“Ang Tawag ni Orson Pratt sa Pagserbisyo,” Kinatibuk-ang Saysay sa mga Pagpadayag (2016)
“Ang Tawag ni Orson Pratt sa Pagserbisyo,” Kinatibuk-ang Saysay sa mga Pagpadayag
Ang Tawag ni Orson Pratt sa Pagserbisyo
Si Orson Pratt masukitsukiton, matinguhaon nga bata. Nahinumdom siya nga sa bata pa, siya “adunay daghang seryosong mga pangutana nga may kalabotan sa Dios ug sa umaabot nga kahimtang.” Bisan kon sila walay giapilan nga simbahan, ang iyang mga ginikanan, sila si Jared ug Charity Pratt, miawhag sa ilang anak sa pagbasa sa Biblia alang sa mga tubag sa iyang daghang pangutana. Ang iyang pagbasa nakamugna og daghan pa nga pangutana.
Ang pamilya, sama sa giingon ni Pratt sa kaulahian, “usa sa mga kabos niini nga kalibotan.” Siya nahinumdom, “Usa ka nagsunod-sunod nga mga demalas ang mibitad nila paubos sa mga walog sa kakabos.” Tungod sa ilang lisod nga mga kahimtang, ang mga ginikanan ni Pratt mipatrabaho kaniya sa edad nga 11 sa umahan sa laing mga mag-uuma isip bugti alang sa lawak ug kapuy-an nga walay bayad. Sulod sa dul-an sa siyam ka tuig, mitrabaho si Pratt isip sinuholan nga katabang sa daghang nagkalainlaing mga mag-uuma gikan sa Ohio ngadto sa Long Island. Bisan kon mibati siya “nga napangadto-adto bisan asa nga walay permanenteng gipuy-an nga lugar,” miingon siya nga ang “sayo nga mga pagbati sa moralidad ug relihiyon nga gisilsil ngadto sa [iyang] hunahuna sa [iyang] mga ginikanan, kanunayng nagpabilin [kaniya]” ug nagsilbi nga usa ka angkla.
Padayon siya nga mibati og “dakong tinguha nga maandam alang sa umaabot nga kinabuhi,” apan wala kini mahitabo hangtod miabot ang tinglarag sa 1829 nga si Pratt sinserong nag-ampo alang sa espirituwal nga giya sa iyang kinabuhi. Sa kaulahian misulat siya, “Sa hilom nga kagabhion, samtang ang uban nahinanok sa ilang pagkatulog, miadto ko sa sekreto nga dapit sa mingaw nga umahan o hilom nga kamingawan, ug miyukbo sa atubangan sa Ginoo, ug nag-ampo sulod sa daghang oras.” Giminubo niya ang iyang mga pagbati nianang higayona: “Ang gitinguha gayod sa akong kasingkasing mao nga ang Ginoo mopakita sa Iyang kabubut-on mahitungod kanako.”
Usa ka Wala Damha nga Pagbisita
Gipadayon niya ang iyang mga pag-ampo samtang nagtrabaho sa mga umahan alang sa lawak ug kapuy-an nga walay bayad duol sa panimalay sa iyang pamilya sa Canaan, New York, hangtod sa Septiyembre 1830. Niana nga bulan gibisitahan siya sa iyang magulang nga lalaki nga si Parley.
Pipila ka semana sa wala pa kadto, si Parley P. Pratt sa wala damha nakadiskobre sa Basahon ni Mormon ug nakabig ngadto sa Simbahan nga gipahiuli pinaagi ni Joseph Smith. Bag-o pa lang nga nabunyagan ug na-orden aron sa pagsangyaw sa ebanghelyo, si Parley mibiyahe sa silangan sa Canaan, ang tuyo mao ang pagpakigbahin sa iyang kadasig sa iyang bag-ong tinuohan ngadto sa iyang pamilya. Samtang ang iyang mga ginikanan mituo “og gamay,” si Parley miingon, “Ang akong igsoon nga si Orson, usa ka batan-on nga disenuybe anyos, midawat niini sa tibuok niyang kasingkasing.”
Ang nadungog ni Orson Pratt sa mensahe sa iyang igsoon nakatagbaw sa iyang espirituwal nga mga pangandoy, ug nabunyagan siya pagka-Septiyembre 19, iyang ika-19 nga adlawng natawhan. Sulod sa pipila ka semana sa iyang bunyag, miadto siya sa Fayette, New York, naghinamhinam nga mahimamat si Joseph Smith.
