“‘Naaghat’ sa Pagtinguha og Pagpadayag,” Kinatibuk-ang Saysay sa mga Pagpadayag (2016)
“Naaghat’ sa Pagtinguha og Pagpadayag,” Kinatibuk-ang Saysay sa mga Pagpadayag
“Naaghat” sa Pagtinguha og Pagpadayag
“Anaa sa panimalay sa tibuok adlaw ug nalingaw sa akong kaugalingon uban sa akong pamilya nga kini adlaw sa Pasko ang bugtong panahon nga ako natagbaw kaayo niini nga pribilihiyo sa taas nga higayon,” rekord sa journal ni Joseph Smith alang sa Disyembre 25, 1835. Ang sunod nga adlaw, Sabado, naglingkod si Joseph uban sa pipila ka kauban ug “nagsugod sa pagtuon sa Hebreo nga Pinulongan” sa dihang dihay nanuktok sa pultahan. Nagtindog didto mao ang iyang higala nga si Lyman Sherman. “Dugay na kong giaghat sa pagpahibalo nimo sa akong mga pagbati ug mga tinguha,” giingnan ni Sherman si Joseph, “ug gisaaran nga makabaton ko og pagpadayag nga magpahibalo sa akong katungdanan” Ang resulta niini nga hangyo mao ang pagpadayag nga nahibaloan karon nga Doktrina ug mga Pakigsaad 108—usa ka mubo apan gamhanan nga pamahayag sa personal nga espirituwal nga kaseguroan nga nagbutang usab ni Lyman Sherman sa sentro sa mas dagko nga mga kalihokan.
“Himoa nga ang Imong Kalag nga Magmalinawon”
Nianang adlaw sa tingtugnaw niadtong 1835, si Lyman Sherman nag-edad og 31 anyos, ug ang ikaupat nga anibersaryo sa iyang bunyag nagsingabot. Sayo sa tinglarag sa 1831, duha ka igsoong lalaki sa iyang asawa, nga si Delcena, nga mibiya sa panimalay aron manarbaho, misulat ngadto sa pamilya nga sila nabunyagan ngadto sa bag-o nga simbahan nga “Mormonite.” “Kini nga balita miabot namo nga makahahadlok ug makapaulaw,” hinumdom sa igsoong lalaki ni Delcena nga si Benjamin. Sa wala madugay human miabot ang unang sulat, ang mga igsoon nga Johnson nga wala diha mipadala og pakete nga naglakip sa Basahon ni Mormon ug “usa ka taas nga pagpasabot” sa ilang bag-ong mga pagtuo. Human madawat kini nga mga materyal, misulat si Benjamin, “Ang akong mama, igsoong lalaki nga si Seth, igsoong babaye nga si Nancy, ug si Lyman R. Sherman, uban sa pipila ka silingan, ang tanan mahalaron sa relihiyon, sekreto nga mag-abot aron mobasa sa Basahon ni Mormon ug sa gisukip nga sulat, o tingali aron mosalikway sa sayop nga nabuhat sa akong mga igsoong lalaki.”
Kining inisyal nga pagduhaduha nawala sa dihang ang “ilang pagbasa sa wala madugay misangpot sa katingala sa kayano ug kaputli sa unsay ilang nabasa, ug sa espiritu nga nag-uban niini, nga nagsaksi sa kamatuoran niini.” Si Lyman ug si Delcena Sherman ug pipila ka miyembro sa pamilyang Johnson nabunyagan niadtong Enero 1832. Ang mga sakop sa pamilyang Sherman nakabig usab. Ang mga Sherman mibalhin ngadto sa Kirtland sa tunga-tunga sa 1833, diin ilang nailaila si Joseph Smith ug daghang mga Santos. Ang ilang anak nga lalaki nga si Albey hapit mapareha og edad ni Joseph Smith III, ug ang mga batang lalaki managhigala.
