“Hunyo 16–22: ‘Ang Ginoo Nagkinahanglan sa Kasingkasing ug sa usa ka Andam nga Hunahuna’: Doktrina ug mga Pakigsaad 64–66,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)
“Doktrina ug mga Pakigsaad 64–66,” Dali, Sunod Kanako—Alang sa Panimalay ug sa Simbahan: 2025
Daviess County, Missouri
Hunyo 16–22: “Ang Ginoo Nagkinahanglan sa Kasingkasing ug sa usa ka Andam nga Hunahuna”
Doktrina ug mga Pakigsaad 64–66
Sa grabe nga kainit sa Agosto 1831, pipila sa mga elder nagbiyahe pabalik ngadto sa Kirtland gikan sa yuta sa Zion sa Missouri. Ang mga nagbiyahe init na og mga ulo ug nangaluya, ug ang mga tensiyon nahimong mga panag-away. Morag ang pagtukod sa Zion, nga usa ka siyudad sa gugma, panaghiusa, ug kalinaw, magkinahanglan pa og taas nga panahon.
Swerte lang, kay ang pagtukod sa Zion—didto sa Missouri niadtong 1831 o sa sulod sa atong mga kasingkasing, mga pamilya, ug mga ward karon—wala magkinahanglan nga kita mahimong perpekto. Hinuon, “kamo gikinahanglan nga mopasaylo,” miingon ang Ginoo (Doktrina ug mga Pakigsaad 64:10). Nagkinahanglan Siya “sa kasingkasing ug sa usa ka andam nga hunahuna” (bersikulo 34). Ug nagkinahanglan Siya sa pagpailob ug kakugi, kay ang Zion tukoron diha sa pundasyon sa “gagmay nga mga butang,” nga pagatumanon niadtong walay “[pagkaluya] diha sa maayo nga buhat” (bersikulo 33).
Tan-awa usab sa Mga Santos, 1:153–54, 155–57.
Mga Ideya alang sa Pagkat-on diha sa Panimalay ug sa Simbahan
Doktrina ug mga Pakigsaad 64:1–11
“Mopasaylo sa usag usa.”
Ikonsiderar ang mosunod samtang magtuon ka sa Doktrina ug mga Pakigsaad 64:1–11:
-
Paghunahuna og usa ka higayon nga ang Ginoo mipasaylo nimo. Unsay imong gibati?
-
Aduna bay usa ka tawo nga kinahanglan nimong pasayloon? Ngano nga ang pagpasaylo sa uban lisod man kaayo? Unsa ang makatabang nimo nga mabuntog kini nga kalisod?
-
Unsa nga mga kamatuoran mahitungod sa pagpasaylo diha sa Doktrina ug mga Pakigsaad 64:1–11 ang daw importante kanimo? Ngano kaha nga ang Ginoo mimando man kanato nga “mopasaylo sa tanan”? (bersikulo 10).
Kon naglisod ka sa pagpasaylo, ikonsiderar ang pagtuon sa mensahe ni Elder Jeffrey R. Holland “Ang Pangalagad sa Pagpasig-uli [Reconciliation]” (Liahona, Nob. 2018, 77–79) o sa mensahe ni Kristin M. Yee “Nagdala Akog Kalipay Inay Kagul-anan: Ang Makaayo nga Dalan sa Pagpasaylo” (Liahona, Nob. 2022, 36–38). Unsa ang imong nakat-onan mahitungod kon unsaon nga si Kristo makatabang nimo sa pagpasaylo?
Ang mga relasyon sa pamilya makahatag og daghang oportunidad sa pagpasaylo. Hunahunaa ang mga sakop sa imong pamilya. Kinsa ang gikinahanglan nimong pasayloon? Sa unsang paagi nga kita “gisakit” (bersikulo 8) kon kita dili mopasaylo sa usag usa? Sa unsang paagi nga ang pagpasaylo makaapekto sa mga relasyon sa imong pamilya?
