“Usa ka Misyon ngadto sa mga Lamanita,” Kinatibuk-ang Saysay sa mga Pagpadayag (2016)
“Usa ka Misyon ngadto sa mga Lamanita,” Kinatibuk-ang Saysay sa mga Pagpadayag
Usa ka Misyon ngadto sa mga Lamanita
Diha sa gihatag nga pagpadayag sa wala pa mahuman og hubad ang Basahon ni Mormon, ang Ginoo miingon nga ang mga palid gitipigan “nga ang mga Lamanita adunay mahibaloan mahitungod sa ilang mga Amahan & nga sila mahibalo sa mga saad sa Ginoo nga sila motuo sa Ebanghelyo & mosalig sa makatubos nga gahom ni Jesukristo.” Isip nag-unang tigsulat sa Basahon ni Mormon, si Oliver Cowdery nasayod nga ang basahon gisulat ilabi na “alang sa mga Lamanita,” kinsa “usa ka salin sa binhi ni Israel.” Nan tukma lang, nga pagka-Septiyembre 1830, unom ka bulan human namantala ang Basahon ni Mormon, si Oliver Cowdery mao ang unang tawo nga gimandoan pinaagi sa pagpadayag nga “moadto sa mga Lamanita & mosangyaw sa akong ebanghelyo ngadto kanila.”
Ang ubang nahauna nga mga kinabig mipahayag usab “sa dako nga tinguha” mahitungod “sa mga salin sa binhi ni Joseph—ang mga Lamanita nga nagpuyo sa kasadpan, nasayod nga maanindot kaayo ang mga katuyoan sa Dios niana nga katawhan.” Agi og tubag niana nga mga tinguha, si Joseph Smith nakadawat og laing pagpadayag, diin si Peter Whitmer Jr. gitawag aron mokuyog sa iyang bayaw nga si Oliver Cowdery. Ang Ginoo misugo kaniya nga “[bukha ang] imong ba-ba sa pagpadayag sa akong ebanghelyo” ug “[paminawa ang] mga pulong & tambag sa imong Igsoon” kinsa gihatagan og gahom sa “pagtukod sa akong simbahan taliwala sa mga Lamanita.”
Pagkasunod bulan, Oktubre 1830, si Parley P. Pratt ug si Ziba Peterson gitawag usab sa pag-adto “sa kamingawan taliwala sa mga Lamanita.” Sa pagtabang nila niining mahagiton nga buluhaton, ang Ginoo misaad nga Siya “mouban kanila ug maanaa sa ilang taliwala.”
Tungod sa Indian Removal Act nga gipasa niadtong Mayo 1830, ang bag-ong teritoryo alang sa bag-o nga kapuy-an sa mga American Indian mao ang Kansas ug Oklahoma karon. Sa ingon niana, kini nga mga misyonaryo sa mga Lamanita nagplano nga moadto sa kasadpang bahin gikan sa Independence, Missouri, ngadto sa Teritoryo sa mga Indian.
Sa wala pa mobiya alang niini nga misyon, si Oliver Cowdery mipirma og pakigsaad nga magpakabuhi kauban sa Dios ug mobuhat “niining mahimayaon nga buhat sumala sa iyang isugo kanako pinaagi sa Espiritu Santo.” Ang iyang tulo ka kompanyon mipirma usab og pakigsaad nga sila motabang ni Oliver Cowdery “sa matinud-anong paagi niini nga butang.” Sa ilang pagbiya, nagdala sila og daghang kopya sa Basahon ni Mormon aron iapud-apod ngadto sa mga maminaw kanila.
