rag-o.

Doktrina ken Katulagan 59:9–12

Ti Sabbath ket ti aldaw ti Apo.

• Ania ti mabalintayo nga aramiden iti Domingo tapno agdaydayaw iti Apo ken makasarak iti rag-o? Tulonganyo dagiti annakyo a mangsapul kadagiti kapanunotan iti Doktrina ken Katulagan 59:9–12 ken iti panid ti aktibidaditi daytoy a lawas. Mabalin a makasarakda pay kadagiti ladawan wenno banag a mangibagi kadagiti banag nga aramidentayo iti Sabbath (kas kadagiti ladawan ti sakramento iti daytoy a balabala). Kasano a tulongannatayo dagitoy a banag a makarikna nga as-asidegtayo iti Nailangitan nga Ama ken ni Jesucristo?

Para iti ad-adu pay a kapanunotan, kitaen iti isyu ti magasin a Friend iti daytoy a bulan.

Panangiladawan ni Marti Major