Kōm̧eļeļe kōn Campfire on the Missouri [Campfire ioon Missouri], jān Bryan Mark Taylor

Juun 9– 15:“Ij Pād ippān ro Retiljek Iien Otemjej”

Katak im Bujen Ko 60–63

Ilo jinoin O̧kwōj 1831, Josep Smith im elder ro jet an Kabun̄ in raar keppopo n̄an jepļaakļo̧k n̄an Kirtland ālkin juon loļo̧k ekadu n̄an “aelōn̄ in zaion” (Katak im Bujen Ko 59:3). Irooj eaar kōņaan bwe ren kwaļo̧k gospel eo ilo tūreep eo aer (lale Katak im Bujen Ko 52:10), im jet iaer raar kōm̧m̧an āinwōt ilo tiljek. Ak ro jet raar m̧akkoko. “Re ņooje kapeel eo me Iaar leļo̧k n̄an er,” Irooj ekar ba, “kōnke remijak armej” (Katak im Bujen Ko 60:2). Elōn̄ iaad jejeļā en̄jake ko elder rein raar en̄jake. Men̄e jej iakwe gospel in, mijak im pere remaron̄ bōbrae kōj jān ad jeere. Bōtaab Irooj ej tūriam̧o̧. E “ejeļā m̧ōjņo̧ an armej im wāween jipan̄ ro kapo [kōj].” (Katak im Bujen Ko 62:1). Kar kajeplōklōk revelesōn kein n̄an mijenede ro m̧okta rej kallim̧ur ko me remaron̄ jipan̄ kōj eļļā jān ad mijak im likjab: “N̄a imaron̄ kōm̧m̧an bwe kom̧in ekwōjarjar.” “Aolep kanniōk ej ilo peiū.” “Ij pād ippān ro retiljek iien otemjej.” Im “E eo ej tiljek im niknik enaaj anjo̧ ioon laļ.” (Katak im Bujen Ko 60:7; 61:6; 62:9; 63:47.)

Ļōmnak ko n̄an Ekkatak ilo M̧weeo im ilo Kabun̄ in

Katak im Bujen Ko 60; 62

Imaron̄ jeere aō iakwe im naan in kam̧ool kōn Jisōs Kraist.

Ekōjkan an naan in kam̧ool eo am̧ kōn gospel eo āinwōt juon “tōļan,” ak juon mweiuk aorōk jān Anij? Ilo wāween ta jej jet iien “ņooje tōļan eo [ad]”? (Katak im Bujen Ko 60:2; bar lale Matu 25:14–30).

Ta ennaan in kōketak ko jān Irooj kwoj loi ilo jekjōn 60 im 62? Ekōjkan an ennaan kein kalōk lōke eo am̧ n̄an kwaļo̧k gospel eo? Ilo am̧ kejōkļo̧kjen kōn kajjitōk kein, ļōmņak in al ak riit naan ko ilo “I Want to Be a Missionary Now” (Children’s Songbook, 168). Ta eo kwoj ekkatak jān al in an ajri kōn kwaļo̧k gospel eo?

Bar lale “Sharing the Gospel” collection ilo Gospel Library.

Imaron̄ kōnono kōn tōm̧ak eo aō ilo Kraist.

Katak im Bujen Ko 60:2–4; 61:1–2, 20, 36–38; 62:1, 6

Jeje ko rekwojarjar rej katakin kōn Jisōs Kraist.

Ke E eaar katakin mijenede ro an, Irooj eaar kwaļo̧k m̧ool ko raorōk kōn E make. Kappukot m̧ool kein ilo Katak im Bujen Ko 60:2–4; 61:1–2, 20, 36–38; 62:1, 6. Bwebwenato ta ko jān jeje ko rekwojarjar rej kwaļo̧k kōn jerbal im jinōkjeej ko an Rilo̧mo̧o̧r me kwaar loi? (lale, n̄an waanjo̧n̄ak, Jon 8:1–11; Ether 2:14–15).

Katak im Bujen Ko 62

Kāālet ko aō rej aikuj jokkin wōt “ekajet im tōl an Jetōb.”

Irooj ej letok tōl kōn m̧ool im pedped ko indeeo, bōtaab E ekutkut an kōtļo̧k bwe jen kāālet kōm̧elele ko kōn wāween ad jerbal ioon pedped kein. Ekōjkan am̧ lo pedped in katak in kar kōmeļeļeik ilo Katak im Bujen Ko 62? (lale barāinwōt Katak im Bujen Ko 60:5; 61:22). Ekōjkan am̧ kar loe pedped in katak in ilo mour eo am̧? Etke em̧m̧an n̄an kōj bwe jen kōm̧m̧ane kāālet ko ijelo̧kin kōtmane bwe Anij en kwaļo̧k ta jen kōm̧m̧ane?

