Going Home [Pagpauli], ni Yongsung Kim

“Hulyo 14–20: “Ako Mogiya Kaninyo”

Doktrina ug mga Pakigsaad 77–80

Wala pa kaabot og duha ka tuig human mapahiuli ang Simbahan ni Jesukristo, kini adunay sobra sa 2,000 ka mga miyembro ug daling milambo. Niadtong Marso 1832 nakigtagbo si Joseph Smith sa ubang mga lider sa Simbahan “aron hisgotan ang mga butang kalabot sa Simbahan”: ang panginahanglan sa pagmantala sa mga pagpadayag, pagpalit og yuta nga kapundokan, ug sa pag-atiman sa mga kabos (tan-awa sa Doktrina ug mga Pakigsaad 78, ulohan sa seksiyon). Aron matubag kini nga mga panginahanglan, mitawag ang Ginoo og pipila ka mga lider sa Simbahan aron himoon ang Nagkahiusang Kapunongan [United Firm], usa ka grupo nga mohiusa sa ilang mga paningkamot sa “pagpadayon sa kahimoan” sa Ginoo (bersikulo 4) niining mga dapit. Apan bisan sa maong pang-administratibang mga butang, ang Ginoo nakatutok diha sa mga butang sa kahangtoran. Sa kataposan, ang katuyoan sa imprintahanan o usa ka balay tipiganan—sama sa uban pa diha sa gingharian sa Dios—mao ang pag-andam sa Iyang mga anak aron madawat ang “usa ka dapit diha sa celestial nga kalibotan” ug “ang mga katigayonan sa kahangtoran” (mga bersikulo 7, 18). Ug kon kadtong mga panalangin lisod masabtan sa pagkakaron, taliwala sa nagkapuliki nga inadlaw-adlaw nga kinabuhi, mipasalig Siya kanato, “Paglipay, kay Ako mogiya kaninyo” (bersikulo 18).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 77

Ang Dios mohatag og kahibalo ngadto sa mga tawo kinsa nagtinguha niini.

Samtang sila si Joseph Smith ug Sidney Rigdon nagtrabaho sa dinasig nga hubad sa Biblia, sila adunay mga pangutana mahitungod sa basahon sa Pinadayag, sama sa daghan nga mga tawo. Ug sumala sa nahibaloan kaayo ni Joseph, kon siya nakulangan og kaalam, siya makapangutana sa Dios. Ang mga panabot nga iyang naangkon anaa sa Doktrina ug mga Pakigsaad 77. Samtang magbasa ka niini nga seksiyon, ikonsiderar ang pagsulat sa imong mga panabot sa may kalabotan nga mga kapitulo sa basahon sa Pinadayag. Unsay imong nakat-onan gikan sa imong pagtuon mahitungod sa pagdawat og pagpadayag?

Translation of the Bible [Hubad sa Biblia], ni Liz Lemon Swindle

Doktrina ug mga Pakigsaad 78

Unsa man ang Nagkahiusang Kapunongan?

Ang Nagkahiusang Kapunongan gi-establisar aron sa pagdumala sa mga kalihokan sa Simbahan sa pagmantala ug pagnegosyo didto sa Ohio ug Missouri. Naglangkob kini nilang Joseph Smith, Newel K. Whitney, ug uban pang mga lider sa Simbahan nga mihiusa sa ilang mga kapanguhaan aron matubag ang temporal nga mga panginahanglan sa nagtubo nga Simbahan. Walay swerte, ang Nagkahiusang Kapunongan nalubong sa utang ug nabungkag niadtong 1834 sa dihang ang mga utang dili na mabayaran.

Tan-awa usab sa “Newel K. Whitney and the United Firm [Newel K. Whitney ug ang Nagkahiusang Kapunongan],” sa Revelations in Context, 142–47; Church History Topics, “United Firm (‘United Order’),” Gospel Library.

Doktrina ug mga Pakigsaad 78:1–7

Makatabang ko sa “pagpadayon sa katuyoan” sa Simbahan.

Ang Ginoo misulti ni Joseph Smith ug sa ubang mga lider sa Simbahan nga ang pagdumala og usa ka balay tipiganan ug imprintahanan makatabang sa “pagpadayon sa kahimoan, nga inyong nadawat” (Doktrina ug mga Pakigsaad 78:4). Unsa ang imong masulti nga mao ang “kahimoan” sa Simbahan sa Manluluwas? Pamalandongi kini samtang magbasa ka sa Doktrina ug mga Pakigsaad 78:1–7. Unsa ang ubang mga paagi nga imong matabang nga matuman kini nga kahimoan—lakip diha sa imong pamilya?

Tan-awa usab sa Kinatibuk-ang Tamdanan nga Basahon, 1.2.

Doktrina ug mga Pakigsaad 78:17–18

Ang Ginoo mogiya kanako.

