Usa ka Anghel ug usa ka Saad

Keith A. Erekson

Ang mga gabii sa Septiyembre 22 ug 23, 1823, nahimong usa ka mahinungdanon kaayo nga punto sa kinabuhi ni Lucy Mack Smith. Niadtong Septiyembre 22, ang iyang anak nga lalaki nga si Joseph mipauli nga mahinamon ug gikapoy gikan sa pagtrabaho sa umahan. Nakahinumdom si Lucy nga “sa dihang ang pamilya magkauban tanan,” si Joseph misulti kanila nga usa ka anghel ang mibisita kaniya sa tibuok gabii nga milabay. Dili kadto ang unang higayon nga si Joseph nakadawat og balaanon nga direksiyon, apan human sa iyang unang panan-awon tulo ka tuig ang milabay, si Joseph yanong misulti ni Lucy mahitungod sa iyang desisyon nga dili mopasakop sa iyang Presbyterian nga simbahan o sa bisan unsang uban nga tinuohan. Niadtong panahona, gipadayon niya ang naandan niyang pagpakabuhi.

Ang mga pagbisita ni anghel Moroni maoy unang naghimo sa personal nga espirituhanon nga mga kasinatian ni Joseph nga usa ka hilisgotan sa panaghisgot sa pamilya. Sa buntag sa Septiyembre 22, ang tibuok gabii nga kasinatian nakapaluya kaayo ni Joseph nga naglisod na siya sa pagtapos sa iyang mga buluhaton kauban sa iyang amahan ug igsoon nga si Alvin, apan nagduhaduha pa gihapon siya sa pagsaysay sa unsay nahitabo. Motuo kaha ang iyang papa kaniya? Tungod si Joseph walay gitanyag nga pagpasabot sa iyang pagkaluya, nagtuo si Joseph Smith Senior nga nasakit ang iyang anak nga lalaki ug gipapauli siya aron makapahulay. Apan sa wala pa makaabot si Joseph sa balay, mipakita pag-usab ang anghel, nagsugo kang Joseph sa pagpahibalo sa iyang amahan ug nagseguro kaniya nga ang iyang amahan motuo kaniya. Pagkagabii, midesisyon si Joseph nga ipakigbahin ang istorya sa pagbisita sa anghel ngadto sa iyang tibuok nga pamilya.

Giseryoso nila og maayo ang iyang kasinatian. Apan, samtang nagsugod si Joseph sa pagsugilon sa unsay nahitabo, ang iyang magulang nga lalaki nga si Alvin nakakita sa kaluya ni Joseph ug misugyot nga ang tibuok pamilya “matulog na ug mangmata og sayo sa buntag, aron humanon ang among buluhaton sa adlaw” ug mamauli alang sa usa ka “nindot nga taas nga kagabhion” sa sunod gabii diin silang “tanan makapanglingkod alang sa katuyoan sa pagpaminaw.” Nangandam og sayo si Lucy sa panihapon pagkasunod adlaw, ug ang tibuok pamilya nagpundok sa wala pa mosalop ang adlaw—amahan, inahan, unom ka anak nga lalaki, ug tulo ka anak nga babaye. Si Lucy mihinumdom nga human sila mapasidan-an nga ang panahon wala pa moabot nga ipakigbahin ngadto sa kalibotan ang mensahe nga iyang nadawat, “Si Joseph nagsugod sa pagsugilon kanamo sa mahinungdanon ug mahimayaon nga mga butang nga gipakita sa Ginoo kaniya.”

Ang Doktrina ug mga Pakigsaad 2 nagpresentar og pipila lang ka dosena sa liboan ka pulong nga sa kataposan gipamulong ug gisulat mahitungod sa mga pagbisita ni anghel Moroni ngadto kang Joseph Smith. Ang mga instruksiyon ni Moroni midirekta kaniya ngadto sa usa ka duol nga bungtod diin iyang nakaplagan ang usa ka sagrado nga kasaysayan sa karaan nga mga lumulupyo sa Amerika nga nakarekord diha sa bulawan nga mga palid. Sa tukmang panahon, ihubad niya ang rekord pinaagi sa gasa ug gahom sa Dios ug imantala kini isip ang Basahon ni Mormon. Alang sa pamilya Smith, hinuon, kadto nga mga gabii sa Septiyembre 1823 mao ang mga panahon sa dihang ang ilang mga kasingkasing nagsugod sa pagdangop ngadto sa karaan nga mga saad ug sa buhat nga pagahimoon sa dili pa mobalik si Jesukristo nganhi sa yuta.