Usa ka Tawag sa Pagsangyaw
Human sa sobra sa 200 ka milya nga pagbiyahe, si Orson Pratt miabot sa panimalay ni Peter Whitmer Sr., diin didto nagpuyo si Joseph Smith nianang higayona. Didto nahimamat niya si Joseph ug nahibaloan nga ang iyang igsoon nga si Parley gitawag pinaagi sa pagpadayag “sa pag-adto sa mga Lamanita aron sa pagpahayag kanila sa malipayon nga mga balita sa dako nga kamaya.” Si Orson, matinguhaon gihapon nga mahibalo sa kabubut-on sa Ginoo alang niya, nangutana ni Joseph “kon mahimo ba nga mahibalo siya kon unsa ang iyang misyon.” Aduna bay pagpadayag alang niya sama sa iyang igsoon?
Si Joseph Smith midapit ni Orson Pratt ug ni John Whitmer sa itaas nga lawak diin didto si Joseph bag-ohay lang nakahuman sa iyang paghubad sa Basahon ni Mormon. Dinhi niining mas pribado nga luna, si Joseph nangutana ni Orson kon andam ba siya nga mosulat sa pagpadayag samtang siya mamulong niini. “Kay batan-on pa ug mibati sa iyang pagkadili takos,” si Orson mihangyo kon mahimo ba nga si John Whitmer ang mohimo isip tigsulat puli niya. Si Joseph Smith miuyon ug “mikuha sa gamay nga bato nga gitawag og bato sa manalagna, ug mibutang niini ngadto sa usa ka Kalo dayon misugod sa pagpamulong.”
Sa pagpadayag, ang Ginoo midayeg ni Orson sa iyang pagtuo ug mitawag niya sa pagpangalagad: “Bulahan ikaw tungod kay ikaw mituo & ikaw labaw nga bulahan tungod kay ikaw gitawag kanako sa Pagsangyaw sa akong Ebanghelyo.” Si Orson Pratt sa kaulahian mihulagway sa iyang mga pagbati dihang naminaw sa Ginoo nga nakigsulti kaniya pinaagi ni Joseph: “Naghunahuna ko nga kadto ang labing nindot ug importante nga tawag, ug mibati ko nga dili gayod makatuman niini gawas kon ang Ginoo mohimo nakong sarang pinaagi sa iyang Espiritu.”
Pagka-Disyembre 1, si Joseph Smith mi-orden niya nga elder, ug si Orson nangandam dayon aron magmisyon. Bisan kon wala gitino sa pagpadayag kon asa siya moadto, nadesisyonan nga magsangyaw siya sa Colesville, New York. Si Orson misalig niini nga saad diha sa pagpadayag: “Ipabati ang imong tingog ug ayaw pagpanagana kay ang Ginoong Dios nakapamulong busa Panagna ug kini ihatag pinaagi sa gahom sa Espiritu Santo.” Miingon siya sa wala madugay, “Naghunahuna ko sa akong kaugalingon, nga gawas kon ang Ginoo mobubo sa iyang Espiritu ngari nako sa mas hingpit nga paagi kaysa bisan unsa nga akong nasinati, dili gayod ako makahimo niini nga mga katungdanan nga madawat sa iyang panan-aw.”
Nagdala sa sulat sa pasiuna nga pinirmahan ni Joseph Smith, si Orson miabot sa Colesville, diin masulundon siya nga “misugod sa pag-abli sa [iyang] baba diha sa publiko nga mga miting, ug sa pagtudlo sa mga butang sa Dios sumala sa gipasulti sa Espiritu [kaniya].” Ang gamayng branch sa Simbahan didto sa Colesville mainitong midawat niya, ug mipauli siya sa Fayette sa ulahing bahin niana nga bulan.
Si Pratt mitug-an nga siya “usahay mibati nga nangurog ug nagpanagana, tungod sa kahadlok nga dili gayod [niya] matuman ug mahuman ang ingon ka mahinungdanon nga buhat.” Hinuon, ang pagpadayag mihimong klaro sa kabubut-on sa Ginoo ngadto kaniya, ug mipadayon siya sa pagserbisyo isip misyonaryo ug Apostol sulod sa sobra sa 60 ka tuig agi og pagtubag niana nga tawag.