Ang Pulong sa Kaalam

D&P 89

Jed Woodworth

Sama sa daghang pagpadayag sa unang Simbahan, ang Doktrina ug mga Pakigsaad 89, nailhan usab karon nga ang Pulong sa Kaalam, miabot agi og tubag sa usa ka problema. Didto sa Kirtland, daghang lalaki sa Simbahan gitawag sa pagsangyaw sa nagkalainlaing bahin sa Estados Unidos. Sila kinahanglan nga mosangyaw og paghinulsol ngadto sa katawhan ug mopundok sa pinili sa Ginoo. Aron sa pag-andam niining bag-ong mga kinabig alang sa ilang importante nga mga trabaho, si Joseph Smith misugod og eskwelahan sa pagbansay nga gitawag og ang Tulunghaan sa mga Propeta, nga gisugdan didto sa Kirtland sa ikaduhang andana sa tindahan ni Newel K. Whitney niadtong Enero 1833.

Matag buntag human sa pamahaw, ang kalalakin-an mag-abot sa tulunghaan aron maminaw sa instruksiyon gikan ni Joseph Smith. Ang kwarto gamay kaayo, ug mga 25 ka elder naghuot sa lugar. Ang unang butang nga ilang buhaton, human makapanglingkod, mao ang “pagdagkot sa hunsoy [kwako] ug maghisgot og talagsaong mga butang sa gingharian ug dayon magpabulhot og aso,” miingon si Brigham Young. Baga kaayo ang aso nga maglisod na gani ang mga tawo sa pagkakita kang Joseph taliwala sa aso. Kon wala nay aso ang hunsoy, ila dayong “ibutang ang inusap nga tabako sa pikas nga daplin ug tingali sa matag kilid ug dayon magkatag na kini sa tibuok salog.” Niining hugaw kaayong palibot, gisulayan ni Joseph Smith ang pagtudlo sa mga lalaki kon unsaon nila ug sa ilang mga kinabig sa pagkahimong balaan, ‘walay lama,’ ug mahimong takos sa presensya sa Dios.

Tabako

Kining kalihokan sa tindahan ni Whitney nahitabo taliwala sa dako kaayong kausaban sa kultura sa kasadpan. Niadtong 1750, kadaghanan sa mga tawo dili kaayo manglimpyo sa ilang kaugalingon, ang mga dato ug mga aristokrata lamang ang nagpakabana sa pagpanglimyo sa kaugalingon. Pagka 1900, ang kanunay nga pagkaligo nahimo nang naandam sa dakong porsiyon sa populasyon, ilabi na sa arangan nga mga tawo, nga misugod sa paghatag og bili sa sosyal nga kahimtang. Ang pagluwa og tabako nausab gikan sa madawat sa publiko nga praktis sa kadaghanan nga pundok sa populasyon ngadto sa usa ka hugaw tan-awon nga kinaiya nga dili buhaton sa matinahoron nga katilingban. Sa tunga-tunga niining pagkausab sa kultura, sa mao gayod nga higayon sa dihang kada adlaw ang mga tawo nagsugod na sa pagpakabana sa ilang kaugalingon sa ilang kalimpyo ug kahimsog sa panglawas, ang Pulong sa Kaalam miabot aron sa pagdan-ag sa agianan.

Ang talan-awon sa Tulunghaan sa mga Propeta tingali igo na nga makahatag og kabalaka sa dili tiggamitan og tabako sama ni Joseph Smith. Ang asawa ni Joseph, si Emma, misulti kaniya nga ang kahimtang nakapabalaka kaniya. Siya ug si Emma nagpuyo sa tindahan sa mga Whitney, ug anaa niya ang buluhaton sa pagbagnos sa luwa gikan sa gahi nga kahoy. Tingali nagbagulbol siya nga gisugo sa paghimo niining lisod nga trabaho nga wala hatagig bili sa uban, apan adunay mas praktikal usab nga konsiderasyon: “Dili niya mahimo nga desente tan-awon ang salog,” hinumdom ni Brigham Young. Ang mga lama imposible nga matangtang. Ang tibuok sitwasyon ingon og dili maayo alang niadtong gitawag sa Dios sama niini nga mga elder, ilabi na kon mahinumdom kita nga ang kwarto nga hugaw og salog kang Joseph nga “kwarto sa paghubad,” ang sama nga dapit nga siya makadawat og mga pagpadayag sa ngalan sa Dios. Nagsugod si Joseph sa pagpangutana sa Ginoo kon unsay mahimong himoon, ug niadtong Pebrero 27, hapit usa ka bulan human sugdi ang tulunghaan, nakadawat siya og pagpadayag nga sa wala madugay gihimo nga kasulatan isip ang Doktrina ug mga Pakigsaad 89. Ang tubag klaro: “Ang tabako dili alang sa tawo apan alang sa mga pangos & sa tanan nga masakiton nga baka; pagagamiton uban sa paghukom & kahanas.”

