“Hulyo 21–27: Diin ‘Daghan ang Gihatag Daghan ang Gikinahanglan’: Doktrina ug mga Pakigsaad 81–83,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)

“Doktrina ug mga Pakigsaad 81–83,” Dali, Sunod Kanako—Alang sa Panimalay ug sa Simbahan: 2025

Detalye gikan sa Christ and the Rich Young Ruler [Si Kristo ug ang Adunahan nga Batan-ong Magmamando], ni Heinrich Hofmann

Hulyo 21–27: Diin “Daghan ang Gihatag Daghan ang Gikinahanglan”

Doktrina ug mga Pakigsaad 81–83

Niadtong Marso 1832, gitawag sa Ginoo si Jesse Gause nga mahimong magtatambag ni Joseph Smith sa Kapangulohan sa Halangdon nga Pagkapari (gitawag karon og Unang Kapangulohan). Ang Doktrina ug mga Pakigsaad 81 usa ka pagpadayag ngadto ni Brother Gause mahitungod sa iyang bag-ong calling. Apan si Jesse Gause wala moserbisyo sa matinud-anong paagi, mao nga si Frederick G. Williams gitawag aron ipuli niya. Ang ngalan ni Brother Williams mao ang gipuli sa ngalan ni Brother Gause diha sa pinadayag.

Morag gamay ra kana nga detalye, apan nagpasabot og mahinungdanong kamatuoran: kadaghanan sa mga pagpadayag diha sa Doktrina ug mga Pakigsaad gipamulong ngadto sa piho nga mga tawo, apan kanunay kitang makakita og mga paagi sa paggamit niini sa atong kaugalingon (tan-awa sa 1 Nephi 19:23). Kon kita magbasa sa tambag sa Ginoo ngadto ni Frederick G. Williams nga “lig-ona ang mga tuhod nga mahuyang,” makahunahuna kita og mga tawo nga mahimo natong lig-onon (Doktrina ug mga Pakigsaad 81:5). Kon kita magbasa sa pagdapit sa Ginoo sa mga sakop sa Nagkahiusang Kapunongan [United Firm] nga “bugkosa ninyo ang inyong kaugalingon pinaagi niini nga pakigsaad” makahunahuna kita sa atong kaugalingong mga pakigsaad. Ug mabasa nato ang Iyang saad, “Ako … mapugos sa pagtuman kon kamo mobuhat sa unsa nga Ako misulti,” ingon og Siya nakigsulti kanato (Doktrina ug mga Pakigsaad 82:10, 15). Mahimo nato kini tungod kay, sama sa gipamahayag sa Ginoo, “Unsa ang akong isulti ngadto sa usa Ako mosulti ngadto sa tanan” (bersikulo 5).

Tan-awa sa “Newel K. Whitney and the United Firm,” “Jesse Gause: Counselor to the Prophet,” diha sa Revelations in Context, 142–47, 155–57.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 81:4–5; 82:18–19

“Ikaw mobuhat og labing dako nga kaayohan ngadto sa imong mga isigkatawo.”

Diha sa pipila ka tudling sa Doktrina ug mga Pakigsaad 81–83, ang Ginoo nagdapit nato sa pagtabang sa mga tawo sa atong palibot nga nanginahanglan. Ikonsiderar ang pagmarka sa mga tudling kon makit-an nimo kini. Ang usa sa labing mahulagwayon nga mga ehemplo anaa sa Doktrina ug mga Pakigsaad 81:4–5. Ania ang pipila ka pangutana nga makatabang nimo sa pagpamalandong niini nga mga bersikulo:

Unsa ang pipila ka paagi nga ang usa ka tawo mahimong “maluyahon”? Unsa ang ipasabot nga “[mo]tabang” nila? Kanus-a man nga ang Kristohanon nga serbisyo nakatabang nako sa dihang mibati ko og kaluya?
Unsa kahay hinungdan nga ang mga kamot sa usa ka tawo “[ma]wad-an og paglaom”? Unsaon nako sa “[pag]pataas” niana nga mga kamot?
Unsa kaha ang ipasabot sa “mga tuhod nga mahuyang”? Sa unsang paagi kini mapalig-on?

Sa unsang paagi nga ang Manluluwas naghimo niini nga mga butang alang nimo?

Tingali ang pagtuon niining bersikulo nakapahunahuna nimo sa usa ka tawo nga mahimo nimong “tabangan,” “ipataas,” o “lig-onon.” Unsay imong buhaton aron makapangalagad nianang tawhana?

