Usa ka Misyon ngadto sa Canada

Eric Smith

Sa tinglarag sa 1833, usa ka 54 anyos nga miyembro sa Simbahan nga ginganlan og Freeman Nickerson mibiyahe ngadto sa Kirtland, Ohio, sakay sa karo ug nangita ni Joseph Smith. Si Nickerson ug ang iyang asawa, si Huldah, sa Perrysburg, New York, nabunyagan sa miagi nga pipila ka bulan. Mihangyo si Nickerson sa Propeta nga mobiyahe uban kaniya ngadto sa Mount Pleasant, sa Upper Canada, aron sa pagsangyaw sa ebanghelyo ngadto sa duha sa iyang mga anak nga lalaki, si Moses ug si Eleazar Freeman. Ang Mount Pleasant usa ka gamay nga baryo sa mga 100 ka milya sa kasadpan sa Buffalo, New York, sa dapit nga nataliwad-an sa Lake Erie ug Lake Ontario.

Si Moses Nickerson sa kadugayan misulti nga siya ang nakahatag og pagdasig sa hangyo sa iyang amahan: “Sa bulan sa Hunyo [1833], samtang nagbisita didto sa panimalay sa akong mga ginikanan [ako] nakadungog sa unang higayon kon unsa ang nailhan kaniadto isip Mormonismo; nakauyon sa doktrina nga gisangyaw, ug mihangyo sa akong mga ginikanan nga pabisitahon kami sa pipila ka mga elder sa Canada. … Sa bulan sa Septiyembre niining tuig 1833, ang akong amahan ug inahan mibisita sa Kirtland, Ohio, ang punoang buhatan niining mga katawhan, ug mihangyo ni Joseph Smith ug Sidney Rigdon sa pagkuyong kanila ngadto sa Canada.”

Ang mga Kabalaka ni Joseph nga Nagkinahanglan og Dinaliang Pagtagad

Niadtong Septiyembre 1833, si Joseph Smith nagpuyo didto sa Kirtland uban sa iyang asawa, si Emma, ug sa duha ka gagmayng mga bata—si Julia, edad 2, ug si Joseph III, sa wala pa ang iyang unang adlawng natawhan. Nawad-an na sila og upat ka mga anak tungod sa kamatayon. Ang Propeta, 27 anyos, nagsangyaw sa mensahe sa ebanghelyo sa daghang nahaunang mga panaw apan hangtod niining panahona wala pa makaalagad og mas pormal nga pagsangyaw nga misyon.

Sa labing minos duha ka kabalaka ang nag-ukopar sa pagtagad sa Propeta niining higayona nga nahimong lisod alang kaniya ang pagbiya sa iyang panimalay ug pamilya sulod sa taas nga panahon. Niadtong Agosto 9, 1833, iyang nahibaloan nga ang mga paningkamot sa Simbahan sa pagtukod sa siyudad sa Zion didto sa Independence, sa Lalawigan sa Jackson, Missouri, misagubang og grabeng pagkalangay. Usa ka manggugubot nga panon sa Simbahan mipugos sa mga miyembro sa pag-uyon nga biyaan ang Lalawigan sa Jackson sa pagka-tingpamulak sa 1834. Si Joseph direktang misulat ngadto sa nag-antos nga mga Santos sa Missouri: “Kaigsoonan kon ako anaa pa unta uban kaninyo usa ko sa aktibong kabahin sa inyong mga pag-antos & bisan og ang akong natural nga pagkatawhanon maoy hinungdan nga gusto nakong molikay sa kasakit apan ang akong kalag dili mutugot kanako nga mobiya kaninyo, ang Dios nagtabang kanako O pagmaya tungod kay ang atong katubsanan nagkaduol na O Dios luwasa ang akong kaigsoonan sa Zion.”

