Hunyo 23–29: “Bililhon … kay sa Katigayonan sa Tibuok Kalibotan”

Doktrina ug mga Pakigsaad 67–70

Gikan niadtong 1828 hangtod sa 1831, si Propeta Joseph Smith nakadawat og daghang pagpadayag gikan sa Ginoo, lakip na sa balaanong tambag alang sa mga indibidwal, mga instruksiyon bahin sa pagdumala sa Simbahan, mga panan-awon sa ulahing mga adlaw, ug daghang makapadasig nga kamatuoran sa kahangtoran. Apan daghan sa mga Santos ang wala makabasa niini. Ang mga pagpadayag wala pa mamantala, ug ang pipila ka mga kopya nga anaa gisulat pinaagi sa kamot sa mga piraso sa papel nga gipang-apod-apod sa mga miyembro ug gidala-dala sa mga misyonaryo.

Dayon, pagka-Nobiyembre 1831, mipatawag si Joseph og usa ka konseho sa mga lider sa Simbahan aron hisgotan ang pagmantala sa mga pagpadayag. Human magtinguha sa kabubut-on sa Ginoo, kining mga lider mihimo og mga plano sa pagmantala sa Basahon sa mga Sugo—ang nag-una sa Doktrina ug mga Pakigsaad karon. Sa wala madugay ang tanan makabasa na alang sa ilang kaugalingon sa pulong sa Dios nga gipadayag pinaagi sa usa ka buhi nga propeta, klaro nga ebidensya nga “ang mga yawe sa mga misteryo sa gingharian sa atong Manluluwas gisalig pag-usab ngadto sa tawo.” Alang niini ug sa daghan pang mga rason, ang mga Santos kaniadto ug karon mikonsiderar niining mga pagpadayag nga “bililhon … kay sa katigayonan sa tibuok Kalibotan” (Doktrina ug mga Pakigsaad 70, ulohan sa seksiyon).

Tan-awa sa Mga Santos, 1:140–43.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 67:1–9; 68:3–6

Ang mga sulugoon sa Ginoo mamulong sa Iyang kabubut-on kon gidasig sa Espiritu Santo.

Ang desisyon sa pagmantala sa mga pagpadayag nga nadawat ni Joseph Smith morag sayon ra, apan ang pipila sa nag-unang mga lider sa Simbahan dili sigurado kon maayo ba kadto nga ideya. Usa nga gikabalak-an adunay kalabotan sa mga diperensya sa pinulongan nga gigamit ni Joseph Smith sa pagsulat sa mga pagpadayag. Ang pagpadayag diha sa seksiyon 67 miabot agig tubag niana nga kabalaka. Unsay imong nakat-onan mahitungod sa propeta sa Ginoo ug sa pagpadayag gikan sa mga bersikulo 1–9? Unsa ang dugang nga mga panabot nga imong naangkon gikan sa 68:3–6?

Giunsa nimo pagkahibalo sa imong kaugalingon nga ang mga pagpadayag nga gihatag sa Dios sa Iyang mga sulugoon tinuod? Mahimo usab nga imong pamalandongan ang mga kasinatian sa dihang imong gibati nga ang Ginoo namulong nganha kanimo pinaagi sa usa sa Iyang mga sulugoon (tan-awa sa Doktrina ug mga Pakigsaad 68:4). Kanus-a ikaw mibati nga “nadasig diha pinaagi sa Espiritu Santo” (bersikulo 3) sa pagsulti og pipila ka butang? Giunsa sa Ginoo nga Siya “anaa uban kaninyo”? (bersikulo 6).

Sa wala pa maimprinta ang Basahon sa mga Sugo, pipila ka lider sa Simbahan mipirma og sinulat nga pagpamatuod nga ang mga pagpadayag sa libro tinuod. Aron makakita og kopya sa ilang pagpamatuod, tan-awa sa “Testimony, circa 2 November 1831,” Revelation Book 1, 121, josephsmithpapers.org.

Doktrina ug mga Pakigsaad 67:10–14

“Padayon diha sa pagpailob.”

Sa unsang paagi nga ang atong mga kasina, kahadlok, ug garbo makapugong kanato nga mas mahiduol sa Ginoo? Unsaon nato pagbuntog sa “kinaiyanhon nga tawo” o “kalibotanon nga hunahuna” aron nga kita “makakita [Kaniya] ug makaila nga [Siya mao]”? (bersikulo 12; tan-awa usab sa Mosiah 3:19). Unsay imong nakita niini nga mga bersikulo nga nakapadasig nimo sa “[pag]padayon diha sa pagpailob hangtod nga kamo mahingpit”? (bersikulo 13).

