Far West ug Adam-ondi-Ahman

Jacob W. Olmstead

paghulagway sa Adam-ondi-Ahman, ni Alfred Lambourne

Atol sa hinapos nga mga bulan sa 1837, ang apostasiya nagsugod sa pag-apekto sa Simbahan sa Kirtland, Ohio. Daghang mga Santos sa Ulahing mga Adlaw ang nasagmuyo tungod sa bug-at nga pagkaalkanse isip resulta sa pagkahugno sa Kirtland Safety Society ug misugod sa pagsalikway sa temporal ug espiritual nga pagpangulo sa Propeta. Lakip sa mga masupilon mao ang pipila ka mga sakop sa Korum sa Napulog Duha ka Apostoles ug mga Seventy, ingon man ang Tulo ka mga Saksi sa mga palid sa Basahon ni Mormon. Niadtong Enero 1838, isip resulta bahin niining pagkatap sa apostasiya ug mga hulga sa pagkabiyolente, si Joseph Smith ug Sidney Rigdon midawat og balaan nga instruksiyon sa pagbiya sa ilang buluhaton sa Kirtland ug sa pagkagiw ngadto sa Far West, Missouri. Bisan og ang pagpadayag nagpahibalo sa buluhaton ni Joseph nga “nahuman na niining dapita,” ang pagbiya sa Kirtland nagpasabot nga dili lamang sa ilang mga panimalay, apan gikan sa kinadak-ang stake sa Simbahan ug sa una ug bugtong nga templo niini. Bisan pa man, si Joseph ug Sidney giawhag nga “molihok ug moadto sa usa ka yuta diin nag-agas ang gatas ug dugos.”

Samtang sila nagsingabot sa Far West human sa “layo & makuti nga bihaye,” si Joseph ug Sidney gihimamat sa mga Santos sa Missouri “sa bukas nga mga bukton ug mainiton nga mga kasingkasing midawat kanamo ngadto sa dughan sa ilang katilingban .” Apan ang mga balita sa mga panagbangi mismo sa mga sakop nga naghulga sa Simbahan didto sa Far West dali kaayong mipakunhod sa kadasig sa malipayong panagtigom. Upat ka adlaw sa wala pa ang Marso 14 nga pag-abot sa Propeta, ang konseho sa stake sa Far West mipahimulag sa dili mahinulsulon nga sila si William W. Phelps ug John Whitmer, mga magtatambag sa kapangulohan sa stake sa Missouri. Ang duha giakusahan sa pagpaginansiya gikan sa pagkahalin sa yuta nga gituyo alang sa pagpundok sa mga Santos ngadto sa Far West ug usab tungod sa ilang kalabotan sa pagbaligya sa maong kapangulohan sa kabtangan didto sa Lalawigan sa Jackson nga supak sa kanhing pagpadayag. Ang halangdong konseho wala mohimo og aksiyon batok ni David Whitmer, presidente sa kapangulohan sa stake sa Missouri, o kaabag ni presidente Oliver Cowdery sa dugang pang kaso. Hinuon, mihulat sila hangtod sa pag-abot ni Joseph aron atubangon kining dili makalipay nga gimbuhaton. Sila si Whitmer ug Cowdery gi-excommunicate sa sayong bahin sa Abril 1838.

Pagkaplag og usa ka Dapit alang sa mga Santos sa Kirtland

Ang Far West milambo nga nahimong nag-unang puloy-anan sa mga Santos sa Ulahing mga Adlaw sa Missouri human sa pagbakwit sa mga Santos gikan sa mga County sa Clay ug Ray sugod sa tunga-tungang bahin sa 1836. Nianang higayona sa pag-abot ni Joseph niadtong 1838, ang Far West adunay populasyon nga 4,900 nga may “150 ka panimalay, upat ka tindahan sa mga kinahanglanon, tulo ka tindahan sa pagkaon ug mga gamit sa balay, pipila ka pandayan, duha ka hotel, usa ka printahanan, ug usa ka dakong balay nga eskwelahan nga gidoble ang gamit isip simbahan ug balay hukmanan.” Ang pagpangita og barato nga yutang kapuy-an alang sa gipaabot nga pag-abot sa dakong pagdagsang sa nagkalisod nga mga Santos sa Kirtland ngadto sa Missouri nahimong usa ka dinalian nga prayoridad. Pagka-Abril 26, 1838, usa ka pagpadayag—nga karon ang Doktrina ug mga Pakigsaad 115—naghatag og direksiyon ngadto sa Unang Kapangulohan, bishopric, ug sa halangdong konseho didto sa Far West. Agig dugang sa pag-awhag sa padayon nga pag-ugmad sa Far West ug ang pagtukod sa usa ka templo didto, ang pagpadayag nagsugo “nga ang ubang mga dapit kinahanglan itagana alang sa mga stake diha sa mga rehiyon sa palibot ingon nga kini ipakita ngadto sa akong Sulugoong si Joseph sa matag karon ug unya.”

