First Furrow [Unang Agi sa Daro], ni James Taylor Harwood

Mayo 26–Hunyo 1: “Matinud-anon, Makiangayon, ug usa ka Maalamon nga Tinugyanan”

Doktrina ug mga Pakigsaad 51–57

Alang sa mga miyembro sa Simbahan niadtong mga 1830, ang panagpundok sa mga Santos ug ang pagtukod sa siyudad sa Zion espirituhanon ingon man usab temporal nga mga buhat, nga adunay daghang praktikal nga mga butang nga atimanonon: Adunay tawo nga kinahanglang mopalit og yuta diin ang mga Santos mahimong mopuyo. Adunay tawo nga kinahanglang moimprinta og mga libro ug ubang mga publikasyon. Ug adunay tawo nga kinahanglang magdumala og tindahan aron makasangkap og mga butang alang sa katawhan sa Zion. Diha sa pagpadayag nga narekord diha sa Doktrina ug mga Pakigsaad 51–57, ang Ginoo mitudlo ug mimando og mga tawo nga modumala niini nga mga buluhaton.

Apan samtang ang mga kahanas sa maong mga butang gikinahanglan sa Zion, kining mga pagpadayag nagtudlo usab nga ang Ginoo nagtinguha sa Iyang mga Santos nga mahimong takos sa espirituhanong paagi aron matawag og katawhan sa Zion—Iyang katawhan. Nanawagan Siya sa matag usa kanato nga mahimong “matinud-anon, makiangayon, ug usa ka maalamon nga tinugyanan,” nga adunay mahinulsolon nga espiritu, “[mo]barog nga malig-on” diha sa mga responsibilidad nga gisangon kanato (tan-awa sa Doktrina ug mga Pakigsaad 51:19; 52:15; 54:2). Kon kita makabuhat niana—bisan unsa pa man ang atong temporal nga mga kahanas—magamit kita sa Ginoo sa pagtukod sa Zion.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 51

Gusto sa Ginoo nga ako mahimong matinud-anon, makiangayon, ug maalamon nga tinugyanan.

Kon miyembro ka sa Simbahan niadtong 1831, tingali gidapit ka nga motuman sa balaod sa pagpahinungod pinaagi sa pagtugyan sa imong kabtangan ngadto sa Simbahan pinaagi sa bishop. Kasagaran, iya dayong ibalik nganha kanimo, kon unsay imong gidonar, usahay adunay sobra. Apan dili na kini imo lamang gipanag-iya—imo kining pagkatinugyanan.

Sa panahon karon ang mga pamaagi lahi, apan ang mga baroganan mahinungdanon gihapon sa buhat sa Ginoo. Samtang magbasa ka sa seksiyon 51, hunahunaa kon unsay gisalig sa Dios nganha kanimo. Unsay gipasabot sa mga pulong nga “tinugyanan” (bersikulo 19) ug “mipahinungod” (bersikulo 5) mahitungod sa mga gilaoman sa Dios kanimo?

Si Presidente Spencer W. Kimball mipasabot: “Sa Simbahan ang pagkatinugyanan usa ka sagradong espirituwal o temporal nga pagsalig nga adunay tulubagon. Tungod kay ang tanan iya sa Ginoo, kita mga tinugyanan sa atong mga lawas, mga salabotan, mga pamilya, ug mga kabtangan. (Tan-awa sa Doktrina ug mga Pakigsaad 104:11–15.) Ang matinud-anong tinugyanan mao ang usa ka tawo kinsa migamit og matarong nga pagmando, nag-amuma sa iyang kaugalingong pamilya, ug nag-atiman sa mga kabos ug timawa” (“Welfare Services: The Gospel in Action,” Ensign, Nov. 1977, 78).

Tan-awa usab sa “The Law of Consecration” (bidyo), Gospel Library.

The Law of Consecration

Historians Kate Holbrook and Steven C. Harper discuss what the Law of Consecration is, the three core doctrines pertaining to it, and how we can live it today.

Doktrina ug mga Pakigsaad 52:9–11, 22–27

Makadapit ko sa uban nga moduol kang Kristo bisan asa ko moadto.

Sa dihang ang Ginoo mipadala og pipila ka lider sa Simbahan ngadto sa Missouri, misulti siya kanila sa paggamit sa panahon nga gigahin sa pagbiyahe ug “magsangyaw sa pulong diha sa agianan” (mga bersikulo 25–27). Unsaon nimo sa pagsangyaw ang ebanghelyo “diha sa agianan,” o atol sa normal nga mga panghitabo sa imong kinabuhi?

Doktrina ug mga Pakigsaad 52:14–19

Ang Ginoo motabang nako nga malikayan ang pagkalingla.

