“Ang Lima ka Pangutana ni William E. McLellin,” Kinatibuk-ang Saysay sa mga Pagpadayag (2016)
“Ang Lima ka Pangutana ni William E. McLellin,” Kinatibuk-ang Saysay sa mga Pagpadayag
Ang Lima ka Pangutana ni William E. McLellin
Sulod sa duha ka bulan gikan sa iyang bunyag niadtong Agosto 20, 1831, si William E. McLellin, usa ka kanhi magtutudlo sa eskwelahan, nadani kaayo sa istorya sa pagpahiuli. Human sa iyang pagkakabig, si McLellin giorden nga usa ka elder ug misangyaw sa ebanghelyo uban ni Hyrum Smith sulod sa pipila ka semana sa wala pa mobiyahe ngadto sa Orange, Ohio, sa kataposang bahin sa Oktubre alang sa usa ka kinatibuk-ang komperensiya sa Simbahan. Gisulat ni McLellin diha sa iyang journal nga niana nga komperensiya siya “unang nakakita ni brother Joseph ang Manalagna, usab nila ni brother Oliver [Cowdery], John [Whitmer] ug Sidney [Rigdon] ug sa ubang daghang bantogan nga mga Elder.” Sa komperensiya, si McLellin giorden isip usa ka high priest ug nakadungog ni Joseph nga nagtudlo mahitungod sa mga gahom ug mga buluhaton niana nga katungdanan. “Kini nga komperensiya akong gitambongan uban sa dakong espirituhanon nga paglambo ug kahupayan sa akong kasingkasing,” miingon siya.
Doktrina ug mga Pakigsaad 66
Human sa komperensiya, si McLellin mibiyahe ngadto sa Kirtland ug, sa pagpadayon sa iyang panaw, “nadakin-as gikan sa gitumban nga dakong troso ug grabe ang pagkalisa sa akong buolbuol”—hilabihan gayod nga mihangyo siya kang Joseph sa pag-ayo kaniya. “Gibutang niya ang iyang mga kamot” sa buolbuol, si McLellin misulat diha sa iyang journal, “ug naayo kini bisan og Kini mihubag og maayo ug hilabihan gayod nga nakapasakit kanako.” Pipila lang ka adlaw ang milabay, midesisyon ni McLellin nga testingan ang calling ni Joseph Smith. Human miadto ngadto sa panimalay ni Joseph didto sa Hiram, Ohio, niadtong Oktubre 29, si McLellin “midangop ngadto sa Ginoo sa tago, ug nagluhod nga mihangyo kaniya sa pagpadayag sa tubag sa lima ka pangutana pinaagi sa iyang Propeta.” Wala pahibaloa si Joseph kon unsa kini nga lima ka pangutana, si McLellin mihangyo kang Joseph sa paghatag kaniya sa kabubut-on sa Dios. Ang miresulta nga pagpadayag—karon nailhan isip ang Doktrina ug mga Pakigsaad 66—mitubag sa lima ka pangutana ni McLellin ngadto sa iyang “hingpit ug tibuok nga katagbawan.” Bisan human nga siya mibiya sa Simbahan sa kadugayan, si McLellin mipahayag nga siya gihapon mikonsiderar niini nga pagpadayag nga usa ka ebidensiya sa propetikanhon nga tawag ni Joseph, “diin,” siya miingon nga, “Dili nako malalis.”
Doktrina ug mga Pakigsaad 65
Human sa usa ka adlaw lang nga gihatag kini nga pagpadayag, si McLellin mitambong og miting sa Simbahan sa panimalay ni John Johnson, diin nagpuyo si Joseph, ug namulong ngadto sa mga nanambong sulod sa usa ka oras og katunga. “Ug dili kadto ako apan ang espiritu ug gahom sa Dios nga anaa kanako,” siya mipasabot. Sa samang miting, si Joseph nakadawat og laing pagpadayag, nga karon gihimong opisyal isip ang Doktrina ug mga Pakigsaad 65. Ang pagpadayag mipahayag nga “ang mga yawe sa gingharian sa Dios” “gitugyan na usab ngadto sa tawo sa Yuta” ug nga ang ebanghelyo “mokaylap ngadto sa mga kinatumyan sa Yuta … hangtod kini mopuno sa tibuok Yuta.”
Doktrina ug mga Pakigsaad 68
Duha ka adlaw ang milabay, niadtong Nobiyembre 1, si McLellin mitambong og usa ka komperensiya sa mga elder nga gipatawag didto sa Hiram, Ohio. Bisan og nakadawat na siya og pagpadayag pinaagi kang Joseph nga naghatag sa kabubut-on sa Ginoo alang kaniya, si McLellin miapil sa tulo ka ubang mga lalaki didto sa komperensiya—sila ni Orson Hyde, Luke Johnson, ug Lyman Johnson—sa paghangyo kang Joseph nga ipadayag “ang hunahuna & kabubut-on sa Ginoo” kabahin sa ilang mga responsibilidad. Si McLellin sa kadugayan mihinumdom nga sa dihang gi-orden siya nga usa ka high priest, siya “wala makasabot sa mga responsibilidad sa katungdanan.” Tingali kana nga kakulang sa pagsabot misangpot sa usa ka bahin sa iyang hangyo, kay ang pagpadayag nga misunod—karon ang Doktrina ug mga Pakigsaad 68—mihatag ni McLellin ug sa iyang mga kompanyon og impormasyon mahitungod sa mga katungdanan sa mga high priest ug mga elder sa pagsangyaw sa ebanghelyo ngadto sa tibuok yuta.
