Pasiuna

Ang mga Santos sa Ulahing mga Adlaw nagtuo sa usa ka mahigugmaon nga Dios nga nakigsulti sa Iyang mga anak “ingon niini nga mga panahon ingon man usab sa karaan nga mga panahon, ug ingon man sa karaan nga mga panahon ug sa panahon nga moabot” (1 Nephi 10:19). Kini nga sukaranan nga baroganan sa gipahiuli nga ebanghelyo gipakita diha sa Santos sa Ulahing mga Adlaw nga kasulatan, nga naglangkob sa mga rekord sa mga pakiglabot sa Dios ngadto sa Iyang mga anak sa dugay nang miagi nga panahon, ingon man sa Iyang mga pulong ngadto kang Joseph Smith ug sa ubang mga propeta sa ulahing mga adlaw.

Ang basahon sa Doktrina ug mga Pakigsaad mao ang usa ka saksi niining pagbubo sa nagpadayon nga pagpadayag. Ang matag seksiyon nagtubag sa importante nga mga pangutana, nagpadayag og importante nga mga kamatuoran, o naghatag og praktikal nga giya. Kini nga mga pagpadayag mao ang bunga sa nagpadayon nga pagpakigsulti sa Ginoo ug sa Iyang katawhan. Apan sa daghang mga higayon, ang Doktrina ug mga Pakigsaad naglangkob lang sa katunga sa maong pagpakigsulti—ang gipadayag nga mga tubag sa Ginoo. Niini nga paagi, kini talagsaon taliwala sa mga basahon sa kasulatan sa Santos sa Ulahing mga Adlaw. Diha sa Biblia, Basahon ni Mormon, ug Perlas nga Labing Bililhon, ang pagtudlo sa ebanghelyo gipahayag sa usa ka istorya. Ang istorya naghatag kanato og mga timaan nga makatabang kanato sa paghubad sa mga pagtulun-an ug makita kon sa unsang paagi kini nakaimpluwensiya sa kinabuhi sa mga lalaki ug mga babaye sa kasulatan. Apan ang Doktrina ug mga Pakigsaad wala maglangkob sa mga istorya luyo sa mga pagpadayag.

Samtang ang mga ulohan sa seksyon, gi-update niadtong 2013, naghatag og pipila ka kinatibuk-ang kahulogan alang sa mga pagpadayag, mga instruksiyon, ug mga pamahayag diha sa Doktrina ug mga Pakigsaad, wala kini maghisgot sa kompleto nga istorya. Unsa ang mga pangutana nga nag-aghat sa mga pagpadayag? Unsay gipasabot sa mga tubag sa Ginoo ngadto sa gitumngan niini nga mga pagpadayag? Sa unsang paagi kadtong kinsa nakadungog sa mga pagpadayag misanong sa bag-o nga mga pagtulun-an? Ang Kinatibuk-ang Saysay sa mga Pagpadayag usa ka koleksiyon sa mga istorya nga nagsulay sa pagtubag niini nga mga pangutana. Giasoy gikan sa panglantaw sa mga tawo kinsa nakasinati niini sa kinatibuk-an gayod nga saysay, kini nga mga pagsugilon naghatag kanato og panabot sa kahulogan sa mga pagpadayag ug motabang kanato nga makakita niini gamit ang bag-o nga panglantaw.

Ang mga istorya niini nga koleksiyon, nga anaa sa hapit tanan sa mga seksiyon sa Doktrina ug mga Pakigsaad, gisulat pinaagi sa mga magsusulat sa kasaysayan diha sa Departamento sa Kasaysayan sa Simbahan. Sa pagsugilon niini nga mga istorya, ang mga tagsulat migamit sa ilang hugot nga pagtuo sa gipahiuli nga ebanghelyo ug sa ilang pagbansay ug kahanas sa Amerikanhon ug sa Santos sa Ulahing mga Adlaw nga kasaysayan. Ang labing importante niini nga serye mao ang Joseph Smith Papers Project [Proyekto sa mga Papeles ni Joseph Smith], nga naghatag og pundasyon sa kuti nga pagtuon diin mao ang sukaranan sa tanang makasaysayanon nga interpretasyon sa kinabuhi ug buhat ni Joseph Smith. Ang mga kinutlo nga anaa sa Joseph Smith Papers diha sa Kinatibuk-ang Saysay sa mga Pagpadayag kasagarang nagdirekta sa mambabasa ngadto sa mga dokumento ug mga materyal nga madagayaong gihimo nga anaa sa josephsmithpapers.org.

Naglaom kami nga kini nga mga pagsugilon maghatag sa mga sakop sa Simbahan dili lang sa usa ka mas klaro nga pagsabot sa mga pagpadayag mismo, apan usa ka mas lawom nga pagdayeg alang sa paagi nga ang Dios makigsulti sa Iyang mga anak “diha sa ilang kahuyang, subay sa paagi sa ilang pinulongan, nga sila unta makasabot” (D&P 1:24).