Ngano kaha nga ang Ginoo motawag man usahay sa Iyang mga sumusunod nga “gagmay nga mga bata”? (Doktrina ug mga Pakigsaad 78:17). Kanus-a ikaw mibati sama sa usa ka gamay nga mga bata, tingali tungod sa butang nga “[ikaw] wala pa gihapon makasabot” o “dili makaantos”? (mga bersikulo 17–18). Unsa ang imong nakit-an niini nga mga bersikulo nga makatabang ninyo nga “maglipay” (bersikulo 18) sa maong mga higayon? Ikonsiderar ang pagpakita og litrato sa imong kaugalingon niadtong bata pa ka ug pamalangdongi sa unsa nga paagi ikaw milambo sa espirituwal nga paagi sukad niadto. O paghunahuna og butang nga lisod alang kanimo sa dihang ikaw gamay pa apan mas sayon na karon. Sa unsa nga mga paagi nga ang Langitnong Amahan ganahan gihapon nimo nga mahimong sama sa usa ka bata? (tan-awa sa Mosiah 3:19). Sa unsa nga paagi Siya “[naggiya] kanimo”?

Doktrina ug mga Pakigsaad 78:19

Ako mahimong modawat sa tanan nga mga butang uban sa pagpasalamat.

Sa pagpangandam sa pagtuon sa Doktrina ug mga Pakigsaad 78:19, ikaw makahimo og lista sa maayong mga butang nga nahitabo kanimo karon. Dayon paghimo og lista sa mga butang nga para nimo ingon og dili gayod mga panalangin. Pamalandongi kini nga mga lista samtang magbasa ka sa Doktrina ug mga Pakigsaad 78:19. Unsa nga kalainan ang mahimo niini sa imong kinabuhi kon imong dawaton ang “tanan nga mga butang uban sa pasalamat—bisan ang mga butang nga ingon og dili mga panalangin?

Aron makat-on pa og dugang kon sa unsa nga paagi nga ang pagpasalamat ngadto sa Dios makaimpluwensya sa imong kinabuhi, suhira kini nga mga kasulatan ug paghimo og lista sa mga kamatuoran nga imong makita: Salmo 107:8–9; Lucas 17:11–19; Mga Taga-Filipos 4:6–7; Mosiah 2:19–24; Alma 34:38; 37:37; Doktrina ug mga Pakigsaa 46:32; 59:7, 15–21.

Ikonsiderar ang pagsiksik sa menashe ni Presidente Dieter F. Uchtdorf nga “Mapasalamaton sa Bisan Unsang Kahimtang” (Liahona, Mayo 2014, 70–77) alang sa tambag mahitungod kon unsaon nga mahimong mapasalamaton. Mahimong mangita ka alang sa susama nga tambag sa bidyo ni “Presidente Russell M. Nelson bahin sa Healing Power of Gratitude” (Gospel Library). Sa unsang paagi nga ang pagpasalamat makaapekto sa imong relasyon ni Jesukristo?

Presidente Russell M. Nelson: Usa ka Propetikanhong Pag-ampo sa Pasalamat, Paglaum, ug Pagkaayo sa Kalibutan

Sa edad nga 96 si Presidente Russell M. Nelson sa Ang Simbahan ni Jesukristo sa mga Santos sa Ulahing mga Adlaw nakakita sa daghang pagsulay. Siya miingon nga dunay yanong solusyo nga makatabang sa pagkaplag og kalipay sa lisud nga panahon—pasalamat.

Pagsiksik ug pagpakigbahin. Kon ikaw gisangonan sa pagtudlo, pangita og mga paagi sa pagtabang sa mga tawo sa pagsiksik sa mga kasulatan o mga pulong sa mga propeta—sa ilang kaugalingon o sa gagmay nga mga grupo—ug sa pagpakigbahin unsay ilang nakat-onan. Pananglitan, niini nga kaihokan ikaw makahatag sa matag indibidwal o grupo og usa ka seksiyon sa mensahe ni Presidente Uchtdorf ug mohangyo kanila sa pagpakigbahin og hugpong sa mga pulong o kapahayag nga ilang gibati nga nagtingob sa unsay iyang gitudlo.

Tan-awa usab sa “Ipha ang Inyong Panalangi,” Mga Himno, nu. 148; Mga Hilisgotan ug mga Pangutana [Topics and Questions], “Pasalamat [Gratitude],” Librarya sa Ebanghelyo [Gospel Library].

Doktrina ug mga Pakigsaad 79–80

Ang tawag sa pagserbisyo sa Dios mas mahinungdanon kay sa asa ko nagserbisyo.

Kalabot sa Doktrina ug mga Pakigsaad 80, si Elder David A. Bednar mitudlo, “Tingali usa sa mga leksyon nga gitudlo sa Manluluwas kanato niini nga pagpadayag mao nga ang buluhaton sa pag-alagad sa piho nga dapit mahinungdanon ug importante apan ikaduha lang sa tawag ngadto sa buhat” (“Gitawag ngadto sa Buhat,” Liahona, Mayo 2017, 68). Unsa nga mga kasinatian ang nakatabang nimo nga makakat-on nga ang mga pulong ni Elder Bednar tinuod? Unsa ang dugang nga mga leksiyon nga imong makita diha sa Doktrina ug mga Pakigsaad 79–80 nga makatabang sa usa ka tawo kinsa mao pa ang pagkadawat og bag-ong calling?