Isog nga mga Ilimnon

Ang tabako usa lamang sa daghan nga mga butang kalabot sa kahimsog ug kalimpyo sa panglawas kansang mga merito gidebatihan pag-ayo sa duha ka habig sa Kadagatan sa Atlantiko sa panahon nga ang Pulong sa Kaalam nadawat. Ang pagpanaghisgot kanunay kaayo tungod kay daghang tawo ang miabuso niini nga butang. Ang taga-Britain nga nobelista nga si Frances Trollope, mireport sa talamayong paagi niadtong 1832 nga sa iyang tanang bag-ong pagbiyahe sa Estados Unidos, talagsa ra kaayo siya nga makasugat og tawo nga dili “tig-usap og tabako o tig-inom og whisky.”

Ang pag-inom, pag-usap og tabako klaro nga dili na kapugngan. Sulod sa mga siglo hapit tanang Amerikano moinom og daghan kaayong ilimnong alkohol, sama sa mga tawo sa Uropa. Ang mga Puritan mitawag sa alkohol nga “Maayong Binuhat sa Dios,” usa ka panalangin gikan sa langit nga mahubog panagsa. Giinom ang alkohol sa matag pagpangaon, ang usa ka rason mao nga ang tubig nga wala mahinloi nianang higayona dili luwas. Ang hinimo sa balay nga serbesa mao ang paborito, ug human sa 1700, ang mga kolonista nga British-American miinom og gibahal nga duga sa milukoton, gibahal nga apple cider, ug ram pinalit gikan sa West Indies o giitos gikan sa molases nga hinimo didto. Pagka-1770, ang kasagaran nga makonsumo sa matag tawo sa giitos nga ilimnon nga alkohol lamang—walay labot sa serbesa o cider—anaa sa 3.7 ka galon kada tuig.

Ang Rebolusyon sa Amerika mipagrabe niini nga pagdepende sa alkohol. Human gihunong ang pagpamalit og mga molases, ang mga Amerikano nangita og ikapuli sa ram pinaagi sa paggamit og whiskey. Ang mga mag-uuma sa lugas sa kasadpang Pennsylvania ug Tennessee nakakita nga mas barato ang paghimo og whiskey kay sa pagpadala ug pagbaligya sa madaot nga mga lugas. Isip sangpotanan, ang gidaghanon sa mga destiliriya dali nga midaghan human sa 1780, gidugangan sa panimuyo sa dapit sa kamaisan sa Kentucky ug Ohio ug sa kalapad sa mga distansya ngadto sa silangan nga mga merkado. Sa katingala sa mga tig-obserbar sama ni Trollope, ang mga Amerikano bisan asa—mga lalaki, mga babaye, ug mga bata—manginom og whiskey sa tibuok adlaw. Ang konsumo sa Amerikano sa alkohol daling misaka. gikan sa duha ug tunga nga galon sa usa ka tawo niadtong 1790 ngadto sa pito ka galon niadtong 1830, ang labing taas nga gidaghanon sa bisan unsang panahon sa kasaysayan sa Amerika ug ang gidaghanon pil-on og katulo ang konsumo karon.