Ang pagkaanaa sa dili mahalon nga yuta nakagiya sa mga lider sa Simbahan samtang nangita sila niining “laing mga dapit” sa paghimo og bag-ong mga stake diha sa rehiyon. Bisan tuod daghang bahin sa Lalawigan sa Caldwell ang nagpabilin nga wala mahusay, ang yuta gi-survey, nga nakapahimo niini nga dili na mapaubos sa balaod sa katungod sa pagpanag-iya. Kini nga mga balaod mitugot sa mga lumulupyo aron maangkon ug mapalambo ang wala masurvey nga kayutaan nga walay pasiunang bayad. Ubos sa aksiyon sa katunogd sa pagpanag-iya, kadtong walay kapanguhaan makatrabaho sa kayutaan alang sa ginansya ug dayon mahimong mahatagan sa unang mga katungod sa pagpalit sa yuta human nga kini ma-survey ug ibaligya gikan sa federal nga pangagamhanan. Ang bag-ong gihimo ug wala pa ma-survey nga Lalawigan sa Daviess, nahimutang duol gayod sa amihanan sa Lalawigan sa Caldwell, nakapadani sa mga lider sa Simbahan isip usa ka potensiyal nga pundokanan alang sa nagkalisod nga mga Santos sa amihanang Missouri.

Pagka-Mayo 18, 1838, gipangulohan ni Joseph Smith ang usa ka grupo sa mga lider sa Simbahan lakip nilang Sidney Rigdon, Thomas B. Marsh, ug David W. Patten (tanan sa Korum sa Napulog Duha ka Apostoles), Bishop Edward Partridge, ug sa uban pa ngadto sa “amihanang mga nasod alang sa katuyoan sa Pagpasiugda sa mga stake sa Zion, sa paghimo og mga Lokasyon ug pagpasiugda sa pag-angkon alang sa pagpundok sa mga Santos alang sa benepisyo sa kabos, ug alang sa pagtukod sa Simbahan sa Dios.” Ang panon mibiyahe paamihanan ngadto sa Lalawigan sa Daviess sulod sa pipila ka adlaw ngadto sa rehiyon sa Grand River, nga gihulagway sa klerk ni Joseph Smith nga si George W. Robinson isip “dako[,] matahom[,] lawom.” Atol sa ilang ekspedisyon, ang pundok nakakaplag og yuta nga adunay “daghang” ihalas nga mga hayop, “Usa, Pabo, mga Himongaan, Elk, ug uban pa.” ug kapatagan nga nalibon sa sagbot. Ang yuta tinuod nga “nagapaagay sa gatas ug dugos.”

Ang Dapit Diin si Adan Moabot

Samtang ang natural nga kaabunda sa yuta sa Lalawigan sa Daviess nagsangkap alang sa temporal nga mga panginahanglan sa nagpundok nga mga Santos, ang pagpadayag nagsugo usab sa mga Santos sa pagbutang og dakong espirituhanon nga kahulogan. Samtang sila si Joseph, Sidney, ug George W. Robinson nangita alang sa lokasyon sa pagtakda og usa ka puloy-anan sa kumunidad duol sa Grand River, miabot sila ngadto sa usa ka ilado nga bungtod nga gitawag og Spring Hill. Niining biyahe, si Joseph nakadawat sa pagpadayag nga nailhan karon isip Doktrina ug mga Pakigsaad 116, nga nag-ila sa rehiyon isip ang Adam-ondi-Ahman, “kay miingon siya, kini mao ang dapit diin si Adan moduaw sa iyang mga katawhan, o ang sa Karaan nga mga Adlaw mahimutang, sama sa gipamulong ni Daniel ang Propeta.”

Ang mga Santos nakahibalo sa Adam-ondi-Ahman gikan sa kanhi nga mga pagpadayag ngadto ni Joseph Smith, nga namantala pipila ka tuig ang milabay sa wala pa sa 1835 nga edisyon sa Doktrina ug mga Pakigsaad. Diha sa mao na karon ang Doktrina ug mga Pakigsaad 107, ang Ginoo mipasabot nga atol sa kataposang mga tuig ni Adan, siya mitawag sa iyang matarong nga kaliwatan ngadto sa “walog sa Adam-ondi-Ahman,” diin siya “mihatag kanila sa iyang mahangtoron nga panalangin.” Ang pagpadayag padayon nga mipasabot nga ang Ginoo “mipakita ngadto kanila” ug nangalagad og kahupay ngadto ni Adan.” Ingon nga “puno sa Espiritu Santo,” si Adan nanagna mahitungod sa iyang kaliwatan “ngadto sa pinakaulahing henerasyon.” Agig dugang ngadto sa mga pakisayran diha sa Doktrina ug mga Pakigsaad, ang hugpong sa mga pulong nahimong usa ka regular nga bahin sa tulumanon sa pagsimba sa mga Santos sa Ulahing mga Adlaw pinaagi sa usa ka himno nga gihimo ni William W. Phelps nga giulohan og “Adam-ondi-Ahman.” Kini nga himno nalakip sa naunang mga himno sa mga Santos sa Ulahing mga Adlaw, nga gihan-ay ni Emma Smith ug gimantala sa nahaunang mga bulan sa 1836, ug gikanta kini nga himno sa mga Santos atol sa pagpahinungod sa Kirtland Temple.