Doktrina ug mga Pakigsaad 68:25–31

Ako makatabang sa pagsentro sa akong panimalay diha ni Jesukristo.

Ang mga pulong sa Ginoo sa Doktrina ug mga Pakigsaad 68:25–31 piho nga nagpasabot ngadto sa mga ginikanan, apan ginikanan ka man o dili, ikaw makagamit sa Iyang tambag sa paghimo sa imong bahin sa pagsentro sa imong panimalay diha sa doktrina ni Jesukristo. Gilista sa ubos mao ang pipila sa mga baroganan nga gisulti sa Ginoo nga kinahanglan nga itudlo diha sa panimalay. Ikonsiderar unsaon nimo sa paghimo sa matag usa niini nga mahimong kabahin sa pundasyon sa usa ka panimalay nga nakasentro ni Kristo—ang panimalay nga imong gipuy-an karon o sa imong umaabot nga panimalay. Ang mga kapanguhaan ug mga pangutana nga gihatag makatabang.

• Paghinulsol: Tun-i ang Alma 36:17–20, ug obserbahi sa unsa nga paagi si Alma gipanalanginan sa kritikal nga panahon tungod kay ang iyang amahan mitudlo kaniya mahitungod sa maulaong misyon sa Manluluwas. Sa unsa nga paagi ikaw makatabang pagdasig sa imong pamilya nga moduol ngadto ni Jesukristo ug maghinulsol? (tan-awa usab sa 2 Nephi 25:26).

• Hugot nga Pagtuo diha ni Kristo: Basaha ang lima ka sugyot ni Presidente Russell M. Nelson alang sa pagpalambo og hugot nga pagtuo diha sa “Si Kristo Nabanhaw; Ang Hugot nga Pagtuo diha Kaniya Makabalhin og mga Bukid” (Liahona, Mayo 2021, 103). Pamalandongi sa unsa nga paagi kini nga mga sugyot makahimo og kultura sa hugot nga pagtuo sa imong pamilya.

• Bunyag: Rebyoha ang pakigsaad sa bunyag sumala sa gihulagway sa Mosiah 18:8–10, 13. Sa unsa nga paagi nga ang imong mga paningkamot sa pagtuman niini nga pakigsaad makapalig-on sa imong pamilya?

• Gasa sa Espiritu Santo: Tun-i ang mga imbitasyon sa mga pahina 17–19 sa Alang sa Kalig-on sa mga Kabatan-onan: Usa ka Giya sa Paghimo og mga Pagpili. Unsa ang imong gibati nga nadasig nga buhaton sa pagdapit sa impluwensya sa Espiritu Santo sa imong panimalay?

• Pag-ampo: Unsay imong nakat-onan mahitungod sa gahom sa pag-ampo diha sa panimalay sa “Ang Gugma Gipamulong Dinhi”? (Songbook sa mga Bata, 102). Unsa nga mga panalangin ang gisaad sa 3 Nephi 18:15–21?

• Ang ubang mga baroganan makita sa Doktrina ug mga Pakigsaad 68:25–31:

Unsa nga tambag ang imong ihatag ngadto sa usa ka tawo kansang mga sakop sa pamilya wala mosuporta sa ilang mga paningkamot sa pagpalig-on sa hugot nga pagtuo diha ni Kristo?

Tan-awa usab sa “Ang Pamilya: Usa ka Pamahayag ngadto sa Kalibotan,” Librarya sa Ebanghelyo; Mga Hilisgotan ug mga Pangutana [Topics and Questions], “Pagkaginikanan [Parenting],” Librarya sa Ebanghelyo [Gospel Library]; Dieter F. Uchtdorf, “Si Jesukristo Mao ang Kalig-on sa mga Ginikanan,” Liahona, Mayo 2023, 55–59.

Doktrina ug mga Pakigsaad 69:1

“Ang matinuoron ug matinud-anon” nga mga higala motabang nako sa pagsunod ni Jesukristo.

Ngano kaha sa imong hunahuna nga “kaalam diha [sa Ginoo]” alang sa usa ka tawo nga “matinuoron ug matinud-anon” sa pagkuyog ni Oliver Cowdery sa buluhaton nga gihulagway niini nga bersikulo? Sa unsang paagi kini nga baroganan magamit nimo?

