“Ezra Thayer: Gikan sa Pagkamadudahon ngadto sa Pagkamagtutuo,” Kinatibuk-ang Saysay sa mga Pagpadayag (2016)
“Ezra Thayer: Gikan sa Pagkamadudahon ngadto sa Pagkamagtutuo,” Kinatibuk-ang Saysay sa mga Pagpadayag
Ezra Thayer: Gikan sa Pagkamadudahon ngadto sa Pagkamagtutuo
Sa tinglarag sa 1830, si Ezra Thayer nagpuyo sa lungsod sa Farmington, New York, uban sa iyang asawa, si Elizabeth, ug sa ilang mga anak. Nagpangidaron na siya og kapin sa traynta ug migahin og pipila ka tuig sa maong dapit sa pagtukod og mga taytayan, mga dam, ug mga galingan.
Ang Madudahon
Sa nahaunang bahin nianang tuiga, ang pipila sa trabahanteng kalalakin-an nga iyang gipatrabaho nagsulti kaniya sa mga hungihong nga mikatap mahitungod ni Joseph Smith ug sa iyang paghubad sa Basahon ni Mormon. Gisalikway ni Thayer ang istorya isip pagbiay-biay ug “napuno sa kasuko mahitungod niini.”
Ang iyang bangis nga reaksyon, sa usa ka bahin, nahitabo kay sa pagkatinuod nakaila siya sa mga Smith, kay sa una iyang gipatrabaho si Joseph, ang iyang amahan, ug sa iyang mga igsoon sa mga proyekto duol sa Palmyra. Ang ideya ni Joseph sa naghubad ug nagmantala sa usa ka basahon sa kasulatan hingpit nga dili uyon sa unsay nahibaloan ni Thayer sa dili edukado nga batan-ong lalaki.
Nahasol si Thayer sa pagdiskobre nga pipila sa mga miyembro sa iyang pamilya misugod sa pagkainteresado sa Basahon ni Mormon. Samtang tua siya sa layo sulod sa pipila ka adlaw, ang iyang igsoon sa gawas nga lalaki ug pag-umangkon misakay og mga kabayo aron maminaw sa sangyaw ni Hyrum Smith. Sa dihang nabalik na si Thayer, iyaha silang gikasab-an, mimando nga sila “dili mousab sa pagkuha sa [iyang] mga kabayo aron maminaw niadtong mapasipad-ong mga alaot nga nagsangyaw.” Sila mipasalig “nga adunay kamatuoran niini, ug nga mas maayo nga [si Thayer] moadto og maminaw kaniya.”
Napabilin nga wala makombinser si Thayer, apan ang iyang mga igsoong lalaki miabot aron mobisita gikan sa Auburn, New York, mga 40 ka milya ngadto sa silangan. Siya, usab, nagtinguha sa pagkat-on og dugang mahitungod sa Basahon ni Mormon ug misugo nga si Thayer mokuyog kaniya sa pagpaminaw sa mga wali sa mga Smith. “Dili ko motuo nianang sayop nga pagtuo,” mitubag si Thayer. Miinsister ang iyang igsoong lalaki nga wala may madaot sa pag-adto ug pagpaminaw—total, si Ezra nakaila man sa pamilyang Smith. Nagpanuko siya sa pag-uyon sa pag-adto.
Ang Magtutuo
Sa usa ka Dominggo sa sayong bahin sa Oktubre, ang duha ka managsoon mibiyahe sa gibanana nga 12 ka milya ngadto sa uma sa mga Smith didto sa Manchaster, sa habatan lamang sa Palmyra. Sa dihang miabot sila, ilang nahinagbo, “ang usa ka dakong panagpundok sa mga tawo” milukop libot sa luna sa balay nga kahoy ni Joseph Smith Sr. ug misugwak ngadto sa karsada.
