Ang Tulunghaan sa mga Propeta gihimo niini nga lawak.

Agosto 11–17: “Pagtukod … og usa ka Balay sa Dios”

Doktrina ug mga Pakigsaad 88

Matag karon ug unya, ang Ginoo mohatag nato og daklit nga pagtan-aw sa Iyang walay kinutoban nga “pagkahalangdon ug gahom” (Doktrina ug mga Pakigsaad 88:47) pinaagi sa makapahingangha nga mga pagpadayag. Ang Doktrina ug mga Pakigsaad 88 usa niana nga matang sa pagpadayag—usa ka pagpadayag bahin sa kahayag ug himaya ug mga gingharian nga makapahimong gamay sa atong yutan-ong mga kabalaka kon itandi niini. Bisan kon dili nato masabtan ang tanan, makabantay kita nga adunay mas daghan pa sa kahangtoran kay sa unsay atong nasabtan karon. Siyempre, ang Ginoo wala mopakigbahin niining dagkong mga kamatuoran aron hadlokon kita o mobati kita nga ubos ra. Gani, Siya misaad, “Ang adlaw moabot nga kamo makasabot bisan sa Dios” (bersikulo 49). Siguro alang nianang mahimayaong kataposan nga ang Ginoo misugo sa Iyang mga Santos didto sa Kirtland sa pagtukod sa Tulunghaan sa mga Propeta. “Han-aya ninyo ang inyong mga kaugalingon,” miingon Siya. “Andama ang matag butang nga kinahanglanon; ug pagtukod og … usa ka balay sa Dios” (bersikulo 119). Labaw pa kay sa bisan asa, kini anaa sulod sa balaang balay sa Dios—ug diha sa atong mga panimalay—nga Siya makabayaw sa atong panglantaw lapas pa sa mortal nga kalibotan, “mopakita sa iyang nawong [ngari kanato],” ug moandam kanato aron “makalahutay sa celestial nga himaya” (mga bersikulo 68, 22).

Tan-awa sa Mga Santos, 1:188–194.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 88

Si Jesukristo mitanyag kanako og kalinaw.

Pipila lang ka adlaw human mipasidaan nga ang gubat “ibu-bu diha sa tanan nga mga nasod” (Doktrina ug mga Pakigsaad 87:2), ang Ginoo mihatag og pagpadayag nga gitawag ni Joseph Smith og “dahon sa oliba,” nga mao ang tradisyonal nga simbolo sa kalinaw (Doktrina ug mga Pakigsaad 88, ulohan sa seksiyon; tan-awa usab sa Genesis 8:11). Sa imong kinatibuk-ang pagtuon sa seksiyon 88 niining semanaha, pangitaa ang mga mensahe sa Ginoo sa kalinaw nganha kanimo.

Doktrina ug mga Pakigsaad 88:6–67

Ang kahayag ug balaod nagagikan ni Jesukristo.

Ang mga pulong nga kahayag ug balaod gibalik-balik sa daghang mga higayon diha sa seksiyon 88. Markahi o hinumdomi ang mga bersikulo diin nimo makit-i kining mga pulong diha sa mga bersikulo 6–67, ug isulat kon unsay imong nakat-onan mahitungod sa kahayag ug balaod—ug mahitungod ni Jesukristo. Unsa ang imong gibati nga nadasig nga buhaton aron madawat ang kahayag ug mosunod sa “balaod ni Kristo”? (bersikulo 21).

Tan-awa usab sa Isaias 60:19; Juan 1:1–9; 3 Nephi 15:9; Timothy J. Dyches, “Ang Kahayag Mounong ngadto sa Kahayag,” Liahona, Mayo 2021, 112–15; Sharon Eubank, “Kristo: Ang Kahayag nga Nagdan-ag taliwala sa Kangitngit,” Liahona, Mayo 2019, 73–76.

Ang mga kasulatan naglangkob sa balaod ni Kristo.

Doktrina ug mga Pakigsaad 88:62–64

“Paduol ngari kanako.”

Unsa nga mga kasinatian ang nakapakita kaninyo nga ang mga saad niini nga mga bersikulo tinuod? Unsa ang imong sunod nga lakang sa “pagpaduol ngadto” ni Kristo? Ikonsiderar ang paghimo sa himno nga “Mas Magpaduol Ko Dios Kanimo” (Mga Himno, nu. 55) nga kabahin sa imong pagtuon ug pagsimba.

Doktrina ug mga Pakigsaad 88:67–76

Mamahimo akong limpyo pinaagi sa Pag-ula ni Jesukristo.

