“Ang mga Pamilyang Knight ug Whitmer,” Kinatibuk-ang Saysay sa mga Pagpadayag (2016)
Tan-awa usab sa “Ang mga Pamilyang Knight ug Whitmer,” Kinatibuk-ang Saysay sa mga Pagpadayag
Ang mga Pamilyang Knight ug Whitmer
Sa tinglarag sa 1826, usa ka prominenteng tag-iya sa yuta nga ginganlan og Joseph Knight Sr. mipatrabaho sa 20-anyos nga si Joseph Smith isip trabahante. Si Knight nanag-iya og upat ka umahan, usa ka galingan, ug duha ka makina (nga moandam sa sida [wool], gapas [cotton], ug ubang mga materyal nga patuyokon sa paghimo og yarn). Ang iyang anak nga lalaki si Joseph Knight Jr. sa kaulahian misulat, “Ang akong amahan miingon nga si Joseph [Smith] mao ang kinamaayohan nga trabahante nga iyang giempleyo,” midugang nga si Joseph misulti kaniya ug sa iyang amahan “nga siya nakakita og usa ka panan-awon, nga usa ka personahe misulti kaniya nga adunay usa ka bulawan nga basahon sa karaan nga panahon nga gilubong, ug kon siya mosunod sa mga direksiyon sa Anghel siya makakuha niini. … Ang akong Amahan ug ako mituo sa unsay iyang gisulti kanamo, tingali kami ang una human sa pamilya sa iyang amahan.”
Usa ka Gikinahanglan nga Higala
Ang mga Knight namatud-an nga mga maunongon nga mga higala. Si Joseph Knight Sr. diha sa panimalay sa Smith, kuyog sa ubang mga higala sa mga Smith, si Josiah Stowell, taga Manchester, New York, niadtong Septiyembre 22, 1827—sa adlaw nga nakuha ni Joseph ang bulawan nga mga palid ug ang Urim ug Thummim. Ang Knight nahimong usa sa unang nakadungog mahitungod niining mga artifact sa dihang si Joseph mibira kaniya sa daplin ug misulti kaniya nga ang Urim ug Thummim “kahibulongan” ug nakapahimo kaniya sa “pagkakita sa bisan unsang butang.” Misulti usab siya nga ang mga palid, ingon og “Bulawan,” mga “nahisulat nga mga Karakter” ug siya gustong mahubad kini.
Ang paghubad nahitabo didto sa Harmony, Pennsylvania, diin si Joseph ug ang iyang asawa, si Emma, nakapalit og usa ka balay ug kabtangan gikan sa mga ginikanan ni Emma. Ang mga Knight nagpuyo mga 30 ka milya ngadto sa amihan, sa Colesvill, New York, ug adunay mahinungdanong papel diha sa paghubad. Sa paghisgot kabahin ni Joseph Knight Sr., si Joseph misulat: “[Siya] mabination kaayo ug mahunahunaon nga nagdala kanamo, og gidaghanon sa mga tagana, aron kami dili mabalda sa buhat sa paghubad.” Si Knight mihinumdom nga nagsangkap og “usa ka Banyera nga anduhaw ug pipila ka papel nga adunay linya para masulatan … uban pang siyam o napulo ka gantangan sa bugas ug ubang lima o unom ka gantangan sa patatas ug usa ka libra nga tsa.”
Si Joseph Knight Jr. mihinumdom nga sa usa ka higayon atol sa paghubad si Joseph nagkinahanglan og $50 (klaro nga igbabayad sa kabtangan nga napalit nilang Emma). “Ang akong amahan wala makatigom niini [sa kwarta],” misulat si Knight. “Siya mianhi dayon nako, sa samang adlaw nga akong gibaligya ang akong balay ug lote ug mipadala kaniya [Joseph Smith] og usa ka tartanilya.”
