Ang Gasa ni Oliver Cowdery

Jeffrey G. Cannon

Si Oliver Cowdery naghigda nga nagmata nga naghunahuna kon tinuod ba kaha ang mga istorya nga iyang nadunggan. Ang 22 anyos nga magtutudlo sa eskwelahan nagpuyo sa Palmyra, New York, sa panimalay ni Joseph Smith Sr. sa tinglarag sa 1828. Wala madugay human nga siya miabot sa dapit, nagsugod siya sa pagkadungog og mga istorya bahin sa anak nga lalaki sa mga Smith nga si Joseph Jr., sa iyang mga engkuwentro sa mga anghel, ug sa iyang pagdiskobre sa bulawan nga mga palid.

Naukyab ang iyang pagkakuryoso, daghan siya og gipangutana ngadto sa tag-iya sa iyang gipuy-an, mahinamon nga makakat-on pa og dugang. Sa sinugdanan nagduhaduha si Joseph Sr. sa pagpakigbahin apan sa kataposan mitugyan ngadto sa mga pangamuyo sa iyang kasera ug misulti kaniya mahitungod sa mga kasinatian ni Joseph Jr. Gikinahanglan ni Oliver nga masayod kon kana nga talagsaong nga mga butang tinuod ba. Nag-ampo siya. Usa ka kalinaw ang miabot kaniya, nga nagkombinse kaniya nga ang Dios misulti ug mimatuod sa mga istorya nga iyang nadungog.

Wala siyay gisultihan bisan usa niini nga kasinatian, bisan og siya kanunayng namulong bahin sa bulawan nga mga palid ug hinay-hinay nga mituo nga ang Dios nagtawag kaniya nga mahimong usa ka eskriba alang kang Joseph Smith samtang siya naghubad. Sa dihang ang ting-eskwela natapos sa tingpamulak sa 1829, si Oliver mibiyahe ngadto sa Harmony, Pennsylvania, diin si Joseph nagpuyo uban sa iyang asawa, si Emma, nagtikad sa yuta nga gipanag-iya sa amahan ni Emma, si Isaac Hale.

Ang paghubad sa mga palid nahunong sulod sa usa ka panahon human giwala sa eskriba ni Joseph nga si Martin Harris ang manuskrito sa miaging ting-init. Bisan pa man niini nga kakulian, gipaneguro ni Joseph sa iyang inahan, nagsulti kaniya nga usa ka anghel ang misulti kaniya nga padalhan siya sa Ginoo og usa ka eskriba. “Ug misalig ko nga ang iyang saad matuman,” miingon si Joseph. Sa pagkatinuod, ang Ginoo mipadala gayod og usa ka eskriba, ug sa kasorpresa sa inahan ug amahan ni Joseph kadto si Oliver Cowdery, ang mismong tawo nga ilang gitabangan nga maandam. Si Oliver miabot sa panimalay ni Joseph ug Emma Smith niadtong Abril 5, 1829.

Wala mag-usik og panahon si Joseph ug Oliver. Human giasikaso ang pipila ka buluhaton niadtong Abril 6, gisugdan dayon nilang duha pagkasunod adlaw ang paghubad.

Usa ka Pagpadayag alang kang Oliver

Ang paghubad nagpadayon sulod sa pipila ka adlaw, ug dayon si Joseph nakadawat og usa ka pagpadayag alang sa iyang bag-o nga eskriba. Ang nagpabilin nga mga pagduhaduha ni Oliver mahitungod sa propetikanhon nga gasa ni Joseph Smith gitubag samtang ang mga pulong sa pagpadayag misugilon og mga kasinatian nga wala gipakigbahin ni Oliver ngadto ni bisan kinsa. “Hinumdomi ang gabii nga ikaw misangpit ngari kanako diha sa imong kasingkasing, nga ikaw unta mahibalo mahitungod sa kamatuoran niini nga mga butang,” ang Ginoo mipahinumdom kaniya. “Wala ba Ako magsulti og kalinaw nganha sa imong hunahuna mahitungod niini nga butang?—Unsa ka labaw nga kamatuoran ang imong maangkon kay sa gikan sa Dios? … Ayaw pagduhaduha, ayaw kahadlok.”