Kining misaka nga konsumo sa alkohol wala mahisubay sa moral sa relihiyon. Sa sayo pa niadtong 1784, ang mga Quaker ug Methodist mitambag na sa ilang mga miyembro sa pagpugong sa paggamit sa makahubog nga ilimnon ug sa paglikay sa pag-apil sa pagpamaligya ug pagbuhat niini. Ang mas agresibo nga kalihokan sa pagdili sa alkohol gipatuman sa mga simbahan sa unang mga dekada sa ika-19 nga siglo. Ang alkohol nakita na nga mas makuyaw nga maninental ug dili na kaayo isip usa ka gasa gikan sa Dios. Niadtong 1812, ang Congregational ug Presbyterian nga mga simbahan sa Connecticut mirekomendar og estrikto nga mga balaod sa paghatag og lisensya nga nagpaminos sa pag-apod-apod sa alkohol. Si Lyman Beecher, ug ka lider niining kalihokan sa reporma, nagpasiugda og mas hilabihan nga mga pagsukod, nag-endorso og hingpit nga pagbiya sa ilimnong alkohol. Ang ideya nahimong labing importanteng tumong sa American Temperance Society (ATS), nga naorgansiar sa Boston niatong 1826. Ang mga sakop sa organisasyon giawhag sa pagpirma og sinumpaan nga pagpugong dili lamang sa pagkontrol sa ilang pag-inom og alkohol apan sa hingpit nga pagbiya. Ang kapital nga “T” gisulat tupad sa mga ngalan niadtong mihimo niini, ug gikan niini nga pulong nga “teetotaler [tawo nga dili gayod moinom og alkohol]” namugna. Pagkatunga-tunga sa mga 1830, ang ATS midaghan og sobra sa usa ka milyon, kadaghanan kanila mga teetotaler.

Naawhag sa ATS, ang liboan ka lokal nga mga pundok sa pagpugong sa kaugalingon naporma sa tibuok nasod sa Estados Unidos. Ang Kirtland adunay iyang kaugalingong grupo sa pagpugong sa kaugalingon, sama sa daghang gagmay nga mga lungsod. Tungod kay ang reporma sa alkohol gihisgotan ug gidebatehan kanunay, ang mga Santos nagkinahanglan og paagi sa paghukom unsa nga opinyon ang husto. Gawas sa pagsalikway sa paggamit sa tabako, ang Pulong sa Kaalam mitambag usab batok sa ilimnong alkohol: “Tungod kay bisan kinsa nga tawo, nga moinom og bino o isog nga ilimnon taliwala kaninyo, tan-awa kini dili maayo, ni angay sa panan-aw sa inyong Amahan.”

Bisan pa niana, nagkinahanglan kini og panahon sa pagsalikway sa mga binuhatan nga nakagamot na pag-ayo sa tradisyon ug kultura sa pamilya, ilabi na kon ang gipaaslom nga mga ilimnon sa tanang matang kanunay nga gigamit alang sa mga katuyoan sa pagpanambal. Ang pulong nga “isog nga ilimnon” naglakip gayod sa ilimnong alkohol sama sa wisky, nga human niana sagad gilikayan sa mga Santos sa Ulahing mga Adlaw. Gihimo nila ang mas kasarangan nga paagi sa mas dili kaayo isog nga ilimnong alkohol sama sa serbisa ug “lunsay nga bino sa ubas, nga inyong kaugalingon nga binuhat.” Alang sa misunod nga duha ka henerasyon, ang mga lider sa mga Santos sa Ulahing mga Adlaw mitudlo sa Pulong sa Kaalam isip usa ka sugo gikan sa Dios, apan sila miuyon sa lain-laing mga panglantaw bahin kon unsa ka estrikto nga ipatuman ang sugo. Kini nga panahon sa transisyon nakahatag sa mga Santos og panahon sa pagpalambo sa ilang kaugalingon nga tradisyon sa pagbiya gikan sa mga butang nga makapaanad. Sa sayo sa ika-20 nga siglo, sa dihang ang sayantipikanhong mga tambal mas daghan na ug ang pagtambong sa templo nahimo nga regular nga bahin sa pagsimba sa mga Santos sa Ulahing mga Adlaw, ang Simbahan andam na nga modawat og mas estrikto nga pagsunod nga makapawala sa mga problema sama sa pag-inom og alkohol sa mga masulundon. Niadtong 1921, ang Ginoo midasig ni Presidente Heber J. Grant sa pagtawag sa tanang mga Santos sa pagsunod sa Pulong sa Kaalam sa tanang bahin niini pinaagi sa pagbiya gikan sa tanang alkohol, kape, tsa, ug tabako. Karon ang mga miyembro sa Simbahan gipaabot nga mosunod niining mas taas nga sumbanan.