Sa iyang biyograpiya, si Parley P. Pratt misulat nga, samtang didto sa New York, ang upat ka misyonaryo gipabisita sa “usa ka nasod sa Indian [Seneca] o duol sa Buffalo; ug migahin og gamayng bahin sa usa ka adlaw uban nila, nagtudlo kanila mahitungod sa katinuod sa talaan sa ilang mga katigulangan.” Sa paghinumdom, ang labing dako nga epekto sa ilang misyon nahitabo sa tunga-tunga sa ilang mga pagbiyahe. Gisugilon ni Pratt kon giunsa nila sa pagpadayon ang ilang panaw hangtod nga mihunong sila sa Mentor, Ohio, aron bisitahan si Sidney Rigdon, ang “kanhi higala ug magtutudlo, diha sa Reformed Baptists Society” ni Pratt. Ila siyang gihatagan og kopya sa Basahon ni Mormon, diin misaad siya nga basahon, ug dayon mitudlo sa gipahiuli nga ebanghelyo sa daghang panimalay sa dapit. Ang sangpotanan niini mao nga “wala madugay si Mr. Rigdon ug daghan pa … miduol ug among nabunyagan, ug nakadawat sa gasa sa Espiritu Santo pinaagi sa pagpandong sa mga kamot.” Si Pratt misulti kon sa unsang paagi nga “ang mga balita sa pagdiskobre sa Basahon ni Mormon ug sa kahibulongan nga mga panghitabo nga konektado niini” nakamugna og kinatibuk-ang “interes ug kaikag … sa Kirtland, ug sa tanang rehiyon sa palibot. Ang mga tawo nagpunsisok namo gabii ug adlaw, nga niana wala na kami panahon sa pagpahulay ug pagkatulog. Ang mga miting gipahigayon sa lainlaing mga kasilinganan, ug ang panon sa katawhan magpundok ug mohangyo nga kami motambong. … Sa duha o tulo ka semana gikan sa among pag-abot diha sa kasilinganan dala ang balita, nakabunyag kami og usa ka gatos ug baynte siyete ka kalag.” Kauban niadtong ilang gipailaila ngadto sa ebanghelyo mao sila si Isaac Morley, John Murdock, Lyman Wight, ug Edward Partridge.
Kining wala damha nga kalamposan didto sa Kirtland adunay dako kaayo nga mga sangpotanan alang sa kaugmaon sa Simbahan. Ang Kirtland wala madugay nahimong importante nga unang pundokanan nga dapit alang sa mga miyembro sa Simbahan ug sa kaulahian nahimong luna sa unang templo sa Simbahan. Ang grupo sa mga kinabig didto sa Kirtland nakamugna og daghang unang mga lider sa Simbahan. Dayag lang nga ang usa nila, siyempre, si Rigdon mismo, nga sa kaulahian nagserbisyo isip magtatambag ni Joseph Smith. Usa sa bag-ong kinabig gikan sa dapit sa Kirtland, si Frederick G. Williams, mikuyog sa upat ka misyonaryo sa ilang panaw.
Samtang ang una nilang katuyoan mao ang pagsangyaw ngadto sa lumad nga mga tribo, si Cowdery ug iyang mga isigka-misyonaryo mipadayon sa pagtudlo sa uban nga ilang masugatan. Usa niining unang mga pakigtagbo mao ang paghimamat sa komunidad sa mga Shaker didto sa North Union, Ohio. Ang ikaduhang pakigtagbo sa mga Shaker nahitabo didto sa Union Village pipila ka milya sa amihanang bahin sa Cincinnati. Sa matag sitwasyon, ang mga misyonaryo magbilin og mga kopya sa Basahon ni Mormon ngadto sa mga Shaker, bisan kon kini nga pamaagi sa pagkatinuod gamay ra og nahimo nga kalamposan: si Richard McNemar, usa ka residente sa Union Village, mibasa sa usa niana nga mga basahon ug miingon, “Bisan unsa pa man ang kaayohan nga nakuha sa mga Indian gikan niining basahon ni Mormon, segurado kini nga kita walay makuha.”
