“Hunyo 30–Hulyo 6: ‘Walay Hinagiban Nga Gihimo batok Kaninyo Nga Mouswag’: Doktrina ug mga Pakigsaad 71–75,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)
“Doktrina ug mga Pakigsaad 71–75,” Dali, Sunod Kanako—Alang sa Panimalay ug sa Simbahan: 2025
I Will Remember the Covenant [Ako Mohinumdom sa Pakigsaad], ni Enrique Manuel Garcia
Hunyo 30–Hulyo 6: “Walay Hinagiban Nga Gihimo batok Kaninyo Nga Mouswag”
Doktrina ug mga Pakigsaad 71–75
Sukad sa bata pa siya, nag-atubang si Joseph Smith og mga kritiko—gani mga kaaway—samtang naningkamot siya sa paghimo sa buhat sa Dios. Apan lisod gayod seguro kadto sa ulahing bahin sa 1831 sa dihang si Ezra Booth misugod sa pagsaway sa Simbahan, tungod kay niini nga sitwasyon ang kritiko usa ka kanhi tumutuo. Nakita ni Ezra ang paggamit ni Joseph sa gahom sa Dios aron ayohon ang usa ka babaye. Gidapit siya nga mouban ni Joseph sa unang pag-survey sa yuta sa Zion didto sa Missouri. Apan sukad niana nawad-an siya og pagtuo ug, sa pagsulay nga daoton ang Propeta, mimantala og sunod-sunod nga mga sulat sa usa ka pamantalaan sa Ohio. Ug ang iyang mga paningkamot daw misalir, tungod kay ang “dili mahigalaon nga mga pagbati … milambo batok sa Simbahan” diha sa dapit (Doktrina ug mga Pakigsaad 71, ulohan sa seksiyon). Unsay angay nga buhaton sa mga tumutuo sa sitwasyon nga sama niana? Samtang walay usa ka husto nga tubag alang sa matag sitwasyon, morag sa kasagaran—lakip na niini nga sitwasyon niadtong 1831—ang usa ka bahin sa tubag sa Ginoo mao ang pagpanalipod sa kamatuoran ug pagkorehir sa mga sayop pinaagi sa “pagpahayag sa ebanghelyo” (bersikulo 1). Oo, ang buhat sa Ginoo kanunay nga adunay mga kritiko, apan sa kataposan, “walay hinagiban nga gihimo batok [niini] nga mouswag” (bersikulo 9).
Tan-awa sa “Ezra Booth and Isaac Morley,” sa Revelations in Context, 134.
Mga Ideya alang sa Pagkat-on diha sa Panimalay ug sa Simbahan
Ang Espiritu mogiya kanako samtang ako mopahayag sa ebanghelyo sa Manluluwas.
Makasamok kaayo kini kon ang mga tawo mosaway o mobugalbugal sa imong pagtuo sa Manluluwas, sa Iyang ebanghelyo, ug sa Iyang Simbahan. Kon mahitabo kana, unsay imong buhaton? Ang susama nga butang nahitabo didto sa Ohio niadtong 1831 (tan-awa sa ulohan sa seksiyon sa Doktrina ug mga Pakigsaad 71). Unsa ang gisulti sa Ginoo nga buhaton ni Joseph Smith ug ni Sidney Rigdon mahitungod niini Doktrina ug mga Pakigsaad 71? Tingali mahimo nimong ilista ang mga instruksiyon nga gihatag sa Ginoo nila ug ang mga panalangin nga Iyang gisaad.
Agi og dugang sa pagtuon sa seksiyon 71, mahimo usab nimong suhiron kon giunsa sa Manluluwas pagtubag ang Iyang mga kritiko atol sa Iyang mortal nga pangalagad. Ania ang pipila ka ehemplo: Mateo 22:15–22; 26:59–64; Juan 10:37–38. Unsa ang imong nakat-onan gikan Kaniya? Unsa nga dugang nga mga ideya ang imong naangkon gikan sa Mateo 18:15; Mga Taga-Efeso 4:31–32; 2 Timoteo 3:12; Santiago 1:19?
Sa unsang paagi kaha nga ang Iyang tambag magamit sa mga sitwasyon nga imong giatubang karon? Mahimo nimong ikonsiderar ang mga paagi sa malinawong pagkorehir sa mga sayop gamit ang imong kaugalingong mga pulong. Pananglitan, mahimo nimong sugdan pinaagi sa pagpahayag og pagtahod sa mga panglantaw sa laing tawo, ug dayon mahimo ka nga mopakigbahin sa mapaubsanon ug mabination nga paagi sa unsay imong gituohan mahitungod ni Jesukristo ug sa Iyang mga pagtulun-an. Sa pagpangandam alang niini nga mga sitwasyon, tingali mahimo nimong praktisan kini nga pamaagi uban sa imong mga higala o mga sakop sa pamilya.