Init nga mga Ilimnon

Ang mga Amerkinano nga tigreporma sa pagpugong sa kaugalingon milampos niadtong 1830 sa dakong bahin pinaagi sa pagpangita og ikapuli alang sa alkohol: kape. Niadtong ika-18 nga siglo, ang kape giisip nga usa ka luho nga butang, ug ang hinimo nga tsa sa taga-Britanya mao ang mas gipalabi. Human sa Rebolusyon, ang pag-inom og tsa nakita nga dili bayanihon ug dili na kaayo ilado—ang paagi naablihan alang sa pagtumaw sa kaatbang nga igpalagsik. Niadtong 1830, ang mga tigreporma miawhag sa Kongreso sa Estados Unidos sa pagtangtang sa buhis sa importasyon sa kape. Ang estratihiya milampos. Ang kape nahimong 10 sentimo ang usa ka libra, mihimo sa usa ka baso nga kape nga pareha og presyo sa usa ka baso nga whiskey, nga maoy nakapakunhod sa whiskey. Pagka-1833, ang kape nagsugod nga “imnon na kanunay kada adlaw sa matag pamilya, dato ug pobre.” Ang Baltimore American mitawag niini nga “apil sa mga kinahanglanon sa kinabuhi.” Bisan og daghan ang nakauyon sa kape sa tunga-tunga sa mga 1830, lakip sa medikal nga komunidad, pipila ka radikal nga mga tigreporma sama nila ni Sylvester Graham ug William A. Alcott nagsangyaw batok sa paggamit sa bisan unsa nga igpalagsik, lakip sa kape ug tsa.

Ang Pulong sa Kaalam misalikway sa ideya nga puli sa alkohol. “Init nga mga ilimnon”—nga nasabtan sa mga Santos sa Ulahing mga Adlaw nga nagpasabot nga kape ug tsa—“dili alang sa lawas o sa tiyan,” mipasabot ang pagpadayag. Hinuon, ang pagpadayag nag-awhag sa pagkonsumo sa sukaranan nga mga kan-onon sa matang nga nakapatunhay sa kinabuhi sulod sa liboan ka tuig. Ang pagpadayag midayeg sa “tanan nga makaayo sa lawas nga mga hilba” ug mipasabot nga ang “tanan nga mga lugas alang sa paggamit sa tawo & sa mga kahayopan nga mahimo nga sangkap sa kinabuhi … usab ang bunga sa bagon kana nga namunga, bisan diha sa yuta o sa ibabaw sa yuta.” Sa pagtuman sa unang pagpadayag nga nag-endorso sa pagkaon og karne, ang Pulong sa Kalaam mipahinumdom sa mga Santos nga ang unod sa mga kahayopan ug sa mga mananap sa kahanginan gihatag “alang sa paggamit sa tawo uban sa pagpasalamat,” apan midugang sa pasidaan nga ang karne “gamiton sa padaginot” ug dili magpasulabi.

“Igabubo Ko ang Akong Espiritu ibabaw sa Tanang Unod”

Ang mga Santos sa Ulahing mga Adlaw nga nakahibalo sa reporma sa mga kalihokan sa panglawas sa Amerika sa 1820 ug 1830 tingali naglibog kon sa unsa nga paagi nga kini nga mga kalihokan may kalabotan sa Pulong sa Kaalam. Si Joseph Smith ba mikuha lang ba sa mga ideya nga anaa na sa iyang palibot ug gihimo kini isip pagpadayag?

