“‘Nagmaya ang Among Kasingkasing sa Pagkadungog Kaniya nga Namulong’” Kinatibuk-ang Saysay sa mga Pagpadayag (2016)
“Nagmaya ang Among Kasingkasing sa Pagkadungog Kaniya nga Namulong,” Kinatibuk-ang Saysay sa mga Pagpadayag
“Nagmaya ang Among Kasingkasing sa Pagkadungog Kaniya nga Namulong”
Si William Clayton mibaktas sa kataposang siyam ka milya ngadto sa Nauvoo. Ang barko nga gisakyan niya ug sa iyang kaubanan miagi sa Mississippi padulong sa ilang bag-ong panimalay mihapit og kadiyot sa Nauvoo alang sa kagabhion. Apan human sa 11-ka semana, 5,000-ka milya nga biyahe gikan sa iyang panimalay sa Penwortham, England, si William dili na makapaabot pa. Siya ug ang pipila ka mga higala milatas sa labihang katugnaw nga sayo sa kabuntagon ug miabot nga nagbaktas sa wala pa ang udto, Nobiyembre 24, 1840. Usa ka kinabig sa tulo na ka tuig, si William mipamatuod sa propetikanhong tawag ni Joseph Smith didto sa iyang yutang natawhan. Karon mahinamon siya nga mahimamat ang Propeta sa personal.
Sa wala madugay nakahimamat siya ni Joseph Smith ug mipakigbahin og pipila sa iyang nahaunang mga impresyon pinaagi sa mga sulat ngadto sa iyang mga higala didto sa England. “Kagabii daghan namo ang mikuyog ni Brother Joseph [ug] nagmaya ang among mga kasingkasing sa pagkadungog kaniya nga namulong bahin sa mga butang sa Gingharian,” siya misulat. “Kon mianhi pa ako gikan sa England aron makig-istorya kaniya sa pipila ka adlaw, isipon ko unta ang akong kaugalingon nga nabayran og maayo sa akong kahago,” misulat siya sa laing okasyon.
Si William nagsugod na sa paghimo og usa ka kinabuhi ug usa ka panimalay alang sa iyang kaugalingon ug sa iyang asawa nga si Ruth, kinsa manganakay na sa ilang ikaduhang anak sa panahon nga sila miabot. Ang unang tuig sa mga Clayton sa ilang bag-ong panimalay namatud-an nga lisod, hinuon. Mipalit sila og yuta sa habig sa kasadpan sa Mississippi River, atbang sa Nauvoo, diin sila misulay sa pagpanginabuhi isip mga mag-uuma. Si William kanhi usa ka bookkeeper sa usa ka industriyal nga lungsod sa English ug walay kahanas ni pisikal nga kasarang sa usa ka mag-uuma. Ang iyang mga paningkamot sa wala madugay nahugno tungod kay napakyas ang usa ka pananom ug sa taas nga pagtakboy sa malarya.
Naluya tungod niining wala damha nga mga panghitabo, si William midawat sa tambag sa misyonaryo nga nagkabig kaniya, si Heber C. Kimball, ug gibalhin ang iyang pamilya balik og tabok sa suba ngadto sa Nauvoo niadtong Disyembre 1841. Ang kanhi magtatambag ni William sa kapangulohan sa British Mission, si Willard Richards, nagserbisyo isip ang kalihim ug nagkinahanglan og kaabag nga iyang makasaligan. Si Heber wala madugay miadto ni William sa paghangyo kaniya sa pagreport sa buhatan ni Joseph Smith. Didto, pagka Pebrero 9, 1842, si William miuyon aron mamahimong kalihim ug eskriba ngadto sa Propeta.
Kalihim ug Eskriba
Sa misunod nga duha ug tunga ka tuig, si William Clayton nakabaton og usa ka mas suod nga paglantaw sa personal ug publikong kinabuhi ni Joseph Smith kay ni bisan kinsa. Gikauban siya ni Joseph hapit sa kada adlaw ug nalambigit og maayo sa mga patigayon, ug politikanhon, ug relihiyosong mga kalihokan. Ang ilang panaghigalaay nakahatag ni William og usa ka lahi nga oportunidad sa suod nga pagsukod sa kinaiya ni Joseph, lakip sa iyang mga sayop. Nakahibalo usab siya sama sa nahibaloan ni bisan kinsa nga si Joseph usa lamang ka tawo, apan para ni William, ang mga kasaypanan ni Joseph dili importante kon timbangon batok sa makapalapad sa kalag nga mga pagtulun-an nga gihatag sa Ginoo pinaagi sa Iyang propeta. Pinaagi sa ilang panag-uban didto Nauvoo, si William nahimong tig-a nga tigpanalipod ni Joseph Smith sa tibuok kinabuhi.
Sa iyang buhat isip kalihim, si William Clayton mirekord sa labing mahinungdanong mga pagpadayag, mga pagtulun-an, ug mga wali nga nahatag ni Joseph Smith atol sa panghitabo sa kataposang duha ka tuig sa kinabuhi sa Propeta. Siya mirekord sa mga instruksiyon ni Joseph kabahin sa bunyag alang sa patay ug sa pagpadayag kabahin mahangtoron ug sa dinaghan nga kaminyoon, diin ang duha sa kadugayan nahimong kabahin sa mga kasulatan sa mga Santos sa Ulahing mga Adlaw. Siya usa sab sa mga eskriba nga nagtipig og usa ka asoy sa labing inila nga wali ni Joseph, ang diskorso alang ni King Follet. Siya mihatag og bili niining mga pagtulun-an labaw pa sa bugti ug ingon og mibati sa importansiya sa pagtipig niini.
