Ezra Booth ug Isaac Morley

Matthew McBride

Alang sa nag-unang mga miyembro sa Simbahan, ang ting-init sa 1831 nagsugod nga adunay taas nga mga gilaoman. Usa ka importante nga komperensiya ang gipahigayon atol sa unang semana sa Hunyo didto sa eskwelahan sa uma ni Isaac Morley duol sa Kirtland. Napuno ang lawak, ug daghan ang naglingkod sa gawas lang sa abli nga mga bentana, naglisod sa pagpaminaw. Ang huyuhoy sa ting-init midala sa kahumot sa bag-ong giani nga yerbabuyna [mint], gitanom didto sa yuta sa duol nga mga umahan. Si Joseph Smith mibukas sa komperensiya pinaagi sa pag-ampo.

Niini nga pagpundok, ang unang mga ordinasyon ngadto sa “halangdong pagkapari” gihimo. Pipila sa mga elder nakasinati og espirituhanon nga mga pagpakita, lakip sa pagpapahawa sa daotan nga mga espiritu. Dayon, duol sa hinapos sa upat ka adlaw nga komperensiya, nakadawat si Joseph Smith og pagpadayag nga naghisgot sa labing gitinguha nga mga paglaom sa mga matinud-anon.

Sukad nga una nilang nabasa ang Basahon ni Mormon, ang mga tumutuo naghunahuna kon sa unsang paagi, asa, ug kanus-a matuman ang mga panagna sa basahon. Kanus-a ang mga Lamanita—nga kaniadto gituohan nga mao ang mga Indian sa Habagatang Amerika—makabig ug moapil sa mga miyembro sa Simbahan sa pagtukod og Bag-o nga Jerusalem diha sa Amerika? Kining nag-una nga mga miyembro nasayod nga ang dapit alang sa siyudad maanaa “taliwala sa mga Lamanita.” Gipadala gani nila si Oliver Cowdery ug tulo pa ka laing mga misyonaryo ngadto sa layong kasadpan nga mga dapit sa Estados Unidos aron sa pagsangyaw ngadto sa Amerikano nga mga Indian duol sa Missouri.

Karon, niining bag-o nga pagpadayag, ang Ginoo mipahayag nga ang Missouri sa pagkatinuod mao ang “yuta diin Ako mopahinungod ngadto sa akong mga Katawhan.” Namulong bahin sa Bag-ong Jerusalem, Misaad Siya nga Siya “mopadali sa pagtukod sa dakbayan niana nga panahon.” Ang pagpadayag mitawag usab ni Joseph Smith, Sidney Rigdon, ug 13 ka laing paresan sa mga misyonaryo sa pagbiyahe nga magtinagurha ngadto sa Missouri, diin ipahigayon ang sunod nga komperensiya. Gisulti usab ngadto kanila nga kon magmatinud-anon sila, ang Ginoo mopadayag “sa yuta nga [ilang] kabilin.”

Ang paresan sa mga misyonaryo mibiya alang sa Missouri nga adunay tag-as nga mga paglaom. Mituo sila nga ang adlaw sa pagbalik ni Jesus sa yuta duol na kaayo ug nga sila nagbiyahe aron sa pagpangita ug pagtukod og usa ka templo nga siyudad diin magpundok sila aron modawat sa Ginoo sa Iyang pag-abot. Mikatap ang mga hungihong nga si Oliver Cowdery ug ang iyang mga isigka misyonaryo hapit na gayod makakabig sa daghang Amerikano nga mga Indian. Ang mga misyonaryo nagpaabot nga didto sa Missouri “ang mga butang sa pagtuo ug paglaom, mao ang mamahimong mga butang sa kahibalo ug katumanan.”

Ang Biyahe ngadto sa Missouri

Si Isaac Morley ug Ezra Booth nalakip sa mga misyonaryo nga gitawag. Silang duha mitambong sa komperensiya ug naorden, ug sila karon gipili nga mobiyahe isip mga managkompanyon.

Si Isaac Morley nalakip niadtong una nga mga kinabig sa Simbahan sa Ohio. Sa panahon sa iyang pagkakabig, si Morley; ang iyang asawa, si Lucy; ang iyang pamilya; ug pipila ka higala mipuyo diha sa iyang umahan, nakig-ambit sa gipanag-iya sa tanan [communal] nga estilo sa kinabuhi. Naningkamot sila og maayo nga magpakabuhi sama sa nag-unang mga Kristiyano nga gihisgotan diha sa basahon sa Mga Buhat, kinsa “nag-ambitay sa tanang mga butang nga ilang gihuptan” (Mga Buhat 4:32).