Ang mao nga mga kabalaka dili makataronganon. Hinumdomi nga daghan sa unang mga Santos sa Ulahing mga Adlaw nga miapil sa mga kalihokan sa pagpugong sa kaugalingon miisip sa Pulong sa Kaalam nga dinasig nga tambag, “gipahiangay ngadto sa Kapasidad sa huyang o & sa labing huyang sa tanan nga mga Santos o matawag nga mga Santos.” Dugang pa, ang pagpadayag walay duol nga kapareha sa literatura nianang panahona. Ang mga tigreporma sa pagpugong sa kaugalingon misulay sa paghadlok sa ilang mga tigpaminaw pinaagi sa pagsulti nga ang pagkunsomo og alkohol adunay daghan nga makuyaw nga mga sakit ug sosyal nga mga kadaot. Ang Pulong sa Kaalam wala magtanyag sa ingon nga pangatarongan. Isog nga ilimnon, ang pagpadayag yanong nag-ingon nga, “dili maayo.” Sa samang paagi mubo nga mga pagpasabot gihatag alang sa mga kamandoan batok sa tabako ug init nga mga ilimnon. Ang pagpadayag mahimong mas masabot isip usa ka tighusay kon unsa ang eksakto imbes nga pagpahayag og usa sa daghang mga opsiyon.

Imbes nga mosulay sa pagdani sa mga tawo pinaagi paghadlok kanila, ang Pulong sa Kaalam nag-awhag gikan sa panglantaw sa kasegurohan ug pagsalig. Ang pagpadayag nagdapit sa mga tigpaminaw sa pagsalig sa Dios kinsa adunay gahom sa paghatag og dakong mga ganti, espirituwal ug pisikal, agi og balos sa pagkamasulundon sa balaan nga sugo. Kadtong kinsa mosunod sa Pulong sa Kaalam, miingon ang pagpadayag, “makadawat og maayo nga panglawas ug uyok sa kabukogan ug makakita og kaalam ug dako nga mga bahandi sa kahibalo ug gani ang tinago nga mga bahandi.” Kini naghulagway sa relasyon sa lawas ug sa espiritu, naghatag og importansiya sa pag-atiman sa lawas ngadto sa lebel sa relihiyoso nga baroganan.

Sa kataposan, gipaabot nga adunay pipila ka pagkasusama nga mga ideya tali sa Pulong sa Kaalam ug sa kalihokan sa reporma sa panglawas sa ika-19 nga siglo. Mao kini ang panahon sa “kahayahay” (Mga Buhat 3:19), usa ka panahon sa kasaysayan diin ang kahayag ug kahibalo gibu-bo gikan sa langit. Usa ka gabii si Joseph Smith gibisitahan ni anghel Moroni sa unang higayon, sa tinglarag sa 1823, ang anghel mikutlo og linya gikan sa basahon ni Joel, ug miingon nga kini hapit na matuman: “Ibubo ko ang akong espiritu sa tanang katawhan,” (Joel 2:28). Tungod kay ang reporma sa pagpugong mihimo sa mga tawo nga dili na kaayo magdepende sa makaadik nga mga butang, nag-aghat og pagkamapainubsanon ug matarong nga aksiyon, ang kalihokan sa pagkatinuod dinasig sa Dios. “Kana nga iya sa Dios nagdapit ug nagdani sa paghimo sa maayo sa kanunay,” ang Basahon ni Mormon namahayag (Moroni 7:13). Kaysa maghunahuna sa ilang mga kaugalinong sa pagkapareha sa kultura, ang mga Santos sa Ulahing mga Adlaw makapamalandong nga malipayon kon sa unsa nga paagi nga ang Espiritu sa Dios mitandog sa daghang tawo, hilabihan ka daghan, ug sa ingon nga gikusgon.

Sa wala madugay human madawat ang Pulong sa Kaalam, si Joseph Smith nagpakita sa atubangan sa mga elder sa Tulunghaan sa mga Propeta ug gibasa ang pagpadayag ngadto kanila. Ang kaigsoonan dili na kinahanglan nga sultihan unsa ang gipasabot sa mga pulong. “Gilabay dayon nila ang ilang mga hunsoy sa tabako ngadto sa kalayo,” nakahinumdom ang usa sa mga partisipante sa tulunghaan. Sukad nianang panahona, ang inspirasyon sa Pulong sa Kaalam naprobahan sa daghang higayon diha sa mga kinabuhi sa mga Santos, ang gahom ug kabalaan niini nagpadayon sa katuigan. Sa pipila ka paagi, ang reporma sa kalihokan sa panglawas sa Amerika nawala. Ang Pulong sa Kaalam nagpabilin nga midan-ag sa atong agianan.