Gibati ni Joseph Smith ang nagkadako nga pagkadinalian sa pagpahibalo sa espirituhanong kahibalo ngadto sa mga Santos. Atol niining panahona sa Nauvoo mihatag siya og usa ka gamhanang publikong wali human sa laing wali ug patas nga mipakigbahin sa gamhanang mga pagtulun-an ug mga ordinansa diha sa pribado nga mga konseho uban sa iyang kasaligan nga mga higala. Si Joseph Smith wala mohatod niining mga pagtulun-an isip pormal nga mga pagpadayag sa paagi nga kasagaran niyang gihimi sa sayong bahin sa iyang pagpangalagad, apan si William Clayton naminaw og maayo sa matag pulong. Iyang girekord ang mga panultihon sa Propeta sa iyang kaugalingong diary o sa journal nga iyang gitipigan alang ni Joseph, ug kining mga sulat nagamit sa kadugayan isip ang basihanan sa pipila ka mga seksiyon sa Doktrina ug mga Pakigsaad.
Bililhon nga mga Pagtulun-an
Diha si William sa dihang nakigkita si Joseph Smith ni Parley P. Pratt niadtong Pebrero 9, 1843, ug mipakigbahin kaniya sa kahibalo kon unsaon sa pag-ila sa langitnong mensahero gikan sa kang Satanas ug sa iyang mga anghel. Kini nga mga instruksiyon kalabot sa mga pagtulun-an sa templo nga gipakigbahin ni Joseph ngadto sa mga sakop sa iyang sinaligan nga sirkulo samtang si Parley tua sa layo sa England. Girekord ni William ang mga instruksiyon diha sa journal ni Joseph, ug sila sa wala madugay gikanonisar isip ang Doktrina ug gma Pakigsaad 129.
Pagka Abril 2, 1843, si Joseph mibisita og usa ka komperensiya sa stake didto sa Remus, Illinois, 20 ka milya sa silangan nga bahin sa Nauvoo. Usa ka Amerikanong lider sa relihiyon nga ginganlan og William Miller mitagna nga ang Ikaduhang Pag-anhi ni Jesukristo mahitabo sa mosunod nga adlaw. Gipahimuslan ni Joseph kini nga okasyon sa pagpasalig sa mga Santos sa Ramus nga ang Ginoo wala mipadayag sa panahon sa Iyang pag-anhi. Si Joseph mitudlo usab nga ang Dios usa ka personahe nga adunay lawas; nga ang tanang butang sa nangagi, kasamtangan, ug sa umaabot anaa sa Iyang atubangan; ug nga ang atong katilingbanong mga relasyon molahutay sa kahangtoran. Ang talaan ni William Clayton niining bililhong mga mutya sa iyang personal nga journal nahimong basehanan sa teksto sa Doktrina ug mga Pakigsaad 130.
Ang Doktrina ug mga Pakigsaad 131 gilangkoban sa kadaghanan sa pipila ka mubo nga mga sinulat sa journal nga gitipigan ni William atol sa Mayo 1843. Lakip niini mao ang mga pagtulun-an mahitungod sa mahangtorong kaminyoon nga gihatag didto sa Ramus diha sa panimalay ni Benjamin ug Melissa Johnson niadtong Mayo 16. Ang mga Johnson naminyo sukad pa sa Adlaw sa Pasko niadtong 1841, apan si Joseph misulti kanila nga tuyo niya nga minyoon sila sumala sa balaod sa Ginoo. Si Benjamin mipasiaw sa pag-ingon nga siya dili makigminyo ni Melissa pag-usab gawas lang kon si Melissa manguyab niya. Apan bug-os si Joseph. Gitudlo niya nga ang mga lalaki ug mga babaye kinahanglan nga mosulod ngadto sa bag-o ug walay kataposan nga pakigsaad sa kaminyoon aron makaangkon sa labing taas nga mga panalangin sa Dios. Siya miselyo dayon nilang Benjamin ug Melissa alang sa kahangtoran.
Para ni William, ang pagrekord niining propetikanhong mga pagpamulong labaw pa sa usa ka katungdanan; kadto ang usa ka dakong mga pribilihiyo sa iyang kinabuhi. Nalipay siya sa paagi nga gipaduol ni Joseph Smith ang distansiya tali niini nga kalibotan ug sa sunod ug gihimo ang mga butang sa kahangtoran ingon nga mahikap ug tinuod. Sa dihang ang mga Santos sa Nauvoo naminaw ni Joseph nga namulong, ang daghang kalisdanan nga ilang giatubang—kamatayon, sakit, kawad-on, ug kagutom—gilamoy sa pagpaabot sa umaabot nga milenyo ug sa saad nga ang mga bugkos sa pamilya ug panaghigalaay molapas pa niini nga kinabuhi. Ang kahimuot ni William Clayton sa pagrekord sa mga pulong ni Joseph Smith adunay malungtaron nga impluwensiya sa mga pagtulun-an sa Simbahan ug nagpadayon sa pagpanalangin sa mga Santos sa Ulahing mga Adlaw karon.