Tabangi ang mga tigkat-on sa pagbayaw sa usag usa. Ang matag indibidwal sa imong klase usa ka buhong nga tinubdan sa pagpamatuod, mga panabot, ug mga kasinatian sa pagsunod sa ebanghelyo. Dapita sila sa pagpakigbahin ug pagbayaw sa usag usa.

Doktrina ug mga Pakigsaad 70:1–4

Ako adunay tulubagon sa mga pagpadayag nga gihatag sa Ginoo kanato.

Ang Ginoo mihatag sa pihong mga elder og responsibilidad sa pagdumala sa pagmantala sa mga pagpadayag. Bisan tuod nga ikaw wala nianang piho nga responsibilidad, unsa ang imong pagkatinugyanan o responsibilidad “sa mga pagpadayag ug sa mga sugo”? (bersikulo 3).

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: William W. Phelps

• Basahon sa mga Kasugoan

• Mga Pagpadayag ni Joseph Smith

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 67

Ang Basahon ni Mormon nagtudlo kanako mahitungod ni Jesukristo.

• Sultihi ang imong mga bata mahitungod kon sa unsa nga paagi nga ang mga pagpadayag ni Joseph Smith naimprinta sa usa ka basahon (tan-awa sa “Kapitulo 23: Ang Doktrina ug mga Pakigsaad,” sa Doktrina ug mga Pakigsaad,, 90–92, o sa tukma nga bidyo sa Gospel Library). Tabangi sila nga makahinumdom sa pipila sa mga butang nga inyong nakat-onan mahitungod ni Jesukristo gikan sa Doktrina ug mga Pakigsaad niining tuiga. Mahimo usab ikaw nga mopakigbahin sa usag usa og pipila imong paborito nga mga bersikulo gikan sa Doktrina ug mga Pakigsaad.

  Chapter 23: The Doctrine and Covenants: August–November 1831

• Mahimo usab nga imong ipakita sa imong mga anak ang Biblia, Basahon ni Mormon, Doktrina ug mga Pakigsaad, ug ang Perlas nga Labing Bililhon ug makigsulti nila mahitungod kon sa unsa nga paagi nga sila lahi ug sa unsa nga paagi sila pareha (tan-awa sa mga deskripsiyon niini nga mga basahon diha sa Ang Giya ngadto sa mga Kasulatan). Unsaon nato sa pagkahibalo nga ang mga kasulatan tinuod? Unsay atong makat-onan gikan sa Doktrina ug mga Pakigsaad 67:4, 9 mahitungod sa mga pagpadayag nga gihatag sa Ginoo ngadto ni Joseph Smith?

Doktrina ug mga Pakigsaad 68:25–31

Ako mahimong bunyagan kon ako mag-edad na og otso anyos.

• Sa Doktrina ug mga Pakigsaad 68:27, ang Ginoo mihatag og detalye kon unsay edad sa tawo nga kinahanglan nga bunyagan. Tabangi ang imong mga anak nga makadiskobre unsay Iyang gisulti. Nganong gusto ni Jesus nga mabunyagan kita? Usa ka kanta sama sa “Bunyag” (Songbook sa mga Bata, 54) makatabang. Gamit ang mga litrato o ang mga bersikulo 25–31 (o ang duha), tabangi ang imong mga anak nga makadiskobre sa mga butang nga gusto sa Ginoo nga makat-onan sa mga bata.

• Basaha uban sa imong mga anak ang mahitungod sa buluhaton nga gihatag sa Ginoo ni Oliver Cowdery sa ulohan nga seksiyon sa Doktrina ug mga Pakigsaad 69. Unsa nga tambag nga gihatag sa Ginoo sa bersikulo 1? Nganong importante man nga makauban sa mga tawo “kinsa matinuoron ug matinud-anon”? Tingali ang imong mga anak makasulti mahitungod sa usa ka tawo nga ilang nailhan kinsa “matinuoron ug matinud-anon.” Panganta og dungan sa kanta nga nag-awhag sa mga bata nga magmatinuoron ug magmatinud-anon sama sa Manluluwas, sama sa “Maninguha Kong Mahimong Mahisama Kang Jesus” (Songbook sa mga Bata,, 40–41). Unsaon man nato sa pagseguro nga kita matinuoron ug matinud-anon ngadto sa Ginoo? Sa unsa nga paagi nga kita Iyang magamit aron sa pagpanalangin sa uban kon kita matinuoron ug matinud-anon?

Alang sa dugang nga mga ideya, tan-awa ang isyu karong bulana sa Higala nga magasin.

Ang Basahon sa mga Sugo, ang nag-una sa Doktrina ug mga Pakigsaad, giimprinta sa imprintahanan nga sama niini.