Pinaagi sa Kamot ni Elijah

Si Joseph misulat o midumala sa pagsulat sa labing menos upat ka asoy sa pagbisita sa anghel. Kadto nga mga asoy nagklaro nga ang mensahe ni Moroni naglakip og labaw pa kaysa panawagan sa pagkuha sa bulawan nga mga palid. Sa usa sa iyang ulahi nga mga asoy, si Joseph mipahayag nga ang anghel nga si Moroni mikutlo gikan sa Malaquias, Isaias, Mga Buhat, ug Joel ingon man sa “daghan pang uban nga mga hitabo sa kasulatan” (Joseph Smith—Kasaysayan 1:36–41); sa lain nga asoy, si Joseph mipaila nga “siya mipasabot sa daghan sa mga panagna nganhi kanako.” Gitino ni Oliver Cowdery ang daghan niini nga mga tudling sa dihang gisugilon niya ang kaugalingon niyang kasinatian sa pagpaminaw kang Joseph nga naghulagway sa mga pagbisita. Naghatag og hapit katuloon nga gidaghanon sa mga pulong sa kinatas-an nga asoy ni Joseph, ginganlan ni Oliver ang daghang tudling gikan sa Deuteronomio, Mga Salmo, Isaias, ug Jeremias isip ang basehan alang sa usa ka halapad nga mensahe mahitungod sa pagbukas sa kalangitan, sa pagpahiuli sa balaanon nga awtoridad ug mga pakigsaad, sa pagpundok sa Israel, ug sa pagpangandam alang sa Ikaduhang Pag-anhi ni Jesukristo. Naobserbahan ni Oliver sa wala madugay “nga ang paghatag og usa ka minuto nga minubo sa usa ka taas nga interbiyo sa usa ka langitnon nga mensahero, lisod kaayo, gawas kon ang tawo giabagan dayon sa gasa sa inspirasyon.”

Paglabay sa panahon, ang tudling gikan sa Malaquias mahitungod sa pagbalik ni Elias nahimong mahinungdanon kaayo alang sa mga Santos sa Ulahing mga Adlaw. Si Elias usa ka gamhanan nga propeta sa Daang Tugon kinsa miselyo sa mga langit batok sa ulan, mitawag og kalayo nga mahulog gikan sa langit, mipadaghan sa pagkaon sa balo, ug mibuhi sa usa ka batan-on nga lalaki gikan sa pagkamatay (tan-awa sa 1 Mga Hari 17–18). Apan ang iyang makapahinuklog nga pagkahimaya nga wala makasinati og kamatayon (tan-awa sa 2 Mga Hari 2) ug ang iyang gisaad nga pagbalik mao ang nakaimpluwensiya kaayo og dako sa mga tradisyon sa mga Judeo ug mga Kristiyano. Ang mga Judeo magbilin og usa ka baso alang kang Elias sa lamesa sa Pagpalabay, mag-ila kaniya isip usa ka mahinungdanon nga tig-una sa tawhanong pagpasig-uli, sa pagpahiuli sa balay ni Jacob, ug sa mesiyanikanhong panahon. Ang nag-una nga mga Kristiyano nagtan-aw kang Elias isip usa ka tig-una sa Mesiyas ug mituboy kaniya isip usa ka modelo sa pag-ampo. Ang Bag-ong Tugon nagrekord og usa ka katumanan niini nga saad sa dihang si Elias mipakita kang Moises didto sa Bukid sa Transpigurasyon.

