Independence, Missouri, 1831, ni Al Rounds

Hunyo 2–8: “Matinguhaon nga Moapil diha sa Usa ka Maayo nga Katuyoan”

Doktrina ug mga Pakigsaad 58–59

Sa dihang unang nakita sa mga elder sa Simbahan ang luna sa siyudad sa Zion—Independence, Missouri—dili kadto maoy ilang gilaoman. Ang uban naghunahuna nga ilang makita ang usa ka malamboon, makugihon nga komunidad nga adunay lig-on nga grupo sa mga Santos. Hinuon ilang nakita ang usa ka dapit nga gamay ra ang nagpuyo, kulang sa sibilisasyon nga ilang naandan ug gipuy-an sa bagis nga mga lumulupyo sa dapit sa kamingawan [frontier] imbis nga mga Santos. Nahitabo nga ang Ginoo wala mohangyo kanila nga moadto lamang sa Zion—gusto Niya nga sila motukod sa Zion.

Kon ang atong mga gilaoman dili mohaom sa reyalidad, mahimo natong hinumdoman kon unsay gisulti sa Ginoo sa mga Santos niadtong 1831: “Kamo dili makakita [pinaagi] sa inyong kinaiyanhon nga mga mata, alang karon nga panahon, sa paagi sa inyong Dios … ug ang himaya nga mosunod human sa daghan nga kalisdanan” (Doktrina ug mga Pakigsaad 58:3). Oo, ang kinabuhi puno sa kalisdanan, gani pagkadaotan, apan kita mahimong “magpahinabo sa daghan nga pagkamatarong; kay ang gahom anaa [kanato]” (mga bersikulo 27–28).

Tan-awa usab sa Mga Santos,; 1:146–52.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 58:1–5; 59:23

“Kay human sa daghan nga kalisdanan moabot ang mga panalangin.”

Ang mga Santos naglaom nga sa panahon sa ilang tibuok kinabuhi ang Lalawigan sa Jackson molambo nga mahimong Zion, usa ka dapit diin mahimong magpundok ang mga Santos. Apan, ang ilang panahon sa Lalawigan sa Jackson puno sa kalisdanan. Sulod sa pipila ka tuig, gipugos sila sa pagbiya ug “mohulat sa mubo nga panahon alang sa katubsanan sa Zion” (Doktrina ug mga Pakigsaad 105:9).

Unsay imong nakat-onan mahitungod sa kalisod o mga hagit gikan sa mga pulong sa Ginoo diha sa Doktrina ug mga Pakigsaad 58:1–5? Ngano kaha nga ang ubang mga panalangin moabot lamang pagkahuman sa kalisdanan? Unsa nga mga panalangin ang imong nadawat human sa kalisdanan?

Unsay inyong nakat-onan gikan sa Doktrina ug mga Pakigsaad 59:23 nga naghatag og paglaom?

Doktrina ug mga Pakigsaad 58:26–29

Mahimo akong “magpahinabo sa daghan nga pagkamatarong” sa atong “kaugalingon nga gawasnon nga kabubut-on.”

Isip kabahin sa imong pagtuon niini nga mga bersikulo, mahimong mohimo ka og lista sa pipila sa mga butang nga ikaw “matinguhaon nga moapil”. Ang tanan ba niini “maayo nga [mga] katuyoan”? Pamalandongi unsay imong mahimo sa “pagpahinabo sa daghan nga pagkamatarong”—ug ikonsiderar ang paghimo og mga tumong sa pagbuhat niini.

Nganong gusto man sa Ginoo nga mobuhat ikaw og “daghan nga mga butang [sumala] sa [imong] kaugalingon nga gawasnon nga kabubut-on”? Unsa kahay resulta kon ikaw “gipugos diha sa tanan nga mga butang”? Unsa ang gidugang sa 2 Nephi 2:27 sa imong pagsabot niini nga baroganan?

Tan-awa usab sa Dale G. Renlund, “Magpili Kamo Niining Adlawa,” Liahona, Nob. 2018, 104–6.

Doktrina ug mga Pakigsaad 58:42–43

Ang Ginoo mopasaylo nako kon ako maghinulsol.

Ang saad sa Ginoo sa Doktrina ug mga Pakigsaad 58:42 nga mopasaylo sa hingpit niadtong kinsa maghinulsol makapadasig, bisan og kini makapatumaw og mga pangutana: Unsay gipasabot sa paghinulsol? Unsaon nako sa pagkahibalo kon ako naghinulsol ba? Maayo na lang, ang Ginoo mipadayon, “Pinaagi niini kamo masayod…” (bersikulo 43).