Unsa pa ang imong nakat-onan mahitungod sa pagserbisyo sa uban diha sa Doktrina ug mga Pakigsaad 82:18–19? Mahimo usab nimong tan-awon ang bidyo nga “Teachings of Thomas S. Monson: Rescuing Those in Need” (Gospel Library). Sa unsang paagi nga ang mga miyembro sa ward ni Bishop Monson nagpakita og ehemplo sa unsay gitudlo niini nga mga bersikulo?

Teachings of Thomas S. Monson: Rescuing Those in Need
Bishop Thomas Monson and his ward welcome a poor German family into their community, providing them with housing, warmth, and food for Christmas.

Tan-awa usab sa Jacob 2:17–19; Mosiah 18:8–9; “Works of God” (bidyo), ChurchofJesusChrist.org.

Mga Buhat sa Dios
Duha ka pamilya nagpaambit kon sa unsang paagi nakita nila nga natuman ang mga buhat sa Dios diha sa ilang kinabuhi sa tabang sa mga sakop sa ward diha sa gugma ug pagsabot.

Si Jesukristo didto sa tuburan sa Betsata

Doktrina ug mga Pakigsaad 82:3

Ang Manluluwas daghan og gihatag kanako ug daghan og gikinahanglan gikan kanako.

Ang pagbasa niini nga bersikulo tingali moaghat nimo sa pagrebyo kon unsay gihatag sa Dios kanimo—pisikal ug espirituwal nga mga panalangin. Hinumdomi kini samtang imong basahon ang tibuok seksiyon 82. Unsa ang imong gibati nga gikinahanglan sa Dios kanimo?

Tan-awa usab sa “Kay Gihatagan Ko og Daghan,” Mga Himno, nu. 132.

Doktrina ug mga Pakigsaad 82:8–10

Ang mga sugo mao ang pagpakita og gugma sa Dios alang kanato.

Kon ikaw o laing tawo nga imong nailhan naghunahuna gayod kon nganong naghatag ang Ginoo og daghan kaayong mga sugo, ang Doktrina ug mga Pakigsaad 82:8–10 makatabang. Unsa nga mga ideya gikan niining mga bersikulo ang makatabang nimo sa pagpasabot ngadto sa usa ka tawo kon nganong mipili ka nga mosunod sa mga sugo sa Ginoo? Unsa ang mahimo nimong ikatandi sa mga sugo nga mahimong makatabang? Makapangita ka og dugang nga mga ideya diha sa Doktrina ug mga Pakigsaad 1:37–38; 130:20–21 ug sa bidyo nga “Blessed and Happy Are Those Who Keep the Commandments of God” (Gospel Library). Unsa nga mga kasinatian ang nagtudlo kanimo nga tan-awon ang mga sugo isip mga panalangin?

Blessed and Happy Are Those Who Keep the Commandments of God
Read Elder Keetch's full conference talk here: https://www.lds.org/general-conference/2015/10/blessed-and-happy-are-those-who-keep-the-commandments-of-god?lang=eng&_r=1

Hunahunaa ang pipila sa mga sugo nga gihatag sa Dios kanimo. Unsa ang gitudlo nimo niini nga mga sugo mahitungod Kaniya ug sa Iyang kabubut-on? (tan-awa sa bersikulo 8). Sa unsang paagi nga ang imong kinabuhi naapektohan niini nga mga sugo?

Unsay imong nakat-onan mahitungod sa Ginoo gikan sa bersikulo 10? Sa imong hunahuna unsa ang ipasabot sa Ginoo nga “mapugos”? (tan-awa usab sa bersikulo 15).

Giunsa pagtuman sa Ginoo ang Iyang mga saad diha sa imong kinabuhi? Unsa ang mahimo nimong isulti ngadto sa usa ka tawo nga wala mobati og kadasig sa pagsunod sa mga sugo tungod kay wala nila madawat ang mga panalangin nga ilang gilaoman? Aduna ka bay makita nga makatabang nga mga ideya diha sa mensahe ni Elder D. Todd Christofferson “Ang Atong Relasyon sa Dios”? (Liahona, Mayo 2022, 78–80).

Tan-awa usab sa, “Mga Sugo [Commandments],” Librarya sa Ebanghelyo [Gospel Library].

Doktrina ug mga Pakigsaad 82:10

Ang Ginoo mopanalangin kanato sa Iyang kaugalingong katingalahan nga mga paagi.

