Pagsaksi sa Pagkamatinud-anon

James Goldberg

Ang Biblia nagsulti sa istorya bahin sa katawhan kinsa nasayod sa kasamok ug pagbangotan. Sa Daang Tugon, ang mga anak sa Israel giguyod palayo gikan sa ilang mga panimalay isip mga binihag ug giulipon sa lagyong kayutaan. Sa kadugayan, ang mga yutang natawhan sa mga Israelita giokupar sa mga pangagamhanan sa langyaw nga nagmando gamit ang gigamit pagkamalupigon. Ang katawhan nagpaabot alang sa tipik sa kaluwasan tungod kay sila nakahibalo kon unsa ka lalim ang molahutay sa pagkaulipon.

Ang kasinatian sa dili na maihap nga itom nga mga African sa milabay nga lima ka siglo nagpalanog sa kasinatian sa karaan nga mga Israelita. Gikan sa nahaunang mga tuig sa 1500 hangtod sa 1888, mga henerasyon sa itom nga mga African gipangkuha gikan sa ilang yutang natawhan ug gihimong ulipon sa Amerika. Sa sayong bahin sa mga tuig 1900, hapit tanang sa Africa giokupar na sa mga pangagamhanang langyaw.

Sa isig ka habig sa Atlantic, ang pagpangulipon ug imperyalismo misangpot ngadto sa lawom nga pagkabahin bahin tali sa puti ug itom nga mga populasyon. Ang mga balaod kasagaran mitratar sa puti nga katawhan isip labaw. Human naorganisar Ang Simbahan ni Jesukristo sa mga Santos sa Ulahing mga Adlaw niadtong 1830, ang ubang itom nga katawhan mihangop sa gipahiuli nga ebanghelyo ug pipila ka itom nga kalalakin-an naorden ngadto sa pagkapari. Hinuon, ang kultura nga nabahin tungod sa kaliwatan sa panahon ug ang mga hulga sa pagpanggukod sa gawas naghatag og mga hagit sa panaghiusa sa kaliwatan sa Simbahan.

Sugod sa mga tuig 1850, ang itom nga mga miyembro gidid-an gikan sa hingpit nga pag-apil sa Simbahan ug gideklarar nga dili angayan nga mahimong iorden ngadto sa pagkapari o modawat og mga ordinansa sa templo. Sulod sa pipila ka mga henerasyon, daghan sa mga itom nga Santos sa Ulahing mga Adlaw, sama sa daghang itom nga katawhan sa tibuok kalibotan, naningkamot kutob sa mahimo nga makabaton og maayong kinabuhi samtang naglaom alang sa usa ka mas maayong kaugmaon.

Samtang ang Simbahan nagsugod sa paglugway sa tibuok kalibotan sa mga dekada human sa Ikaduhang Gubat sa Kalibotan, nagkadaghang itom nga katawhan ang nakabig ngadto sa gipahiuli nga ebanghelyo. Sa Afrika ug sa mga Amerika, usa ka bag-ong henerasyon sa itom nga mga pioneer ang mibutang sa ilang pagsalig sa Ginoo aron maabli ang dalan alang kanila ngadto sa usa ka adlaw nga hingpit nang makaapil diha sa Simbahan. Bisan og adunay makapadasig nga mga timailhan sa kausaban sa mga kinaiya sa lain-laing kaliwatan sa sulod ug sa gawas sa Simbahan, ang diskriminasyon sa lain-laing kaliwatan nagpadayon sa pagkatap, ug ang pagdili sa pagkapari ug sa templo ngadto sa itom nga mga Santos nagpabilin. Ang mga kasinatian sa tulo ka managtiayon—Charlotte Andoh-Kesson ug Silliam Acquah didto sa Ghana, Helvécio ug Rudá Tourinho Assis Martins sa Brazil, ug Joseph ug Toe Leituala Freeman sa Estados Unidos—mitabang sa pagpasabot kon unsa ang kasinatian sa itom nga mga Santos sa Ulahing mga Adlaw sa mga katuigan hangtod miabot ang 1978 nga pagpadayag nga mihatag sa mga panalangin sa pagkapari ug sa templo ngadto sa mga miyembro sa Simbahan sa bisan unsa nga kaliwatan.