Ang mga instruksyon ni Moroni dili mao ang kataposan nga nadungog ni Joseph mahitungod kang Elijah. Sa usa ka proseso sa nagpadayon nga pagpadayag nga mamahimong usa ka opisyal nga timaan sa Pagpahiuli, nakakat-on si Joseph og dugang pa sa paglabay sa panahon, “pagtulon-an human sa usa ka pagtulon-an, lagda human sa usa ka lagda, diyotay dinhi ug diyotay didto” (2 Nephi 28:30). Ang Basahon ni Mormon naglakip og usa ka istorya kabahin ni Jesus nga nagpakigbahin sa panagna ni Malaquias mahitungod ni Elias ngadto sa pipila sa karaan nga mga lumulupyo sa Amerika (tan-awa sa 3 Nephi 25), ug si Joseph mohisgot og usab sa tudling isip kabahin sa iyang dinasig nga mga pag-usab sa Biblia. Usa ka pagpadayag niadtong Agosto 1830 mipasabot nga si Elias naghupot “sa mga yawe sa gahom sa pagbalik sa mga kasingkasing sa mga amahan ngadto sa mga anak” (D&P 27:9) samtang may lain pang gihatag wala madugay pipila ka bulan ang milabay nga nagpasabot sa pag-anhi ni Elias sa kataposan (tan-awa sa D&P 35:4). Ang journal ni Joseph Smith nagrekord nga si Elias mipakita gayod didto sa Kirtland Temple niadtong Abril 1836, namahayag nga “ang panahon miabot na sa hingpit” alang sa iyang pagbalik, alang “sa pagpabalik sa mga kasingkasing sa mga amahan ngadto sa mga anak” ug sa pagtugyan ngadto kaniya sa “mga yawe niini nga kapaigoan” (D&P 110:14–16). Didto sa Nauvoo, ang pagpahiuli sa bunyag alang sa mga patay mipabalik sa mga panghunahuna sa daghang Santos ngadto sa ilang mga katigulangan ug mihimo og usa ka sumpay tali sa nangagi ug sa kasamtangan nga mga henerasyon. Sukad niadtong panahona, daghang mga Santos sa Ulahing mga Adlaw ang mikonektar sa espiritu ni Elias ngadto sa mga ordinansa sa templo ug sa buhat sa family history.

Apan, ang saad sa pagbalik ni Elias, naglakip og dugang pa kaysa templo ug buhat sa family history. Ang Pagpahiuli mismo, isip usa ka pagpabalik ngadto sa karaan nga awtoridad ngadto sa mga henerasyon sa modernong panahon, mao ang usa ka katumanan sa panagna ni Malaquias, nga gisubli ni anghel Moroni niadtong 1823. Sa kataposan nga tuig sa iyang kinabuhi, si Joseph Smith mitudlo nga “ang espiritu, gahom, ug tawag ni Elijah mao, nga kamo dunay gahom sa paghupot sa mga yawe sa pagpadayag, mga ordinansa, mga orakulo, mga gahom ug mga tuga sa kahingpitan sa Melchizedek nga Pagkapari ug sa gingharian sa Dios dinhi sa yuta” aron makahimo sa “pagpahigayon sa tanang mga ordinansa nga anaa sa gingharian sa Dios.” O, sama sa giminubo ni Joseph sa laing okasyon, “ang pakigsaad nga gihimo sa Dios sa karaang Israel hapit na matuman.”

Si Lucy Smith mao ang usa sa unang nakadungog mahitungod sa mensahe ni Moroni ug nakabati kon sa unsang paagi kini mihimo nga mas nagkasuod ang iyang pamilya. Sa kataposan sa iyang kinabuhi, si Lucy mihinumdom nga kadtong mga gabii nga pagbisita “nakapahimo kanamo nga magmaya sa hilabihan” ug nagmatuod nga ang Dios “mohatag kanamo og mas hingpit nga kahibalo sa plano sa kaluwasan ug sa katubsanan sa tawhanong pamilya.” Ang mga pagbisita gikan ni Moroni ngadto sa iyang anak nga lalaki nagdala og labihan kamahinungdanon nga kasaysayan, naglunsad sa aktibo nga buhat sa Pagpahiuli, nagpaila ni Joseph ngadto sa Basahon ni Mormon, ug nagpahimutang sa pundasyon alang sa pagbalik ni Elias ug sa mas lapad nga buhat sa pagsumpay sa mga anak sa Dios sa usag usa isip usa ka pamilya alang sa karon ug sa kahangtoran.