Si Oliver miadto sa Harmony nagtuo nga siya gitawag nga tigsulat alang kang Joseph; karon siya anaa didto ug gustong mahibalo kon unsa pay ipabuhat sa Ginoo kaniya. “Tan-awa ikaw adunay gasa,” ang Ginoo mipahayag diha sa pagpadayag, “ug bulahan ikaw tungod sa imong gasa. Hinumdomi nga sagrado kini ug gikan sa kahitas-an.” Ang iyang gasa mao ang gasa sa pagpadayag, ug pinaagi niini siya “makakaplag og mga misteryo, nga [siya] makadala og daghan ngadto sa kasayoran sa kamatuoran; oo, ipakita kanila ang kamatuoran sa sayop nila nga mga pamaagi.” Ang Ginoo mitanyag usab ni Oliver og laing gasa: “kon ikaw magtinguha kanako, sa paghubad, bisan ang akong sulugoon nga si Joseph.”

Sa kasamtangan, si Oliver padayon nga nakasaksi ni Joseph Smith sa paggamit sa iyang gasa sa paghubad. Sa usa ka panahon nianang sama nga bulan, ang duha ka lalaki naghisgot sa gidangatan ni Apostol Juan—usa ka gikahinaman nga hilisgotan niadtong panahona. Ang kasaysayan ni Joseph mirekord nga magkalahi sila sa ilang mga opinyon ug “parehong miuyon nga husayon [kini] pinaagi sa Urim ug Thummim.” Ang tubag miabot pinaagi sa usa ka panan-awon sa usa ka papel nga gihubad ni Joseph, nga karon mao ang Doktrina ug mga Pakigsaad 7.

Si Oliver Nagtinguha nga Mohubad

Samtang si Joseph ug Oliver nagpadayon sa ilang buhat, nagkadako ang tinguha ni Oliver nga mobuhat og mas dako nga bahin sa paghubad. Ang Ginoo misaad kaniya og kahigayonan nga mohubad, ug gusto niya kining angkonon. Si Joseph midiktar og laing pagpadayag. Niini, ang Ginoo miseguro kang Oliver nga makabaton siya sa gasa nga iyang gitinguha. Ang mga gikinahanglan mao ang hugot nga pagtuo ug usa ka matinuoron nga kasingkasing.

Ang pagpadayag nagpadayon, nagpahibalo sa nangandoy nga mahimong tighubad kon unsaon sa paghimo kini nga proseso. Ang Ginoo mipahayag, “Ako mosulti kanimo diha sa imong hunahuna & sa imong kasingkasing, pinaagi sa Espiritu Santo, nga moabot diha kanimo & nga mopuyo diha sa imong kasingkasing.” Ang pagpadayag kanunayng moabot niini nga paagi. Ang pagpadayag namahayag nga mao kini ang paagi o “ang espiritu diin si Moises midala sa mga anak sa Israel agi sa Pulang Dagat sa ibabaw sa uga nga yuta.”

Si Oliver Cowdery nagpuyo sa usa ka kultura nga naimpluwensiyahan og maayo sa mga ideya sa biblia, pinulongan, ug mga binuhatan. Ang paghisgot kang Moises diha sa pagpadayag lagmit nakaimpluwensiya kaniya. Ang asoy sa Daang Tugon mahitungod ni Moises ug sa iyang igsoon nga si Aaron misaysay og pipila ka higayon sa paggamit og mga sungkod sa pagpakita sa kabubut-on sa Dios (tan-awa sa Exodo 7:9–12; Mga Numeros 17:8). Daghang Kristiyano sa panahon ni Joseph Smith ug Oliver Cowdery ang parehong nagtuo sa mapanagnaon nga mga sungkod isip mga instrumento alang sa pagpadayag. Si Oliver nalakip niadtong mga mituo ug migamit og mapanagnaon nga sungkod.