Bar lale Ether 2:18–25; Katak im Bujen Ko 58:27–28.

Katak im Bujen Ko 63:7–12

Kōkaļļe ko rej itok jān tōmak im ankilaan Anij.

Ilo jem̧ļo̧kin laajrak in, ewōr juon kōmeļeļe in juon kabwilōn̄lōn̄ me ekar lukkuun im̧we Ezra Booth: pein Elsa Johnson eaar menin bwilōn̄ bwe eaar mo. Ālkin kar loe mennin, Ezra eaar kōņaan in peptaij. Ijoke, ium̧win jejjo allōn̄, eaar jako tōmak eo an Ezra im eaar jum̧ae Rikanaan eo. Ekōjkan an menin kar waļo̧k, ļōmņak kōn kabwilōn̄lōn̄ eo eaar kam̧oole?

Kōļmenļo̧kjeņ kōn menin ilo am̧ riiti Katak im Bujen Ko 63:7–12. Ta m̧ool ko kwoj ekkatak kaki kōn kakōļļe ko im tōmak?

Lale barāiniwōt Matu 16:1–4; Jon 12:37; Mormon 9:10–21; Ether 12:12, 18.

Katak im Bujen Ko 63:16

Imaron̄ erreo ilo lōmņak ko im m̧akūtkūt ko aō.

Ilo Katak im Bujen Ko 63:16, Rilo̧mo̧o̧r eo ej kapen ta eo E ekar katakin ilo Kallim̧ur Ekāāl—bwe kien erreo ej aikuj kakien ejjab m̧akūtkūt ko ad wōt ak bar ļōm̧ņak ko ad (lale Matu 5:27–28). Ilo am̧ riiti Katak im Bujen Ko 63:1, je kakkōl ko Rilo̧mo̧o̧r eo ej letok kōn kōļmenļo̧kjen ko rettoon. Kwomaron̄ bar kejōkļo̧kjen kōn oktak in kajojo kakkōl kein. N̄an waanjon̄ak, ta jet iaan naan ko ak eoon ko me rej jum̧ae mijak? Ta kōjeraam̧m̧an ko jet rej itok ilo aō ļōmņak im jerbal ko rerreeo?

Elōn̄ armej rej ļōmņak jon̄ak ko an Irooj kōn erreo ilo ļōmņak im jerbal rōm̧ōr ak rejjab jerbal. Ta oktak eo enaaj kōm̧m̧an n̄e aolep ajri ro nejin Anij ren kar kajjieon̄ in mour kōn kien in? Kwomaron̄ kappukot uaak ko an kajjitōk in ilo enaan eo an Elder David A. Bednar “We Believe in Being Chaste” (Liahona, May 2013, 41–44) ak “Ānbwinūm̧ ekwojarjar” (N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko, 23–26). Ta ennaan ko an kōjdatdikdik kwoj loi?

Mekarta n̄e jejeļā ta kōjeraam̧m̧an ko an erreo ilo kōļmenļo̧kjen im m̧akūtkūt, ejjab meļeļein ke epidodo. Kwoj maron̄ bōk jidik iien n̄an kejōkļo̧kjen kōn ta ej kōm̧m̧an bwe en pen am̧ kōjpārok jon̄ak eo an Rilo̧mo̧o̧r kōn erreo—im ta eo ej kapidodoikļo̧k. Ta mennin jipan̄ ko kwoj maron̄ jeere ippān ro jet kōn ta kwoj maron̄ kōm̧m̧ane n̄e kwoj po ilo ļōm̧ņak ko rejjab erreo?

Jipan̄ doon. Juon iaan kōjeraam̧m̧an ko reļļap in kweilo̧k ippān doon ilo kweilo̧k ko an Kabun̄ im kūlaaj ko ej iien em̧m̧an eo n̄an jipan̄ Rikwojarjar ro jet m̧ōttad ilo kijejeto ko ad n̄an ļo̧o̧r Rilo̧mo̧o̧r eo. Elōn̄ iaad jej jelmae apan̄ ko rej āinwōt juon, im en̄jaake ko ad remaron̄ juon kajoor eļap. Jab mijak in kwaļo̧k ke ewōr am̧ apan̄. Jeer ippān doon ta ko rej remaron̄ jipan̄ eok mour kōn kakien ko an Anij im eļļa jān mennin kapo.