Charlotte Andoh-Kesson Acquah ug William Acquah, Ghana

Sa bata pa, si Charlotte Andoh-Kesson mitambong sa usa ka simbahan nga Anglican uban sa iyang mga ginikanan ug 12 ka igsoon. Usa ka natural nga relihiyoso nga two, si Charlotte nakamemorya sa tanang himno ug gani sa mga pulong sa mesa.

Sa diang si Charlotte nagpangidaron og 11 anyos, ang iyang inahan nakahimamat og usa ka lokal nga pastor ginganlan og Joseph William “Billy” Johnson. Si Johnson dili sama sa ubang mga pastor—agig dugang ngadto sa Biblia, siya nagsangyaw gikan sa laing basahon sa kasulatan nga gitawag og ang Basahon ni Mormon. Si Charlotte nagdako nga nakadungog sa mga ngalan sama ni Moroni, Nephi, ug Ammon ingon man sa mga ngalan sama ni Moises ug Marcos. Lakip sa mas daan nga mga himno, mikanta siya sa mga himno sa mga Santos sa Ulahing mga Adlaw mahitungod sa Zion ug sa Pagpahiuli sa ebanghelyo. May higayon, siya ug ang uban gikan sa iyang simbahan mobiyahe palugsong sa baybayon aron makigbisog ngadto Ginoo diha sa pag-ampo sama sa gibuhat ni Enos sa Basahon ni Mormon.

Ang kongregasyon nga gitambongan ni Charlotte nagkita sa usa ka gubaon nga bilding nga busloton og atop, apan ilang giadornohan ang bilding og estatuwa ni anghel Moroni aron sa pagpahinumdom kanila sa layo nga mga templo. Pipila sa mga miyembro sa kongregasyon nagdamgo ug nanagna sa usa ka adlaw nga sila magsul-ob og puti, nagbarog sa usa ka matahom nga templo sa Ghana. Sa wala pa moabot kana nga adlaw, bisan pa, nakahibalo sila nga ang mga representante gikan sa punoang buhatan sa Simbahan kinahanglang moanhi ug opisyal nga mohimo kanila nga kabahin sa tibuok kalibotan nga Simbahan.

Niadtong 1978, ang tuig nga nahuman Charlotte sa kolehiyo, nagsugod siya nga gibati nga naglibog tali sa lain laing kapilian. Sa usa ka bahin, si Brother Johnson mas nakombinsir nga ang panahon nagsingabot nga ang Simbahan nga kadaghanan mga puti, nga nahimutang sa Estados Unidos, moila sa itom nga mga kongregasyon sa mga Santos sa Ulahing mga Adlaw sa Ghana, ug siya nangulo sa daghang adlaw nga pagpuasa aron mapadali ang pag-abot niini. Sa samang higayon, si Charlotte nagsugod sa pagkigdayt ni William Acquah. Nalipay si William sa mihangop sa iyang mga paryente ug mga higala nga Santos sa Ulahing mga Adlaw apan nagduhaduha sa mga pagtulun-an sa Simbahan, kritikal sa dili nindot nga pisikal nga mga pasilidad niini, ug matahapon sa puti nga mga tawo sa kinatibuk-an, lakip niadtong gipangamuyo sa mga Santos sa Ulahing mga Adlaw sa Ghana nga moabot sa ilang nasod.

Helvécio Martins ug Rudá Tourinho Assis Martins, Brazil

Sa sayong bahin sa mga tuig 1970, si Helvécio ug Rudá Martins nangitag relihiyosong kamatuoran sa Brazil. Sa pagdasig sa pamilya ni Rudá, ang magtiayon migahin og pipila ka tuig sa pagpraktis sa tinuohan nga gisagolan sa Aprikanong mga tradisyon, mga pagtulun-an sa Katoliko, ug espirituwalismo. Hinuon, sa hinay-hinay, nagsugod sila sa pagbati nga wala kadto makatuman sa ilang espirituhanong mga panginahanglan o wala makapaduol nila ngadto sa namatay nga sakop sa pamilya ug mga katigulangan.

