Warren Cowdery

Lisa Olsen Tait

Sa dihang ang iyang manghod nga si Oliver, nianang higayona nga anaa sa iyang mga baynte anyos ang panuigon, nahimong “ikaduhang elder” sa gipahiuli nga Simbahan niadtong 1830, si Warren Cowdery (nga nailhan usab nga Dr. Cowdery) nanag-iya og parmasya, nagserbisyo isip postmaster, ug nakatukod sa labing una nga balay nga ginama sa tisa [brick] didto sa Freedom, New York. Nianang higayona, siya ug ang iyang asawa, si Patience, mga ginikanan sa walo ka anak. Bisan kon nakahibalo siya mahitungod sa Basahon ni Mormon sa higayon nga gimantala kini niadtong 1830, si Warren wala magpasakop sa Simbahan hangtod sa paglabay sa upat ka tuig. Gisundan niya ang mga panghitabo mahitungod sa pagtuo sa iyang igsoong lalaki gikan sa layo. Sa usa ka sulat niadtong Enero 1834 ngadto ni Oliver, si Warren miduyog sa kasubo nga nahiagoman sa mga Santos didto sa Missouri human sa ilang bag-ohay lang nga pagpalayas gikan sa Lalawigan sa Jackson, apan siya sa gihapon misulat ngadto sa mga miyembro sa Simbahan nga nag-ingon “imong katawhan” ug “imong mga higala.”

Ang malagmit nga pag-usab ni Warren Cowdery nahitabo sa pagbisita ni Joseph Smith ug ni Parley P. Pratt niadtong Marso 1834. Nagsunod sa sugo nga mang-agni og mga partisipante ug mangolekta og mga donasyon gikan sa mga miyembro sa Simbahan didto sa “silangan nga mga nasod” alang sa Zion’s Camp, si Joseph ug si Parley mibiyahe sa Freedom ug miistar didto og usa ka gabii sa panimalay ni Warren ug ni Patience Cowdery, diin maabiabihon sila nga gitagad “sa hingpit nga Pagpahimulos sa tanang Panalangin sa temporal ug sa espirituwal nga among gikinahanglan o nakita nga takos nga madawat.” Atol sa pagbisita, nagsangyaw sila og dili lang kausa “ngadto sa usa ka balay nga puno kaayo sa mga tawo,” ug ubay-ubay ka mga tawo ang nabunyagan, lakip na ang silingan ni Cowdery nga si Heman Hyde. Si Pratt sa kaulahian mihinumdom nga “traynta o kwarenta” ka tawo ang nabunyagan ug naorganisar ngadto sa usa ka branch, nga nahimong sentro sa pagtubo sa Simbahan niana nga rehiyon.

Bisan kon walay nahibilin nga mga rekord bahin niining unang mga miyembro sa Freedom Branch, maingon og si Warren Cowdery usa nila. Sa tinglarag sa 1834, unom ka bulan human sa pagbisita ni Joseph Smith, si Warren misulat og laing sulat ngadto ni Oliver, diin namulong siya bahin sa relihiyon nga “gihangop namong duha” ug giisip namo ang mga Santos nga “among kaigsoonan.” Ang sulat ni Warren nag-ingon nga ang iyang pagkakabig iyang naangkon human sa daghang paningkamot. Ingon og kahibalo gayod siya bahin sa pagpanaway ug pagsupak sa “liboan ka talahorong mga tawo [kinsa] nag-ingon … kita gibinuangan ug gilingla,” mas nasakitan nianang oposisyon tungod sa iyang talahoron nga katungdanan sa lokal nga katilingban. Ug bisan kon mibati na siya og “pipila ka pagpakita sa balaanong pag-aprobar” sa iyang pagsimba didto sa Freedom Branch, si Warren nangandoy gihapon og mga kasinatian sama sa iyang igsoon. “Nangandoy ko sa liboan na ka higayon nga unta makabaton ko niana nga ebidensya nga anaa kanimo,” siya misulat. Mipadayag usab si Warren og tinguha alang sa “usa ka tigsangyaw sa atong simbahan” nga moanha sa dapit sa Freedom, usa ka tawo kinsa “mobuhat og maayo kanato, pinaagi sa paglig-on ug pagdasig kanato pinaagi sa labing balaan nga pagtuo.”