Bar lale Katak im Bujen Ko 121:45; Topics and Questions, “Virtue,” Gospel Library; “Standards: Sexual Purity and Modesty—True Confidence” (video), Gospel Library; AddressingPornography.ChurchofJesusChrist.org

Standards: Sexual Purity and Modesty - True Confidence

Two young women share their secret for confidence and self-worth: the companionship of the Holy Ghost.

Katak im Bujen Ko 63:58–64

Men ko rekwojarjar rej aikuj kōm̧m̧an kōn kautiej.

Pedpedin katak ko ilo Katak im Bujen Ko 63:58–64 reļļapļo̧k jān ba pata ņae etan Irooj. Ta men ko jet rekwojarjar rej itok “jān lan̄,” ak jān Anij? Ta meļeļein menin n̄an kwe n̄an kōnono kōn men kein “ilo kōjpārok”?

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Katak im Bujen Ko 60:4; 61:1–2, 36; 62:1

Jeje ko rekwojarjar rej katakin kōn Jisōs Kraist.

• Bōlen kwoj maron̄ je jet ennaan ko kōn Rilo̧mo̧o̧r loi ilo Katak im Bujen Ko 60–62 ioon mōttan pepa ko. Ajri ro nejūm̧ remaron̄ māāje enaan kein n̄an pija ko an Jisōs jān jerbal eo An ioon laļ (lale Gospel Art Book, nos. 34–61) me ej kwaļo̧k kōn jinōkjej kein. Ewi wāween An kwaļo̧k E make n̄an kōj rainin?

  

Kōmeļeļe ko jān Kōn Jibadbad In, jān Yongsung Kim

Katak im Bujen Ko 60:7; 61:1–2; 62:1

Irooj enaaj jeorļo̧k aō bōd n̄e ij ukeļo̧k.

• Ilo am̧ riiti Katak im Bujen Ko 60:7; 61:2 ippān ajri ro, jipan̄ er pukot naan ko me rej juon wōt ippān eoon kein. Kakeememej er ke kar lilo̧k revelesōn kein n̄an Josep Smith im ritōl ro jet an Kabun̄. Ta eo Irooj ekar kōņaan bwe ren jeļā? Kwoj maron̄ bar kōnono kōn wāween an Rilo̧mo̧o̧r eo en̄jake kōn kōj n̄e jej kōm̧m̧an bōd ko im ta meļeļein n̄an ukeļo̧k. Ekkar n̄an Katak im Bujen Ko 62:1, elmen an Jisōs jipan̄ n̄e jej pād ilo kapo?

Katak im Bujen Ko 62:3, 9

Jisōs Kraist ej kōņaan bwe jen kwaļo̧k gospel eo An.

• Kwoj maron̄ kajjitōk ippān ajri ro ta eo remaron̄ ba n̄e juon armij eaar kajjitōk ippāer ta eo rej iakwe kōn Jisōs Kraist im Kabun̄ eo An kake. Al ippān doon juon al kōn kajedeed gospel eo, āinwōt “I Want to Be a Missionary Now” (Children’s Songbook, 168), emaron̄ leļo̧k aer ļōm̧ņak. Innām kwoj maron̄ riiti Katak im Bujen Ko 62:3 im kajjitōk ippān ajri ro nejūm̧ n̄an ron̄jake ta eo ej waļo̧k n̄e jej jeere naan in kam̧ool ko ad. Ekōjkan an kallim̧ur eo ilo eoon 9 jipan̄ n̄e jej en̄jake ikūmkūm?

Katak im Bujen Ko 63:64

Imaron̄ kautiej.

• N̄an kwaļo̧k kadkad in Katak im Bujen Ko 63:64, kwomaron̄ al juon al kōn kautiej ippān ajri ro nejūm̧, āinwōt “Reverence Is Love” (Children’s Songbook, no. 31). Innām kwomaron̄ kōnono kōn wāween ko n̄an kwaļo̧k kautiej n̄an Jemedwōj Ilan̄ im Jisōs Kraist.

• Kwomaron̄ jipan̄ ajri ro nejūm̧ meļeļe ta in kautiej ilo am̧ kōnono ippaer kōn juon aitōm me eaorōk ippāer, āinwōt juon kein ikkure eo em̧m̧antata, bok, ak juon būļan̄kōj. Kajjitōk ippāer elmen aer lale im kōjpārok men ko me raorōk ippāer. Innem kom maron̄ riit ippān doon Katak im Bujen Ko 63:64. Ta men ko raorōk—ak rekwojarjar—n̄an Jemed Ilan̄? (lale, n̄an waanjo̧n̄ak, eoon 61 an wiik in peij in m̧akūtkūt). Elmen ad kea kōn men kein—kōn naan im m̧akūtkūt ko ad?

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.

Healing of Elsa Johnson’s Shoulder,, jān Sam Lawlor