Sa kasamtangan, si Joseph nagsagubang usab og usa ka hulga nga nagagikan sa kanhi higala. Usa ka kanhi miyembro sa Simbahan nga ginganlan og Doctor Philastus Hurlbut, human gi-excommunicate niadtong Hunyo 1833 tungod sa imoral nga binuhatan, misugod og usa ka agresibong kampanya sa pagdaot sa dungog ni Joseph ug sa Simbahan. Ang iyang pamaagi naglakip sa pag-awhag og pangpanggukod sa lokal nga paagi, mibiyahe og lagyo aron sa pagkolekta og mga pamahayag nga kritikal kang Joseph, ug naghulga sa kinabuhi ni Joseph. Ang naglahutay nga mga papel sa Propeta niining tungora nagpakita og grabing kaguol mahitungod sa mga kalihokan ni Hurlbut. Sa usa sa sulat niadtong Agosto 1833 ngadto sa mga miyembro sa Missouri, siya mireport nga si Hurlbut “maayo kaayong namakak ug ang mga tawo nanggukod kaniya ug naghatag kaniya og kwarta aron sa pagpahuyang sa mormonismo nga nakapapiligro kaayo sa atong mga kinabuhi.” Sa usa ka sulat sa journal pipila ka bulan ang milabay, ang Propeta namahayag nga si Hurlbut “nagtinguha sa kalaglagan sa mga santos dinhi niini nga dapit ug ilabi na gayod sa akong kaugalingon ug sa pamilya.” Ang sitwasyon naghulga ug walay nasayod kon unsay sangpotan.

Usa ka Pag-ampo alang sa Kahupay

Bisan pa niining mga kabalaka, si Joseph midawat sa imbitasyon ni Nickerson sa pagsangyaw sa ebanghelyo ngadto sa iyang mga kaparyentihan sa Canada, ug si Sidney Rigdon miuyon sa pag-uban kaniya. Ang journal ni Joseph yano nga nag-ingon niadtong Oktubre 4: “Nangandam sa pag-adto sa Silangan uban ni Freeman Nickerson.” Ug sa pagka-Oktubre 5: “Kining adlawa nagsugod sa usa ka Panaw ngadto sa Silangan.” Ang usa-ka bulan nga misyon latas sa amihanang kasadpan sa Pennsylvania ug sa habagatang kasadpan sa New York ug ngadto sa unsay nailhan karon isip ubos nga bahin sa Ontario, Canada, nga mokabat og mga 500 ka milya ngadto-ngari ug lakip sa mga paghunong sa labing minos 10 ka lungsod, apil na ang pagsangyaw sa kadaghanan niini. Ang propeta nagdala og journal nga mohaom sa iyang bulsa, ug siya ug si Sidney nagpuli-puli sila sa pahimo og mubo nga pagsulat diha niini aron masubay ang ilang mga pagbiyahe ug ang ilang pagsangyaw.

Pagka-Oktubre 12, ang gamayng pundok mitabok sa amihanang kasadpan tumoy sa Pennsylvania New York ug miabot sa panimalay nilang Freeman ug Huldah Nickerson didto sa Perrysburg. Si Joseph Smith misulat nga siya mibati og “maayo kaayo” sa iyang hunahuna apan siya adunay “dakong kahadlok” mahitungod sa iyang pamilya, tingale sa usa ka bahin tungod sa oposisyon nga gipaukyab ni Hurlbut didto sa Kirtland. Kana nga kahadlok tingali maoy nakagiya nilang Joseph ug Sidney ngadto sa pag-ampo alang sa kahupay. Usa ka pagpadayag nianang adlawa (karon Doktrina ug mga Pakigsaad 100) namahayag, “Sa pagkatinuod, sa ingon miingon ang Ginoo nganha kaninyo, akong mga higala nga sila si Sidney & Joseph, ang inyong mga banay anaa sa maayo nga kahimtang; ania sila sa akong mga kamot, ug Ako mohimo ngadto kanila unsa ang akong buot buhaton nga maayo; kay ania kanako ang tanan nga gahom.” Ang kabalaka sa Propeta maklaro nga wala hingpit nga nawala—pagkasunod adlaw mihangyo siya sa Ginoo sa “pagpanalangin sa [iyang] pamilya ug sa pag-amping kanila”—apan siya klaro nga nakakaplag og kahupay niining mga pulong, isip ebidensiya pinaagi sa nahisulat nga iyang girekord sa dihang siya miabot sa panimalay sa Kirtland niadtong Nobiyembre 4 atol sa pagtapos sa iyang misyon: “Nakita nako ang akong pamilya nga maayo ra sumala sa gisaad sa Ginoo. tungod sa maong mga panalangin akong gibati ang pagpasalamat ngadto sa iyang balaan nga ngalan; Amen.”