Seguradong wala kadto dahoma dihang, duha ka bulan ang milabay, si Joseph Smith nakadawat og pagpadayag nga nagsangon kang Warren nga mahimong “usa ka halangdon nga pari nga tigdumala sa akong simbahan, sa yuta sa Freedom ug sa palibot nga mga rehiyon.” Ingon nga mao ang sagad nga mahitabo, si Warren ang nahimong tubag sa iyang kaugalingong hangyo. Ug sama sa daghan niadtong gitawag aron moserbisyo, ang mga pulong sa pagpanalangin ug ang tambag nga iyang gihatag nagpakita nga ang Ginoo nakaila kaniya ug motabang kaniya nga magmalamposon sa iyang tawag.

Sa pagsuporta sa pagpili ni Warren nga mopasakop sa Simbahan, ang pagpadayag miila usab sa panglimbasog nga iyang nasinati. “Dihay kamaya sa langit sa diha nga ang akong sulugoon nga si Warren miyukbo sa akong gahom, ug mibulag sa iyang kaugalingon gikan sa mga panikas sa mga tawo,” kini miingon. Kana nga pagbulag nahimong mas importante, kay ang pagpadayag mipahimangno nga si Cowdery “mosangyaw sa akong walay kataposan nga ebanghelyo, ug mopataas sa iyang tingog ug mopasidaan sa katawhan, dili lamang sa iyang kaugalingon nga dapit, apan sa kasikbit nga mga lalawigan,” ug siya “mohalad sa iyang tibuok nga panahon niini nga halangdon ug balaan nga tawag.” Dihang gibuhat niya kini, ang Ginoo “mihatag kaniya og grasya ug kasiguroan bisan asa siya mobarog.” Sa kataposan, ang pagpadayag miingon, ang kalamposan ni Warren mas nagdepende sa iyang pagkamapainubsanon kaysa iyang abilidad: “Bulahan ang akong sulugoon nga si Warren, kay Ako adunay kaluoy kaniya; ug, dili igsapayan ang garbo diha sa iyang kasingkasing, Ako motuboy kaniya ingon nga siya magpaubos sa iyang kaugalingon sa akong atubangan.”

Kay diyotay ra man ang mga rekord, wala kita mahibalo nga si Warren Cowdery gibutang sa katungdanan sa tigdumala nga elder sa rehiyon sa Freedom pagkasunod tuig—puno sa kalihokan nga tuig niana nga dapit. Sa sayo sa Abril, ang komperensiya gipahigayon diin si Sidney Rigdon sa Unang Kapangulohan ang nagdumala. Mikomentaryo bahin niini nga komperensiya sa balita sa mantalaan, naobserbahan ni Oliver Cowdery nga ang “kadaghanan” sa rehiyon sa Freedom “matinguhaon nga makadawat og panudlo kalabot sa pagtuo ug sa gituohan niini nga simbahan, naghinamhinam sa pagpakisayod sa pipila ka elder nga palarang nakasangyaw niana nga nasod.” Pipila ka semana ang milabay, ang Napulog Duha—sa ilang unang misyon isip usa ka korum—miabot sa dapit. Mipahigayon sila og usa ka komperensiya pagka-Mayo 22–23, diin ilang gitino ang mga utlanan nga mga lugar sa Komperensiya sa Freedom, nga naglakip sa 12 ka branch ug naglangkob sa dakong porsiyon sa kasadpang bahin sa New York. Ang Freedom Branch mao ang kinadak-an, nga adunay gibalita nga 65 ka miyembro.

