“Moadto sa Ohio”

Elizabeth Maki

Wala madugay human ang ikaduhang komperensiya sa bag-ong Simbahan ni Kristo nga natapos sa ulahing bahin sa Septiyembre 1830, upat ka misyonaryo—si Oliver Cowdery 1830, Peter Whitmer Jr., Parley P. Pratt, ug si Ziba Peterson—migikan sa New York aron sa pagsangyaw ngadto sa mga American Indian sa Missouri. Human sa mubong pagbisita sa mga Seneca Indian duol sa Buffalo, New York, ang grupo minunot sa gibati ni Pratt nga moadto subay sa Lake Erie hangtod sa Mentor, Ohio, panimalay sa iyang kanhi espirituhanong lider, si Sidney Rigdon.

Ang Pagkabig ni Sidney Rigdon

Kanhi usa ka tigsangyaw sa duha ka Reformed Baptist nga kongregasyon, si Rigdon adunay igong impluwensiya nga kadtong anaa sa iyang panon nailhan sa kadaghanan isip mga Rigdonita. Miila sa iyang impluwensiya, si Pratt ug si Cowdery mibisita ni Rigdon niadtong Oktubre 28, apan ang iyang reaksiyon ngadto sa ilang mensahe dili positibo. Maduhaduhaon niyang gidawat ang usa ka kopya sa Basahon ni Mormon, ug ang usa ka sakop sa kongregasyon nakahinumdom nga “medyo gikondenar niya kini.” Bisan pa man, miuyon siya sa pagbasa niini.

Ang mga misyonaryo misangyaw og usa ka wali didto sa Mentor nga gamay ra ang epekto ug wala madugay mibalhin ngadto sa Kirtland ug ang Isaac Morley Farm, miabot pagka Nobyembre 2. Usab usa ka Reformed Baptist, si Isaac Morley mao ang “espirituhanong amahan sa usa ka dakong komon nga pamilya”—gilangkoban kadaghanan sa mga sakop sa mga kongregasyon ni Rigdon—nga nagpuyo sa iyang umahan. Isip usa ka grupo, ang “pamilya” nagtinguha sa pag-tukod og usab sa ebanghelyo ni Jesukristo sama sa gihulagway diha sa Biblia. Ang mga misyonaryo nakasinati og mainitong paghangop alang sa ilang mensahe taliwala sa mga sakop sa “pamilya” didto sa umahang Morley ug mibunyag og daghan kanila.

Sa pagkasunod adlaw, Nobiyembre 4, si Rigdon miadto sa Kirtland aron sa pagpahigayon og kaminyoon ug dayon miapil sa mga misyonaryo samtang mibiyahe sila sa dapit nga nagsangyaw sa mensahe sa gipahiuli nga ebanghelyo. Desi siyete pa ka tawo ang nabunyagan sa sunod nga adlaw, ug bisan tuod og wala nila makauban si Rigdon, sulod sa laing adlaw miapil siya sa pagsangyaw ug, sumala sa usa ka tigpaniid, “naapektohan pag-ayo ug mitulo ang mga luha” atol sa miting.

Pagka-Dominggo, Nobiyembre 7, ang pagsangyaw nakadani sa panon sa katawhan nga hilabihan ka daghan nga ang mga tigpaminaw miawas sa gawas ug adunay usa nga mibira sa mga tabla gikan sa bilding aron ang sobra nga katawhan makadungog. Si Parley P. Pratt mitudlo gikan sa Basahon ni Mormon ug dayon midapit sa uban sa pagpamulong—ang usa ka pagdapit ni Sidney Rigdon daling gidawat. Si Rigdon mibarog ug mipahibalo nga human sa pagkadungog sa mensahe sa misyonaryo, siya “kinahanglan dili na mosulay sa pagsangyaw og usab” ug miawhag sa mga tigpaminaw nga dili makigbingkil batok sa unsay ilang nadungog.

Nakombinsir si Rigdon nga ang mga misyonaryo gayod, sa pagkatinuod, adunay awtoridad nga kaniadto wala pa makaplagi sa yuta. Nagtinguha siya nga magpabunyag ug gihisgotan ang maong butang uban sa iyang asawa, si Phebe, nagpasidaan kaniya kon sa unsang paagi ang ilang mga kinabuhi lagmit mausab kon ilang tumanon ang ebanghelyo:

“‘Mahal ko, ikaw sa makausa misunod nako ngadto sa kawad-on; andam ka ba nga mausab kini?’ Mitubag siya, ‘akong gitimbang-timbang ang maong butang; akong gipamalandongan … ang mga kahimtang nga atong nahimutangan; akong gikwenta ang kantidad, ug ako hingpit nga kontento sa pagsunod kanimo. “Oo, akong tinguha nga buhaton ang kabubut-on sa Dios, mabuhi man ko o mamatay.”