Ang sugo sa Ginoo nga “ibalaan ang inyong mga kaugalingon” makita og kaduha diha sa seksiyon 88 (mga bersikulo 68, 74). Unsa sa imong hunahuna ang gipasabot niini nga hugpong sa mga pulong? Mahimo nimong rebyohon ang pipila ka tudling ubos sa “Pagbalaan” diha sa ang Giya ngadto sa mga Kasulatan (Librarya sa Ebanghelyo). Sa unsang paagi kita mahimong balaan? Himoa nga kini nga pangutana mogiya nimo sa pagtuon sa Doktrina ug mga Pakigsaad 88: 67–76, ug irekord ang bisan unsang espirituhanong mga panabot nga imong madawat.

Doktrina ug mga Pakigsaad 88:77–80, 118–26

“Pangitaa ang pagtulun-an, gani pinaagi sa pagtuon ug usab pinaagi sa hugot nga pagtuo.”

Ang Ginoo misulti sa mga Santos sa pagtukod sa “tulunghaan sa mga propeta” sa Kirtland (Doktrina ug mga Pakigsaad 88:137). Kadaghanan sa instruksiyon diha sa seksiyon 88 mitudlo kanila unsaon sa pagbuhat niini. Kini nga instruksiyon makatabang usab nimo sa “pagtukod … og usa ka balay sa pagkat-on” (bersikulo 119) sa imong kaugalingong kinabuhi. Gani, mahimo nimong tan-awon sa mga bersikulo 77–80 ug 118–26 isip mga blueprint sa “pagbag-o sa inyong panimalay [o sa imong kinabuhi] ngadto sa usa ka sentro sa pagkat-on sa ebanghelyo” ug “usa ka santuwaryo sa hugot nga pagtuo” (Russell M. Nelson, “Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 113). Mahimong makapaikag ang pagplano unsay hitsura sa imong personal nga “pagbag-o”, lakip sa hugpong sa mga pulong gikan niini nga mga bersikulo nga imong gibati nga imong gikinahanglan nga gamiton.

Makatabang usab tingali ang pagsuhid niini nga mga pangutana: Ngano nga ang pagkat-on ug edukasyon importante ngadto sa Ginoo? Unsa ang Iyang gusto nga akong tun-an? Unsa ang gusto Niya nga paagi nga ako makat-on? Pangita og mga tubag niini nga mga pangutana diha sa mga bersikulo 77–80 ug sa “Ang kamatuoran mohimo kaninyo nga gawasnon” (Alang sa Kalig-on sa Kabatan-onan: Usa ka Giya sa Paghimo og mga Pagpili, 30–33).

Unsa sa imong hunahuna ang gipasabot sa pagkat-on “pinaagi sa pagtuon ug usab pinaagi sa hugot nga pagtuo”? (bersikulo 118). Unsa nga mga panabot ang imong maangkon gikan sa mensahe ni Elder Mathias Held “Pagpangita og Kahibalo pinaagi sa Espiritu”? (Liahona, Mayo 2019, 31–33).

Tan-awa usab sa Mga Hilisgotan ug mga Pangutana [Topics and Questions], “Pagkaplag sa Kamatuoran ug Paglikay sa Panglingla [Seeking Truth and Avoiding Deception],” Librarya sa Ebanghelyo [Gospel Library]; “A School and an Endowment,” sa Revelations in Context, 174–82.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Newel K. Whitney

• Mga Kapanguhaan sa Kasaysayan sa Doktrina ug mga Pakigsaad: Frederick G. Williams

• Tulunghaan sa mga Propeta

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 88:33

Ang Langitnong Amahan naghatag kanato og maayo nga mga gasa.

• Mahimo kang mosugod og usa ka panaghisgotan mahitungod sa Doktrina ug mga Pakigsaad 88:33 pinaagi sa paghangyo sa mga bata sa paghisgot mahitungod sa mga gasa nga gihatag ngadto nila—kadtong ilang nadawat sa malipayong paagi ug sa uban nga wala nila madawat. Tingali sila mahimong modrama nga nakadawat og gasa uban ang hingpit nga kalipay. Dayon mahimo nimong hisgotan ang mahitungod sa mga gasa nga gihatag sa Langitnong Amahan kanato (sama sa gasa sa Espiritu Santo). Unsaon nato sa pagdawat niini nga mga gasa uban ang hingpit nga kalipay?

Doktrina ug mga Pakigsaad 88:63

Kon mangita ako sa Manluluwas, ako makakaplag Kaniya.

