Ang Basahon ni John Whitmer

Brian Reeves

Natawo si John Whitmer sa Pennsylvania niadtong 1802. Ang iyang pamilya wala madugay namalhin ngadto sa New York, sa kataposan mipuyo “kuyog sa ubang German nga mga pamilya duol sa Fayette,” usa ka lungsod nga gamay ra og populasyon mga 48 kilometros sa habagatang silangan sa Palmyra. Pinaagi sa pagkahigala sa iyang pamilya kang Oliver Cowdery, si John Whitmer nahibalo mahitungod kang Joseph Smith ug sa iyang nag-uswag nga paghubad sa usa ka karaan rekord sa kasulatan, ang Basahon ni Mormon.

Ang mga Whitmer nainteresado kaayo sa buhat ni Joseph, ug niadtong Hunyo 1829 gihimo ang mga pakigsabot alang sa batan-on nga propeta ug sa iyang eskriba nga si Oliver Cowdery nga mopuyo sa panimalay sa mga Whitmer samtang gitiwas nila ang paghubad. Ang igsoon nga lalaki ni John nga si David mibiyahe ngadto sa Harmony Pennsylvania, aron tabangan si Joseph ug Oliver sa pagbalhin ngadto sa panimalay sa mga Whitmer sa Fayette, New York. Si David mitanyag usab “sa tabang sa usa sa iyang igsoon nga mga lalaki,” si John, isip usa ka eskriba. Si Joseph midawat ug mipuyo uban sa mga Whitmer “hangtod nahuman ang paghubad.” Sama sa gisaad, si John mitabang “og daghan kaayo pinaagi sa pagsulat sa nahibilin nga buluhaton.”

Wala madugay human miabot si Joseph sa Fayette, ang 26 anyos nga si John Whitmer nabunyagan didto sa Seneca Lake. Nahimo siyang usa sa Walo ka mga Saksi, kinsa nakakita sa mga palid sa Basahon ni Mormon, ug siya sa wala madugay mipahayag, “Nakahikap ako niadto nga mga palid; adunay pino nga mga kinulit sa isig ka kilid.”

Sa dihang ang Simbahan naorganisar didto sa panimalay sa mga Whitmer niadtong Abril 6, 1830, ang Ginoo misugo kang Joseph Smith, “Adunay Talaan nga tipigan diha kaninyo.” Aron sa pagtuman niini nga sugo, gipili si Oliver Cowdery nga maoy unang magsusulat sa kasaysayan sa Simbahan.

Ang mga pagpadayag ni Joseph mihulma og mahinungdanon nga bahin sa makasaysayan nga rekord. Si John Whitmer misulat nga atol sa unang mga adlaw sa Simbahan, “ang Ginoo mipanalangin og maayo sa iyang mga disipulo, ug mihatag siya og Pagpadayag human sa usa ka Pagpadayag, nga naglangkob og doktrina, mga instruksiyon, ug mga panagna.” Niadtong Hulyo 1830, ang Propeta “misugod sa paghan-ay ug pagkopya sa mga pagpadayag nga iyang nadawat hangtod niadtong tungora,” uban ni Whitmer nga naglihok isip eskriba.

Si John Whitmer isip Magsusulat sa Kasaysayan ug Tig-rekord

Sa tinglarag sa 1830, si Oliver Cowdery misugod og usa ka misyon ngadto sa mga Lamanita. Puli sa iyang dapit, si John Whitmer gipili “pinaagi sa tingog sa mga Elder sa pagtipig sa rekord sa Simbahan,” misulat si Whitmer. “Si Joseph Smith Jr. misulti kanako nga kinahanglan usab nga ikaw ang motipig sa kasaysayan sa Simbahan.”

Komportable ra si Whitmer nga maoy tigsulat sa mga pagpadayag ni Joseph Smith apan nagduhaduha sa pagdawat sa dili pamilyar nga tahas sa magsusulat sa kasaysayan. Giingnan niya si Joseph, “Mas palabihon unta nako ang dili pagbuhat niini,” apan miuyon siya nga dawaton ang buluhaton kon pagbuot sa Ginoo—nga niini nga kahimtang, padayong miingon si Whitmer, “Gitinguha nako nga siya mopakita niini pinaagi kang Joseph ang Manalagna.”

Sa miresulta nga pagpadayag (karon ang Doktrina ug mga Pakigsaad 47), gipetsahan og Marso 8, 1831, ang Ginoo mimatuod sa duha ka buluhaton ni Whitmer nga “magsulat & magtipig sa kanunay og kasaysayan, & sa pagtabang sa akong sulugoon nga si Joseph, sa Pagsulat sa tanan nga butang nga ihatag kaniya.” Mitubag bahin sa kakulang sa pagsalig ni Whitmer mahitungod sa iyang mga kahanas sa pagsulat, ang Ginoo misaad, “Ihatag diha kanimo pinaagi sa Maghuhupay ang pagsulat niini nga mga butang.” Tulo ka bulan ang milabay, gisugdan ni Whitmer ang iyang kasaysayan, “Ang Basahon ni John Whitmer.”