Si Ezra Booth usa ka tinahod nga Methodist nga tigwali didto sa amihanang silangan sa Ohio. Ang iyang pagkakabig nakamugna og gamayng kontrobersiya sa iyang mga higala ug kaila, nga naguol sa iyang pag-apil sa “Mormonites.” Si Booth kusganong mibati nga moapil sa bag-ong tinuohan. “Ang mga impresyon sa akong hunahuna halawom ug gamhanan,” siya mihinumdom, “ug ang akong mga pagbati nagmahinamon nga wala gayod nako mabatyag sukad.”

Apan sa panahon sa iyang pagbiya niadtong Hunyo 1831, si Booth nagsugod sa pagduhaduha. Ang espirituhanon nga mga pagpakita diha niana sa komperensiya wala makaabot sa iyang mga gilaoman, ug nasagmuyo siya nga si Joseph Smith ug si Sidney Rigdon mibiyahe alang sa Missouri sakay sa usa ka karomata, samtang siya ug si Isaac gitawag nga molakaw sa tibuok gilay-on ubos sa kainit sa ting-init, nga magsangyaw sa ilang maagian.

Ang biyahe hasol usab alang sa uban. Si Joseph Smith mibiya pipila lang ka semana human siya ug si Emma namatyan og mga kaluha wala madugay human sa pagkatawo. Gibiyaan niya ang iyang nagbangotan nga asawa, kinsa kinahanglang moatiman sa iyang kaugalingon ug sa bag-ong gisagop nga Murdock nga mga kaluha (kansang inahan, si Julia, namatay sa hinapos sa Abril ug kansang amahan, si John, mobiyahe usab ngadto sa Missouri).

Sa dihang si Ezra Booth sa kataposan naabot sa Missouri, mibati siya nga nawad-an og kadasig. Siya ug ang uban “nagdahom nga makakaplag og usa ka dapit nga buhong sa mga gikinahanglan ug kaharuhay sa kinabuhi.” Hinuon, mitan-aw siya sa palibot ug miila nga “ang sitwasyon ingon og murag makasubo.” Nakahinumdom si Booth nga masaligong mipahayag si Joseph Smith sa wala pa ang biyahe nga ang Simbahan sa Missouri dako ug naglambo, apan sa dihang sila miabot sila nakakaplag lang og pito ka bag-ong mga miyembro.

Si Joseph Smith mismo tingali sa una nasagmuyo sa dihang miabot siya sa Missouri. Ang dapit palibot sa Independence kasagaran lapad nga kasagbotan nga adunay pipila ka nagkatag nga mga kahoy. Layo gikan sa makadasig nga mga panan-awon sa kapital sa milenyum, ang utlanan nga lungsod mismo “usa ka siglo nga naulahi kaysa kasamtangang panahon.” Alang sa kadaghanan sa mga elder, ang katinuod sa ilang naabtan sa Missouri makapasagmuyo. Apan sagubangon nila kana nga kasagmuyo sa lainlain nga mga paagi.

Usa ka Pag-ampo alang sa Giya

Kini ba gayod ang dapit ug panahon nga sulayan ang pagtukod sa Zion? Niadtong Hulyo 20, mahingawaon nga makasabot sa tukma nga panahon ug mga katuyoan sa Dios, si Joseph midangop ngadto sa Ginoo. “Kanus-a mamulak ang kamingawan ingon sa rosas?” siya nag-ampo. “Kanus-a tukoron ang Zion diha sa iyang himaya, ug asa mobarog ang Imong Templo?” Kini nga mga pangutana miaghat og pagpadayag—karon Doktrina ug mga Pakigsaad 57—nga sa kataposan mitudlo sa dapit alang sa siyudad ug sa templo.

Usa ka dugang nga pagpadayag niadtong Agosto 1 (Doktrina ug mga Pakigsaad 58) misugo sa mga misyonaryo sa pagpahinungod sa yuta apan mipaila nga ang Zion matukod lamang “human sa daghan nga kalisdanan.” Ang pagpadayag mipanton niadtong kinsa, sama ni Ezra Booth, nga miyawyaw og mga reklamo. “Miingon sila sa ilang mga kasingkasing dili kini buhat sa Ginoo kay ang iyang mga saad wala matuman.” Nagpasidaan kini nga “ang ilang ganti nagtago sa kahiladman & dili gikan sa kahitas-an.”

Bisan pa man sa kasagmuyo ug sa kadako sa proyekto sa pagtukod sa siyudad, determinado si Joseph nga himoon ang pagsugod. Uban ni Sidney Rigdon ug sa uban, nagsugod siya sa pagtrabaho. Gipahinungod nila ang yuta duol sa Independence alang sa usa ka dapit nga kapundokan, mipahimutang sa unang troso alang sa usa ka balay sa Zion, ug mipahimutang sa aminahang silangan nga bato sa pamag-ang alang sa usa ka templo.