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Stephen Burnett

• Mga Kapanguhaan sa Kasaysayan sa Doktrina ug mga Pakigsaad: Newel K. Whitney

• Ang Hubad ni Joseph Smith sa Biblia

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 77:2

Ang Dios milalang sa matag nilalang sa yuta.

• Samtang ikaw ug ang imong mga anak magdungan sa pagbasa sa Doktrina ug mga Pakigsaad 77:2, mahimong motan-aw mo sa mga litrato sa mga hayop lakip sa mga insekto ug mga langgam. Ang imong mga anak mahimong motudlo ngadto sa mga litrato kon basahon nimo ang mga pulong nga “kahayopan,” “nagkamang nga mga butang,” ug “mga langgam sa kahanginan.” Ipakigbahin sa usag usa kon sa unsang paagi nga ang mga nilalang sa Dios motabang ninyo nga mobati sa Iyang gugma.

Ang Dios milalang sa matag nilalang sa yuta.

Doktrina ug mga Pakigsaad 78:4

Ako makatabang sa “pagpadayon sa kahimoan” ni Jesukristo.

• Aron matabangan ang imong mga anak nga maghunahuna mahitungod sa ilang mga tahas diha sa buhat sa Ginoo, ikonsiderar ang pagbasa uban nila sa Doktrina ug mga Pakigsaad 78:4 aron sa pag-ila sa “kawsa” nga atong “gidawat” (gipili nga suportahan) sa dihang gibunyagan kita. Tabangi sila sa pagpangita diha sa mga tudling sa kasulatan sama niini alang sa posible nga mga tubag: Mosiah 18:8–10; Doktrina ug mga Pakigsaad 20:37; Moises 1:39. Ang imong mga anak tingali malingaw nga magdrama kon unsaon nila nga makatabang sa buhat sa Ginoo. Pananglitan, unsa ang sitwasyon sa “pagtambayayong sa usag usa nga mga alantoson” o “pagdala diha sa [mga kaugalingon] sa ngalan ni Jesukristo”? Unsaon niini sa “pagpadayon sa kahimoan” ni Jesukristo?

Doktrina ug mga Pakigsaad 78:6

Ipakigbahin nako unsay ania nako ngadto sa uban.

• Aron sa pagtudlo unsay gipasabot sa “managsama diha sa yutan-on nga mga butang” (bersikulo 6), mahimong hatagan nimo ang imong mga anak og mga litrato sa mga tawo nga nanginahanglan (gigutom, nasakitan, o gitugnaw) ug mga butang nga makatabang (sama sa pagkaon, usa ka bendahi, o habol). Dayon ang imong mga anak mahimong mopahaom sa mga litrato ngadto sa mga butang. Unsa ang mahimo natong ipakigbahin aron sa pagtabang sa mga tawo nga nanginahanglan?

• Aron makuha ang ubang konteksto alang sa seksiyon 78, basaha uban sa imong mga anak ang mga kapahayag ubos sa unang duha ka litrato sa “Kapitulo 28: Ang Propeta si Joseph Miadto sa Missouri Pag-usab” (sa Mga Istorya sa Doktrina ug mga Pakigsaad, 108, o sa tukma nga bidyo diha sa Gospel Library). Dayon ang imong mga anak mahimong magpakaaron-ingnon nga sila nagtabang og usa ka tawo nga motukod og balay, mopakigbahin og pagkaon, o moserbisyo sa laing paagi.

  Chapter 28: The Prophet Joseph Goes to Missouri Again: March–May 1832

Doktrina ug mga Pakigsaad 78:18

Si Jesukristo mogiya kanako.

• Tingali makalingaw alang sa imong mga anak ang paghisgot mahitungod kon unsay gipasabot nga mahimong usa ka lider ug dayon mogiya sa usa ka kalihokan. Human mobasa og dungan sa Doktrina ug mga Pakigsaad 78:18, mahimo nimong hisgotan ang mga panahon sa dihang nagkinahanglan kita ni Jesus nga mogiya kanato. Ikonsiderar ang pagkatanta sa usa ka kanta sama sa “Mokuyog Ko ni Jesus” (Gospel Library).

Doktrina ug mga Pakigsaad 78:19

Ako makadawat sa “tanan nga mga butang uban sa pagpasalamat.”

• Basaha uban sa imong mga anak ang Doktrina ug mga Pakigsaad 78:19 aron sa pagdiskobre unsa ang gisaad sa Ginoo ngadto sa mga tawo kinsa mapasalamaton. Tabangi ang imong mga anak nga makasabot unsa ang gipasabot sa “gatosan ka pilo-pilo,” tingali pinaagi sa pagpakita og diyotay nga butang ug dayon 100 nianang sama nga butang. Tingali mahimo silang magdrowing og mga litrato sa mga butang nga ilang nadawat gikan sa Ginoo “uban ang pasalamat.”

Alang sa dugang nga mga ideya, tan-awa ang isyu karong bulana sa Higala nga magasin.

God’s Garden [Tanaman sa Dios],, ni Sam Lawlor