Niadtong 1972, duha ka mga misyonaryo nga Santos sa Ulahing mga Adlaw nanuktok sa ilang pultahan. Interesado si Helvécio apan adunay usa ka dinalian nga kabalaka. “Gumikan kay ang inyong simbahan nahimutang sa Estados Unidos, usa ka nasod nga adunay kasaysayan sa kasungian sa kaliwatan,” siya nangutana, “giunsa pagtratar sa inyong relihiyon ang mga itom? Gitugtan ba sila sa pagsulod sa simbahan?”

Nadumdoman ni Helvécio ang tigulang nga misyonero nga “nakulbaan [nag-kurog] sa iyang gilingkoran” agig tubag Sa wala motubag, ang mga misyonaryo mihangyo sa pag-ampo uban nilang Helvécio, Rudá, ug sa mga bata. Sila mipakigbahin dayon sa istorya sa Pagpahiuli ug gipasabot ang mga restriksiyon sa pagkapari ug sa templo sa ilang labing maayo nga pagsabot. Si Helvécio mibati og igong katagbawan sa ilang tubag aron tutokan ang uban nilang bag-ong mga pagtulun-an. Sulod sa pipila ka mga bulan, naawhag pinaagi “sa diwa sa mga pakigpulong … ug sa gugma sa mga miyembro” sa simbahan, si Helvécio ug Rudá nabunyagan. Nianang panahona, malipayon silang mitugot sa ebanghelyo nga mopalambo sa ilang mga kinabuhi ug sa magpaabot—nagtuo sila hangtod sa Milenyum—alang sa pipila ka mga panalangin nga may kalabotan sa pagkapari.

Mga usa ka tuig human sa ilang mga bunyag, bisan pa niana, ang pamilyang Martins nasurprisa sa dihang ang ilang patriyarkal nga mga panalangin misugyot nga sila maselyo isip usa ka pamilya niini nga kinabuhi ug nga ang ilang anak si Marcus moserbisyo og misyon. Dili gusto nga madismaya, ilang gihuptan ang ilang pagsabot nga magpaabot sila sa maong panalangin hangtod sa pagbalik ni Kristo. Sa samang higayon, gusto nga mahimong andam kon unsa man ang giplano sa Ginoo, nag-abli sila og usa ka account sa pagtigom alang sa misyon ni Marcus

Sa misunod nga pipila ka tuig, samtang ang pamilyang Martins milambo sa Simbahan, ang mga miyembro mihatag kanila og suporta—ug usahay dili komportable nga mga pagpahayag sa simpatiya. Sa usa ka okasyon, usa ka bishop miingon nga iyang gibati nga ang pinakadakong hagit ni Helvécio mao ang pagpabiling matinud-anon sa Simbahan nga dili maorden sa pagkapari. “Bishop,” mitubag si Helvécio, “magmapasalamaton kon kini ang akong labing dako nga pagsulay.”

Niadtong 1975, si Helvécio ug Rudá gidapit sa paglibot sa dapit diin itukod ang São Paulo Brazil Temple tungod sa tawag ni Helvécio isip ang direktor sa mga relasyon sa publiko sa rehiyon sa Simbahan. Atol sa paglibot, sila si Helvécio ug Rudá mihunong sa unsay ilang nahibaloan nga sa kaulahian, ang dapit sa celestial nga lawak. “Usa ka gamhanang espiritu ang mitandog sa among mga kasingkasing,” miingon si Helvécio. “Nagginaksanay kami ug nanghilak, wala gyod makasabot kon ngano.”