Ang Ginoo miila sa abilidad ni Oliver sa paggamit og sungkod: “Ikaw adunay laing gasa nga mao ang gasa sa paggamit og turok [o sungkod].” Nagkompirmar sa kabalaanon niini nga gasa, ang pagpadayag mipahayag: “Tan-awa walay laing gahom gawas sa Dios nga makapahimo niining butang sa Kinaiyahan nga motrabaho diha sa imong mga kamot kay kini mao ang buhat sa Dios.” Kon gitinguha ni Oliver, ang pagpadayag padayon nga namulong, ang Ginoo modugang sa gasa sa paghubad ngadto sa mapadayagon nga mga gasa nga anaa na daan ni Oliver.

Bisan og diyotay ra kaayo kita og nasayran nga mga detalye mahitungod sa pagsulay ni Oliver Cowdery sa paghubad, sa tinuod dili kaayo maayo ang dagan niini. Ang iyang mga paningkamot daling natapos. Tungod sa kapakyasan ni Oliver, si Joseph Smith nakadawat og laing pagpadayag, nagtambag kang Oliver, “Pagpailob akong anak, kay kini mao ang kaalam ngari kanako, ug kini dili angay nga ikaw mohubad gayod niini nga panahon.” Gisultihan usab si Oliver nga wala siya makasabot sa proseso. Gisultihan siya: “Ikaw kinahanglan gayod nga magtuon niini diha sa imong hunahuna; unya ikaw kinahanglan nga mangutana kanako kon kini husto, ug kon kini husto, Ako mohimo sa imong dughan nga moinit diha sulod kanimo.”

Awtoridad Gipahiuli

Samtang nawad-an og kadasig tungod sa iyang napakyas nga pagsulay sa paghubad, si Oliver makugihong mipadayon sa iyang tahas isip eskriba samtang si Joseph midiktar sa paghubad gikan sa mga palid. “Kini ang mga adlaw nga dili gayod makalimtan,” si Oliver sa wala madugay misulat. “Nga [molingkod] ubos sa tunog sa usa ka tingog nga gidiktahan pinaagi sa paglamdag sa langit, nakapahigmata sa tuman nga pagpasalamat niini nga dughan!”

Sa dihang si Joseph ug Oliver miabot sa asoy sa personal nga pangalagad ni Jesus ngadto sa mga Nephita, nagsugod sila sa paghunahuna kon aduna bay bisan kinsa sa ilang panahon nga anaay awtoridad sa pagpahigayon sa tinuod nga simbahan ni Kristo. Naghunahuna sila og maayo mahitungod sa bunyag. Niadtong Mayo 15, 1829, mibiya sila sa panimalay sa mga Smith diin sila nagtrabaho aron mangita og hilit nga dapit nga kaampoan diha sa duol nga kakahoyan.

Bisan unsa nga mga pagduhaduha nga mahimong gihunahuna pa ni Oliver Cowdery seguradong nawala sa dihang ang nabanhaw nga si Juan Bautista “mikanaog uban sa usa ka panganod sa kahayag, ug mipandong sa iyang mga kamot kanamo [miingon,] ‘Diha kaninyo nga akong kauban nga mga sulugoon, sa ngalan sa Mesiyas, ako motugyan sa Pagkapari ni Aaron, nga naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag pinaagi sa pagpaunlod alang sa kapasayloan sa mga sala.’” Ang kasinatian hilabihang milig-on sa hugot nga pagtuo ni Oliver. “Hain ang lawak sa pagduhaduha?” Si Oliver sa wala madugay misulat bahin sa panghitabo. “Wala na gayod, ang kawalay kasegurohan nahanaw, ang pagduhaduha miunlod.”