Ang pipila sa mga elder, sama ni Reynolds Cahoon, nakakita og makapahinam nga mga posibilidad niining simbolikanhon nga mga sinugdanan. “Didto ang akong mortal nga mga mata nakakita og mahinungdanon ug talagsaon nga mga butang,” misulat siya, “nga wala ko magtuo nga makakita ako og sama niini dinhi sa kalibotan.” Apan wala makadayeg si Ezra Booth sa gamay nga sinugdanan. Kadto “usa ka pagpanguryoso,” miingon siya, “apan dili igo ang pag-adto sa Missouri nga kadto ra ang makita.”

Ang Pagbalik ngadto sa Ohio

Bisan og pipila sa mga misyonaryo gipili nga magpabilin sa Missouri, ang Agosto 1 nga pagpadayag misugo sa nahibilin nga mga misyonaryo sa pagbalik ngadto sa ilang mga panimalay, nagpaila nga “ang panahon wala pa moabot, sulod sa daghang katuigan, alang kanila sa pagdawat sa ilang kabilin dinhi niini nga yuta.”

Laing pagpadayag, karon ang Doktrina ug mga Pakigsaad 60, misugo sa mopauliay nga mga misyonaryo sa pagbiyahe diha sa Suba sa Missouri sa silangan ngadto sa St. Louis. Didto si Joseph ug Sidney Rigdon mobiyahe dayon paingon ngadto sa Cincinnati, Ohio, aron sa pagsangyaw, samtang ang uban mobiyahe “nga magtinagurha, & magsangyaw sa pulong, nga dili magdali, diha sa katigoman sa mga daotan.”

Nanakay sila og mga bangka paingon sa St. Louis niadtong Agosto 8. Ang Suba sa Missouri lisod kaayo nga inabigar. Ang mga kapitan sa bapor [steamboat] nabalaka kaayo sa naglutaw nga natumbang mga kahoy nga dili makita niana nga suba, nga sa kanunay miguba sa ilang mga barko. Ang mga elder sa wala madugay misulti kang Elizabeth Marsh nga ang grabe ka sulog nga agos sa suba “makita nga daw nagsalimoang kini sa kasuko sama og kini gitunglo.”

Ang biyahe usa ka mabingkilon alang sa mga elder. Ang kakapoy, kainit, ug ang mabudhion nga Suba sa Missouri nakapahimo kanila nga daling masuko. Sa ilang ikatulo nga adlaw sa tubig, pipila sa mga bangka hapit nasangit sa natumba nga mga kahoy nga nagtago diha sa suba, nga mihulga nga matikyaob ang mga bangka, nga nagpameligro sa mga kinabuhi niadtong dili makalangoy.

Human nga nakaabot gayod sila nga luwas sa kilid sa suba, nagpadayon ang ilang panagbingkil. Bisan og siya ang hinungdan sa panagbingkil, si Ezra Booth mubo ra og pasensiya alang niini sa uban. Siya sa wala madugay mabiaybiayong miobserbar, “Kini mao ang mga lider sa simbahan, ug ang bugtong nga simbahan sa yuta nga gitan-aw sa Ginoo nga adunay pagdayeg.”

Si Joseph Smith nakadawat og laing pagpadayag sa misunod nga buntag dapit sa kilid sa suba (Doktrina ug mga Pakigsaad 61), diin ang Ginoo mipasidaan kanila sa kakuyaw diha sa tubig apan miingon “Dili igsapayan ngari kanako … kon sila moadto ba pinaagi sa tubig o pinaagi sa yuta.”

Si Joseph mipadayon diha sa yuta pagkasunod adlaw uban sa usa ka bahin sa grupo. Nasugatan nila ang iyang igsoon nga si Hyrum ug ang uban kinsa nalangay ug mobisita pa sa dapit alang sa Zion. Usa ka pagpadayag (Doktrina ug mga Pakigsaad 62) mipahimangno kanila, “Padayon sa inyong Pagpanaw, [pundoka ang] inyong mga kaugalingon diha sa yuta sa Zion, & paghimo og usa ka tigom & paglipay nga magkahiusa & paghalad og sakramento ngadto sa Labing Halangdon.”

Si Ezra Booth, sa laing bahin, midesisyon nga mobalik dayon kutob sa mahimo imbes mosangyaw diha sa ilang maagian sumala sa nahauna nga pagpadayag. Gibiyahe niya ug sa pipila ka kauban ang nahibilin nga panaw ngadto sa Ohio pinaagi sa barko ug karwahe.