Tan-awa usab sa Mga Hilisgotan ug mga Pangutana [Topics and Questions], “Kaspasayloan [Forgiveness],” Librarya sa Ebanghelyo [Gospel Library]; “Forgiveness: My Burden Was Made Light” (bidyo), Librarya sa Ebanghelyo.
Forgiveness: My Burden Was Made Light
After a man loses his wife and several children in a car accident, he finds healing and is able to forgive the offending driver through the power of Jesus Christ.
“Kamo kinahanglan gayod nga mopasaylo sa usag usa” (Doktrina ug mga Pakigsaad 64:9).
Doktrina ug mga Pakigsaad 64:31–34
Ang Ginoo nangayo sa akong “kasingkasing ug sa usa ka andam nga hunahuna.”
Mibati ka ba og “[pagkaluya]” sa tanang “maayo nga buhat” nga gisulayan nimo sa pagkab-ot? Pangitaa ang mensahe sa Ginoo alang kanimo diha sa Doktrina ug mga Pakigsaad 64:31–34. Unsay gusto sa Ginoo nga imong buhaton aron mahitabo ang Iyang “mahinungdanon nga buhat”?
Paghunahuna og leksiyon nga gamitan og butang nga maghulagway sa bersikulo 33—usa ka dakong butang nga hinimo gikan sa gagmayng mga butang, sama sa mosaic o usa ka brick nga bilding. Unsa ang “gagmay nga mga butang” nga imong mabuhat matag adlaw aron sa “[pagpahimutang] sa pundasyon” sa mahinungdanon nga buhat sa Dios? Unsa ang pipila ka ehemplo sa “mahinungdanon nga buhat” nga gihatag sa Ginoo kanimo?
Doktrina ug mga Pakigsaad 64:31–34
“Ang kasingkasing ug usa ka andam nga hunahuna”
Si Elder Donald L. Hallstrom misugyot niining posible nga kahulogan sa hugpong sa mga pulong nga “kasingkasing ug usa ka andam nga hunahuna”:
“Ang kasingkasing nagsimbolo sa gugma ug pasalig. Mohimo kita og mga sakripisyo ug mopas-an sa palas-anon alang sa atong mga minahal nga dili nato malahutay sa bisan unsang laing rason. Kon wala ang gugma, momenos ang atong pasalig. …
“Ang pagbaton og ‘usa ka andam nga hunahuna’ nagpasabot sa paghatag sa atong labing maayong paningkamot ug labing maayong panghunahuna ug sa pagtinguha sa kaalam sa Dios. Nagsugyot kini nga ang atong labing mainitong tibuok kinabuhi nga pagtuon kinahanglang mahitungod sa mga butang nga mahangtoron og kinaiyahan. Nagpasabot kini nga kinahanglan gayod nga adunay dili magkabulag nga relasyon tali sa pagpamati sa pulong sa Dios ug sa pagsunod niini” (“The Heart and a Willing Mind,” Ensign, June 2011, 31–32).
Doktrina ug mga Pakigsaad 64:41–43
Ang Zion mahimong “bandila ngadto sa mga katawhan.”
Ang bandila “usa ka sumbanan diin ang mga katawhan magpundok sa hiniusa nga tuyo o ilhanan” (Giya ngadto sa mga Kasulatan, “Bandila,” Librarya sa Ebanghelyo). Sa unsang paagi nga ang Zion—o ang Simbahan sa Ginoo—nahimong sama sa usa ka bandila nganha nimo? Ikonsiderar kining ubang mga ehemplo sa mga butang nga giisa, sama sa usa ka bandila, sa pagpanalangin sa mga tawo: Numeros 21:6–9; Mateo 5:14–16; Alma 46:11–20. Pangitaa ang laing mga paagi nga gihulagway sa Ginoo ang Zion diha sa Doktrina ug mga Pakigsaad 64:41–43.
Tan-awa usab sa “Let Zion in Her Beauty Rise,” Hymns, no. 41.