Apan bisan og si Sherman nagmahal sa mga Santos ug adunay dili mausab nga hugot nga pagtuo sa gipahiuli nga ebanghelyo, dayag nga siya adunay mga pagduhaduha mahitungod sa kalidad sa iyang kaugalingong pagkadisipulo. Ang pagpadayag naghatag nato og tipik sa proseso nga gitawag ni Sherman nga “naaghat” sa pagpangita sa Propeta. Ang Ginoo miingon nga si Sherman “nagsunod sa akong tingog sa pag-anhi,” nagkompirma nga siya nakadawat og mga pag-aghat gikan sa Espiritu sa pagpangita niini nga oportunidad. Ang Ginoo mitambag nga “ayaw na pagsupak sa akong tingog” nagsugyot nga si Sherman nakadawat niadto nga mga impresyon sa daghang okasyon apan nagduhaduha sa pagbuhat niini samtang nakasinati siya og lawom ug makapaikag nga espirituwal nga pagsiksik aron masayod sa iyang kahimtang sa atubangan sa Dios. Agig og tubag niana nga hangyo, ang pagpadayag miseguro kaniya nga ang iyang mga sala gipasaylo ug mabinationg misulti kaniya, “Himoa nga ang imong kalag magmalinawon kalabot sa imong espirituhanon nga kahimtang.”
“Ikaw Pagahinumdoman”
Ang pagpadayag mitubag usab sa hangyo ni Sherman nga ang Ginoo “mopahibalo sa [iyang] katungdanan.” Siya usa na ka lider sa naglambo nga organisasyon sa pagkapari sa Simbahan. Sa sayo niadtong 1835, nakaapil siya sa usa ka miting “niadtong mopanaw padulong sa Zion” uban sa Kampo sa Zion sa miaging ting-init. Niini nga miting, si Joseph Smith mipahibalo nga “kini Kabubut-on sa Dios” nga kadtong kinsa miadto sa Zion “kinahanglan nga maorden sa pangalagad ug pul-ongan ang akong ubasan sa kataposang higayon ,” ug ang unang napulog duha ka Apostoles niini nga dispensasyon gitawag. Paglabay sa duha ka semana, ang unang korum sa Seventy naorganisar aron “moadto sa tibuok yuta, bisan asa ang napulog duha ka Apostoles motawag kanila.” Si Lyman Sherman naordinahan nga usa sa mga pito ka presidente sa Seventy. Sa iyang ordinasyon gisaaran si Sherman og mga panalangin, “Ang imong hugot nga pagtuo dili matarog ug ikaw pagaluwason gikan sa daghang kasakit. … Ikaw usa ka pinili sa Ginoo.”
Apan sa wala pa sila moadto “ngadto sa tibuok yuta,” ang mga Seventy, lakip ni Lyman Sherman, mao ang importante nga mga partisipante sa mga kalihokan nga naglibot sa pagpahinungod sa templo sa tingpamulak sa 1836. Ang pagpadayag ngadto ni Lyman Sherman mitambag kaniya, “Paghulat nga mapailobon hangtod ang maligdong nga katigoman pagatawgon sa akong mga sulugoon, unya ikaw pagahinumdoman uban sa akong una nga mga elder, ug modawat ug katungod pinaagi sa pag-orden uban sa nahibilin sa akong mga elder nga Akong gipili.” Kini nga mga saad natuman samtang si Sherman miapil sa lain-laing mga miting ug mga ordinansa nga paingon sa ligdong nga katigoman sa pagpahinungod sa Templo sa Kirtland ug sa espirituwal nga pagbubo ug sa “pagtuga sa gahom” nga gihatag ngadto sa mga Santos nianang higayon.