Ang Oktubre 12 nga pagpadayag mitubag sa duha ka laing mga butang. Nagpasabot nianang “Ako ang Ginoo mitugot kaninyo sa pag-anhi niini nga dapit kay gikinahanglan ko kadto alang sa kaluwasan sa mga kalag,” ang Ginoo misaad ni Joseph ug Sidney nga “usa ka epektibo nga pultahan pagaablihan sa mga rehiyon sa palibot niini nga yuta sa silangan.” Kon ang mga misyonaryo “mobayaw” sa ilang mga tingog uban ang “pagkabalaan sa kasingkasing pinaagi sa espiritu sa kaaghop” ug mamahayag sa mga pulong nga ibutang sa Dios diha sa ilang mga kasingkasing, ang “espiritu Santo [mapa] kaylap sa pagpamatuod sa tanang butang sa bisan unsa” nga ilang isulti. Ang pagpadayag nakahatag usab ni Joseph ug Sidney og kaseguroan nga ang Zion “matubos bisan og kini gipanton sulod sa gamayng panahon.”

Pag-abot didto sa Mount Pleasant

Niadtong Oktubre 18, ang grupo miabot sa ilang destinasyon sa gamay nga baryo sa Mount Pleasant, sa Upper Canada. Mihatag si Sidney Rigdon og mga detalye sa journal ni Joseph Smith: “Miabot sa ilang [Eleazer] Freeman Nickerson didto sa ibabaw nga bahin sa Canada nga human kami miabot sa Canada miagi sa usa ka nindot kaayo nga nasod ug maayo nga pagkaugmad ug adunay daghang lahi nga mga pagbati kalabot sa nasod ug sa mga tawo nga kami mabination nga gidawat.”

Si Joseph ug Sidney migahin sa nagsunod nga usa ka semana ug tunga sa pagsangyaw didto sa Mount Pleasant ug sa pipila ka nagpalibot nga mga baryo ngadto sa dagko ug matinagdanon nga mga kongregasyon. Ang journal sa Propeta ingon og nagpakita sa pagkadinalian ug kamadasigon kalabot sa ilang bisi nga itineraryo. Niadtong Oktubre 24, human si Joseph ug Sidney mipahigayon og usa ka tigom didto sa Mount Pleasant, si Eleazer Freeman Nickerson “mipahayag sa iyang hingpit nga pagtuo sa kamatuoran sa buhat.” Narekord sa journal, nga siya, “uban sa iyang asawa kinsa nakombinser usab nga mabunyagan sa Dominggo mipatigbabaw ang kadasig sa matag dapit diin man kami maadto.” Nianang Dominggoha, Oktrubre 27, napulog duha ka indibidwal ang nabunyagan. Dugang pang duha ang nabunyagan pagkasunod nga adlaw. Uban niadtong mga nabunyagan mao sila si Eleazer Freeman Nickerson, iyang asawa si Eliza, ug si Moises Nickerson.

Sa gabii sa Oktubre 28, ang mga misyonaryo mipahigayon sa ilang kataposan nga panagtigom uban sa ilang gamay nga panon didto sa Mount Pleasant. Sa journal sa Propeta sa pagkasunod buntag, si Sidney Rigdon misulat: “Mipahigayon og panagtigom kagabii Miorden ni br. E[leazer] F[reeman] Nickerson ngadto sa katungdanan sa pagka-Elder adunay maayo nga panagtigom sa usa sa mga sister nga adunay gasa sa mga pinulongan nga nakapalipay sa mga santos nihaot nga ang Dios mopadako sa mga gasa taliwala kanila alang sa kaayohan sa ilang mga anak nga lalaki karong buntaga sa among pagpamauli hinaot ang Ginoo mopauswag sa among panaw Amen.” Si Joseph ug Sidney mibalik pinaagi sa pagtabok sa Lake Erie ug miabot didto sa Kirtlan sa Nobiyembre 4.

Paglabay sa duha ka semana, si Joseph Smith mipadala og sulat ngadto ni Moses Nickerson aron sa pagpahibalo kaniya sa iyang luwas nga pagbalik ug sa pagpaabot sa iyang mga pagbati alang sa bag-ong gitukod nga branch didto sa Mount Pleasant. “Ako maglaom og kumunikasyon gikan nimo sa pagdawat niini, ug hinaot nga imoha kong hatagan og impormasyon kalabot sa kaigsoonan, sa ilang panglawas, hugot nga pagtuo, ug uban pa,” misulat si Joseph. Siya mipadayon: “Ako tinuod nga makasulti, nga uban sa dakong kabug-os ako nakatawag sa Ginoo alang sa kaayohan sa atong kaigsoonan sa Canada. Ug sa dihang akong gihunahuna kon unsa kaandam silang midawat sa pulong sa kamatuoran pinaagi sa pagpangalagad ni bro. Sidney ug nako, ako tinuod nga ubos sa dakong obligasyon sa pagpaubos sa akong kaugalingon diha sa pagkamapasalamaton diha Kaniya.”