Ang gingharian sa Dios dinhi sa yuta nag-andam sa kalibotan alang sa pagbalik sa Manluluwas.
Ang Doktrina ug mga Pakigsaad 65 naghatag og makadasig nga deskripsyon sa misyon sa Simbahan sa Ginoo sa ulahing mga adlaw. Ikonsiderar ang pagsiksik niini nga seksiyon, nga mangita og tubag sa mga pangutana sama niini: Unsa ang gusto sa Ginoo nga mabuhat sa Iyang gingharian dinhi sa yuta? Unsa ang gusto Niya nga akong buhaton aron makatabang?
Tan-awa usab sa “Prepare Today for the Second Coming” (bidyo), ChurchofJesusChrist.org.
Prepare Today for the Second Coming
(Joseph Smith—Matthew 1:46–54; Matthew 24:42–51) An excerpt from “Preparation for the Second Coming,” Ensign or Liahona, May 2004, 8–9.
Ang Ginoo nasayod sa mga tinguha sa akong kasingkasing.
Sa wala madugay human mipasakop sa Simbahan, si William E. McLellin mihangyo ni Joseph Smith nga ipadayag ang kabubut-on sa Dios alang kaniya. Wala masayod si Joseph niini, apan si William adunay lima ka personal nga mga pangutana nga iyang gilaoman nga tubagon sa Ginoo pinaagi sa Iyang Propeta. Wala kita masayod kon unsa ang mga pangutana ni William, apan ang pinadayag nga gitumong alang kaniya, karon mao ang Doktrina ug mga Pakigsaad 66, mitubag sa matag pangutana alang sa “hingpit ug kinatibuk-ang katagbawan” ni William (“William McLellin’s Five Questions,” sa Revelations in Context, 138).
Samtang magbasa ka sa seksiyon 66, hunahunaa kon unsay nasayran sa Ginoo mahitungod ni William McLellin ug ang mga gikabalak-an ug mga tinguha sa iyang kasingkasing. Sa unsang paagi nga gipakita sa Ginoo nimo nga nakaila Siya nimo? Kon ikaw adunay patriyarkal nga panalangin, ikonsiderar ang pagtuon niini. Samtang nagbuhat ka niini, unsa ang gitabang sa Espiritu Santo nimo nga masabtan mahitungod sa kabubut-on sa Dios alang nimo?
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Tawo, Mga Dapit, Mga Panghitabo
Mga Ideya sa Pagtudlo sa mga Bata
Doktrina ug mga Pakigsaad 64:7–10
Gusto ni Jesukristo nga ako mopasaylo sa tanan.
Pahinumdom: Samtang magtudlo ka sa imong mga anak mahitungod sa sugo sa Ginoo nga “mopasaylo sa tanan,” mahimo nimong klarohon nga ang pagpasaylo wala magpasabot nga motugot sa mga tawo sa pagpasakit kanato. Awhaga sila nga mosulti sa kasaligan nga hamtong kon ang usa ka tawo mopasakit nila o mohikap-hikap nila sa dili tukmang paagi.
-
Human sa pagbasa sa Doktrina ug mga Pakigsaad 64:10 uban sa imong mga bata, sultihi sila kon unsay ipasabot sa pagpasaylo sa usa ka tawo. Mahimo nimong ipakigbahin ang pipila ka yanong mga ehemplo. Tingali mahimo silang magdrama-drama niini nga mga ehemplo sa pagbansay sa pagpasaylo.
-
Mahimo nimong hangyoon ang mga bata sa pagplano kon unsaon nila sa pagtudlo sa usa ka tawo—sama sa manghod nga igsoon—mahitungod sa pagpasaylo sa uban. Tabangi sila nga makita ang hugpong sa mga pulong diha sa Doktrina ug mga Pakigsaad 64:7–10 nga mahimo nilang gamiton samtang magtudlo sila.
-
Kantaha ang usa ka awit mahitungod sa pagpasaylo, sama sa “Tabangi Ko, Mahal nga Amahan” (Songbook sa mga Bata, 52). Unsa ang gitudlo niini nga kanta kanato mahitungod sa pagpasaylo sa uban?