Si Sister Virginia H. Pearce, kanhi sakop sa Kinatibuk-ang Kapangulohan sa Young Women, misaysay mahitungod sa usa ka babaye kinsa hilabihan nga nabalaka sa iyang mga anak nga naghimo og dili matarong nga mga pagpili. Nataranta, gisulayan niya ang tanan kutob sa iyang mahunahunaan sa pagpangita sa mga panalangin sa Ginoo alang nila. Agi og dugang sa iyang hugot nga pag-ampo, naghimo siya og medyo lisod nga tumong nga pirme motambong sa templo ug mibati og kaseguroan nga ang Ginoo mopasidungog niining mahinungdanong sakripisyo pinaagi sa pag-usab sa kasingkasing sa iyang mga anak. Ang babaye mi-report:

“Human sa napulo ka tuig nga pirme motambong sa templo ug kanunay nga pag-ampo, masulub-on akong mosulti nga wala mausab ang mga pagpili sa akong mga anak. …

“Apan ako ang nausab. Lahi na ako nga babaye. … Nakabaton ko og mas malumo nga kasingkasing. Napuno ko sa kaluoy. Sa pagkatinuod makahimo ko og dugang pa ug nawala na nako ang kahadlok, kabalaka, kahasol, pagmahay, ug kakuyaw. Giundangan nako ang paglimitar sa akong panahon ug nakahimo nga mag-agad sa Ginoo. Ug nasinati nako ang kanunay nga mga manipestasyon sa gahom sa Ginoo. Siya nagpadala og malumo nga mga kaluoy, ginagmay nga mga mensahe nga nagpakita sa iyang gugma alang nako ug sa akong mga anak. Ang akong mga gilaoman nausab. Imbes maglaom nga mausab ang akong mga anak, naglaom ako niining kanunay nga malumong mga kaluoy ug napuno ko sa pasalamat alang niini. …

“Ang akong mga pag-ampo nausab. Ako mopahayag og mas dakong gugma ug ako mas mapasalamaton. … Ang Ginoo maglihok sa talagsaong mga paagi, ug tinud-anay akong napuno sa kalinaw nga lapas pa sa tanang panabot” (sa “Prayer: A Small and Simple Thing,” At the Pulpit [2017], 288–89).

Doktrina ug mga Pakigsaad 83

“Ang mga biyuda ug ang walay mga ginikanan pagahatagan.”

Niadtong Abril 1832, sama sa gimando sa Ginoo, mibiyahe si Joseph Smith og dul-an sa 800 ka milya aron bisitahan ang mga Santos nga nagpundok didto sa Missouri (tan-awa sa Doktrina ug mga Pakigsaad 78:9). Samtang anaa siya didto, mibisita siya sa usa ka komunidad diin ang pipila ka mga biyuda nag-inusarang miatiman sa ilang mga anak. Apil nila mao sila si Phebe Peck ug Anna Rogers, kinsa personal nga nailhan sa Propeta. Didto sa Missouri sa mga 1830, ang mga balaod sa estado naghatag sa mga biyuda og limitado nga mga katungod sa kabtangan sa namatay na nilang mga bana. Unsa ang imong nakat-onan gikan sa seksiyon 83 kon unsay gibati sa Ginoo mahitungod sa mga biyuda ug sa walay mga ginikanan? Aduna ka bay nailhan nga ingon niini ang sitwasyon nga makabenepisyo tungod sa imong gugma o pag-atiman? Unsa ang pipila ka paagi nga makapakigbahin ka sa unsay anaa kanimo ngadto sa mga biyuda, walay mga ginikanan, nag-inusara nga mga inahan, ug sa uban nga nanginahanglan?

Tan-awa usab sa Isaias 1:17; Santiago 1:27.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 81:3

Ako makaampo sa Dios “sa dayag ug diha sa [akong] kasingkasing.”

Samtang magbasa ka sa Doktrina ug mga Pakigsaad 81:3 uban sa imong mga anak, tabangi sila sa paghunahuna og nagkalain-laing “publiko” ug “pribado” nga mga dapit diin mahimo sila nga mag-ampo. Mahimo usab ninyong paminawon o kantahon ang usa ka himno mahitungod sa pag-ampo, sama sa “Hilom nga Pag-ampo” (Mga Himno, nu. 86). Mopakigbahin sa usag usa og usa ka butang gikan sa himno nga nagtudlo og importante nga kamatuoran mahitungod sa pag-ampo. Mahimo usab nimong hisgotan ang mahitungod sa pagpakigsulti nga may balaang pagtahod ngadto sa Langitnong Amahan.
Sa pag-awhag sa imong mga anak nga mag-ampo diha sa ilang mga kasingkasing, mahimo nimo silang hatagan og mga papel nga porma og kasingkasing ug dapita sila sa pagdrowing o pagsulat og usa ka butang nga gusto nilang iampo ngadto sa Langitnong Amahan. Pagpamatuod nga ang Langitnong Amahan nahibalo sa unsay atong gihunahuna ug gibati ug Siya makadungog sa atong mga pag-ampo bisan kon dili nato kini isulti og kusog. Mahimo ka nga mopakigbahin nila og usa ka kasinatian sa dihang nag-ampo ka diha sa imong kasingkasing ug ang Langitnong Amahan nakadungog nimo.

