Detalye gikan sa The Restoration of the Melchizedek Priesthood [Ang Pagpahiuli sa Melchizedek nga Pagkapari], ni Liz Lemon Swindle

Hulyo 28–Agosto 3: “Ang Gahom sa Pagkadiosnon”

Doktrina ug mga Pakigsaad 84

Sukad nga napahiuli ang pagkapari niadtong 1829, ang unang mga Santos napanalanginan pinaagi sa sagradong gahom sa Ginoo. Sila nabunyagan, nakompirmahan, ug natawag nga moserbisyo pinaagi sa awtoridad sa pagkapari, sama gayod kanato karon. Apan ang pagkaadunay access sa gahom sa pagkapari dili sama nga butang sa hingpit nga pagkasabot niini, ug ang Dios adunay dugang pa nga gusto Niya nga masabtan sa Iyang mga Santos—ilabi na sa umaabot nga pagpahiuli sa mga ordinansa sa templo. Ang 1832 nga pagpadayag bahin sa pagkapari, nga karon mao ang Doktrina ug mga Pakigsaad 84, mipalapad sa panglantaw sa mga Santos kon unsa gayod ang pagkapari. Ug makahimo kini sa samang butang ngari nato karon. Kay adunay daghang angayang makat-onan mahitungod sa balaanong gahom nga naghupot “[sa] yawe sa kahibalo sa Dios,” nga makapakita “[sa] gahom sa pagka-diosnon,” ug nag-andam kanato nga “makakita sa nawong sa Dios, gani sa Amahan, ug mabuhi” (mga bersikulo 19–22).

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 84:17–32

Ako adunay access sa gahom ug sa mga panalangin sa pagkapari sa Dios.

Kon maghunahuna ka sa pulong nga pagkapari, unsay mosantop sa imong hunahuna? Sa unsang paagi nga ang gahom sa pagkapari sa Dios nakaimpluwensya sa imong kinabuhi?

Human makapamalandong niining mga pangutana, mahimo ka nga magtuon sa Doktrina ug mga Pakigsaad 84:17–32, nga mangita kon unsay gusto sa Dios nga imong mahibaloan mahitungod sa Iyang gahom sa pagkapari. Ikonsiderar kon unsaon nimo nga magamit kini nga mga bersikulo aron ihulagway ang pagkapari ug ang katuyoan niini ngadto sa usa ka tawo.

Ang usa ka butang nga imong makaplagan mao nga pinaagi sa mga ordinansa sa pagkapari “ang gahom sa pagkadiosnon gipakita” (tan-awa sa mga bersikulo 19–21). Tingali mahimo nimong ilista ang mga ordinansa sa pagkapari nga imong naapilan (ang mga lista diha sa Kiinatibuk-ang Tamdanan nga Basahon, 18.1, 18.2, makatabang). Sa unsang paagi nga kini nga mga ordinansa—ug ang nag-uban nga mga pakigsaad—nagdala og gahom sa Dios nganha sa imong kinabuhi? Unsa kaha ang mahitabo sa kinabuhi kon wala kini?

Si Presidente Nelson mitudlo, “Ang matag babaye ug matag lalaki kinsa mohimo og mga pakigsaad uban sa Dios ug motuman niadto nga mga pakigsaad, ug kinsa takos nga moapil sa mga ordinansa sa pagkapari, direktang makaangkon sa gahom sa Dios” (“Espirituhanon nga mga Bahandi,” Liahona, Nob. 2019, 77). Ikonsiderar ang pagtuon sa mensahe ni Presidente Nelson, nga mangita sa mga paagi nga ikaw makahimo sa “paggamit sa gahom sa Manluluwas sa [imong] kinabuhi.”

Tan-awa usab sa Doktrina ug mga Pakigsaad 25:10, 13, 15; 121:34–37, 41–46; Mga Hilisgotan ug mga Pangutana [Topics and Questions], “Pagkapari [Priesthood],” “Joseph Smith’s Teachings about Priesthood, Temples, and Women,” Librarya sa Ebanghelyo [Gospel Library]; Kinatibuk-ang Tamdanan nga Basahon, 3.6, Librarya sa Ebanghelyo.

Doktrina ug mga Pakigsaad 84:31–44

Ang pagkapari mabatonan pinaagi sa usa ka panumpa ug pakigsaad.

