Leman Copley ug ang mga Shaker

Matthew McBride

Ang mga Shaker duol sa Lebanon, New York

Niadtong tingpamulak sa 1831, usa ka mauswagon nga mag-uuma nga ginganlan og Leman Copley miapil sa bag-ong Simbahan ni Kristo (nga maoy tawag sa Simbahan sa una). Ang iyang uma sa Thompson, Ohio, pipila lang ka kilometro gikan sa baryo sa Kirtland, nga bag-o lang natukod isip ang bag-ong punoang buhatan sa Simbahan.

Si Copley usa ka miyembro sa United Society of Believers in Christ’s Second Appearance sulod sa daghang tuig sa wala pa ang iyang pagkakabig. Ang mga miyembro niini nga sekta kasagarang nailhan nga mga Shaker tungod kay ang ilang pagsimba naglakip sa matang sa makalingaw nga pagsayaw. Ang daghang sama nga doktrina tali sa Shaker ug sa mga Santos sa Ulahing mga Adlaw sa walay pagduhaduha nakapadani ni Copley: Ang duha ka tinuohan parehas nga nagtuo sa kinatibuk-ang apostasiya, sa moderno nga panagna, sa kabubut-on sa tawo, ug sa sumbanan sa komon nga kinabuhi. Hinuon, dako ang panaglahi niini, sa ubang importante nga mga punto.

Ang mga Shaker wala mokonsiderar sa bunyag—o sa bisan unsang laing ordinansa—nga importante alang sa kaluwasan. Nagtuo sila nga si Jesukristo mihimo na sa Iyang Ikaduhang Pag-anhi sa pagkatawo ni Mama Ann Lee (1736–84), nahaunang lider sa Shaker. Ang uban nagpraktis sa pagkaon og pulos utanon. Ang mga Santos sa Ulahing mga Adlaw ug ang mga Shaker managlahi usab sa ilang mga pagsabot sa kaminyoon ug sekswal nga mga relasyon, ang debotado nga mga Tumutuo (nga maoy tawag sa mga Shaker sa ilang mga kaugalingon) miinsister sa hingpit nga dili pagminyo, nga gipasabot nila nga “pas-anon niya ang iyang krus.”

Kining duha nga relihiyoso nga mga grupo unang nagkasugat panahon sa miaging tingtugnaw, sa dihang usa ka grupo sa mga misyonaryo sa mga Santos sa Ulahing mga Adlaw, nga naglakip nila ni Oliver Cowdery ug Parley P. Pratt, mihunong sa makadiyot bag-ong puloy-anan sa mga Shaker sa North Union, Ohio, padulong sa Missouri. Ang komunidad sa North Union nahimutang sa mga 24 ka kilometro sa habagatang kasadpan sa Kirtland.

Mipaila si Cowdery sa iyang kaugalingon ngadto sa lider sa Shaker, nga si Ashbel Kitchell, isip “usa ka kaabag sa paghubad sa bulawan nga Biblia” ug usa sa tulo ka saksi nga nakasaksi sa usa ka anghel nga nagpamatuod sa katinuod niini. Si Kitchell mitugot ni Cowdery nga mopakigbahin sa iyang mensahe sa usa sa mga panagpundok sa komunidad.

Human sa duha ka gabii sa North Union, si Cowdery ug ang iyang mga kompanyon mipadayon sa paglakaw, apan sa wala pa sila molakaw nagbilin sila og pito ka kopya sa Basahon ni Mormon ngadto ni Kitchell. Ang mga misyonaryo adunay hingpit nga pagsalig “sa gahom sa ilang mga Basahon, nga si bisan kinsa ang mobasa niini, mobati nga hingpit nga makombinser sa kamatuoran nga anaa niini.” Human niining unang panagkita, ang mga Shaker ug ang mga Santos sa Ulahing mga Adlaw sa Ohio nagpabilin nga adunay maayong relasyon, naghimo og “pagbinayloay ug ubang mga buhat sa maayo nga pagkasilingan,” sumala ni Kitchell. Hinuon, ang ilang mahigalaon nga pagbinayloay, sa dili madugay pagasulayan.

Usa ka Pagpadayag alang sa mga Shaker

Sa wala pa moapil sa Simbahan, si Leman Copley kauban sa North Union Shakers, tingali nagtambong sa ilang mga miting, bisan og siya wala kaayo moapil sa hingpit sa ilang estrikto nga komon nga kinabuhi. Ang pagkatinuod nga siya nagpuyo og mga 56.33 ka kilometro gikan sa komunidad ug nagpabilin nga minyo naghatag og timailhan sa gidak-on sa iyang pasalig a mga baroganan sa Shaker. Samtang klaro nga nadani sa pipila sa ilang mga pagtulun-an ug tingali sa ilang matang sa pagsimba, dili siya hingpit nga partisipante. Gani, gikasab-an ni Kitchell si Copley sa pagsalikway sa kinabuhi nga dili minyo ug sa “pagdawat sa Mormonismo nga isip mas sayon nga plano.”