• Ang Doktrina ug mga Pakigsaad 88:63 naglakip og mga aksiyon nga mga pulong nga mahimong makapadasig og pipila ka makalingaw nga mga kalihokan aron sa pag-awhag sa imong mga anak sa pagtinguha sa presensya sa Ginoo sa ilang mga kinabuhi. Pananglitan, ikaw ug ang imong mga anak makahunahuna ba og usa ka dula aron mahisgotan ang hugpong sa mga pulong nga “tinguhaa ako sa makugihon ug ikaw makakaplag kanako”o “panuktok, ug kini pagaablihan”?

Ang mga bata nagkinahanglan og kalainan. “Kadaghanan sa mga bata labing makakat-on kon maapil ang nagkalain-laing mga pamalatian. Pangita og mga paagi sa pagtabang sa mga bata nga magamit ang ilang mga pamalatian sa pagtan-aw, pagdungog, ug paghikap samtang sila nagkat-on. Sa pipila ka mga sitwasyon, mahimo gani ka nga mangita og mga paagi nga malakip ang ilang mga pamalatian sa pangsimhot ug pagtilaw!” (Pagtudlo sumala sa Pamaagi sa Manluluwas, 32).

• Sa paghatag og gibug-aton sa imbitasyon sa Manluluwas nga “[Mo]paduol ngari kanako,” mahimong mohangyo ka og usa ka bata sa paggunit og litrato ni Jesus (sama sa litrato sa kataposan niini nga latid) sa usa ka bahin sa kwarto samtang ang ubang bata mobarog sa laing bahin sa kwarto. Samtang ang imong mga anak maghunahuna sa mga butang nga ilang mahimo aron makapaduol ngadto sa Manluluwas, sila mahimong mohimo og usa ka lakang padulong sa litrato, ug ang bata nga naggunit sa litrato molakang og usa ka lakang paingon sa ubang mga bata. Pakig-istoryahi ang imong mga anak mahitungod kon sa unsa nga paagi ikaw nagpaduol ngadto sa Manluluwas ug sa unsa nga paagi nga Siya mopaduol nganha kanimo. Mahimo usab nga imong kantahon uban nila ang usa ka kanta mahitungod niini nga hilisgotan “Gibati Ko ang Gugma sa Akong Manluluwas” (Songbook sa mga Bata, 42).

Doktrina ug mga Pakigsaad 88:77–80, 118

Gusto ang Langitnong Amahan nga ako makat-on.

• Hangyoa ang imong mga anak sa pagsulti kanimo unsa ang ilang nakat-onan sa eskwelahan o sa Primary. Mahimo usab nga ikaw mopakigbahin og mga butang nga imong nakat-onan. Dayon mahimo nimong ipakita sa imong mga anak ang mga pulong nga unsa, ngano, ug unsaon. Tabangi sila nga mosiksik sa Doktrina ug mga Pakigsaad 88:77–79 sa pagsusi unsa ang gusto sa Ginoo nga atong makat-onan. Dayon tan-awa pagdungan ang bersikulo 80 aron sa pagsusi ngano nga Siya gusto nga kita makat-on ug sa bersikulo 118 sa pagsusi unsaon nato sa pagkat-on.

“Pangitaa ang pagtulon-an … pinaagi sa pagtuon ug usab pinaagi sa hugot nga pagtuo.”

Doktrina ug mga Pakigsaad 88:119

Ang atong panimalay mahimong balaan sama sa templo.

• Samtang magbasa ka sa Doktrina ug mga Pakigsaad 88:119 ngadto sa imong mga anak, sila mahimong maghimo og panting [spire] sa templo gamit ang ilang mga bukton matag higayon nga sila makadungog sa pulong “balay.” Ipasabot nga ang Langitnong Amahan gusto nga si Joseph Smith ug ang mga Santos motukod og usa ka templo, o usa ka “balay sa Dios.”

• Mahimong hangyoon nimo ang imong mga anak sa pagpili og pito ka pulong nga naghulagway sa ilang panimalay. Dayon tabangi sila sa pagpangita, diha sa Doktrina ug mga Pakigsaad 88:119, sa pito ka pulong nga gigamit sa Ginoo sa paghulagway sa Iyang balay. Unsaon nato paghimo ang atong panimalay nga usa ka “balay sa Dios”?

Alang sa dugang nga mga ideya, tan-awa ang isyu karong bulana sa Higala nga magasin.

Be Not Afraid [Ayaw og Kahadlok] ni Michael Malm