Paglabay sa duha ka tuig, atol sa seremonya sa bato sa pamag-ang sa templo, si Presidente Spencer W. Kimball mitawag ni Helvécio aron moadto sa iyang kiliran. “Brother Martins,” siya mitambag, “ang importante nimo mao ang pagkamaunungon. “Pagpabilin nga magmatinud-anon ug ikaw makatagamtam sa mga panalangin sa ebanghelyo.”

Apan unsaon man sa pamilyang Martins sa pagdawat sa tanang panalangin sa ebanghelyo kon dili maghupot sa pagkapari o makadawat sa mga ordinansa sa templo? Sa pagkasunod tuig, si Marcus nahimong sinayoran ngadto sa usa ka miyembro sa Simbahan kinsa walay katigulangan sa itom nga African. Samtang siya kontento na aron mosalig sa mga saad nga ang tanang panalangin mahimong maanaa ngadto sa tanang miyembro, ang paglantaw nga dili makasal sa templo sakit.

Joseph Freeman ug Toe Leituala Freeman, Estados United

Sukad sa dugayng panahon nga wala pa siya makadungog mahitungod sa Ang Simbahan ni Jesukristo sa mga Santos sa Ulahing mga Adlaw, si Joseph Freeman nanumpa sa paghatag sa iyang kinabuhi ngadto ni Kristo. Ang iyang pamilya aktibo sa Balaan nga kalihokan, ug nahimo siyang ministro. Niadtong 1972, si Joseph nagpalista usab sa kasundalohan ug nadestino sa usa ka base sa Hawaii. Ang iyang panahon napuno sa pagserbisyo sa militar, samtang ang iyang libreng panahon napuno sa pagsangyaw ug pag-ampo.

Apan si Joseph mibati nga adunay butang nga kulang. Nangayo og giya, mihangyo siya og usa ka semana nga bakasyon, nagdrayb ngadto sa hilit nga bahin sa baybayon, ug nagpuasa sulod sa lima ka adlaw. “Ako literal nga nangamuyo sa Ginoo,” nahinumdom si Joseph, “nga ako masayod unsay buhaton aron makabaton og kalig-on ug espirituhanong gahom sa pagtudlo sa ebanghelyo ingon nga kini angay nga itudlo.” Gipahayag usab niya ang ikaduhang pangandoy: ang pagpangitag asawa nga mahigugma sa Diyos sama sa iyang paghigugma kaniya.

Ang pag-ampo ni Joseph gitubag. Samtang nagbisita sa Polynesian Cultural Center sa Laie, iyang nahimamat ang pipila ka mga Santos sa Ulahing mga Adlaw kansang mga panabot sa ebanghelyo nakapadani kaniya. Sa partikular, ang usa ka mipauli na nga sister nga misyonaryo nga ginganlan og Toe Isapela Leituala ingon og mao ang matang sa babaye nga kanunay niyang gipangita. Pinaagi sa mga panag-istoryahanay uban sa bag-ong mga higala, mga misyonaryo, ug Toe, si Joseph nakombinsir nga iyang nakit-an ang gipahiuli nga Simbahan ni Kristo. Nabunyagan siya niadtong Septiyembre 30, 1973.

Isip usa ka bag-ong miyembro, ang mga pagbati ni Joseph mahitungod sa kaliwatan ug sa Simbahan nagsagol. Gikulbaan siya nga siya lamang ang itom nga miyembro sa iyang ward. Agi og dugang, ang pagdili sa pagkapari ug templo nagpataliwala kaniya ug sa duha sa iyang labing lawom nga mga tinguha: dili siya mahimong ministro sa Simbahan, ug dili niya maangkon ang kaminyoon nga iyang gusto. Si Toe, kinsa gusto og kaminyoon sa templo, nagpalayo kang Joseph samtang iyang gibati nga ang iyang pagkaibog kaniya nagkadako.