Doktrina ug mga Pakigsaad 64:33
Ang “mahinungdanon nga buhat” sa Dios gitukod diha sa “gagmay nga mga butang.”
-
Mahimo ka nga mopakita sa mga bata og pipila ka butang nga gihimo gikan sa gagmay nga mga bahin, sama sa puzzle o usa ka trapo. Dayon mahimo ninyong basahon og dungan ang Doktrina ug mga Pakigsaad 64:33. Unsa ang “mahinungdanon nga buhat” sa Dios? Unsa ang “gagmay nga mga butang” nga atong mabuhat nga makatabang?
Doktrina ug mga Pakigsaad 64:34
Ako makasunod ni Jesus pinaagi sa akong kasingkasing ug hunahuna.
-
Samtang magbasa ka ngadto sa imong mga anak gikan sa Doktrina ug mga Pakigsaad 64:34, mahimo nimong itudlo ang imong kasingkasing ug ulo sa higayon nga mabasa nimo ang “kasingkasing” ug “hunahuna,” ug dapita ang mga bata sa paghimo niini uban nimo. Sa unsang paagi nga atong mahatag ang atong mga kasingkasing (mga tinguha) ug mga hunahuna ngadto sa Manluluwas?
Hatagi og gibug-aton ang ehemplo ni Jesukristo. Ikonsiderar kon unsaon nimo sa paghatag og gibug-aton sa ehemplo sa Manluluwas kon ikaw magtuon o magtudlo. Pananglitan, kon magtudlo mahitungod sa Doktrina ug mga Pakigsaad 64:34, mahimo ka nga mosulti ngadto sa imong mga anak kon sa unsang paagi nga ang Manluluwas mihatag sa Iyang kasingkasing (mga tinguha) ug hunahuna ngadto sa Iyang Amahan sa Langit. (Tan-awa sa Pagtudlo sumala sa Pamaagi sa Manluluwas, 6.)
Ang Ginoo nakaila kon kinsa ako ug nahigugma kanako.
-
Tabangi ang imong mga anak nga makasabot nga si William E. McLellin adunay lima ka pangutana alang sa Ginoo. Si Joseph Smith nakadawat og mga tubag niini nga mga pangutana bisan og wala siya makahibalo kon unsa ang mga pangutana ni William. Sultihi ang imong mga anak mahitungod sa usa ka higayon nga ang Ginoo mipakita nimo kon unsa ang gusto Niya nga imong buhaton, ug hisgoti ang mahitungod sa mga panalangin nga moabot gikan sa pagsunod sa Iyang direksiyon. Mahimo ninyong basahon og dungan ang Doktrina ug mga Pakigsaad 66:4 ug dapita ang imong mga anak sa pagtinguha og mga oportunidad aron makasabot sa unsay gusto sa Ginoo nga buhaton nila.
Detalye gikan sa The Second Coming [Ang Ikaduhang Pag-anhi], ni Kevin Keele
Ako makatabang sa pag-andam sa kalibotan nga modawat ni Jesukristo.
-
Samtang ang imong mga anak magtan-aw sa hulagway sa Ikaduhang Pag-anhi sa Manluluwas, hangyoa sila sa paghulagway kon unsay ilang nakita o kon unsay ilang nahibaloan mahitungod niini nga panghitabo. Mahimo usab nimong hatagan ang imong mga anak og mga pulong ug hugpong sa mga pulong mahitungod sa Ikaduhang Pag-anhi nga makita diha sa Doktrina ug mga Pakigsaad 65. Unsa man ang gitudlo niini nga mga pulong ug hugpong sa mga pulong ngari kanato? Unsaon nato sa pagpangandam alang sa pagbalik sa Manluluwas?
Alang sa dugang nga mga ideya, tan-awa ang isyu karong bulana sa Higala nga magasin.
Forgiven [Gipasaylo], ni Greg Olsen