Doktrina ug mga Pakigsaad 81:5

Gusto sa Ginoo nga ako motabang sa mga tawo nga nanginahanglan.

Uban sa imong mga anak, drowinga ang mga hulagway sa mga kamot ug mga tuhod, ug hangyoa ang mga bata sa pagpangita niini nga mga bahin sa lawas diha sa Doktrina ug mga Pakigsaad 81:5. Unsa ang gisugo sa Ginoo nga atong buhaton dinhi niini nga bersikulo? Mahimo kamong mopakigbahin sa usag usa og pipila ka paagi nga ang mga tawo milig-on ninyo sa dihang mibati kamo nga “maluyahon” o “mahuyang.” Ang bidyo nga “Pass It On” (ChurchofJesusChrist.org) makahatag sa imong mga anak og mga ideya kon unsaon nga sila makaserbisyo sa uban. Mahimo usab ninyong kantahon ang usa ka awit mahitungod sa pagserbisyo, sama sa “Nakabuhat Ba Ako og Maayo Karon?” (Mga Himno, nu. 135). Ikonsiderar ang pagtabang sa imong mga anak sa paghimo og plano sa pagtabang og labing menos usa lang ka tawo niini nga semana.

2:3
Pass It On
Children around the world have taken President Thomas S. Monson's counsel to find a way to serve others.
Mahimo usab ka nga mogamit og mga hulagway o mga bidyo sa pagsugilon og yano nga mga istorya bahin ni Jesukristo nga nagserbisyo sa uban (tan-awa ang mga hulagway niini nga latid; Libro sa Hulagway sa Ebanghelyo, nu. 41, 42, 46, 47, 55; o usa sa Bible Videos sa Gospel Library). Unsaon nato sa pagsunod sa ehemplo sa Manluluwas sa pagtabang sa uban?

Si Jesukristo uban sa babaye nga Iyang giayo — Makatabang kita sa mga tawo nga nanginahanglan sama sa gihimo sa Manluluwas.

Tabangi ang imong mga anak nga makadawat og ilang kaugalingong inspirasyon. Ang pagtudlo nagpasabot nga mas labaw pa kay sa pagpakigbahin lamang sa kamatuoran—nagpasabot kini sa pagtabang sa ubang tawo nga mahimong mga tigkat-on nga dili magsalig sa uban. Imbes moingon lang sa imong mga anak kon unsaon nga makaserbisyo sila sa uban, pananglitan, awhaga sila sa pagtinguha sa giya sa Ginoo aron masayod kon kinsa ang ilang tabangan.

Doktrina ug mga Pakigsaad 82:10

Ang Langitnong Amahan nagsaad og mga panalangin samtang maningkamot ko sa pagsunod Kaniya.

Ikaw ug ang imong mga anak mahimong mangita diha sa Doktrina ug mga Pakigsaad 82:8–10 og mga tubag sa pangutana nga “Ngano nga ang Langitnong Amahan nagahatag nato og mga sugo?” Mahimo nimong tabangan ang imong mga anak sa paghunahuna og mga ehemplo sa Iyang mga sugo (tan-awa, pananglitan sa Exodo 20:4–17; Mateo 22:37–39; Doktrina ug mga Pakigsaad 89:5–17). Tingali makatabang kon ikaw ug ang imong mga anak mangita o magdrowing og mga hulagway aron morepresentar sa pipila niini. Sa unsang paagi nga ang mga sugo sa Langitnong Amahan nagpakita sa Iyang gugma alang kanato?
Tingali ang usa ka yano nga dula makatabang sa imong mga anak sa pagtan-aw sa mga sugo isip mga panalangin, dili mga palas-anon. Ang usa ka tawo mahimong mohatag og mga instruksiyon aron tabangan ang laing tawo, kinsa gitaptapan ang mga mata, sa pagbuhat sa usa ka butang sama sa paghimo og sandwich o pagdrowing og usa ka hulagway. Paghunahuna og butang nga makalingaw ug mamugnaon! Dayon hisgoti kon sa unsang paagi nga ang mga sugo sa Dios susama sa mga instruksiyon dinhi niini nga dula.

Alang sa dugang nga mga ideya, tan-awa ang isyu karong bulana sa Higala nga magasin.

Si Jesukristo uban sa tawo nga iyang giayo — Paghulagway bahin ni Jesus nga nag-ayo sa usa ka tawo, ni Dan Burr