Ang bag-ong pagpadayag kalabot sa Adam-ondi-Ahman nagsugyot og usa ka makahuloganon nga katungdanan ni Adan sa mga panghitabo sa dili pa ang Ikaduha nga Pag-anhi sa Ginoo. Naghatag og detalyeng katin-awan sa panan-awon ni Daniel sa Karaan nga mga Panahon (tan-awa sa Daniel 7:9, 13–14), sa kadugayan si Joseph Smith mipasabot nga “Ang tanan nga nakabaton sa mga Yawe kinahanglan gayod nga mobarog sa iyang [Adan] atubangan niining dakong Konseho. … Ang Anak sa Tawo [Kristo] Nagbarog sa iyang atubangan & didto gihatag kaniya ang himaya & kamandoan.—Gitugyan ni Adan ang iyang pagkatinugyanan ngadto kang Kristo, nga gihatag kaniya ingon nga naghupot sa mga Yawe sa Uniberso, apan nagpabilin ang iyang baroganan isip pangulo sa tawhanong pamilya. .”

Pagpundok ngadto sa Adam-Ondi-Ahman

Pinaagi sa pagpakita sa lokasyon sa Adam-ondi-Ahman ngadto ni Joseph Smith, ang Ginoo mipuno sa yuta sa Lalawigan sa Daviess sa espirituhanong kasaysayan ingon man sa usa ka espirituhanong kaugmaon. Sa panahon nga ang kalamboan sa gingharian sa Dios dinhi sa yuta maingon nga nag-ungaw sa pagkahugno isip resulta sa apostasiya ug pagbakwit, kini nga pagpadayag nagpahinumdom ni Joseph ug sa mga Santos sa ilang luna diha sa naglambo nga sagradong kasaysayan. Ang mga lider sa Simbahan wala mag-inusarang nagtrabaho sa pagtukod og usa ka dapit alang sa mga bakwit nga mga Santos sa Kirtland ug sa uban nga nagtinguha sa pagpundok, apan sila usab naapil sa pagpundok sa mga matarong ngadto sa lokasyon diin si Adan sa usa ka adlaw motugyan sa iyang pagkatinugyanan ngadto sa Ginoo sa dili pa ang Ikaduhang Pag-anhi.

Sa pagbalik ni Joseph ngadto sa Far West niadtong Mayo 21, 1838, mipahigayon dayon siya og usa ka konseho “sa pagkonsulta sa mga kaigsoonan kabahin sa hilisgotan sa among panaw aron makahibalo kon maalamon ba ang pag-adto dayon sa amihanang nasod … aron sa pagseguro sa yuta sa grand river.” Human ang mga kaigsoonan mipahayag sa ilang mga gibati kabahin sa hilisgotan, “ang pangutana gisukna ni Presidente Smith ug nagkahiusa nga gipaboran ang pagseguro sa yuta diha sa sapa taliwala niining dapita ug sa Far West.” Paglabay sa lima ka semana, niadtong Hunyo 28, 1838, pinaagi ni Joseph Smith nga mibarog isip tsirman, ang Adam-ondi-Ahman nga stake sa Zion naorganisar uban ni John Smith nga gitawag isip presidente. Ang ikaduhang magtatambag ni John Smith ug usa sa unang mga Santos sa Ulahing mga Adlaw nga lumulupyo sa Lalawigan sa Daviess, si Lyman Wight, misulat: “Kini nga matahom nga nasod nga adunay dalaygon nga talan-awon nakapadani sa daghang mga lalin. Dili moubos sa traynta ang akong bisita ug mga dumuduong sa tibuok adlaw atol sa tulo ka buwan nga ting-init.” Pagka-Oktubre, si Wight mirekord nga “nag-umento sa duha ka gatos ka mga balay” ang natukod sa Adam-ondi-Ahman nga adunay “kwarenta ka pamilya nga nagpuyo sa ilang mga karomata.”