Ang panumpa ug pakigsaad sa pagkapari (tan-awa sa Doktrina ug mga Pakigsaad 84:31–44) espesyal nga magamit sa mga anak nga lalaki sa Langitnong Amahan kinsa giorden ngadto sa usa ka katungdanan sa pagkapari, apan daghan sa gisaad nga mga panalangin niini nga mga bersikulo magamit sa tanang anak sa Dios. Unsa kini nga mga saad, ug unsa ang gihangyo sa Dios nga atong buhaton aron makadawat niini?

Si Elder Paul B. Pieper mitudlo: “Makapainteres nga diha sa panumpa ug pakigsaad sa pagkapari [tan-awa sa Doktrina ug mga Pakigsaad 84:31–44], ang Ginoo migamit sa verb nga pagbaton ug pagdawat. Siya wala mogamit sa verb nga pag-orden. Diha sa templo nga ang mga lalaki ug babaye—mag-uban—moangkon ug modawat sa mga panalangin ug gahom sa Aaronic ug Melchizedek [nga Pagkapari]” (“Gipadayag nga mga Reyalidad sa Pagkamortal,” Liahona, Enero. 2016, 21).

Samtang magtuon ka sa Doktrina ug mga Pakigsaad 84:31–44, pamalandongi kon unsa kaha ang kahulogan sa “pagbaton” ug “pagdawat” sa pagkapari. Unsa ang nakalahi niini kay sa pagkaorden ngadto sa katungdanan sa pagkapari? Unsa pa ang gidapit sa Ginoo nga imong dawaton dinhi niini nga mga bersikulo? Kumusta man ang imong paghimo niana?

Unsay imong nakita nga nakapadasig nimo nga mahimong mas matinud-anon sa pagdawat sa Manluluwas, sa Iyang Amahan, sa Iyang mga sulugoon, ug sa Iyang gahom sa pagkapari?

Tan-awa usab sa Doktrina ug mga Pakigsaad 121:36–46.

Doktrina ug mga Pakigsaad 84:43–61

Ang pagpakabuhi subay sa pulong sa Dios nagdala og kahayag ug kamatuoran sa akong kinabuhi.

Unsa nga mga kamatuoran ang imong nakit-an diha sa Doktrina ug mga Pakigsaad 84:43–61 nga nakatabang nimo nga masabtan kon ngano nga nagkinahanglan ka nga kanunayng magtuon sa pulong sa Dios? Bantayi ang pagkasukwahi tali sa kahayag ug sa kangitngit niining mga bersikulo; sa unsang paagi nga ang imong “makugihon nga pagsunod sa mga pulong sa kinabuhi nga dayon” nagdala og kahayag, kamatuoran, ug “[sa] Espiritu ni Jesukristo” nganha sa imong kinabuhi? (mga bersikulo 43, 45).

Tan-awa usab sa 2 Nephi 32:3.

Itandi ang mga baroganan sa ebanghelyo ngadto sa pamilyar nga mga butang. Aduna ka bay mahunahunaan nga analohiya nga mohulagway sa mga kamatuoran diha sa mga bersikulo 43–44? Pananglitan, sa unsang paagi nga ang pagsunod sa tanang lakang sa usa ka resipe nahisama sa pagsunod sa “matag pulong … sa Dios”?

“Paghatag og makugihon nga pagsunod sa mga pulong sa kinabuhi nga dayon.”

Doktrina ug mga Pakigsaad 84:62–91

Ang Ginoo magauban kanako kon magserbisyo ako Kaniya.

Samtang magbasa ka niining mga bersikulo, maila nimo ang mga paagi nga gisulti sa Ginoo nga Iyang suportahan ang Iyang mga sulugoon. Sa unsa kaha nga paagi nga kining mga saad magamit ngadto sa buhat nga Iyang gihangyo nga imong buhaton? Pananglitan, sa unsang paagi nga kining mga saad sa bersikulo 88 natuman diha sa imong kinabuhi?

Doktrina ug mga Pakigsaad 84:106–110

Ang tanan mahimong makatampo ngadto sa buhat sa Dios.

Unsa ang imong nakat-onan gikan niini nga bersikulo kon sa unsang paagi nga ang Ginoo motuman sa Iyang buhat? Unsa nga tambag ug mga panalangin ang imong nakita? Mahimo usab ka nga maghunahuna kon sa unsang paagi nga ikaw “nahatagan og kaayohan sa tanan nga kaaghop” tungod kay miserbisyo ka uban sa usa ka tawo kinsa “lig-on diha sa Espiritu,” lakip na sa mga tawo sa imong pamilya.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Joseph Smith Jr.