“Buntoga ang Inyong mga Kaaway”

Wala madugay human sa iyang pagbalik ngadto sa Ohio, si Ezra Booth mibiya sa Simbahan sa dayag kaayo nga paagi. Tungod kay ang iyang kasinatian wala motakdo sa iyang mga gilaoman kon unsa ang panagway sa Zion o kon unsay angay nga lihok ni Joseph Smith, una nagduhaduha siya ug dayon gitalikdan ang iyang tinuohan. Sugod niana nga Oktubre, ang Ohio Star, usa ka pamantalaan nga nahimutang sa Ravenna, Ohio, nagsugod sa pagmantala og usa ka sunod-sunod nga mga sulat nga gihimo ni Booth, nga hilabihan nga nanaway kang Joseph Smith ug sa Simbahan.

Pagka Disyembre ang iyang mga sulat gani nagsugod sa pagpahinay sa misyonaryo nga buhat, ug si Joseph Smith nakadawat og duha ka pagpadayag niadtong Disyembre 1831 ug Enero 1832, karon makita sa Doktrina ug mga Pakigsaad 71 ug 73. Naghagit kini kang Booth ug sa ubang mga masupakon sama ni Symonds Ryder sa “[pag]dala sa ilang lig-on nga mga pangatarongan batok sa Ginoo.” Kini usab miawhag ni Joseph ug Sidney Rigdton nga aktibong mosangyaw: “Buntoga ang inyong mga kaaway; Magtawag kanila sa pagpakigkita kaninyo diha sa dayag, ug diha sa tago.”

Bisan og si Sidney Rigdon mihagit ni Booth ug Ryder ngadto sa publiko nga debate, midumili sila, tingali nahibalo sa reputasyon ni Rigdon isip usa ka bangis nga tigdebate. Si Rigdon misangyaw didto sa Ravenna, Ohio, ug sa ubang mga lokasyon, sa pagsukwahi sa mga gipangangkon ni Booth. Bisan og ang mga sulat ni Booth nakaapekto og gamay sa misyonaryo nga buhat, kana nga epekto wala magdugay.

Subo lang, ang pagkanegatibo ni Booth miresulta sa pagbulag dili lang tali kaniya ug sa gipahiuli nga Simbahan apan usab tali kaniya ug sa iyang nahaunang espirituhanon nga mga kasinatian. Siya sa kataposan “mibiya sa Kristiyanismo ug nahimong usa ka wala motuo sa Dios [agnostic].”

Ang Pagsulay ni Isaac Morley

Samtang ang mga kasinatian ni Ezra Booth sa pagbiyahe ngadto sa Missouri mipalayo kaniya gikan sa Simbahan, ang kang Isaac Morley sa kataposan nakapaduol hinuon kaniya. Atol sa biyahe, si Morley klarong nakigbahin, sa gamayng bahin, sa pagkanegatibo ni Ezra Booth. Usa ka pagpadayag nga nadawat niadtong Septiyembre 11 (Doktrina ug mga Pakigsaad 64) mipanton ni Booth ug Morley: “[Gihukman nila nga daotan ang] butang nga dili daotan.” Ang bisan unsang mga pagduhaduha nga tingali anaa si Morley mahitungod sa iyang misyon wala ra magdugay. Dili sama ni Ezra Booth, si Isaac Morley mihunong sa iyang mga pagpanaway ug miusab sa iyang panglantaw. Ang pagpadayag nagpadayon sa kaugalingong tingog sa Ginoo: “Ako mipasaylo sa akong sulugoon nga si Isaac.”

Apan ang Ginoo adunay gihunahuna nga dugang nga mga sakripisyo alang kang Isaac Morley. Gihangyo siya nga biyaan ang iyang dakong kayutaan sa Kirtland ug mobalik ngadto sa Missouri uban sa iyang pamilya. Sa usa ka pagpadayag nga gihatag sa wala madugay human sa pagbalik ni Joseph Smith sa Kirtland (Doktrina ug mga Pakigsaad 63), ang Ginoo misugo sa bayaw ni Morley nga si Titus Billings nga “[ipabaligya]” ang uma ni Morley. Diha sa pagpadayag nga gihatag niadtong Septiyembre 11, ang Ginoo mipasabot nga siya misugo nga ibaligya ang uma, “nga ang akong sulugoon nga si Isaac Morley dili mahimo nga matental labaw niana diin siya mahimo nga moantos.”

Si Isaac ug Lucy Morley andam nga mihimo sa sakripisyo. Niadtong Oktubre 1831, si Titus Billings mibaligya sa kadaghanan sa uma ni Morley. Gidala balik ni Morley ang iyang pamilya balik ngadto sa Independence, segun sa gisugo kaniya, ug naningkamot pag-usab sa pag-establisar og pundasyon alang sa templo nga siyudad. Kay nakalahutay latas sa iyang mga pagduhaduha, nakapadayon siya sa pagserbisyo isip usa ka bishop ug usa ka patriyarka. Mitaliwan siya sa Utah niadtong 1865.