Tan-awa usab sa Mga Hilisgotan ug mga Pangutana [Topics and Questions], “Pagtabang sa Uban gamit ang mga Pangutana [Helping Others with Questions],” Librarya sa Ebanghelyo [Gospel Library]; Dallin H. Oaks, “Paghigugma sa Uban ug Pagpakabuhi nga may mga Panaglahi,” Liahona, Nob. 2014, 25–28; Jörg Klebingat, “Maisogon nga Pagkadisipulo sa Ulahing mga Adlaw,” Liahona, Mayo 2022, 107–10.
Ang Ginoo mopanalangin nako pinaagi sa pangalagad sa mga lider sama sa mga bishop.
Sa dihang si Newel K. Whitney gitawag nga moserbisyo isip bishop, ang iyang mga katungdanan medyo lahi og gamay sa mga bishop karon. Pananglitan, si Bishop Whitney midumala sa pagpahinungod sa kabtangan ug sa pagtugot sa pagpuyo sa yuta sa Zion diha sa Missouri. Apan samtang magbasa ka mahitungod sa iyang calling diha sa Doktrina ug mga Pakigsaad 72, tingali mamatikdan nimo ang pipila ka koneksiyon sa unsay gibuhat sa mga bishop karon—bisan man lang sa diwa, kon dili man sa mga piho, bahin sa ilang mga katungdanan.
Pananglitan, sa unsang mga paagi nga ikaw “mohatag og husay” ngadto sa imong bishop? (bersikulo 5). Sa atong panahon karon, “ang balay tipiganan sa Ginoo” mahimong maglakip sa mga donasyon, serbisyo, ug mga talento sa mga sakop sa ward (tan-awa sa mga bersikulo 10, 12). Sa unsang paagi nga makatampo ka nianang balay tipiganan?
Sa unsang paagi nga ang Ginoo mipanalangin nimo ug sa imong pamilya pinaagi sa serbisyo sa usa ka bishop?
Tan-awa usab sa Quentin L. Cook, “Mga Bishop—Mga Magbalantay sa Panon sa Ginoo,” Liahona, Mayo 2021, 56–60.
Daghan ko og oportunidad sa pagpakigbahin sa ebanghelyo sa Manluluwas.
Sa pagbalik ni Joseph Smith ug ni Sidney Rigdon gikan sa ilang misyonaryo nga buluhaton (tan-awa sa Doktrina ug mga Pakigsaad 71), ang Ginoo misulti nila nga ipadayon ang ilang paghubad sa Biblia (tan-awa sa Giya ngadto sa Mga Kasulatan, “Hubad ni Joseph Smith (HJS),” Librarya sa Ebanghelyo). Apan wala kana magpasabot nga Siya gusto nga ihunong nila ang pagpakigbahin sa ebanghelyo. Human sa tanan, kabahin kini sa kinabuhi sa usa ka disipulo.
Samtang magbasa ka sa Doktrina ug mga Pakigsaad 73, ikonsiderar kon unsaon nimo paghimo sa pagpakigbahin sa ebanghelyo nga usa ka nagpadayon, “praktikal nga buluhaton” (bersikulo 4)—o tinuod—nga bahin sa imong kinabuhi apil sa imong uban pang mga responsibilidad.
Ang pagpakigbahin sa ebanghelyo ni Jesukristo mahimong normal ug natural.
Doktrina ug mga Pakigsaad 75:1–16
“Maghago uban sa inyong gahom … magpahayag sa kamatuoran.”
Ang pagpadayag diha sa seksiyon 75 gipamulong ngadto sa mga tawo kinsa “nakahatag sa [ilang] mga ngalan sa paglakaw sa pagsangyaw sa ebanghelyo [sa Manluluwas]” (bersikulo 2). Ang usa ka paagi sa pagtuon niini nga pagpadayag mao ang paghimo og duha ka lista: (1) kon unsaon ang epektibong pagpakigbahin sa ebanghelyo ug (2) kon unsaon sa Ginoo sa pagpanalangin ug sa pagsuporta nato samtang kita mohimo niini.
Sa imong hunahuna unsay ipasabot sa “magpabilin” o “magtinapulan” sa pagpakigbahin sa ebanghelyo? Morag sama sa unsa man ang “maghago uban sa inyong gahom”? (bersikulo 3).
Tan-awa usab sa “Moadto Ako Bisan Asa sa Pagbuot Mo,” Mga Himno, nu. 168.
Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.
Mga Tawo, Mga Dapit, Mga Panghitabo
Mga Ideya sa Pagtudlo sa mga Bata
Ako makapanalipod sa kamatuoran pinaagi sa pagpakigbahin sa akong pagpamatuod.