Nahasol si Joseph nga dili siya makakita og suporta sa kasulatan alang sa komon nga mga katarongan sa restriksiyon, kadaghanan niini naglakip sa pangagpas mahitungod sa kinabuhi sa wala pa dinhi. Sa samang higayon, nakakaplag siya og kahupayan diha sa saad nga ugma damlag, bisan sa Millennium, ang mga itom nga kalalakin-an makahupot na sa pagkapari. “Ang akong konsepto sa Millennium dili butang nga layo nga lapas pa sa masabot sa hunahuna,” matud pa ni Joseph. “Gibati gayod nako nga tingali dili moabot og daghang katuigan sa dili pa ang ‘mahinungdanon ug makalilisang nga adlaw.’”

Gani uban sa problema nga iyang giatubang isip usa ka itom nga tawo diha sa Simbahan, si Joseph nagpabilin nga mapasalamaton sa ebanghelyo. “Sa matag adlaw ang gasa sa Espiritu Santo nahimong talagsaong tinubdan sa giya ug kalinaw ug usa ka mas permanenting bahin sa akong kinabuhi,” matod pa niya. Wala madugay human sa iyang panag-istorya, lisod kaayo para niya nga hunahunaon kon giunsa niya sa pagkabuhi nga wala kini.

Nahimo na usab nga lisod para ni Toe nga maghunahuna nga mabuhi kon wala siya. Bisan tuod og ang pagminyo kang Joseph makapugong kaniya nga maselyo sa templo nga dugay na niyang gipangandoy, mibati siya nga naaghat sa pagpadayon sa relasyon. Ang duha nagsugod sa pagdayt ug sa wala madugay nakigtambag sa ilang bishop mahitungod sa pagminyo. Ang bishop mipahayag sa tipikal nga mga kabalaka niadtong panahona mahitungod sa pagminyo sa managlahi nga kaliwatan ug kultura apan misaad nga kon sila magpuasa ug mag-ampo, ang Espiritu Santo mosulti kanila kon unsa ang buhaton. Si Joseph ug si Toe nagpuasa, nag-ampo, ug mibati sa kompirmasyon sa Espiritu sa ilang pagpili. Ang uban mipugos kanila sa pagbulag sa ilang relasyon, apan nagpabilin sila nga matinuoron ngadto sa tubag nga ilang nadawat. Naminyo sila niadtong Hunyo 15, 1974.

Ang kaminyoon sa wala madugay napanalanginan sa usa ka bata, ug sila ni Joseph ug Toe mihukom sa pagbiya sa kinabuhing sundalo. Mibalhin sila ngadto sa Siyudad sa Salt Lake, diin nadugangan ang ilang mga anak. Usa ka hinungdan sa ilang desisyon nga manimuyo sa Siyudad sa Salt Lake mao ang Genesis Group, usa ka gipaluyohan sa Simbahan nga katilingbanon ug espirituhanong grupo alang sa itom nga mga Santos. Sa kadaghanan, iyang nakita nga kontento na siya sa iyang kinabuhi sa Simbahan. Bisan pa niana, nabalaka siya, kon unsaon pagpadako sa iyang mga anak nga lalaki nga adunay igong pagtamod sa kaugalingon nga dili matutokan panahon sa ilang mga pagka-tin-edyer nga wala tugoti nga makadawat sa pagkapari uban sa ilang mga kaedad.

Ang Dugay Nang Gipaabot nga Adlaw

Samtang ang mga kongregasyon sa mga tumutuo nagkadako didto sa Ghana ug Nigeria ug ang mga tawo sama sa pamilyang Martins ug Joseph Freeman miapil sa Simbahan sa America, si Presidente Spencer W. Kimball nakasaksi sa ilang pagkamatinud-anon ug nahimong okupado kon unsaon sa pagtabang kanila nga molambo diha sa hugot nga pagtuo. Sa usa ka okasyon, nakahilak siya pinaagi sa usa ka sulat gikan ni Emmanuel Bondah, usa ka grade six didto sa Ghana, naghangyo alang sa iyang kaugalingong kopya sa Basahon ni Mormon ug alang sa tabang nga mahimong “usa ka tinuod nga Mormon.”