Kay daghang mga tawo ang nangangkon og espirituhanong mga manipestasyon, nabalaka ang unang mga Santos nga malingla. Unsa nga pasidaan ang gihatag sa Ginoo kanila diha sa Doktrina ug mga Pakigsaad 52:14? Unsa ang Iyang solusyon? (tan-awa sa mga bersikulo 14–19).

Ang sundanan mao ang usa ka butang nga magbalikbalik sa regular, matagna nga paagi. Ang mga ehemplo naglakip sa pag-ihap pinaagi sa magkapares nga mga numero o ang adlaw mosubang ug mosalop matag adlaw. Unsa ang uban pang mga ehemplo nga imong nahunahunaan? Samtang mangita sa Doktrina ug mga Pakigsaad 52:14–19, ilha ang mga sundanan sa Ginoo aron malikayan ang pagkalingla. Tingali makatabang nga hinumdoman nga ang “mahinulsolon” nagpasabot sa usa ka pagbati sa kamapaubsanon ug paghinulsol; ang “maaghop” nagsugyot sa kalumo ug pagpugong sa kaugalingon; ug ang “paghatag og kaayohan” nagpasabot nga pagtudlo, paglambo, o paglig-on. Sa imong pamati ngano nga ang sundanan sa Ginoo naglakip niini nga mga kinaiya, ingon man usab sa pagkamasulondon? Unsaon nimo paggamit niini nga sundanan aron malikayan ang pagkalingla?

Ipasabot ang lisod nga mga pulong. Diha sa Gospel Library nga app, mahimo nimong i-tap ug i-hold ang usa ka pulong ug dayon pilion ang “Define.” Dad-on dayon ka sa kahulogan niana nga pulong. Sulayi kini kon makasugat ka og dili pamilyar nga mga pulong—o mga pulong nga daw pamilyar nga gusto nimo nga mas masabtan.

Unsa ang pipila ka ehemplo sa mga pagpanglingla sa atong panahon karon? Unsaon nato sa pagkahibalo nga kita gilingla?

Pananglitan, mahimo nimong ikonsiderar ang pagsusi sa imong mga pagpili kalabot sa mga salida, musika, ug social media base sa mga sumbanan diha sa “Magkinabuhi sa kahayag sa Dios” diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili, 16–21.

Tan-awa usab sa Gary E. Stevenson, “Ayaw Paglingla Kanako,” Liahona, Nob. 2019, 93–96; “Guide Me to Thee,” Hymns, no. 101; Mga Hilisgotan ug mga Pangutana [Topics and Questions], “Seeking Truth and Avoiding Deception,” Librarya sa Ebanghelyo [Gospel Library].

Doktrina ug mga Pakigsaad 54

Makadangop ko sa Ginoo kon ako masakitan tungod sa mga pagpili sa uban.

Nakasinati ka na ba nga nasagmuyo sa dihang ang usa ka tawo nga imong gisaligan wala motuman sa ilang mga pasalig? Nahitabo kini ngadto sa mga Santos sa Colesville, New York, kinsa naglaom nga mopuyo sa yuta ni Leman Copley didto sa Ohio. Sa pagkat-on gikan niini nga kasinatian, ikonsiderar ang pagrebyo sa ulohan sa seksiyon 54 (tan-awa usab sa Mga Santos, 1:125–28; “A Bishop unto the Church,” diha sa Revelations in Context, 78–79). Kon ikaw adunay higala kauban sa mga Santos sa Colesville unsa nga tambag nga imong makita diha sa seksiyon 54 ang imong ipakigbahin ngadto nila?

umahan ni Leman Copley

Doktrina ug mga Pakigsaad 56:14–20

Bulahan ang mga putli og kasingkasing.

Niining mga bersikulo, namulong ang Ginoo ngadto sa mga adunahan ug ngadto sa mga kabos; seguro makapainteresado nga itandi ang Iyang tambag niining duha ka grupo. Unsa ang anaa niining mga bersikulo nga adunay kalabotan nimo sa personal nga paagi?

Alang sa dugang nga mga ideya, tan-awa sa mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Newel Knight

• Zion/Bag-ong Jerusalem

• Pagka-Lamanite

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 51:9

Mahimo akong magmatinuoron.

• Aron matabangan ang imong mga anak nga makakat-on kon unsay ipasabot sa magmatinuoron, mahimo ninyong basahon og dungan ang Doktrina ug mga Pakigsaad 51:9 ug mopakigbahin og mga istorya bahin sa mga bata nga nag-atubang og mga desisyon mahitungod sa pagkamatinuoron. Mahimo ka nga mogamit og mga litrato, mga medyas nga puppet, o mga papel nga monyeka aron makapahimo sa mga istorya nga mas makapainteres. Sa unsang paagi nga ang Ginoo mopanalangin nato samtang kita maningkamot nga magmatinuoron?