“Ang Mas Importanteng mga Butang”

Bisan pa sa pagkatukod niining bag-ong stake sa Zion ug sa tawag nga manimuyo sa amihanang bahin sa Missouri, ang uban naglisod sa pagbiya sa ilang mga panimalay sa Kirtland. Sa kataposan, atol sa mga bulan nga ting-init sa 1838, kadaghanan sa maunongon nga mga Santos nga nagpabilin didto sa Kirtland misugod sa paggikan padulong sa Missouri. Klaro nga wala sa pundok sa nagsingabot nga mga Santos mao sila si William Marks ug Newel K. Whitney, usa ka bishop sa Kirtland ug adunahan nga negosyante. Ang duha mibalibad sa pagpundok uban sa kadaghanan sa Simbahan didto sa Missouri aron sa pagpahimutang sa ilang kalihokan sa negosyo didto sa Kirtland. Nanglimbasog ang duha sa pagbiya sa temporal nga seguridad sa ilang mga negosyo ug kabtangan nga gihatag.

Niadtong Hulyo 8, 1838, nadawat ni Joseph Smith ang pagpadayag nga (karon ang Doktrina ug mga Pakigsaad 117) gidirekta ngadto ni Marks ug Whitney nagsugo kanila nga “mogula, ug dili maglangay-langay.” Ang pagpadayag mitawag ni Marks nga “magdumala diha sa taliwala sa akong mga katawhan sa dakbayan sa Far West,” lagmit isip ang bag-o nga presidente sa kapangulohan sa stake sa Missouri. Mahitungod kang Whitney, ang pagpadayag nagsugo kaniya “sa pag-adto sa yuta sa Adam-ondi-Ahman, ug mamahimong usa ka bishop ngadto sa akong katawhan.” Gamit ang paghulagway sa karaang yutang natawhan ni Adan ug sa walay kinutoban nga mga panalangin nga gisaad sa kaliwatan ni Adan, ang pagpadayag nangutana: “Wala bay igo nga lawak diha sa mga bukid sa Adan-ondi-Ahman, ug sa mga patag sa Olaha Shinehah, o sa yuta diin si Adan nagpuyo, nga diin ikaw kinahanglan nga … maibog niana nga usa lamang ka gamay nga butang, ug ibaliwala ang labaw nga mahinungdanon nga mga butang?” Si Oliver Granger gitudlo sa paghusay sa tanang mga account sa Simbahan sa Kirtland, ug mihatag siya og sulat ngadto ni Marks ug Whitney nga naglangkob sa pagpadayag. Diha sa sulat, ang Unang Kapangulohan mipahayag og kamasaligon sa kaandam sa duha sa pagtuman sa pagpadayag ug sa “paglihok sumala niana.” Nagmasulondon ngadto sa instruksiyon, silang duha si Marks ug Whitney mibiya sa ilang mga kabtangan sa Kirtland. Sa kataposan miapil sila sa nag-unang pundok sa mga Santos aron motambong ngadto sa “mas importanteng mga butang” sa pagpangalagad sa mga panginahanglan sa mga Santos.

Panapos nga Pamulong

Sa tibuok ting-init sa 1838, ang mga Santos mipadayon sa pagpundok ngadto sa FarWest, sa Adam-ondi-Ahman, ug sa ubang bag-ong mga pinuy-anan sa mga Santos sa Ulahing mga Adlaw sa amihanan nga Missouri. Sumala sa sugo sa pagtukod sa Far West, niadtong Hulyo 4, 1838, ang mga bato sa pamag-ang gipahiluna alang sa usa ka templo niana nga komunidad. Sa wala madugay may dapit usab nga napilian alang sa usa ka templo sa Adam-ondi-Ahman. Hinuon, ang kalinaw ug kaabunda nga gitagamtam sa mga Santos sa amihanang Misssouri wala molungtad og dugay. Ang nagkadako nga kawalay pagsalig ug katahap tali sa mga taga-Missouri ug mga Santos sa Ulahing mga Adlaw kusog nga miulbo niadtong Agosto 1838. Usa ka serye sa armadong kasungian nga nailhan isip ang Missouri-Mormon War nga misangpot sa pagkabilanggo ni Joseph Smith ug sa pagpapahawa sa mga Santos sa Ulahing mga Adlaw gikan sa Missouri. Human sa pagpapahawa sa mga Santos gikan sa ilang estado, ang mga Missourihanon dali nga mibalhin dayon aron makaangkon sa kayutaan ug mga kalamboan. Bisan tuod sila magpadayon aron sa pag-establisar og laing komunidad sa pakigsaad ug magtukod og usa ka matahom nga templo sa Nauvoo, ang mga Santos padayon nga naglaom nga usa ka adlaw makabalik sila aron sa pagbawi niining sagrado nga mga yuta sa Missouri sa dili pa ang Ikaduhang Pag-anhi.