1. Tan-awa sa Milton V. Backman Jr., “School of the Prophets and School of the Elders,” sa Joseph: Exploring the Life and Ministry of the Prophet, ed. Susan Easton Black and Andrew C. Skinner (Salt Lake City: Deseret Book, 2005), 165–75.

2. Si Orson Hyde mao ang nag-unang magtutudlo nianang unang termino, apan ingon og kanunay ang presensya ni Joseph Smith. Tan-awa sa Steven R. Sorensen, “Schools of the Prophets,” sa Daniel H. Ludlow, ed., Encyclopedia of Mormonism, 5 vols. (New York: Macmillan, 1992), 3:1269; Lyndon W. Cook, The Revelations of the Prophet Joseph Smith: A Historical and Biographical Commentary on the Doctrine and Covenants (Salt Lake City: Deseret Book, 1985), 191–92.

3. Brigham Young, Discourse, December 2, 1867; February 8, 1868, Papers of George D. Watt, shorthand transcribed by LaJean Purcell Carruth, Church History Library, Salt Lake City. Ang kanhi wali wala mamantala. Alang sa namantala nga bersyon sa ulahing wali, tan-awa sa Brigham Young, “Remarks,” Deseret News: Semi-Weekly, Feb. 25, 1868, 2.

4. Tan-awa sa “Revelation, 2 January 1831 [D&C 38],” sa Revelation Book 1, 51, josephsmithpapers.org.

5. Ang proseso sa “pagkasibilisado” nagsige na sugod sa mga siglo apan nahimong inila sa mga tawo sa lain-lain og sosyal nga mga kahimtang sa ika-19 nga siglo. Tan-awa sa Norbert Elias, The History of Manners, trans. Edmunds Jephcott (New York, 1978); Georges Vigarello, Concepts of Cleanliness: Changing Attitudes in France since the Middle Ages, trans. Jean Birrell (Cambridge: Cambridge University Press and Editions de la Maison des Sciences de l’Homme, 1988); Richard L. Bushman and Claudia L. Bushman, “The Early History of Cleanliness in America,” Journal of American History, vol. 74 (Mar. 1988), 1213–38; Richard L. Bushman, The Refinement of America: Persons, Houses, Cities (New York: Knopf, 1992); Dana C. Elder, “A Rhetoric of Etiquette for the ‘True Man’ of the Gilded Age,” Rhetoric Review, vol. 21, no. 2 (2002), 155, 159.

6. Sa dili paggamit ni Joseph Smith sa tabako, tan-awa sa Brigham Young, Discourse, Feb. 8, 1868, Papers of George D. Watt, transcribed by LaJean Purcell Carruth, Church History Library, Salt Lake City.

7. Brigham Young, Discourse, Feb. 8, 1868. Ang gimantala nga bersyon miusab sa pinulongan aron makita ang reklamo kaysa sa kabalaka: “ang reklamo sa iyang asawa nga manglimpyo sa hugaw kaayo nga salog” (“Remarks,” 2).

8. Tan-awa sa “Revelation, 27 February 1833 [D&C 89],” sa Sidney Gilbert, Notebook, 113, josephsmithpapers.org; ang panuldok gihimong standard; tan-awa usab sa Doktrina ug mga Pakigsaad 89:8.

9. Frances Trollope, Domestic Manners of the Americans, 2 vols. (London, 1832), 2:101. Pagka 1800, ang tabako nailhan nga makaayo og taas nga lista sa mga sakit: sakit sa tiyan, mga pinaakan sa bitin, scurvy, almoranas, “pagkabuang,” ug daghan pang mga sakit. Apan ang pagkatap sa kalamboan sa middle-class sa unang mga dekada sa ika-19 nga siglo nakapahimo sa daghang katawhan nga mosaway sa paggamit sa tabako. Ang tabako nga nailhan nga ang “hugaw nga sagbot,” ug ang mga pulong sama sa “makapungot” ug “makahasol” nagkadugang nga nahimong kabahin niini. Tan-awa sa Lester E. Bush Jr., “The Word of Wisdom in Early Nineteenth-Century Perspective,” Dialogue, vol. 14 (Fall 1981), 56; “For the Evening Post,” New York Evening Post, June 27, 1829, [2].