Doktrina ug mga Pakigsaad 1
Tungod niana nga responsibilidad sa pagsangyaw, ug tungod kay ang Oktubre 30 nga pagpadayag mipahayag nga ang ebanghelyo “mokaylap ngadto sa mga kinatumyan sa yuta,” gikinahanglan nga ang mga pagpadayag nga nadawat na ni Joseph gikinahanglang imantala. Si McLellin sa kadugayan mihinumdom nga “mga oras ang gigahin” sa komperensiya sa paghisgot kon imantala ba ang mga pagpadayag sa wala pa “kini sa kataposan madesisyoni nga kini ipaimprinta.” Sumala sa mga nahinumdoman ni McLellin, siya, si Oliver Cowdery, ug posible si Sidney Rigdon gipili nga maoy mohimo og usa ka pasiuna alang sa Basahon sa mga Sugo. Apan sa dihang ang mga lalaki mipresentar sa pasiuna ngadto sa komperensiya, ug ang mga partisipante niini “misukit-sukit niini og maayo” ug “mihangyo kang Joseph sa pagpangutana sa Ginoo mahitungod niini.” Human miduko sa pag-ampo atol sa komperensiya, si Joseph, sumala ni McLellin, “midiktar pinaagi sa pasiuna pinaagi sa Espiritu,” mibuhat niini samtang naglingkod siya duol sa “usa ka bintana sa lawak diin nanglingkod ang nanambong sa komperensiya.” Si McLellin nakahinumdom nga “si Joseph mohatag og pipila ka kapahayag [sentence] ug si Sydney [Rigdon] mosulat niini, dayon basahon kini og kusog, ug kon husto, nan si Joseph mopadayon ug mohatag og dugang.” Sumala kang McLellin, “pinaagi niini nga proseso ang pasiuna”—karon ang Doktrina ug mga Pakigsaad 1—“gihatag.”
Doktrina ug mga Pakigsaad 67
Si Joseph Smith nagtinguha usab nga ang mga partisipante sa komperensiya mohatag sa ilang pagpamatuod sa balaanon nga gigikanan sa mga pagpadayag. Ang uban nagduhaduha sa pagbuhat sa ingon, misangpot ngadto sa pagdiktar og laing pagpadayag, karon ang Doktrina ug mga Pakigsaad 67. Niini nga pagpadayag, ang Ginoo mihatag og paagi alang sa mga elder sa pagtino kon ang mga pagpadayag gikan ba sa Dios: “Kon adunay bisan kinsa diha kaninyo nga makahimo og usa nga sama” sa mga pagpadayag, kini mipahayag, “busa kamo mahatagan og Kaangayan sa pag-ingon nga kamo wala masayod nga kini tinuod,” apan kon walay “makahimo og usa nga sama niini, kamo anaa ubos sa panghimaraot kon kamo dili mohatag og kamatuoran nga kini mga tinuod.”
Sumala sa usa ka asoy, si McLellin miboluntaryo sa pagsulay og sulat sa iyang kaugalingon nga pagpadayag apan napakyas gayod. Human niana, si McLellin, kuyog ang ubang mga nanambong sa komperensiya, mibutang sa iyang ngalan ngadto sa usa ka pagpamatuod, nga giandam ni Joseph, nag-ingon nga “ang dios mimatuod sa among mga kalag pinaagi sa Espiritu Santo nga gipakita ngari kanamo nga kini nga mga sugo gihatag pinaagi sa inspirasyon sa Dios & makaayo alang sa tanang tawo & tinuod gayod.”
Doktrina ug mga Pakigsaad 133
Human natapos ang komperensiya, si McLellin nagpabilin uban ni Joseph Smith sulod sa laing duha ka semana, nagkopya sa mga pagpadayag ug nag-andam alang sa usa ka umaabot nga misyon uban ni Samuel H. Smith ngadto sa silangan nga mga estado. Tingali anaa gani siya niadtong Nobiyembre 3 sa dihang si Joseph nakadawat sa unsay mailhan nga apendiks ngadto sa Basahon sa mga Sugo, nga makita sa kasamtangang Doktrina ug mga Pakigsaad isip ang seksiyon 133.
Sama sa Doktrina ug mga Pakigsaad 1, nagpasidaan kini sa mga lumulupyo sa yuta sa nagkaduol nga pagbalik ni Kristo ug sa panginahanglan sa paghinulsol ug pagdawat sa direksiyon sa Dios sigon sa gihatag diha sa mga pagpadayag nga Iyang gihatag ngadto kang Joseph. Nalig-on pinaagi sa pulong sa Dios, si McLellin mibiya alang sa iyang misyon uban ni Samuel Smith niadtong Nobiyembre 16 ug misangyaw sa ebanghelyo sulod sa pipila ka semana human niana.
Si McLellin sa kataposan matawag isip usa sa nag-unang mga sakop sa Korum sa Napulog Duha ka Apostoles. Subo lang, wala siya magpabiling matinuoron sa iyang pagpamatuod; mibiya siya sa Simbahan ug miapil gani sa pagpangdaogdaog sa mga Santos didto sa Missouri. Gani sulod sa pipila ka mubo nga mga semana atol sa tinglarag sa 1831, usa siya ka saksi sa propetikanhon nga tawag ni Joseph Smith, nakasaksi sa pipila ka pagpadayag, lakip sa mga pagpadayag nga direktang gipadangat ngadto kaniya, ug miapil sa desisyon sa pagmantala sa mga pagpadayag isip ang Basahon sa mga Sugo. Si McLellin, kuyog ang ubang mga partisipante sa laing Nobiyembre 1831 nga komperensiya, mipahayag nga kini nga mga pagpadayag “bililhon alang sa Simbahan sama sa mga bahandi sa tibuok Yuta” ug nga kini naglangkob “sa mga Yawe sa mga misteryo sa Gingharian, & sa mga bahandi sa Kahangtoran ngadto sa simbahan.”