Pipila ka bulan human niana, ang mga lider sa Simbahan mihimo og mga lakang aron mamantala ang mga pagpadayag ni Joseph Smith, usa ka libro sa mga himno, usa ka mantalaan sa Simbahan, ug ubang mga sinulat. Usa ka Nobiyembre 1831 nga pagpadayag (karon mao ang Doktrina ug mga Pakigsaad 69) nagsugo kang Oliver Cowdery ug John Whitmer sa pagdala sa mga manuskrito sa mga pagpadayag ngadto sa Independence, Missouri, aron ipamantala kini sa dapit diin gitukod ni W. W. Phelps ang imprintahan. Ang pagpadayag midugang pa sa pagsugo nga ang mga misyonaryo nga “anaa sa tibuok Kalibotan kinahanglang mopadala sa ilang mga asoy ngadto sa Yuta sa Zion” ug midugang sa mga katungdanan ni Whitmer isip magsusulat sa kasaysayan sa Simbahan, nga nagsulti kaniya sa “pagbiyahe og kadaghan gikan sa usa ka dapit ngadto sa laing dapit ug gikan sa usa ka Simbahan ngadto sa laing Simbahan aron mas dali ra siyang makaangkon og kahibalo sa Pagsangyaw ug pagpatin-aw, pagkopya ug pagpili ug pag-angkon sa tanang butang nga mahimong kaayohan sa Simbahan ug alang sa nagtubo nga mga henerasyon nga motubo diha sa Yuta sa Zion.”

Niadtong Hulyo 1832, si Joseph Smith miawhag ni Whitmer sa “paghinumdom sa gisugo kaniya nga magtipig og kasaysayan sa simbahan & sa pagpundok niini.” Sa ulahing bahin nianang tuiga, ang Propeta nakadawat og laing pagpadayag nga mipalapad sa tahas ni John Whitmer nga tighimo sa kasaysayan: “Katungdanan sa klerk sa Ginoo, nga iyang gipili sa pagtipig og usa ka kasaysayan, ug usa ka kinatibuk-an nga talaan sa mga butang sa simbahan nga nahitabo sa Zion … ug usab [sa] paagi sa kinabuhi, ilang hugot nga pagtuo, ug mga buluhaton; ug usab sa mga mibiya sa tinuohan.”

Sa ingon niana si Whitmer mitipig sa iyang rekord sa bag-o pa nga Simbahan sulod sa panahon sa iyang pagkamiyembro nga natapos niadtong 1838. Sumala sa usa ka grupo sa mga magsusulat sa kasaysayan, ang kasaysayan nga gihimo ni John Whitmer “naghatag og katin-awan sa daghang importante nga mga kabalaka sa nag-unang simbahan, lakip sa mga problema sa kabtangan, disiplina sa simbahan,” sa Bag-ong Jerusalem, “sa pagtratar sa mga masupakon, ug sa pag-establisar sa usa ka kagamhanan sa pagpangulo sa pagkapari. … Ang buhat ni Whitmer mahinungdanon labi na sa mga pagpadayag, mga petisyon, ug mga sulat nga nagporma sa usa ka dako nga bahin sa iyang kasaysayan.”

Unsa ang Nahitabo kang John Whitmer ug sa Iyang Kasaysayan?

Niadtong 1834, si Joseph Smith mipili og usa ka kapangulohan alang sa Simbahan sa Missouri, nga si John Whitmer ug W. W. Phelps ang nagserbisyo isip mga magtatambag ni David Whitmer. Si John Whitmer ug Phelps sa wala madugay giakusahan og pinansyal nga salaod nga may kalabotan sa ilang mga posisyon didto ug tungod niini gipahimulag sila gikan sa Simbahan niadtong Marso 1838.

Si Whitmer misulat sa iyang kasaysayan: “Ang pipila ka temporal nga mga kalihokan, wala kaayo makatagbaw sa unsay gusto nga mahitabo sa tanang partido, nga tanang mga partido mitapos usab sa pagpapahawa sa [daghang] miyembro, lakip ni W. W. Phelps ug kanako.

“Busa akong taposon ang kasaysayan sa simbahan sa mga Santos sa Ulahing mga Adlaw, Naglaom nga ako mapasaylo sa akong mga kasaypanan, ug ang akong mga sala mapapas ug sa kataposang adlaw maluwas diha sa gingharian sa Dios bisan pa man sa akong kasamtangang sitwasyon.”

Si Joseph Smith miabot sa Far West pipila lang ka adlaw human sa mga pagpahimulag. Ang bag-ong gipili nga klerk mitawag kang Whitmer aron makuha ang iyang sinulat nga kasaysayan, apan si Whitmer midumili sa pagtugyan sa dokumento. Temporaryo siyang mibiya sa Far West atol sa kasungian didto sa Missouri niadtong 1838–39, apan mibalik siya sa wala madugay ug mipuyo didto alang sa nahibilin sa iyang kinabuhi.

Human sa kamatayon ni John Whitmer niadtong 1878, ang iyang kasaysayan gipasa ngadto sa iyang igsoon nga si David, ug niadtong 1903 ang Reorganized Church of Jesus Christ of Latter Day Saints nakakuha sa kasaysayan gikan sa usa ka kaliwat ni David Whitmer. Sa kataposan, niadtong 1974, Ang Simbahan ni Jesukristo sa mga Santos sa Ulahing mga Adlaw nakakuha og microfilm nga kopya sa manuskrito sa usa ka panagbaylo sa makasaysayanong mga materyal sa RLDS Church. Niadtong 2012, ang istorya ni John Whitmer gimantala isip kabahin sa Joseph Smith Papers nga proyekto.