10. Tan-awa sa W. J. Rorabaugh, The Alcoholic Republic: An American Tradition (New York: Oxford University Press, 1979), 25–57; W. J. Rorabaugh, “Alcohol in America,” OAH Magazine of History, vol. 6 (Fall 1991), 17–19; Peter C. Mancall, “‘The Art of Getting Drunk’ in Colonial Massachusetts,” Reviews in American History, vol. 24 (Sept. 1996), 383.

11. Tan-awa sa Gordon Wood, Empire of Liberty: A History of the Early Republic, 1789–1815 (New York: Oxford University Press, 2009), 339; Joseph F. Kett, “Temperance and Intemperance as Historical Problems,” Journal of American History, vol. 67 (Mar. 1981), 881; Rorabaugh, “Alcohol in America,” 17.

12. Tan-awa sa Mark Edward Lender and James Kirby Martin, Drinking in America: A History, rev. and exp. ed. (New York: Free Press, 1987), 35.

13. Tan-awa sa Ian R. Tyrrell, Sobering Up: From Temperance to Prohibition in Antebellum America, 1800–1860 (Westport, Connecticut: Greenwood Press, 1979); James R. Rohrer, “The Origins of the Temperance Movement: A Reinterpretation,” Journal of American Studies, vol. 24 (Aug. 1990), 230–31; Lyman Beecher, Six Sermons on the Nature, Occasions, Signs, Evils, and Remedy of Intemperance (New York: American Tract Society, 1827), 194; Daniel Walker Howe, What Hath God Wrought: The Transformation of America, 1815–1848 (New York: Oxford University Press, 2007), 166–68. Ang American Temperance Society misagop sa usa ka pormal nga panumpa sa pagpugong gikan sa tanang ilimnong alkohol niadtong 1831. Tan-awa sa Robert H. Abzug, Cosmos Crumbling: American Reform and Religious Imagination (New York: Oxford University Press, 1994), 98.

14. Tan-awa sa Christopher G. Crary, Pioneer and Personal Reminiscences (Marshalltown, Iowa: Marshall Printing, 1893), 25. Utangan ako ni Andy Hedges sa pagpahibalo nako niini nga tinubdan.

15. Tan-awa sa “Revelation, 27 February 1833 [D&P 89],” sa Sidney Gilbert, Notebook, 113; tan-awa usab sa Doktrina ug mga Pakigsaad 89:5. Ang termino nga “isog ng ilimnon” usa ka hugpong sa pulong sa biblia nga gigamit ngadto sa bino, apan ang mga tigreporma sa pagpugong mihatag og termino nga mas dako og kahulogan nga naglakip sa maayo nga pagkaitos. Tan-awa sa Addison Parker, Address Delivered before the Southbridge Temperance Society, on the Evening of Dec. 1, 1830 (Southbridge: Josiah Snow, 1830), 7–8; Fifth Report of the American Temperance Society, Presented at the Meeting in Boston, May 1832 (Boston: Aaron Russell, 1832), 47, 95, 112.

16. Doktrina ug mga Pakigsaad 89:6; tan-awa usab sa “Revelation, 27 February 1833 [D&P 89],” sa Sidney Gilbert, Notebook, 113.

17. Kasarangan nga paggamit kaysa pag-undang ang gigamit sa hapit tanan nga mga “ayaw” sa Pulong sa Kaalam hangtod sa sayong bahin sa ika-20 nga siglo. Ang opisyal nga pagsunod sa Pulong sa Kaalam giistrikto ug gipormal sa Simbahan, tan-awa sa Thomas G. Alexander, Mormonism in Transition: A History of the Latter-day Saints, 1890–1930 (Urbana: University of Illinois Press, 1986), 258–71; Paul H. Peterson and Ronald W. Walker, “Brigham Young’s Word of Wisdom Legacy,” BYU Studies, vol. 42, nos. 3–4 (2003), 29–64.