Aniay pipila ka dugang nga mga pangutana usahay sa mga tawo mahitungod sa paghinulsol. Unsa ang gitudlo sa Espiritu kanimo samtang nagtuon ka sa gisugyot nga mga kapanguhaan nga gihatag sa ubos?

Sa unsa nga paagi nga ang pagkumpisal sa akong mga sala motabang nako sa paghinuslsol? Tan-awa sa Salmo 32:1–5; Mga Panultihon 28:13; Mosiah 27:34–37; Alma 39:12–13.

Naningkamot ko sa pagbiya sa akong mga sala, apan nagpadayon ko sa paghimo og mga sayop. Balido ba ang akong paghinuslsol? Tan-awa sa Bradley R. Wilcox, “Ang Pagkatakos Dili ang Pagkawalay Tatsa,” Liahona, Nob. 2021, 61–67; “Daily Restoration” (video), Gospel Library.

Daily Restoration

Elder Dieter F. Uchtdorf and Church members compare drifting in life to the circles walked by test participants in a dense forest. Shadows creep in off the path, but we can chase away darkness and come back.

Unsaon nako sa pagkaseguro nga ang Manluluwas mipasaylo kanako? Tan-awa sa Tad R. Callister, “Ang Pag-ula ni Jesukristo,” Liahona, Mayo 2019, 85–87, ilabi na sa seksiyon nga giulohan og “2. Sala.”

Makakita ka og dugang nga mga panabot diha sa “Mga Pangutana ug mga Tubag” mahitungod sa paghinulsol sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (mga pahina 8–9).

Tan-awa usab sa Mga Hilisgotan ug mga Pangutana [Topics and Questions], “Paghinulsol [Repentance],” Librarya sa Ebanghelyo [Gospel Library].

Doktrina ug mga Pakigsaad 59

Kinsa si Polly Knight?

Si Polly Knight ug ang iyang bana, si Joseph Knight Sr., mao ang pipila sa unang mga mituo sa propetikanhong tawag ni Joseph Smith. Sila si Polly ug Joseph mihatag og mahinungdanong suporta ngadto sa Propeta sa buhat sa paghubad sa Basahon ni Mormon. Ang pamilyang Knight mibiya sa Colesville, New York, aron makigpundok uban sa mga Santos didto sa Ohio ug sa wala madugay gimandoan nga mobalhin ngadto sa Lalawigan sa Jackson, Missouri. Samtang nagbiyahe sila, ang kahimsog ni Polly nagsugod sa pagkunhod, apan determinado siya nga makakita sa Zion sa dili pa siya mamatay. Didto siya sa Missouri sulod lamang sa pipila ka adlaw sa dihang namatay siya (tan-awa sa Mga Santos,, 1:145–46, 151–52). Ang Doktrina ug mga Pakigsaad 59 nadawat sa adlaw sa iyang pagkamatay, ug ang mga bersikulo 1 ug 2 morag pihong nagpasabot mahitungod kaniya.

Doktrina ug mga Pakigsaad 59:4–19

Ang mga sugo mga panalangin.

Unsa kaha sa imong hunahuna ang ipasabot sa “pagakoronahan … sa daghan nga mga sugo”? (bersikulo 4). Hunahunaa kon sa unsang paagi ikaw gipanalanginan sa Ginoo samtang maningkamot ka sa pagsunod sa matag sugo diha sa mga bersikulo 5–19.

Ipakigbahin unsay imong nakat-onan. Sa daghang sitwasyon, ang espirituwal nga mga panabot nga imong madawat samtang magtuon ka sa mga kasulatan makapalig-on sa hugot nga pagtuo sa imong pamilya, mga higala, ug mga miyembro sa ward. Ipakigbahin kanila ang imong mga kasinatian, mga pagbati, ug pagpamatuod bahin ni Jesukristo.

Doktrina ug mga Pakigsaad 59:9–19

Ang Igpapahulay mao ang adlaw sa Ginoo.

Human makasaad nga panalanginan ang mga Santos sa Zion “sa daghan nga mga sugo,” ang Ginoo mihatag og espesyal nga gibug-aton sa usa ka piho nga sugo: ang sugo nga tahoron ang Iyang “balaan nga adlaw” (Doktrina ug mga Pakigsaad 59:4, 9). Samtang magtuon ka sa Doktrina ug mga Pakigsaad 59:9–19, pamalandongi nganong ang pagtahod sa Igpapahulay importante man kaayo niining mga Santos samtang nagtinguha sila sa pagtukod sa Zion. Nganong importante man kini kanimo?