Biyahe ngadto sa New York sa Pagbisita ni Joseph

Nasayod nga ang bugti sa ilang pagkakabig tingali maglakip sa ilang panimalay ug sa ilang panginabuhi, silang duha si Sidney ug si Phebe Rigdon nabunyagan niadtong Nobiyembre 1830. Giundang ni Rigdon ang pagsangyaw ug mitrabaho og kadiyot sa umahan ni Morley apan sa wala madugay mibiya aron moadto sa New York nga “matinguhaon kaayo sa pagkigkita ni Joseph Smith Jr. ang Manalagna nga gituboy sa Ginoo niiing kataposang mga adlaw.” Giubanan si Rigdon sa iyang biyahe sa usa sa iyang kanhi mga parokyano, si Edward Partridge, kansang asawa, si Lydia, mituo sa mensahe sa mga misyonaryo. Nagmadudahon gihapon, gitinguha ni Partridge ang pakigkita ni Joseph sa dili pa siya magpabunyag.

Ang duha ka lalaki nahimamat ni Joseph sa New York sa sayong bahin sa Disyembre 1830, ug si Rigdon wala madugay, “ nagmatinguhaon nga ang manalagna mopakigsayod sa Ginoo, aron masayod kon unsa ang kabubut-on sa Ginoo kalabot kaniya.” Agig tubag, gidiktar ni Joseph ang pagpadayag nga karon naila isip Doktrina ug mga Pakigsaad 35. Gidayeg si Rigdon alang sa iyang buhat niining pagpangalagad didto sa Ohio ug gisugo nga mahimong kauban ni Joseph ug eskriba alang sa nagpadayon nga paghubad sa Biblia. Gisultihan siya nga kon siya mobuhat sa ingon, “ang mga kasulatan ihatag gani isip nga kini anaa sa akong kaugalingong dughan ngadto sa kaluwasan sa akong kaugalingon nga pinili.” Sumala niana, si Rigdon mipabilin didto sa Fayette uban ni Joseph ug misugod sa iyang serbisyo isip eskriba.

Sa iyang pag-abot sa New York, si Partridge nakigsulti sa mga silingan sa mga Smith mahitungod sa karakter sa pamilya. Hingpit nga nakontento sa unsay ilang nahibaloan, mihangyo siya nga bunyagan, ug si Joseph misaad sa pagbunyag kaniya human si Partridge makapahulay gikan sa iyang biyahe. Si Joseph Smith sa wala madugay nakadawat usab og pagpadayag alang ni Partridge, diin si Partridge gisugo sa “pagsangyaw sa walay kataposang ebanghelyo sa Nasod.” Pagkahuman sa iyang bunyag, si Partridge mibiyahe pasilangan aron sa pagpakigbahin sa iyang bag-ong tinuohan ngadto sa iyang pamilya.

Ang Panawagan sa Pagpundok

Ang pag-abot ni Rigdon ug Partridge sa New York nagdala og balita kon sa unsang paagi ang gipahiuli nga ebanghelyo lawom nga nakagamot didto sa Ohio. Ug bisan kon ang gidaghanon sa mga kinabig sa Ohio paspas kaayo nga mitubo, ang Simbahan sa New York nag-atubang sa nagkadakong oposisyon. Sa miaging pipila ka bulan, si Joseph Smith nakadawat og pagpadayag nga namahayag nga ang Simbahan kinahanglan mapundok sa usa ka dapit, bisan og kana nga lokasyon wala pa gipadayag (tan-awa sa D&P 29:7–8).

Ang inahan ni Joseph, si Lucy, sa kadugayan nahinumdom nga si Joseph nakadawat og pulong nga ang bag-o pa nga mga kongregasyon sa Ohio nagkinahangalan kaayo og direksiyon, samtang ang gidaghanon sa mga kinabig milubo na ngadto sa 300. Unya, samtang si Joseph ug si Sidney Rigdon mibiyahe gikan sa Fayette ngadto sa Canandaigua, New York, sa ulahing bahin sa Disyembre, nakadawat sila og usa ka pagpadayag nga nagdirekta sa Simbahan sa “pag-adto sa Ohio.” Diha sa pagpadayag, ang kalalakin-an gisugo usab nga temporaryong mohunong sa pagtrabaho sa rebisyon sa Biblia aron palig-onon ang mga kongregasyon sa New York agig pagpangandam alang sa pagbalhin.

Paglabay sa tulo ka adlaw, ang ikatulo nga komperensiya sa Simbahan gipahigayon sa Fayette, ug si Joseph mipahibalo sa mga miyembro sa sugo sa Ginoo sa pagbiya sa ilang mga panimalay aron magpundok sa Ohio. Kalabot sa pahibalo, si Joseph midiktar og laing pagpadayag nga nagpatin-aw sa sugo sa pagpundok ug misaad sa mga miyembro nga sa Ohio sila makadawat sa “balaod sa Dios & didto kamo matugahan sa gahom gikan sa kahitas-an.”

Si Newel Knight sa wala madugay misulat nga ang mga miyembro nga mitambong “gisugo isip usa ka katawhan, sa pagsugod sa pagpundok sa Israel, ug adunay pagpadayag nga gihatag ngadto sa Propeta kabahin niini nga hilisgotan.” Bisan og ang ubang mga miyembro sa Simbahan nagdumili sa sugo nga biyaan ang ilang mga panimalay ug magpundok ngadto sa bag-ong dapit, human sa usa ka gabii nga pagpuasa ug pag-ampo, ang batan-ong Simbahan mipasalig sa pagsunod sa sugo.