Ang ilang biyahe sa kaulahian sa Disyembre ug hangtod sa bulan sa Enero lisod kaayo tungod sa unsay gitawag nga “ang tingtugnaw sa lawom nga niyebe.” Si Parley P. Pratt mihulagway kon giunsa sa paghunong sa mga misyonaryo sulod sa pipila ka adlaw didto sa Illinois tungod sa dugay nahuman nga mga pag-unos “nga atol niini nga panahon nag-ulan og niyebe nga hapit tulo ka pye ang gilawmon.” Kay wala man madayon ang orihinal nilang mga plano tungod kay nahimong ice ang tubig sa suba, mipadayon sila sa ilang panaw nga nanagbaktas, nagbiyahe, sama sa gisulat ni Pratt, “sulod sa tulo ka gatos ka milya agi sa halapad nga kapatagan ug agi sa mga hilit nga walay agianan nga napuno sa niyebe—walay dalan nga makita; ang mga balay diyotay ra ug naglagyo; ug ang bugnaw nga hangin sa amihanang kasadpan kanunayng kusog nga mihuros sa among mga nawong nga mura na og malangkat ang panit sa among nawong. … Human sa labihang kakapoy ug mga pag-antos kaming tanan miabot sa Independence, sa lalawigan sa Jackson, sa kinadaplinan sa kasadpang bahin sa mga utlanan sa Missouri, ug sa Estados Unidos.”
Sa dihang ang grupo miabot sa Independence, si Peter Whitmer Jr. ug si Ziba Peterson nagpabilin aron mangita og kwarta samtang sila si Oliver Cowdery, Parley P. Pratt, ug Frederick G. Williams nangadto sa Teritoryo sa mga Indian. Nagsangyaw sila og una ngadto sa mga Shawnee ug dayon sa mga Delaware. Namulong pinaagi sa usa ka tighubad, si Oliver Cowdery mipakigbahin og mahinungdanong mensahe sa Basahon ni Mormon. Kabahin sa iyang mensahe, sama sa girekord ni Parley P. Pratt, mao “ang Ginoo misugo ni Mormon ug ni Moroni, ilang kataposan nga maalamong mga lalaki ug mga propeta, nga tagoan ang Basahon sa ilawon sa yuta, nga kini matipigan nga luwas, ug makaplagan ug mahibaloan sa ulahing adlaw sa mga puti og panagway kinsa nanag-iya sa yuta; nga sila makapahibalo niini pag-usab ngadto sa pula nga tawo; aron mabalik sila ngadto sa kahibalo sa kabubut-on sa Gamhanang Espiritu ug ngadto sa Iyang panalangin.”
Ang mga Delaware Indian madawaton kaayo, ug ang pangulo [chief] mihangyo nga ang mga misyonaryo mobalik inig tingpamulak diin “kamo mobasa ngari namo ug motudlo namo og dugang pa kalabot sa Basahon sa among amahan ug sa kabubut-on sa Gamhanang Espiritu.” Hinuon, tungod sa mando sa federal agent, ang mga misyonaryo gipapahawa sa Teritoryo sa mga Indian. Kay wala magmalamposon sa pagkuha og pagtugot gikan ni William Clark, superintendente sa mga kalihokan sa Indian sa maong dapit, ang mga misyonaryo wala na makatudlo sa Teritoryo sa mga Indian.
Bisan kon ang misyon ngadto sa mga Lamanita natapos, nakatabang kini sa paghimo og bag-ong plano alang sa wala pa molambo nga Simbahan para sa mosunod nga dekada. Ang mga misyonaryo nakatukod sa Simbahan didto sa dapit sa Kirtland, ug ilang giandam ang dalan alang ni Joseph Smith nga moadto sa Ohio sayo sa 1831 ug dayon nanawagan sa mga Santos nga anaa sa silangan nga mobalhin usab didto. Sa kaulahian sa 1831, si Joseph mismo mibiyahe ngadto sa Lalawigan sa Jackson, diin iyang gipahibalo ang lokasyon sa Bag-ong Jerusalem ug, pagka-Agosto 3, 1831, duol sa balay-hukmanan sa Independence, gipahimutang ang tukorang bato alang sa templo.