Tuyo nga maminaw sa unsay gisulti, si Thayer mingsuot sa daghang tawo aron makapaduol sa atubangan. Sa pagsugod ni Hyrum Smith sa pagsangyaw, ang pagsupak ni Thayer nahanaw. Sa kaulahian misulat siya mahitungod sa iyang kasinatian nianang adlawa: “Matag pulong nakapatandog kanako sa kinahiladman sa akong kalag. Naghunahuna ko nga ang matag pulong gipunting ngari nako. … Ang mga luha midagayday sa akong mga aping, labihan ko ka mapasigarbohon ug gahi og ulo. Dihay daghan didto nga nakaila nako. … Milingkod ko hangtod naulian ko sa akong kaugalingon una ko nangahas sa paghangad.”
Human sa wali, si Hyrum mipakita ni Thayer og usa ka kopya sa Basahon ni Mormon. Samtang siya midawat ug miabli niini, diha diha dayon siya napuno sa “labaw nga katalagsaon nga hingpit nga kalipay.” Sa pagsira sa hapin, nangutana siya, pila ang presyo niini?” Mibayad siya og 14 ka shilling ug gikuha ang basahon. Sa dihang si Martin Harris, kinsa nagbarog sa tungod, mimatuod nga ang basahon tinuod, si Thayer mitubag “nga siya dili kinahanglan mosulti nako niana, tungod kay ako nasayod nga kini tinuod sama kaniya.”
Sa pag-abot sa balay, si Thayer nakaamgo nga bisan og hingpit siya nga nakombinser, lahi na usab nga butang ang pagtabang sa iyang pamilya, mga higala, ug mga silingan nga makasabot, labaw na nga motuo sama niya. Mikatap ang istorya ngadto sa iyang mga silingan nga si Ezra Thayer, respetadong negosyante, karon mao na si Ezra Thayer, magtutuo ni Joseph Smith ug sa iyang “bulawan nga Biblia.”
Ang panimalay sa mga Thayer sa wala madugay gipundokan sa mga silingan nga matinguhaon sa pagpugong kaniya. Siya miingon, “Gipuno nila ang akong panimalay tibuok adlaw, ug gipatuo sa mga kalalakin ang akong asawa nga ako naboang na ug mawad-an sa akong mga higala ug sa tanan nakong kabtangan.” Sa dihang si Thayer naningkamot sa pagpakigrason sa usa ka magtiayon nga Methodist kalabot sa iyang bag-ong tinuohan, pranka nilang gibaliwala ang iyang argumento, hinungdan nga ang asawa ni Thayer, si Elizabeth, nasagmuyo. “Misugod sa paghilak ang akong asawa,” misulat siya, “ug miingon nga ako naboang na, ug kini nakadaot nako, ug siya mobiya nako.” Milampos siya sa pagpakalma sa iyang kahadlok, apan ang ilang bag-ong kaplag nga tinuohan sa dili madugay moagi og dugang pang mga pag-atake.
Iyang gidala ang Basahon ni Mormon ngadto sa duol nga lungsod sa Canandaigua, diin ang iyang mga higala, wala makadayeg niini, nagpulipuli sa paghatag sa ilang mga opinyon. Sa dihang nangutana sila kon siya mituo ba gihapon niini, siya mitubag, “Ako dili makasulti nga ako mituo niini, ako nasayod niini.” Usa ka lokal nga editor sa pamantalaan “miingon nga makasulti siya nako nga ako walay nahibaloan kalabot sa Dios kon ako walay liberal nga edukasyon.” Si Thayer mipakita sa iyang simpleng hugot nga pagtuo ug mipamatuod sa Dios ug bahin sa Basahon ni Mormon.
Ang Pagpadayag
Human niining panagtagbo, siya nakasinati og usa ka panan-awon o damgo diin “usa ka tawo miabot ug nagdala kaniya og linukot nga papel ug mipresentar niini ngari kanako, ug usa ka trumpeta ug misugo kanako nga tayhopon kini. Giingnan nako siya nga wala pa gayod ako sukad makatayhop og bisan usa sa akong kinabuhi. Miingon siya nga makatayhop ka niini, sulayi kini. Ako kining gibutang sa akong ba-ba ug gitayhop kini, ug nakahimo kini og labing nindot nga tingog nga akong nadungog sukad.” Ang kahulogan sa damgo alang ni Thayer sa wala madugay nahimong klaro.