Sama sa tanang unang kinabig sa Simbahan, gidala ni Copley ang mga tradisyon ug mga kinaiya nga nahulma sa iyang miaging relihiyoso nga kasinatian. Si Joseph Smith nakigsulti ni Copley wala madugay human sa iyang pagkakabig ug nahinumdom nga siya “klaro nga matinuoron og kasingkasing, apan nagbilin og mga ideya nga eksakto ang mga Shaker sa pipila ka bahin sa ilang tinuohan.” Si John Whitmer dugang nga nakahinumdom nga si Copley “gusto nga ang pipila sa mga elder kinahanglan nga moadto sa iyang kanhi kaigsoonan ug mosangyaw sa ebanghelyo.” Gani siya “nangomedya nga ordinahan aron siya mismo mosangyaw.”

Nakahukom si Copley nga mobisita ni Joseph Smith—nga nagpuyo didto sa panimalay sa iyang higala nga si Isaac Morley duol sa Kirtland—sa Sabado, Mayo 7, 1831. Bisan og kita walay rekord sa ilang panagsultihanay, tingali si Copley nangayo og katin-awan sa piho nga mga pagtuo sa Shaker ug tingali misugyot sa ideya nga magmisyon ngadto sa North Union. Isip resulta niini nga miting, si Joseph nakadawat og pagpadayag nga karon gidawat nga kasulatan nga Doktrina ug mga Pakigsaad 49. Kini nga pagpadayag madayganon nga mitubag sa mga kalainan sa doktrina tali sa duha ka tinuohan. Nagsugod kini pinaagi sa pagbadlong sa mga Shaker: “Sila nagtinguha nga masayod og Tipik sa kamatuoran,” mabasa kini, “apan dili sa tanan, kay sila dili matarong sa akong atubangan ug kinahanglan gayod nga maghinulsol.”

Nagmatuod pag-usab nga ang bunyag importante, ang pagpadayag mipadayon sa pagsaway sa pipila ka gimahal pag-ayo sa mga Shaker nga mga pagtuo, nagpahayag nga ang kaminyoon gi-orden sa Dios, nga ang mga hayop gihatag ngadto sa tawo alang sa pagkaon ug sinina, ug nga “ang anak sa tawo moabot dili sa panagway sa usa ka babaye ni sa lalaki nga nagbiyahe sa kalibotan.”

Diha sa pagpadayag, ang Ginoo mitawag ni Copley—uban ni Sidney Rigdon ug Parley P. Pratt—sa pagsangyaw sa ebanghelyo ngadto sa iyang mga kaigsoonan sa North Union. Samtang silang tulo nakahibalo sa mga baroganan sa Shaker, si Copley dili pa kaayo sinati isip usa ka tigsangyaw ug usa ka misyonaryo kay sa bisan kinsa sa duha niyang mga kauban. Ang iyang dayag nga tinguha sa pagsangyaw ngadto sa iyang mga higala nga Shaker nagpasabot nga siya manawagan nga maghinulsol ang maong mga tawo nga mipanghimaraot niya sa unsay ilang gibati nga iyang kakulangan sa relihiyoso nga pasalig. Tingali naglaom siya sa pagpakita sa tinuod nga pagtulun-an sa iyang bag-ong tinuohan. Sa bisan unsa nga rason, si Copley miuyon sa pagsunod sa matinud-anong paagi sa sugo sa pagpadayag sa “pagpangatarongan” sa mga Shaker.

Ang Misyon ngadto sa North Union

Mao nga, tungod niini nga pagpadayag, sila si Rigdon ug Copley nagsugod dayon sa pagbiyahe padulong sa North Union. Miabot sila sa Union nianang pagkahapon ug mahigalaong gidawat ni Kitchell ug sa iyang kaubanan. Nag-uban silang migahin sa gabii, nagdebate sa mga merito sa ilang mga relihiyon, ang matag usa mibati nga sila mao ang midaog sa debate.

Pagkasunod buntag, si Kitchell misugyot ngadto ni Rigdon ug Copley nga walay usa sa matag habig ang “mopugos sa ilang doktrina ngadto sa pikas nga habig niining higayona.” Si Rigdon nagplano sa pagbasa sa pagpadayag ngadto sa mga Shaker sa ilang tulumanon sa Igpapahulay nianang adlawa apan nakahukom nga dili lang usa ug “mopahiuyon sa iyang kaugalingon sa lagda sa lugar.”

Sa wala pa magsugod ang miting, si Parley P. Pratt miabot sa North Union nga nagsakay og kabayo. Sa dihang nakadungog sa manunutong tubag ni Rigdon sa sugyot ni Kitchell, ang maisogon nga Pratt miinsister nga sila “dili motuo [kaniya], kay sila mianha uban sa awtoridad ni Ginoong Jesukristo, ug ang mga katwo kinahanglan nga makadungog niini.”