• Ikonsiderar ang pagpakigdula sa imong mga anak. Human niana, hisgoti kon unsa ang mahimong kalainan sa dula kon adunay manikas. Nganong importante man nga “makigsabot sa matinuoron nga paagi” sa usag usa?

Doktrina ug mga Pakigsaad 52:10; 53:3; 55:1

Akong nadawat ang gasa sa Espiritu Santo pinaagi sa pagpandong sa mga kamot.

• Ang pagdawat sa Espiritu Santo pinaagi sa pagpandong sa mga kamot gihisgotan sa makadaghang higayon diha sa Doktrina ug mga Pakigsaad 51–57. Tingali usa kini ka maayong oportunidad sa pagtudlo sa mga bata mahitungod niini nga ordinansa. Pananglitan, mahimo sila nga motan-aw sa usa ka litrato sa usa ka bata nga gikompirmahan ug mohulagway kon unsa ang nahitabo diha sa litrato. Hangyoa sila sa pagpakpak sa ilang mga kamot kon ilang madungog ang “pagpandong sa mga kamot” o “magpandong sa mga kamot” samtang magbasa ka sa Doktrina ug mga Pakigsaad 52:10; 53:3; 55:1.

• Mahimo usab ninyong kantahon ang “Ang Espiritu Santo” (Songbook sa mga Bata, 56) o usa ka susama nga awit. Tabangi ang imong mga anak sa pagpangita og mga pulong o hugpong sa mga pulong diha sa awit nga nagtudlo mahitungod sa gasa sa Espiritu Santo.

  

Doktrina ug mga Pakigsaad 52:14–19

Ang Dios adunay sundanan aron sa pagtabang nako nga dili malingla.

• Sa pagtudlo mahitungod sa sundanan sa Ginoo aron malikayan ang pagkalingla, mahimo nimong sugdan pinaagi sa pagtabang sa mga bata sa pagpangita og mga ehemplo sa mga sundanan—sa kalikopan, sa mabulokon nga mga habol o sinina, o sa inadlaw nga kinabuhi. Tabangi sila nga makita ang sundanan nga gihatag sa Ginoo diha sa Doktrina ug mga Pakigsaad 52:14–15. Seguroa nga ilang masabtan ang bisan unsang dili pamilyar nga mga pulong niiini nga mga bersikulo. Unsaon nato sa paggamit niini nga sundanan sa pag-ila sa kamatuoran?

Doktrina ug mga Pakigsaad 54:4–6

Angay nakong tumanon kanunay ang akong mga pakigsaad.

• Sa imong kaugalingong mga pulong, ipakigbahin ngadto sa imong mga anak kon unsa ang nahitabo sa mga Santos nga miabot aron mopuyo sa yuta ni Leman Copley (tan-awa sa ulohan sa seksiyon 54). Ang imong mga anak mahimong magpakaaron-ingnon nga usa ka miyembro sa Simbahan nga miabot sa Ohio. Unsa kaha ang ilang gibati human nga si Leman wala motuman sa iyang pakigsaad? Unsa ang gitudlo niini ngari kanato mahitungod sa pagtuman sa atong mga pakigsaad o mga saad? Basaha og dungan ang Doktrina ug mga Pakigsaad 54:6 sa pagdiskobre sa mga panalangin alang sa mga tawo nga motuman sa ilang mga pakigsaad.

Doktrina ug mga Pakigsaad 55:1–4

Akong magamit ang mga panalangin nga gihatag sa Dios kanako sa pagpanalangin sa uban.

• Sa pagpaila sa seksiyon 55, mahimo nimong ipasabot nga si William W. Phelps usa ka tigmantala sa mantalaan kinsa nakat-on mahitungod sa ebanghelyo ug mipasakop sa Simbahan. Basaha uban sa imong mga anak ang Doktrina ug mga Pakigsaad 55:1–4, ug tabangi sila sa pagdiskobre kon unsa ang gusto sa Dios nga buhaton ni William. Giunsa Niya sa pagplano aron magamit ang mga talento ni William? Mahimo kining mosangpot ngadto sa usa ka panaghisgot mahitungod kon sa unsang paagi nga ang Dios nagdapit nato sa paggamit sa atong mga talento aron sa pagpanalangin sa Iyang mga anak.

Alang sa dugang nga mga ideya, tan-awa sa isyu karong bulana sa Higala nga magasin.

Bishop Partridge Receives Consecration [Si Bishop Partridge nga Nagdawat sa Pagpahinungod], ni Albin Veselka