Mahimo usab nimong pamalandongan kon gigamit ba nimo ang adlaw nga Igpapahulay sa paagi nga gitinguha sa Ginoo. Sa unsang paagi nga ang pagbalaan sa adlaw nga Igpapahulay makatabang nimo nga magpabiling “walay buling gikan sa kalibotan”? (bersikulo 9). Unsay imong mabuhat aron makahatag sa imong “mga paghalad ngadto sa Labing Halangdon”? (bersikulo 10).

Tingali makamatikod ka nga ang Ginoo migamit sa mga pulong sama sa “paglipay,” “malipayon,” ug “pagmaya” aron sa pagtudlo mahitungod sa adlaw nga Igpapahulay. Unsay makapahimo sa Igpapahulay nga makapahimuot alang kanimo? Unsaon nimo sa pagpasabot ngadto sa usa ka tawo ngano nga ikaw mipili sa pagtahod sa adlaw sa Ginoo?

Unsay imong nakat-onan gikan sa himno nga “Ihinay ang Pagkanta” (Mga Himno, nu. 88) mahitungod sa mga katuyoan ug mga panalangin sa Igpapahulay?

Tan-awa usab sa Genesis 2:2–3; Isaias 58:13–14; Russell M. Nelson, “Ang Igpapahulay usa ka Kahimut-an,” Liahona, Mayo 2015, 129–32.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Joseph Knight Sr.

• Independence, Missouri

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 58:26–28

Ang Langitnong Amahan mihatag nako og gahom sa pagpili.

• Ang pagbasa og dungan sa Doktrina ug mga Pakigsaad 58:26, 28 makahatag nimo ug sa imong mga anak og oportunidad sa paghisgot mahitungod sa gahom sa Langitnong Amahan nga gihatag kanato aron sa pagpili sa pagbuhat sa matarong. Mahimo nimong sultihan ang matag usa mahitungod sa nagkalain-laing mga pagpili nga imong nahimo ug unsay nahitabo isip resulta. Tingali ang imong mga anak gusto nga magdrowing og usa ka litrato sa ilang kasinatian.

• Mahimo nimong isulat ang pagpili sa pikas bahin sa piraso sa papel ug ang sangpotanan sa pikas bahin ug mogamit niini nga papel sa paghulagway nga ang atong mga pagpili ug ang mga sangpotanan niini dili mabulag. Tingali ang imong mga anak makalista og pipila ka pagpili ug hisgotan ang mga sangpotanan nga miabot tungod niini. Dayon mahimong basahon ninyo pagdungan ang Doktrina ug mga Pakigsaad 58:27–28 ug maghisgot mahitungod sa mga pagpili nga “mopahinabo sa daghan nga pagkamatarong” o maayo nga mga sangpotanan. Sa unsa nga paagi nga ang Langitnong Amahan “moganti” o mopanalangin kanato kon kita maningkamot sa pagbuhat og maayo? (bersikulo 28).

Doktrina ug mga Pakigsaad 59:7, 18–21

“Pasalamati ang Ginoo nga imong Dios sa tanang butang.”

• Ikonsiderar ang pagbasa niini nga mga bersikulo samtang ikaw ug ang imong mga anak manglakaw o motan-aw og mga litrato sa kinaiyahan, moobserbar sa mga butang nga “(maka)pahimuot sa mata ug … pagmaya sa kasingkasing” (bersikulo 18). Mahimo usab nga imong maobserbahan ang susama nga mga butang sa usa ka kanta sama sa “Gihigugma Ako sa Langitnong Amahan” (Songbook sa mga Bata, 16). O mahimo nimong dapiton ang imong mga anak sa pagrowing og mga litrato sa mga butang nga sila mapasalamaton ug pasultiha sila nimo mahitungod sa ilang mga litrato. Unsaon nato sa pagpakita sa atong pasalamat alang niining mga butanga?

Ang Ginoo mibuhat sa daghan nga matahom nga mga butang aron mohatag nato og kalipay.

Doktrina ug mga Pakigsaad 59:9–12

Ang Igpapahulay mao ang adlaw sa Ginoo.

• Unsay atong mahimo sa Dominggo sa pagsimba sa Ginoo ug pagkaplag og hingpit nga kalipay? Tabangi ang imong mga anak sa pagpangita og mga ideya diha sa Doktrina ug mga Pakigsaad 59:9–12 ug sa pahina sa kalihokan niining semanaha. Tingali makakita usab sila og mga litrato o mga butang nga nagrepresentar sa mga butang nga atong buhaton sa Igpapahulay (sama sa mga litrato sa sakramento niini nga latid). Sa unsang paagi nga kining mga butanga motabang nato nga mobati nga mas suod sa Langitnong Amahan ug ni Jesukristo?

Alang sa dugang nga mga ideya, tan-awa ang isyu karong bulana sa Higala nga magasin.

Paghulagway pinaagi ni Marti Major