Detalye gikan sa Campfire on the Missouri [Campfire sa Missouri], ni Bryan Mark Taylor

Hunyo 9–15: “Ako Mag-uban sa Matinud-anon sa Kanunay”

Doktrina ug mga Pakigsaad 60–63

Sa sayong bahin sa Agosto 1831, si Joseph Smith ug ang ubang mga elder sa Simbahan nag-andam nga mobalik ngadto sa Kirtland human sa makadiyot nga pagbisita sa “yuta sa Zion” (Doktrina ug mga Pakigsaad 59:3). Ang Ginoo gusto nga mosangyaw sila sa ebanghelyo atol sa ilang pagbiyahe (tan-awa sa Doktrina ug mga Pakigsaad 52:10), ug ang pipila nila nagkugi sa paghimo niini. Apan ang uban nagduha-duha. “Sila nagtago sa kahibalo nga Ako mihatag ngadto kanila,” miingon ang Ginoo, “tungod sa kahadlok sa tawo” (Doktrina ug mga Pakigsaad 60:2). Kadaghanan nato nasayod unsay gibati niini nga mga elder. Bisan og gimahal nato ang ebanghelyo, ang kahadlok ug pagduhaduha mahimong mopugong nato sa pagpakigbahin niini. Apan ang Ginoo maluluy-on. Siya “nasayod sa kahuyang sa tawo ug unsaon sa pagtabang [kanato]” (Doktrina ug mga Pakigsaad 62:1). Sa kinatibuk-an niining mga pagpadayag ngadto sa nag-unang mga misyonaryo anaa ang mga pasalig nga makatabang aron atong mabuntog ang atong mga kahadlok ug mga kasaypanan: “Ako adunay katakos sa paghimo kaninyo nga balaan.” “Ang tanan nga mga tawo ania sa akong kamot.” “Ako mag-uban sa matinud-anon sa kanunay.” Ug “Siya nga matinud-anon ug molahutay makabuntog sa kalibotan.” (Doktrina ug mga Pakigsaad 60:7; 61:6; 62:9; 63:47.)

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 60; 62

Makahimo ako sa pagpakigbahin sa akong gugma ug pagpamatuod ni Jesukristo.

Sa unsang paagi nga ang imong pagpamatuod sa ebanghelyo sama sa usa ka “talento,” o bahandi gikan sa Dios? Sa unsang mga paagi nga usahay kita “nagtago sa [atong] talento”? (Doktrina ug mga Pakigsaad 60:2; tan-awa usab sa Mateo 25:14–30).

Unsa nga makapadasig nga mga mensahe gikan sa Ginoo ang imong makita sa mga seksiyon 60 ug 62? Sa unsang paagi nga kining mga mensahe nakapaugmad sa imong pagsalig sa pagpakigbahin sa ebanghelyo? Samtang mamalandong ka niini nga mga pangutana, ikonsiderar ang pagkanta o pagbasa sa mga pulong sa “Gusto Ko Karon nga Mamisyonaryo” (Songbook sa mga Bata, 90). Unsay imong nakat-onan gikan niining kanta sa mga bata mahitungod sa pagpakigbahin sa ebanghelyo?

Tan-awa usab sa “Pagpakigbahin sa Ebanghelyo” koleksiyon sa Librarya sa Ebanghelyo.

Ako makahimo sa pagpakigbahin sa akong tinuohan bahin ni Kristo.

Doktrina ug mga Pakigsaad 60:2–4; 61:1–2, 20, 36–38; 62:1, 6

Ang mga kasulatan nagtudlo mahitungod ni Jesukristo.

Samtang Siya naghatag og instruksiyon sa Iyang mga misyonaryo, ang Ginoo mipadayag og importante nga mga kamatuoran mahitungod sa Iyang Kaugalingon. Pangitaa kini nga mga kamatuoran sa Doktrina ug mga Pakigsaad 60:2–4; 61:1–2, 20, 36–38; 62:1, 6. Unsa nga mga istorya gikan sa mga kasulatan ang naghulagway sa mga tahas ug mga kinaiya sa Manluluwas nga imong nakita? (tan-awa sa sama pananglit, Juan 8:1–11; Ether 2:14–15).

Doktrina ug mga Pakigsaad 62

Ang akong mga desisyon kinahanglan mobalanse sa “paghukom ug sa direksyon sa Espiritu.”

Ang Ginoo maghatag og direksyon mahitungod sa mahangtoron nga mga kamatuoran ug mga baroganan, apan sa kasagaran isalig ra Niya nato ang pagtino sa piho nga mga detalye kon unsaon sa pagsunod niini nga mga baroganan. Sa imong tan-aw giunsa kini paghulagway nga baroganan diha sa Doktrina ug mga Pakigsaad 62? (tan-awa usab sa Doktrina ug mga Pakigsaad 60:5; 61:22). Sa unsang paagi nga ikaw nakakita niini nga baroganan sa imong kinabuhi? Nganong maayo man alang kanato nga mohimo og pipila ka mga desisyon nga dili magpaabot sa Dios nga mosulti nato sa eksaktong paagi unsay buhaton?