Ang mga hilisgotan nga gihisgotan sa komperensiya naglakip “sa ‘Pulong sa Kaalam,’ sa gasa sa mga pinulongan, pagpanagna, uban pa,” ug “sa katubsanan sa Zion.” Lima ka sakop sa Napulog Duha ang namulong, human niana “ang simbahan mipahayag sa ilang determinasyon sa pagbuhat sa mga pagtulun-an” nga gihatag. Sa hinapos nianang tuiga, gibisita ni Orson Pratt ang dapit sa usa ka misyon. Gibalita nga nakabunyag siya og pipila ka tawo, nakabaligya og mga kopya sa Basahon ni Mormon ug Doktrina ug mga Pakigsaad, ug nakakuha og pipila ka subskripsiyon sa mantalaan sa Simbahan, ang Messenger and Advocate [Mensahero ug Tigpataliwala]. “Adunay posibilidad nga daghan ang mohangop sa ebanghelyo niini nga mga bahin,” siya misulat.

Kini ug ang ubang mga balita nagpakita nga si Warren Cowdery kabahin sa usa ka maabtik, dunay suod nga relasyon tali sa sentrong mga dapit ug sa anaa sa lagyo nga nag-unang mga branch sa Simbahan. Isip usa ka lokal nga lider sa Simbahan, tingali nakatabang siya sa pagpangalagad sa daghang bag-o nga mga kinabig sa ilang pag-adto sa Simbahan, samtang nagtabang usab sa pag-abi-abi ug paghan-ay sa mga miting alang sa mga misyonaryo ug mga lider gikan sa Kirtland.

Ang misyonaryo nga mga kalamposan nagpasabot nga paspas nga pagtubo sa bag-ong mga branch; ang uban, sama sa Freedom Branch, ingon og daghan na kaayo. Apan ang panawagan sa pagpundok uban sa mga Santos nagpasabot nga ang lokal nga mga lider kasagaran mitabang sa pagdumala sa paspas nga mga pagkunhod sa mga miyembro sa ilang rehiyon. Ang kasinatian ni Warren Cowdery normal ra. Ang iyang balita nga gimantala sa Pebrero 1835 sa Messenger and Advocate naghatag og ideya kon unsa ka paspas ang kausaban sa nag-unang mga branch. Ang simbahan sa Westfield gibalita nga adunay 72 ka miyembro, igo nga gidaghanon, samtang ang mga branch sa Mendon ug sa Lima gibalita nga adunay gidaghanon nga walo. “Gikan niining ulahi nga gihisgotan nga simbahan, ang mas daghang bahin namalhin; ang uban ngadto sa Kirtland, ug ang uban ngadto sa Missouri, ug ang walo nga gihisgotan dinhi, mao ang salin nga nahibilin,” si Cowdery mipasabot. “Ang simbahan kaniadto daghan kaayo.”

Ingon man usab, ang 18 ka miyembro sa Java ug sa Weathersfield nagrepresentar “sa nahibilin sa simbahan,” diin “daghan ang mibalhin ngadto sa mga dapit nga pundokanan.” Si Cowdery mismo sa kataposan miapil niana nga pagpundok. Matinud-anong nakaserbisyo sa Freedom, siya ug ang iyang pamilya mibaligya sa ilang kabtangan niadtong tinglarag sa 1835 ug nangandam sa pagbalhin ngadto sa Kirtland. Miabot sila sa sayo sa 1836, tukma kaayo nga panahon aron moapil sa mga kalihokan nga may kalabotan sa pagpahinungod sa balay sa Ginoo.

Sama sa daghang uban pa sa nahaunang mga Santos nga wala kaayo mailhi karon, si Warren Cowdery nakahimo og importante nga mga kontribusyon sa buhat sa Ginoo. Mitrabaho siya sa opisina sa pagmantala didto sa Kirtland ug mi-edit sa mantalaan sa Simbahan. Isip klerk ni Joseph Smith, mitabang siya sa pagsulat sa pagpahinungod nga pag-ampo alang Templo sa Kirtland ug mitipig sa mga rekord sa inadlaw-adlaw nga kalihokan. Ang iyang labing malungtaron nga kontribusyon makita sa pipila lang ka pahina gikan sa pagpadayag nga alang kaniya—niadtong 1836, iyang girekord ang entry diha sa journal ni Joseph Smith nga naghulagway sa pagbisita sa Manluluwas ug sa ubang langitnong mga mensahero ngadto ni Joseph ug ni Oliver didto sa Templo sa Kirtland niadtong Abril 3, 1836.