Mga niining samang panahona, si Joseph Knight Sr. nahimong “matinguhaon nga makahibalo sa iyang katungdanan” diha sa buhat sa Ginoo. Nagpakisayod si Joseph sa Ginoo ug nakadawat og usa ka pagpadayag nga karon nailhan isip Doktrina ug mga Pakigsaad 12. Susama sa mga pagpadayag nga gidiktar alang kang Oliver Cowdery sa (seksiyon 6) ug ni Hyrum Smith sa (seksiyon 11), kini nga pagpadayag nagsugo ni Knight sa pagtuman sa mga sugo, sa “paningkamot sa pagdala ug pagpahimutang sa kahimoan sa Zion,” ug “sa pagpatalinghog uban sa [iyang] gahom.”
Gikan sa Harmony hangtod sa Fayette
Niadtong Mayo 1829, laing pamilya ang nahimong higala ni Joseph Smith—ang mga Whitmer. Ang pamilyang Whitmer sa Fayette Township, New York (mga 100 ka milya amihanan sa Harmony), unang higayon nga nadungog ang bahin sa “bulawan nga Biblia” sa uhahing bahin sa 1828, human ang anak nga lalaki ni Peter Whitmer nga si David nahigala ni Oliver Cowdery atol sa unang pagbisita didto sa Palmyra. Mihukom sila sa pagpakisusi sa istorya bahin sa mga palid ug magpahibaloay sa usag usa.
Si Oliver mihunong aron sa pagpakigkita sa mga Whitmer sa tingpamulak sa 1829 sa diha siya padulong na nga makigkita ni Joseph ug sa kataposan miserbisyo isip eskriba. Sukad niadto, si Oliver misulat ngadto ni David nagsulti sa milagroso nga paghubad. Sama sa mga Knight, ang mga Whitmer nakombinser nga sila kinahanglan motabang sa paghubad, ug sa mga hinapos sa Mayo, si David mibiyahe ngadto sa Harmony sa pagbalhin nilang Joseph ug Oliver ngadto sa panimalay ni Whitmer. “Siya misugyot nga kami makapuyo nga walay bayad,” misulat si Joseph. “Sa among pag-abot, among nakita nga ang pamilya ni Mr. Whitmer mahinangpon kaayo kalabot sa buhat, ug hilabihan ka mahigalaon kaayo ngari namo. Nagpadayon sila niana nga pagtagad, mipapuyo ug mipakaon namo sumala sa gisugyot, ug si John Whitmer, labi na gayod, dako kaayo og gikatabang namo sa pagsulat atol sa nahabilin nga buluhaton.” Si Emma miabot sa panimalay sa Whitmer sa wala madugay human nilang Joseph ug Oliver ug usab mitabang isip usa ka eskriba.
Ang buwan sa Hunyo sa 1829 mao ang usa ka talagsaon sa kasaysayan sa Simbahan. Dili lang nakompleto ni Joseph ug sa iyang mga eskriba ang paghubad, si Joseph midektar sa labing minos lima ka hubad, si Oliver midiktar og usa ka pagpadayag nga gitawag og “Mga Artikulo sa Simbahan ni Kristo,” ug silang duha nakabaton og gamhanang kasinatian “didto sa Lawak sa panimalay ni Mr. Whitmer” diin “Ang pulong sa Ginoo” miabot ngadto nila ug misugo nila kalabot sa usa ka serye sa importanteng mga ordinansa ug mga miting. Agig dugang, si Joseph migamit og usa ka copyright sa Basahon ni Mormon ug siya ug si Martin Harris misugod sa pakig-istorya ngadto sa mga tig-imprenta bahin sa pagmantala sa basahon. Sa kataposan, usa ka anghel ang mitunga ug gipakita ang mga palid ngadto sa Tulo ka Saksi duol sa umahan ni Whitmer didto sa Fayette Township, ug ang Walo ka Saksi nakakita ug nakagunit sa mga palid duol sa umahan ni Smith didto sa Palmyra Township.