• N. K. Whitney & Co. Tindahan

• Manwal sa Estudyante sa Doktrina ug mga Pakigsaad

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 84:4–5

Ang mga ordinansa sa templo nakatabang nako sa pagpangandam sa pagpuyo pag-usab uban sa Langitnong Amahan.

• Aron matabangan ang imong mga anak nga maghinamhinam nga moadto sa templo, mahimo ka nga maghimo og usa ka puzzle gikan sa hulagway sa usa ka templo. Sa luyo sa matag piraso, mahimo nimong sulatan og usa ka butang nga atong buhaton diha sa templo, sama sa pagpabunyag alang sa mga katigulangan, pagpaselyo ngadto sa atong mga pamilya, ug paghimo og mga pakigsaad ngadto sa Dios. Basaha ang Doktrina ug mga Pakigsaad 84:4–5 uban sa imong mga anak, ug hangyoa sila sa pagpaminaw kon unsay gisugo sa Ginoo nga tukuron sa mga Santos. Samtang ikaw ug ang imong mga anak nagsumpay-sumpay sa puzzle, pagpakigbahin sa usag usa og mga butang nga atong buhaton sa pagpangandam sa pagsulod sa templo.

Doktrina ug mga Pakigsaad 84:19–22

Ako makadawat sa gahom sa Langitnong Amahan pinaagi sa mga ordinansa sa pagkapari.

• Aron matabangan ang imong mga anak nga makasabot kon unsa ang ordinansa, ikonsiderar ang pagtan-aw sa mga hulagway sa pipila ka ordinansa sa pagkapari uban nila, sama sa Libro sa mga Hulagway sa Ebanghelyo, nu. 103–8, o sa pahina sa kalihokan niining semanaha. Hangyoa sila sa paghulagway kon unsa ang nahitabo diha sa matag hulagway. Mahimo dayon ninyong basahon og dungan ang Doktrina ug mga Pakigsaad 84:19–22. Nganong gusto man sa Langitnong Amahan nga kita makadawat niini nga mga ordinansa? Sultihi ang imong mga anak kon sa unsang paagi nga imong gibati ang gahom sa Dios tungod sa mga ordinansa nga imong nadawat ug sa mga pakigsaad nga imong gihimo. (Tan-awa usab sa “Gahom sa Pagkapari, Awtoridad, ug Yawe, Mga” diha sa apendiks A o apendiks B.)

Doktrina ug mga Pakigsaad 84:77

Ako higala ni Jesus kon ako mosunod Kaniya.

• Human sa pagbasa og dungan sa Doktrina ug mga Pakigsaad 84:77, pangutan-a ang imong mga anak kon unsa ang ipasabot nga mahimong usa ka higala. Mahimo kamong maghisgot mahitungod sa inyong buotan nga mga higala. Sa unsang paagi nga gipakita ni Jesus nato nga gusto Siya nga kita mahimong Iyang mga higala? Sa unsang paagi nga kita makapakita nga kita gusto usab niana? Ang usa ka awit sama sa “Maninguha Kong Mahimong Mahisama Kang Jesus” (Songbook sa mga Bata, 40–41) makatabang niini nga panagsultihanay.

Doktrina ug mga Pakigsaad 84:88

Ang Langitnong Amahan motabang sa Iyang mga sulugoon.

• Ang imong mga anak tingali malingaw nga maminaw kon giunsa sa mga misyonaryo sa pagtabang nimo, sa imong pamilya, o sa imong mga katigulangan sa pagdawat sa ebanghelyo. Dayon mahimo ninyong basahon ang mahitungod sa usa ka espesyal nga saad nga gihimo sa Ginoo ngadto sa mga misyonaryo diha sa Doktrina ug mga Pakigsaad 84:88. Tingali ang imong mga anak makahunahuna og mga aksiyon nga idungan niini nga bersikulo. Ikonsiderar ang pagpakigbahin mahitungod sa usa ka higayon sa dihang ikaw nagserbisyo sa Ginoo ug mibati nga Siya nagauban kanimo, sumala sa gihulagway diha sa bersikulo 88. Mahimo usab nimong tabangan ang imong mga anak sa paghunahuna og mga paagi nga sila mahimong mga misyonaryo karon. Ipamatuod nga ang Langitnong Amahan motabang nato nga masayod kon unsay isulti sa higayon nga kita makigsulti sa uban mahitungod ni Jesukristo.

Alang sa dugang nga mga ideya, tan-awa ang isyu karong bulana sa Higala nga magasin.

Rome Italy Temple