Tan-awa usab sa Ether 2:18–25; Doktrina ug mga Pakigsaad 58:27–28.

Doktrina ug mga Pakigsaad 63:7–12

Ang mga timailhan moabot pinaagi sa hugot nga pagtuo ug sa kabubut-on sa Dios.

Sa kataposan niini nga latid, adunay gihulagway nga usa ka milagro nga nakapadani pag-ayo ni Ezra Booth: Ang bukton ni Elsa Johnson naayo sa milagrosong paagi. Human makakita niana, si Ezra madasigong gibunyagan. Ug unya, sulod lang sa pipila ka bulan, nawad-an og pagtuo si Booth ug mihinaway sa Propeta. Nganong nahitabo man kini, kon magkonsiderar sa milagro nga iyang nasaksihan?

Pamalandongi kini samtang magbasa ka sa Doktrina ug mga Pakigsaad 63:7–12. Unsay imong nakat-onan mahitungod sa mga timailhan ug hugot nga pagtuo?

Tan-awa usab sa Mateo 16:1–4; Juan 12:37; Mormon 9:10–21; Ether 12:12, 18.

Doktrina ug mga Pakigsaad 63:16

Mahimong putli ako sa akong mga hunahuna ug mga aksiyon.

Sa Doktrina ug mga Pakigsaad 63:16, ang Manluluwas midason unsay Iyang gitudlo sa Bag-ong Tugon—nga ang balaod sa kaputli modumala dili lamang sa atong mga aksiyon apan usab sa atong mga hunahuna (tan-awa sa Mateo 5:27–28). Samtang magbasa ka sa Doktrina ug mga Pakigsaad 63: 16, isulat ang mga pasidaan nga gihatag sa Manluluwas mahitungod sa maulagon nga mga hunahuna. Mahimo usab nga imong pamalandongan ang kaatbang sa matag pasidaan. Pananglitan, unsa ang pipila ka pulong o hugpong sa mga pulong nga kaatbang sa kahadlok? Unsa ang ubang mga panalangin nga nagagikan sa pagkaputli og mga hunahuna ug mga aksiyon?

Daghang mga tawo naghunahuna nga ang mga sumbanan sa Ginoo sa kaputli sa hunahuna ug aksiyon kinaraan o gani malupigon. Unsa ang kalainan ang ikahatag niini kon ang tanang anak sa Dios maningkamot sa pagsunod niini nga balaod? Mahimong mangita ka sa mga tubag niini nga pangutana sa mensahe ni Elder David A. Bednar “Kita Nagtuo sa Pagkaputli” (Liahona, Mayo 2013, 41–44) o sa “Ang imong lawas sagrado” (Alang sa Kalig-on sa mga Kabatan-onan: Usa ka Giya sa Paghimo og mga Pagpili, 23–26). Unsa nga mga mensahe sa paglaom ang imong nakita?

Bisan kon kita nakahibalo sa mga panalangin sa pagkaputli sa atong mga hunahuna ug mga aksiyon, wala kana magpasabot nga sayon kini. Mahimong mogahin ka og panahon sa pagpamalandong unsa ang nakapalisod nimo sa pagtuman sa sumbanan sa Manluluwas sa kaputli—ug unsa ang nakapahimo niini nga sayon. Unsa ang mga sugyot nga imong ipakigbahin sa uban kon unsay buhaton kon ikaw tintalon sa dili takos nga mga hunahuna?

Magsuportahay sa usag usa. Usa sa mahinungdanong mga panalangin sa pagpundok diha sa mga miting sa Simbahan ug sa mga klase mao ang oportunidad nga makakuha og suporta gikan sa isig ka Santos sa atong paningkamot nga mosunod sa Manluluwas. Kadaghanan nato nag-atubang og susama nga mga hagit, ug ang atong komon nga mga kasinatian mahimong usa ka mahinungdanon nga kalig-on. Ayaw kahadlok sa pagdawat nga ikaw adunay mga hagit. Ipakigbahin sa usag usa unsa ang nakatabang nimo sa pagsunod sa mga balaod sa Dios ug pagbuntog sa tintasyon.

Tan-awa usab sa Doktrina ug mga Pakigsaad 121:45; Mga Hilisgotan ug mga Pangutana [Topics and Questions], “Hiyas [Virtue],” Librarya sa Ebanghelyo [Gospel Library]; “Standards: Sexual Purity and Modesty—True Confidence” [Mga Sumbanan: Sekswal nga Kaputli ug Kaligdong] (video), Librarya sa Ebanghelyo; AddressingPornography.ChurchofJesusChrist.org.

Standards: Sexual Purity and Modesty - True Confidence

Two young women share their secret for confidence and self-worth: the companionship of the Holy Ghost.

Doktrina ug mga Pakigsaad 63:58–64

Ang sagrado nga mga butang kinahanglang tahoron sa balaanong paagi.