Sa sayo nga bahin sa 1978, si Presidente Kimball kanunayng nag-ampo sa templo alang sa pagpadayag mahitungod sa paghatag sa ordinasyon sa pagkapari ug mga panalangin sa templo ngadto sa mga itom nga mga miyembro sa Simbahan. Nakig-istorya siya sa taas nga panahon uban sa iyang mga magtatambag diha sa Unang Kapangulohan ug uban sa mga sakop sa Korum sa Napulog Duha ka Apostoles sa hilisgotan ug midapit kanila sa paghimo og usa ka importanteng pagtuon ug pag-ampo.

Pagka-Hunyo 1, 1978, si Presidente Kimball nakigkita sa Unang Kapangulohan ug sa Korum sa Napulog Duha ka Apostoles diha sa templo. Siya nangutana sa makausa pa alang sa ilang mga hunahuna ug tambag kalabot sa pagdili ug dayon nag-ampo alang sa pagpadayag. “Ako nakabaton na og talagsaon nga espirituhanong mga kasinatian kaniadto,” miingon si Elder Bruce R. McConkie, “… apan walay sama niini kakusog. Ang tanan sa Kaigsoonan sa diha-diha dayon nasayod ug mibati sa ilang mga kalag kon unsa ang tubag ngadto sa gipangamuyo nga petisyon ni Presidente Kimball.” Usa ka semana ang milabay, ang Unang Kapangulohan mipadala og pulong ngadto sa mga lider sa Simbahan sa tibuok kalibotan nagpahibalo nga ang restriksiyon gitangtang na. Kini nga pamahayag sa kaulahian gihimong kasulatan diha sa Doktrina ug mga Pakigsaad as Opisyal nga Pamahayag 2.

Sa adlaw human sa pahibalo, si Joseph Freeman nakadawat og tawag sa telepono gikan sa iyang bishop. Sa nahitabo, ang ilang komperensiya gitakda nga ipahigayon nianang kataposan sa semana: Si Joseph giinterbiyo, gipaluyohan, ug niadtong Hunyo 11, 1978, nahimong unang itom nga tawo nga gi-orden ngadto sa Melchizedek nga Pagkapari human sa pagpadayag. Sa kataposan, makahimo na siya sa pagpangalagad nga adunay awtoridad nga kanhi iyang giampo nga makaplagan. Paglabay sa duha ka semana, si Joseph ug si Toe midala sa ilang mga anak ngadto sa templo. Samtang ang pamilya nila ni Joseph ug Toe miluhod atubangan sa altar, si Elder Thomas S. Monson namulong sa mga pulong sa ordinansa ug dayon miselyo kanila alang sa karon ug sa kahangtoran.

Alang sa pamilyang Martins sa Brazil, ang balita migiya sa ilang anak nga lalaki si Marcus sa paglangay sa iyang kasal aron mo serbisyo sa misyon nga gipamulong sa iyang patriyarkal nga panalangin ug nga gitiguman sa ang iyang mga ginikanan. Human lang gyod sa pagka-orden nga usa ka elder mismo, si Helvécio mibarog diha sa sirkulo sa pag-orden ni Marcus ngadto sa samang katungdanan. “Gibati nako nga daw mobuto ko sa kalipay,” matod pa ni Helvécio. Mga pipila lang ka semana ang milabay, siya mihatag sa og panalangin sa pagkapari ngadto sa anak nga lalaki sa ilang katabang ug nakasaksi sa milagrosong pagkaayo sa batang lalaki. Nianang Nobiyembre, giablihan ang São Paulo Brazil Temple ug ang pamilyang Martins—lakip ni Marcus, kinsa nagserbisyo og usa ka misyon sa São Paulo, Brazil—naselyohan.