Ang mga misyonaryo hilom nga nanglingkod hangtod nahuman ang miting. Sa dihang ang mga tawo nanindog aron mobiya, si Rigdon “mibarog ug mipahayag nga siya adunay mensahe gikan ni Ginoong Jesukristo niini nga katawhan; aduna ba siyay pribilihiyo sa pagsulti niini?” Uban sa pagtugot ni Kitchell, gibasa niya ang pagpadayag sa kinatibuk-an ug nangutana kon sila ba motugot kanila sa pagpadayon sa pagsangyaw sumala sa gisulti sa pagpadayag.

Si Kitchell, nga nagpugong sa iyang kalagot, mitubag nga wala siya modawat sa mensahe ug “kuhaan & ang ilang Kristo gikan sa bisan unsa pa nga palas-anon mahitungod kanato, ug angkonon ang tanang responsibilidad sa akong kaugalingon.” Si Rigdon mitubag, “Dili ka makahimo niini; gusto nako nga makadungog sa mga tawo nga mosulti.” Apan sa dihang si Kitchell mitugot sa uban nga mopagawas sa ilang mga hunahuna, sila usab mimatuod “nga hingpit ang ilang pagkakontento sa unsay anaa nila.”

Si Rigdon nga kalmado nga mihiplig sa pagpadayag, midawat nga wala magmalamposon ang ilang misyon. Si Pratt, sa laing bahin, wala dayon molunga. Mibarog siya, sugilon ni Kitchell, ug mitaktak sa abog sa tumoy sa iyang kupo “isip usa ka pagpamatuod batok kanamo, nga gisalikway namo ang pulong ni Ginoong Jesus.” Sa pagbuhat sa ingon, si Pratt nagsunod sa sugo ni Jesus ngadto sa Iyang mga disipulo diha sa mga Ebanghelyo.

Apan si Kitchell wala mobaliwala niini. Ang iyang pailob naupos na, ang lider sa Shaker misaway ni Pratt sa atubangan sa iyang kongregasyon: “Ikaw nga mahugaw nga Mananap, nagpatuong mianhi dinhi, ug naningkamot nga sundogon ang usa ka tawo sa Dios pinaagi sa pagtaktak sa imong hugaw nga kupo; ikompisal ang imong mga sala ug pug-a ang imong kalag gikan sa imong mga kahigal, ug sa imong ubang mga salawayon sa dili pa ikaw mosulay sa paghimo pag-usab sa samang butang.”

Si Kitchell mipahungaw sa iyang kasuko ngadto ni Copley, nga nagsugod sa pagbakho, ug mihatag sa iyang grabe nga pagkasaba: “Ikaw nga maot, mas nasayod ka;—nasayod ka asa ang buhing buhat sa Dios; apan tungod sa indulhensiya, gitugotan nimo nga mailad ang imong kaugalingon.”

Ang Sangpotanan

Gibuhian dayon ni Kitchell ang kongregasyon. Ang napakyas nga si Pratt misakay sa iyang kabayo ug mibalik dayon ngadto sa Kirtland. Sa kadugayan mihatag siya og sumada sa ilang pagbisita: “Natuman namo kini nga misyon, sumala sa gisugo namo, sa usa ka dapit sa kahibudngan nga mga tawo, duol sa Cleveland, Ohio; apan hingpit sila nga nagdumili sa pagpaminaw o pagsunod sa ebanghelyo.” Human niini nga insidente, ang pagkontakay tali sa Simbahan ug sa mga Shaker panagsa na lang ug tensyonado kasagaran.

Si Rigdon nagpabilin alang sa panihapon sa wala pa mobalik ngadto sa Kirtland nianang gabhiona, nagbilin og kopya sa pagpadayag ngadto ni Kitchell. Si Copley, sa kasamtangan, nagpabilin sa North Union nianang gabhiona ug mipaingon ngadto sa iyang uma pagkasunod adlaw, ang iyang mga panghinaot sa pagkabig sa pipila sa iyang kanhi kaigsoonan subo nga nawala. Ang engkuwentro nakapasuko niya nga sa iyang pagbalik ngadto sa Thompson, wala na niya tumana ang kasabotan nga iyang gihimo sa pagtugot sa mga miyembro sa Simbahan nga gikan sa Colesville, New York, nga mopuyo sa iyang uma.

Ang nagduhaduha nga si Copley nagpadayon sa paglubaylubay sa iyang debosyon ngadto sa gipahiuli nga Simbahan sulod sa daghang tuig human sa iyang misyon ngadto sa mga Shaker. Sa kataposan permanenteng na siyang mibiya sa Simbahan sa mga 1838 ug nagpabilin sa Ohio sa nahibilin niyang kinabuhi.