Dayon si Joseph mihangyo ni Nickerson sa pagpabilin nga matinud-anon ngadto sa iyang bag-ong mga gituohan: “Imong hinumdoman ang pagpamatuod nga akong gihatag sa ngalan ni Ginoong Jesus, kalabot sa talagsaong buhat nga iyang gipahitabo sa kataposang mga adlaw. Ikaw nakahibalo na sa akong matang sa pakig-kumunikasyon, kon giunsa nga sa kahuyag ug kayano ako namahayag nganha kanimo kon unsa ang gipahitabo sa Ginoo pinaagi sa pagpangalagad sa iyang balaan nga mga anghel ngari kanako, alang niining henerasyon. Akong giampo nga ang Ginoo mopagahom kanimo sa pagbahandi niining mga butanga diha sa imong hunahuna; tungod kay ako nasayod nga ang iyang Espiritu mopamatuod ngadto sa tanan kinsa makugihon nga magtinguha og kahibalo gikan kaniya. Manghinaot ko nga imong siksikon ang mga kasulatan, aron makita kon kining mga butanga wala ba usab mahiuyon niadtong mga butang nga nahisulat sa karaan nga mga propeta ug mga apostoles.”

Ang kongregasyon sa Mount Pleasant mipadayon sa pagtubo human sa pagbiya nilang Joseph ug Sidney. Pagka-Disyembre 1833, adunay gikataho nga 34 ka miyembro didto. Ang kongregasyon mahimong miabot sa gidaghanon nga 50 sa misunod nga pipila ka tuig. Sa kataposan, ang kadaghan sa mga tumutuo didto milalin aron moapil sa mga Santos didto sa Estados Unidos, o nahilayo gikan sa Simbahan.

Si Freeman Nickerson, ang tawo nga mibiyahe ngadto sa Kirtland aron mohangyo sa Propeta sa pagsangyaw ngadto sa Iyang mga anak nga lalaki, miapil sa Zion’s Camp nga ekspidesyon niadtong 1834 (duha ka anak nga lalaki, si Uriel ug si Levi, mikuyog kaniya), miapil sa pundok sa mga Santos sa Nauvoo, ug namatay sa sayong bahin sa 1847 didto sa Teritoryo sa Iowa panahon sa paglalin padulong sa kasadpan.

Si Moses Nickerson ug si Eleazer Freeman Nickerson miapil sa mga Santos diha sa kasadpang bahin sa Estados Unidos sulod sa mubong panahon sa ulahing bahin sa 1830, apan ang duha mibalik sa Canada sa sayong bahin sa 1840. Si Eleazer, kinsa namatay niadtong 1862, ingon og mipadayon sa pag-isip sa iyang kaugalingon nga usa ka Santos sa Ulahing mga Adlaw. Si Moses miapil sa duha pa ka laing denominasyon sa wala pa ang iyang kamatayon niadtong 1871. Sa usa ka talandogon nga asoy nga nahisulat sa ulahing bahin sa iyang kinabuhi, siya mipahayag og pagdayeg alang ni Joseph Smith, kinsa iyang gikahinagbo sa dihang mibisita sa Nauvoo sa sayong bahin sa 1840: “Dinhi akong nakita si Joseph Smith nga nagpuyo sa tolda, kay iyang gipagamit ang iyang balay isip ospital sa mga masakiton! Gibuhat niya ang tanan niyang mahimo aron mapagaan ang ilang mga pag-antos.”

Ang misyon ni Joseph Smith sa Canada mibukas og “usa masangpoton nga pultahan” alang sa pagsangyaw sa ebanghelyo ug sa pagluwas sa mga kalag sa daghang paagi kay sa usa lang. Pagka-1836, si Apostol Parley P. Pratt mibiyahe ngadto sa Upper Canada sa pagsangyaw sa ebanghelyo didto. Sa iyang panaw, si Pratt gikuyogan sa iyang igsoon nga si Orson ug ni Eleazer Freeman Nickerson. Didto sa Hamilton, Upper Canada, si Parley P. Pratt nakaila ni Moses Nickerson. Si Moses mihatag ni Pratt og usa ka sulat sa pagpaila ngadto sa usa ka relihiyoso nga tigsiksik gikan sa Toronto nga ginganlan og John Taylor.