Ang mga baroganan sa Doktrina ug mga Pakigsaad 63:58–64 naglangkob og daghan pa kaysa pagpasipala sa ngalan sa Ginoo. Unsa ang ubang sagradong mga butang nga “gikan sa kahitas-an,” o gikan sa Dios? Para nimo, unsa ang kahulogan sa pagpamulong niining mga butanga “sa mainampingong paagi”?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Ezra Booth

• Mga Kapanguhaan sa Kasaysayan sa Doktrina ug mga Pakigsaad: William W. Phelps

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 60:4; 61:1–2, 36; 62:1

Ang mga kasulatan nagtudlo mahitungod ni Jesukristo

• Tingali imong masulat ang pipila sa mga pamahayag mahitungod sa Manluluwas nga makita sa Doktrina ug mga Pakigsaad 60–62 sa gamay nga piraso sa papel. Dayon ang imong mga anak mahimong mopahaom niini nga mga pamahayag ngadto sa mga hulagway ni Jesus gikan sa Iyang yutan-ong pagpangalagad (tan-awa sa Pakete sa mga Hulagway sa Ebanghelyo, mga nu. 34–61) nga nagpakita niini nga mga hiyas. Sa unsa nga paagi Siya mopaila sa Iyang Kaugalingon kanato karon?

  

Detalye gikan sa For This Purpose [Alang Niini nga Katuyoan], ni Yongsung Kim

Doktrina ug mga Pakigsaad 60:7; 61:1–2; 62:1

Ang Ginoo mopasaylo nako kon ako maghinulsol.

• Samtang magbasa ka sa Doktrina ug mga Pakigsaad 60:7; 61:2 uban sa imong mga anak, tabangi sila sa pagpangita og mga pulong nga komon niini nga mga bersikulo. Pahinumdomi sila nga kini nga mga pagpadayag gihatag ngadto ni Joseph Smith ug sa ubang mga lider sa Simbahan. Unsa ang gusto sa Ginoo nga ilang mahibaloan? Mahimo usab nga maghisgot ka mahitungod kon unsay bation sa Manluluwas kanato sa panahon nga kita makahimo og mga sayop ug unsa ang gipasabot sa paghinulsol. Sumala sa Doktrina ug mga Pakigsaad 62:1, sa unsang paagi si Jesus motabang nato kon kita tintalon?

Doktrina ug mga Pakigsaad 62:3, 9

Gusto ni Jesukristo nga mopakigbahin ko sa Iyang ebanghelyo.

• Mahimong imong pangutan-on ang imong mga anak unsay ilang ikasulti kon dunay mangutana kanila unsay ilang ganahan ni Jesukristo ug sa Iyang Simbahan. Pagkanta kamong tanan og kanta mahitungod sa pagpakigbahin sa ebanghelyo, sama sa “Gusto Ko Karon nga Mamisyonaryo” (Songbook sa mga Bata, 90), makahatag nila og mga ideya. Basaha ang Doktrina ug mga Pakigsaad 62:3 ug hangyoa ang imong mga anak sa pagpaminaw sa unsay mahitabo kon kita mopakigbahin sa atong mga pagpamatuod. Sa unsa nga paagi nga ang saad sa bersikulo 9 makatabang kon kita mobati nga gikulbaan?

Doktrina ug mga Pakigsaad 63:64

Ako makapakita og balaan nga pagtahod.

• Sa pagpaila sa Doktrina ug mga Pakigsaad 63:64, mahimo kang mokanta og awit mahitungod sa balaan nga pagtahod uban sa imong mga anak, sama sa “Ang Pagtahud Usa ka Gugma” (Songbook sa mga Bata, nu. 12). Dayon mahimo kang maghisgot mahitungod sa lain-laing mga paagi sa pagpakita og balaan nga pagtahod alang sa Langitnong Amahan ug ni Jesukristo.

• Mahimo kang makatabang sa imong mga anak nga makasabot unsa ang balaan nga pagtahod pinaagi sa pagpakigsulti nila mahitungod sa usa ka butang nga espesyal ngadto kanila, sama sa paborito nga dulaan, libro, o habol. Pangutan-a sila giunsa pag-atiman ug pagpanalipod ang mga butang nga espesyal ngadto kanila. Dayon mahimong basahon ninyo pagdungan ang Doktrina ug mga Pakigsaad 63:64. Unsa ang mga butang nga espesyal—o sagrado—ngadto sa Langitnong Amahan? (tan-awa, pananglitan sa, bersikulo 61 ug sa pahina sa kalihokan niining semanaha). Unsaon nato pagtratar kini nga mga butang—sa atong mga pulong ug sa atong mga aksiyon?

Alang sa dugang nga mga ideya, tan-awa ang isyu karong bulana sa Higala nga magasin.

Healing of Elsa Johnson’s Shoulder [Pag-ayo sa Abaga ni Elsa Johnson], ni Sam Lawlor