18. Rorabaugh, Alcoholic Republic, 99–100.

19. Tan-awa sa Bush, “The Word of Wisdom in Early Nineteenth-Century Perspective,” 52.

20. Tan-awa sa Paul H. Peterson, “An Historical Analysis of the Word of Wisdom” (master’s thesis, Brigham Young University, 1972), 32–33; “The Word of Wisdom,” Times and Seasons, vol. 3 (June 1, 1842), 800.

21. Tan-awa sa “Revelation, 27 February 1833 [D&P 89],” sa Sidney Gilbert, Notebook, 113; “City Marshall’s Department,” City Gazette and Commercial [Charleston, South Carolina], Apr. 18, 1823, 3; “Gaming,” Berks and Schuylkill Journal (Reading, Pennsylvania), Jan. 8, 1825, 3.

22. “Revelation, 27 February 1833 [D&P 89],” sa Sidney Gilbert, Notebook, 114; tan-awa usab sa “Revelation, 7 May 1831 [D&P 49],” sa Revelation Book 1, 81, josephsmithpapers.org.

23. “Revelation, 27 February 1833 [D&C 89],” sa Sidney Gilbert, Notebook, 113.

24. Sa mga pulong sa usa sa eksperto, ang alkohol “makapalibog sa ilang mga pagbati, makapabanhod sa ilang moral nga mga pamalatian, makapahuyang sa abilidad sa paghilis, ug sa ingon makahatag og sakit sa tiyan, gawas niana walay laing lisod ayohon nga sakit nga lisod motakboy sa tawo” (“On Drunkenness,” Connecticut Herald, Feb. 21, 1826, 1). Alang sa ubang mga argumento, tan-awa sa “Twenty Dollars Reward,” Daily National Intelligencer, Sept. 23, 1823, 4; “Rev. Isaac McCoy,” New Hampshire Repository, vol. 6 (May 3, 1824), 70; “From the Times and Advertiser,” Times and Hartford Advertiser, Jan. 3, 1826, 4.

25. Dili ipasabot nga ang tanang sugyot sa kahimsog nianang panahona nagsalig sa maayong pagkahashas nga argumento. Tan-awa, pananglitan, ang Samuel Underhill’s propositions in Mark Lyman Staker, Hearken, O Ye People: The Historical Setting for Joseph Smith’s Ohio Revelations (Salt Lake City: Greg Kofford Books, 2009), 110. Alang sa ubang mga paagi nga ang Pulong sa Kaalam tingali nasukwahi sa giila nga kaalam, tan-awa sa Steven C. Harper, Making Sense of the Doctrine and Covenants: A Guided Tour through Modern Revelations (Salt Lake City: Deseret Book, 2008), 332–33. Sa ika-20 nga siglo, ang pipila ka mga Santos sa Ulahing mga Adlaw naningkamot sa paglain sa makadaot nga mga kemikal sa mga butang nga gidili sa Pulong sa Kaalam, apan ang mao nga pag-analisar wala gayod dawata isip doktrina sa Simbahan ug milapas sa rason sa pagpadayag mismo. Tan-awa sa John A. Widtsoe and Leah D. Widtsoe, The Word of Wisdom: A Modern Interpretation (Salt Lake City: Deseret Book, 1950).

26. “Revelation, 27 February 1833 [D&C 89],” in Sidney Gilbert, Notebook, 114–15.

27. Tan-awa sa Harper, Making Sense of the Doctrine and Covenants, 328.

28. Pagka 1840, ang kasagaran nga konsumo sa matag tawo sa Amerika miubos ngadto sa mga tulo ka galon, ang labing dako nga pagkunhod nga nahitabo sa napulo ka tuig nga gidugayon. Tan-awa sa Lender and Martin, Drinking in America, 71–72; Tyrrell, Sobering Up, 225–51.

29. Zebedee Coltrin reminiscence, in Salt Lake School of the Prophets, Minutes, Oct. 3 1883, Church History Library, Salt Lake City.