-
Mahimo nimong gamiton ang ulohan sa seksiyon sa Doktrina ug mga Pakigsaad 71 o “Kapitulo 25: Si Joseph Smith ug Sidney Rigdon Magmisyon” (diha sa Mga Istorya sa Doktrina ug mga Pakigsaad, 96, o ang katukma nga bidyo diha sa in Librarya sa Ebanghelyo) sa pagtudlo sa mga bata mahitungod sa mga sirkumstansya nga nakapadasig sa seksiyon 71. Dayon tabangi sila sa pagdiskobre sa bersikulo 1 kon unsay gusto sa Ginoo nga buhaton ni Joseph ug ni Sidney mahitungod sa “dili mahigalaon nga mga pagbati” ngadto sa Simbahan. Giunsa Niya sa pagsulti nga Siya motabang nila? Sa unsang paagi kita mamahimong sama ni Joseph ug Sidney?
0:45Chapter 25: Joseph Smith and Sidney Rigdon Go on a Mission: December 1831–January 1832
-
Mahimo usab ninyong kantahon ang usa ka awit nga makapadasig sa imong mga anak nga magmatinuoron ngadto sa Manluluwas, sama sa “Barogan ang Kamatuoran” (Songbook sa mga Bata, 81). Tabangi ang imong mga anak sa pagpraktis kon unsaon sa pagpakigbahin sa unsay ilang nahibaloan mahitungod ni Jesukristo.
Doktrina ug mga Pakigsaad 72:2
Ang Ginoo mitawag og bishop sa pagtabang kanako.
-
Ang pagbasa og dungan sa Doktrina ug mga Pakigsaad 72:2 makamugna og oportunidad sa paghisgot kon ngano nga ang Ginoo naghatag kanato og mga bishop (tan-awa usab sa “Kapitulo 17: Ang Unang mga Bishop sa Simbahan,” diha sa Mga Istorya sa Doktrina ug mga Pakigsaad, 64–66, o sa katukma nga bidyo diha sa Librarya sa Ebanghelyo). Ikaw ug ang imong mga anak mahimong mangita og mga hulagway o mga butang nga nagrepresentar sa mga responsibilidad sa usa ka bishop. Ang hulagway ug pahina sa kalihokan diha sa kataposan niini nga latid naghatag og pipila ka ideya. Dayon mahimo ninyong hisgotan og dungan ang mahitungod sa mga bishop nga inyong nailhan ug sa unsang paagi nga ang Ginoo mipanalangin sa inyong pamilya pinaagi sa ilang serbisyo.
1:45Chapter 17: The First Bishops of the Church: February and December 1831
Motudlo kanunay mahitungod ni Jesukristo. “Bisan unsa pa ang inyong gitudlo, hinumdomi nga kamo sa tinuod nagtudlo mahitungod ni Jesukristo ug unsaon nga mahimong sama Kaniya” (Pagtudlo sumala sa Pamaagi sa Manluluwas, 6). Pananglitan, kon motudlo ka sa imong mga anak mahitungod sa mga bishop, ipasabot og maayo nga sila mga representante ni Jesukristo, gitawag Niya aron sa paghimo sa Iyang buhat (tan-awa sa 1 Pedro 2:25).
Ang Ginoo naghangyo sa mga bishop sa pag-atiman sa mga tawo nga nanginahanglan.
Doktrina ug mga Pakigsaad 75:3
Akong ihatag ang akong labing maayong paningkamot ngadto sa Ginoo.
-
Sa paghisgot mahitungod sa kalainan tali sa “magtinapulan” ug “maghago uban sa [atong] gahom,” tingali mahimong magpili ka og pipila ka buhat sa pagserbisyo o buluhaton sa balay ug dapita ang imong mga anak nga mopakita sa pagbuhat niini nga nagtinapulan ug dayon sa tanan nilang gahom. Sa higayon nga imong basahon ang “dili magtinapulan” diha sa Doktrina ug mga Pakigsaad 75:3, ang imong mga anak mopakita kon unsaon pagbuhat sa buluhaton nga magtinapulan. Sa higayon nga imong basahon ang “apan maghago uban sa inyong gahom,” sila mopakita kon unsaon pagbuhat nga makugihon. Ngano nga importante nga kita mobuhat sa atong labing maayo kon magserbisyo sa Ginoo?
-
Diha sa iyang mensahe nga “Duha ka mga Baroganan alang sa Kaayohan” (Liahona, Nob. 2009, 55–58), si Presidente Dieter F. Uchtdorf misugilon og duha ka istorya mahitungod sa buhat. Tingali mahimo nimo kining ipakigbahin sa imong mga anak ug hisgotan kon unsa kaha ang bation nga masayod nga kita nagtrabaho nga makugihon ug naghimo sa atong labing maayo.
Alang sa dugang nga mga ideya, tan-awa ang isyu karong bulana sa Higala nga magasin.
Recognizing the Tender Mercies in Your Life [Pag-ila sa Malumo nga mga Kaluoy diha sa Imong Kinabuhi], ni Keith Larson