“Lig-ona ang Imong mga Kaigsoonan”
Ang pag-alagad ni Lyman Sherman ngadto sa mga Santos sa Kirtland nagpakita nga gidawat niya ang tambag sa pagpadayag sa “paglig-on sa [iyang] kaigsoonan” nga kinasingkasing. Si Wilford Woodruff, nga usa ka batan-ong Seventy nga wala makatambong sa pagpahinungod sa Templo sa Kirtland ug sa nag-uban nga espirituwal nga pagbubo, nakamatikod sa espirituwal nga pagkapangulo ni Sherman. Sa usa ka balaanong panagtigom alang sa sakramento sa templo, si Woodruff misulat, “Si Elder Sherman mikanta pinaagi sa gasa sa mga pinulongan & mipahayag og dagko & nga talagsaong mga butang samtang ubos sa impluwensya sa gahom & sa espiritu sa Dios.” Atol sa tingtugnaw sa 1836–37, ang mga Seventy magmiting kada Martes sa gabii sa kasadpang lawak sa ibabaw nga bahin sa balay duol sa atop nga andana sa templo; sa usa niini nga mga okasyon, si Sherman miorden og usa ka dosena nga tawo ngadto sa ikatulo nga korum sa Seventy. Usa ka importanteng kalihokan niining panahona mao ang ligdong nga katigoman nga gihimo atol sa unang semana sa Abril sa pagsaulog sa pagpahinungod sa templo ug sa pagtugyan sa mga ordinansa niadtong kinsa wala makatambong sa miaging tuig.
Samtang ang panagsumapaki sa sulod sa simbahan ug sa oposisyon sa gawas naghiusa sa kusog batok sa Simbahan, si Lyman Sherman ug ang iyang pamilya nagpabilin nga maunongon ngadto ni Joseph Smith, nagtabang sa pagpalig-on sa mga Santos latas sa lisod nga mga panahon. Si Sherman natudlo ngadto sa high council sa Kirtland niadtong Oktubre 1837. Mibalhin siya ngadto sa Far West, Missouri, diin siya gitudlo niadtong tinglarag sa 1838 ngadto sa High Council sa Far West. Niining higayona, si Joseph Smith ug ang ubang mga lider nabilanggo, ug ang mga Santos nagdali nga makaeskapo gikan sa mga manggugubot nga panon sa Missouri. Sumala ni Benjamin Johnson, si Sherman mibiyahe aron bisitahon ang Propeta sa bilanggoan, ug ang agig resulta niini nga pagbiyahe siya “gisip-on” ug nagmasakiton pag-ayo. Sa kasamtangan, sa Enero 16, 1839, ang Unang Kapangulohan misulat ngadto ni Brigham Young ug Heber C. Kimball, ang senior nga Apostoles, mitudlo ni Lyman Sherman sa pagpuli sa usa sa mga bakante sa Korum sa Napulog Duha. Si Kimball misulat nga siya ug si Young mibisita ni Joseph Smith sa Bilanggoan sa Liberty niadtong Pebrero 8, 1839. Miingon siya nga sa dihang sila mibiya gikan sa Far West, “dili maayo ang pamati ni Lyman Sherman. Sulod sa pipila ka adlaw human sa among pagbalik namatay siya. Wala namo mapahibalo siya sa iyang pagkatudlo.”
Usa kadto ka hilom ug kalit nga kataposan sa mortal nga pangalagad sa matinud-anon nga tawo. Ang kamatayon ni Sherman nangahulogan sa kalisod alang sa iyang asawa, si Delcena, ug sa ilang unom ka gagmay nga anak, nga nakaabot ngadto sa Illinois ug dayon sa Utah nga makaluluoy kaayo. Sama sa daghan nga unang mga Santos, si Lyman Sherman mipahinungod sa iyang kinabuhi ngadto sa kawsa sa pag-establisar sa Zion ug andam nga misunod ni Propeta Joseph Smith bisan pa sa kakabos, oposisyon, ug sa walay kaseguroan. “Siya usa ka tawo sa dakong kaligdong, usa ka gamhanan nga tigsangyaw,” hinumdom sa iyang bayaw nga si Benjamin Johnson. Siya nabuhi ug namatay nga hingpit nga miapil sa pagtuman sa sugo sa Ginoo sa “[pag]lig-on sa inyong mga kaigsoonan diha sa inyong tanan nga panagsultihanay, diha sa inyong tanan nga mga pag-ampo, diha sa inyong tanan nga mga pagdasig, ug sa inyong tanan nga mga buhat.”