Sa Ghana, ang pagpadayag sa pagkapari sa kataposan mibukas sa dalan alang sa mga misyonaryo sa pag-adto ug opisyal nga miorganisar sa mga kongregasyon didto. Alang sa mga miyembro sama ni Charlotte, klaro kadto nga tubag sa gilugwayan nga mga pagpuasa ug daghang mga pag-ampo sa lokal nga mga Santos. Ang iyang bana, si Willian, wala kaayo makadayeg. Sa iyang mga pagtuon, nawala ang iyang pagsalig sa puti nga mga tawo ug sa ilang mga asoy mahitungod sa kasaysayan ug hugot nga pagtuo. Ang iyang personal nga mga interaksiyon sa mga puti nga katawhan nakapadugang lang niana nga kawala sa pagsalig, ug siya nagmadudahon mahitungod sa puti nga mga misyonaryo nga nagdala og bisan unsang kaayohan sa iyang nasod.

Unsa ang iyang tinuod nga nasinati, bisan paman, nakapahingangha niya. Usa ka senior nga magtiayon nga misyonaryo, si Reed ug Naomi Clegg, midala kaniya sa ebanghelyo pinaagi sa ilang mga aksiyon ug mga pulong. Sila mahigalaon ug prangka. Dili lang sila nagtudlo nga ang tanang katawhan mga anak sa Dios apan mihatag og pagtahod ngadto sa tanan nga ilang nahimamat. “Sila mi-welcome kanako sa paagi nga walay puti nga nakahimo sa pag-welcome kanako,” matod pa ni William. Sa higayon ang iyang mapanagan-on nga kinaiya mahitungod sa puti nga mga mensahero nahanaw, wala magdugay nga si William mibati sa mensahe sa ebanghelyo nga mituhop ngadto sa iyang kasingkasing. Nabunyagan siya, naorden ngadto sa pagkapari, ug mitabang sa pagpalig-on sa Simbahan sa Ghana gikan sa gamay nga sinugdanan hangtod sa panahon sa 2004 sa dihang ang mga panan-awon sa unang mga miyembro natuman ug ang Ghana nakabaton og kaugalingon templo niini.

Padayon sa Unahan diha sa Hugot nga Pagtuo

Samtang si Helvécio Martins nakapadayag ngadto sa iyang bishop sa tunga-tungang bahin sa 1970, ang pagkapari ug restriksiyon sa templo mao ang usa sa daghang pagsulay sa kinabuhi sa itom mga miyembro. Agig dugang sa ilang kaugalingong mga pagsulay, daghan ang nag-atubang ug nagpadayon sa pag-atubang og sayop nga pagsabot sa kultura ug pagkamahukmanon, bisan sa ilang kaugalingong mga ward o mga branch. Ug ang mga miyembro sa tanang kaliwatan nanglimbasog sa pagsabot sa restriksiyon.

Agig resulta sa pagpadayag nga nagtapos sa restriksiyon, ang mga miyembro sa Simbahan sa tibuok kalibotan nakasinati og tinuod ug makahuloganon nga pakigsagol sa ilang isig ka Santos. Pinaagi sa pagtudlo ug pagbisita sa panimalay, mga calling sa Simbahan, pagserbisyo, ug pakigdait, ang mga miyembro sa lain-laing mga kagikan sa kaliwatan kasagaran nahimong nalambigit sa mga kinabuhi sa usag usa. Ang mga miyembro nakakat-on gikan sa usag usa, midawat og tambag sa usag usa, ug nakabaton og mga oportunidad aron mas masabtan ang mga panglantaw sa usag usa ug mga kasinatian.

Ang mga Santos sa Ulahing mga Adlaw nanglimbasog gihapon sa mga problema nga namugna sa mga siglo sa pagpangulipon, kolonisasyon, pagpasangil, ug pagkabahin-bahin. Apan ang pakigdait sa Simbahan nagtanyag kanila sa kahigayonan nga mamahimong usa sa kasingkasing ug usa sa hunahuna samtang sila nangalagad sa usag usa diha gugma. Samtang nagpadayon sila sa unahan diha sa pagkamapainubsanon ug sa hugot nga pagtuo, ang mga miyembro sa Simbahan nakakaplag og pagkaayo ug kalig-on pinaagi ni Jesukristo, ang Manluluwas natong tanan.