Sa pagkasunod Dominggo, si Thayer mibalik ngadto sa Manchester aron makighimamat sa uban pa nga mga magtutuo. Niining higayona, iyang nahimamat si Joseph Smith ug gisaysay ngadto kaniya ang iyang kasinatian sa Basahon ni Mormon. Gidawat niya ang imbitasyon ni Joseph nga magpabunyag ug mibiyahe og pipila ka milya ngadto sa usa ka lim-aw alang sa galingan, lakip sa usa ka lalaki nga ginganlan og Northrop Sweet. Si Joseph Smith mikompirma kanila.
Wala madugay human sila nabunyagan, si Thayer ug Sweet gitawag ngadto sa pagpangalagad diha sa usa ka pagpadayag (karon Doktrina ug mga Pakigsaad 33) gidiktar ni Joseph Smith didto duol sa Fayette, New York. Diha niini, ang tingog sa Dios misugo kanila, “sa pagpabati sa [inyong] mga tingog nga sama sa tunog sa Trumpeta, sa pagpadayag sa akong ebanghelyo ngadto sa hiwi & masinupakon nga kaliwatan.” Kini nga tudling nagpahinumdom ni Thayer sa iyang damgo. Iyang nasabtan nga, “Ang linukot nga papel mao ang pagpadayag bahin nako ug ni Northrop Sweet. Si Oliver [Cowdery] mao ang tawo nga midala sa linukot nga papel ug sa trumpeta.
Ang Misyonaryo
“Ablihi ang inyong mga ba-ba,” ang pagpadayag miingon, , nag-awhag sa bag-ong gitawag nga mga misyonaryo nga “ayaw pagpanagana.” Apan si Ezra Thayer ug Northrop Sweet mitubag sa lahi nga paagi niini nga mando. Si Sweet sa wala madugay mibiya ni Joseph Smith aron sa pagporma sa unsay iyang gitawag nga “ang Pure Church of Christ.” Siya ug ang uban pang lima misugod sa pagpahigayon og mga panagtigom, apan kining nahaunang pagkabahin-bahin wala milambo.
Si Thayer, sa laing bahin, misugod dayon sa pagtabang sa pagpakatap sa iyang bag-ong pagtuo. Iyang giandam nga si Joseph moabot sa pagsangyaw sa iyang kamalig ug miawhag sa iyang pamilya, mga higala, ug mga silingan sa pagtambong. Sa gikatakda nga adlaw, ang iyang 50 por 18 ka pye nga kamalig miawas sa kapuno, ug ang mga bisita nakadungog sa mga wali gikan ni Joseph ug Hyrum Smith ingon man sa uban pang bag-ong gitawag nga mga misyonaryo: Oliver Cowdery, Parley P. Pratt, Peter Whitmer Jr. , ug si Ziba Peterson.
Pagka-Disyembre, Si Thayer miandam og laing panagtigom, niining higayona didto sa Canandaigua. Sa sinugdanan misulay siya sa pagkuha og pagtugot sa usa ka balay tigomanan sa Methodist isip ang lugar sa panagtigom, apan gibalibaran, mao nga mikuha siya og pagtugod nga makagamit sa balay hukmanan. Nianang gabhiona, si Sidney Rigdon ug ang uban nahimamat ni Thayer sa iyang panimalay, ug si Thayer miuban kanila ngadto sa Canandaigua ug “nagbantay sa pultahan” samtang si Rigdon nagsangyaw.
Tungod sa lawom nga espirituhanong mga kasinatian nga misangpot sa iyang pagkakabig, si Thayer mitubag sa tawag sa pagpadayag sa pagpakigbahin sa iyang pagtuo bisan pa man sa mga risgo sa iyang repotasyon ug panginabuhian. Sa kaulahian siya misulat, “Kon ang Dios mopakita sa usa ka tawo sa maong butang pinaagi sa gahom sa Espiritu Santo siya masayod nga kini tinuod. Siya dili mahimo magduda niini.”