Ang mga Whitmer usa ka dakong tabang atol niining nagsunodsunod nga mahinungdanong kalihokan. Ang maong pagserbisyo nagdala og mga pagsulay ug mga ganti ngadto sa pamilya. Usa ka apo nga lalaki ni Mary Musselman Whitmer (asawa ni Peter Whitmer Sr.) namalita nga si Mary adunay “daghan kaayong mga tawo nga giatiman” nga siya “sa kasagaran nahan-okan sa trabahoon.” Usa ka gabii, human sa tibuok adlawng trabaho, miadto siya sa kamalig aron gatasan ang mga baka ug nakita ang usa ka wala mailhing tawo nga “mipakita kaniya sa usa ka binangan nga mga palid” ug “gipakli ang mga panid sa basahon nga mga palid, palid human sa laing palid,” nagsaad ni Mary nga “siya mabulahan” kon siya “magmapailobon ug matinud-anon sa pagdala sa iyang palas-anon og diyotay pang higayon.” Sa ingon nahimo siyang lain nga saksi sa Basahon ni Mormon.
Espesyal nga mga panalangin miabot usab ngadto sa anak nga mga lalaki ni Mary. Sila si “David, John, ug Peter Whitmer Jr nahimong among madasigong mga higala ug mga katabang sa buluhaton,” misulat si Joseph. Ang samang butang ang mahimong masulti alang ni Christian ug Jacob Whitmer, kinsa miapil ni John ug Peter Jr. isip ang upat sa Walo ka mga Saksi. Sa dihang sila si David, John, ug Peter Jr. mihangyo ni Joseph sa pagpakisayod sa Ginoo kalabot sa ilang mga katungdanan, si Joseph midektar sa tulo ka pagpadayag nga karon naila isip Doktrina ug mga Pakigsaad 14, 15, ug 16. Si David, usa sa Tulo ka mga Saksi, gisaaran nga kon siya mangutana inubanan sa hugot nga pagtuo siya makadawat sa Espiritu Santo, “nga mohatag og ikapamulong, nga ikaw mobarog ingon nga usa ka saksi sa mga butang diin ikaw makadungog ug makakita, ug usab nga ikaw mopahayag og paghinulsol ngadto niini nga kaliwatan.”
Usa ka deklarasyon ngadto nilang John ug Peter Jr. nahimong usa sa mas halandomon nga mga bersikulo sa modernong kasulatan: Ug karon, tan-awa, Ako moingon nganha kanimo, nga ang butang nga labing bililhon nganha kanimo mao ang pagpahayag og paghinulsol ngadto niini nga mga katawhan, nga ikaw unta makadala og mga kalag ngari kanako, nga ikaw unta makapahulay uban kanila sa gingharian sa akong Amahan.”
Panghitabo sa wala pa ang Pag-organisar sa Simbahan
Bisan tuod og ang Basahon ni Mormon wala pa gimantala hangtod sa Marso 1830, kining nahaunang mga Santos nakakaplag og dakong kahupay ug kadasig sa pagbasa sa sunod nga teksto. Si Lucy Mack Smith subling misaysay nga atol sa ting-init sa 1829, ang usa ka gabii diha sa balay ni Whitmer “gigahin sa pagbasa sa manuskrito sa [Basahon ni Mormon] ug kini dili na kinahanglang isulti para nako … nga kami nagmaya sa hilabihan.”
Kini nga mga tumutuo migamit usab sa wala pa gimantala ang Basahon ni Mormon aron sa pagsangyaw sa ebanghelyo. Ang maong mga misyonaryo sa umaabot sama nilang Thomas B. Marsh ug Solomon Chamberlain gihatagan og proyeba nga mga panid sa Basahon ni Mormon samtang kini giprinta pa ug nakabig pipila ka mga bulan sa wala pa ang Simbahan naorganisar. Dili ikatingala, nga ang mga sakop sa pamilyang Whitmer mao ang usa niadtong mipaila ni Chamberlain ngadto sa bag-ong basahon sa kasulatan.
Tali nila, ang mga pamilyang Knight ug Whitmer naglangkob sa unsay nahimong duha sa unang “mga branch” sa Simbahan—didto sa Colesville ug sa Fayette, matag usa. Dungan sa pamilyang Smith sa Palmyra (ang laing branch sa Simbahan), ang mga Whitmer ug mga Knight mihalad sa espirituwal ug temporal nga suporta nga importante kaayo sa Pagpahiuli sa ebanghelyo.