Juu 23–29: “Aorōk … M̧weie ko an Aolepān Laļ”

Katak im Bujen Ko 67–70

Jān 1828 n̄an 1831 eo, Rikanaan Joseph Smith ekar bōk elōn̄ revelesōn ko jān Irooj, ekoba kapilōk eo ekwojarjar n̄an kajjojo armej, naan in kōmeļeļe ko kōn tōl Kabun̄ eo, im visiōn ko an raan ko āliktata, im elōn̄ m̧ool ko an indeeo. Bōtaab elōn̄ wōt iaan Armej ro Rekwojarjar raar jab riiti. Revelesōn ko rejjan̄in kar pojak n̄an aolep, im jet wōt kape ko raar pojak kar jeje kōn pā ioon peba ko me raar litok litak ilubwilijin membōr ro im būkitok būkitak jān mijenede ro.

Innām, ilo Nobōm̧ba 1831 eo, Josep ekar kūr juon ko̧o̧njeļ an ritōl ro an Kabun̄ in n̄an kōnono kōn likūti ilo bok revelesōn ko. Ālkin pukōt ankilan Irooj, ritōl rein raar kōm̧m̧ani karōk ko n̄an printi Bok in Kien ko—me rainin jej ņaetan Katak im Bujen Ko. Ejjab to aolep raar maron̄ in riiti ippāer make naan an Anij kar kwaļo̧ki kōn juon rikanaan emour, kein kam̧ool eo ealikkar “kii ko an ittiņo ko an aelōn̄ in kiin̄ eo an ad Rilo̧mo̧o̧r rej bar juon alen leļo̧k eddo n̄an armej. Kōn un kein im elōn̄ un ko jet, Armej ro Rekwojarjar m̧okta im kiiō rej watōk revelesōn kein bwe rej “aorōk … m̧weie ko an aolepān Laļ” (Katak im Bujen Ko 70, jekjōn eo im̧aan.

Lale Armej ro Rekwojarjar,, 1:140–43.

Ļōmnak ko n̄an Ekkatak ilo M̧weeo im ilo Kabun̄ in

Katak im Bujen Ko 67:1–9; 68:3–6

Rijerbal ro an Irooj rej kōnono kōn kōņaan eo An n̄e Jetōb Kwojarjar ej im̧we er.

Jokāālet eo n̄an likūt ilo bok in revelesōn ko kar bōke jān Joseph Smith eaar āinwōt juon eo epidodo, bōtaab jet iaan ritōl ro an Kabun̄ in m̧okta raar jab lo bwe ekar juon ļōmņak em̧m̧an. Juon n̄ūrbōktak eaar aikuj in kōm̧m̧ane kōn jab jetjet ko ilo wāween an Joseph Smith kar je revelesōn ko. Revelesōn eo ilo jekjōn 67 eaar itok n̄an uwaake n̄ūrbōktak eo. Ta ko kwoj ekkatak kōn rikanaan im revelesōn ko an Irooj jān eoon ko 1–9? Ta kakobaba in kōļmenļo̧kjeņ ko kwoj būki jān 68:3–6?

Ekōjkan am̧ kar jeļā ippam̧ make ke revelesōn ko Anij ekar letok n̄an rijerbal ro An rej m̧ool? Kwomaron̄ barāinwōt kōļmenļo̧kjeņ kōn iien ko rem̧m̧an kwaar en̄jaaki ke Irooj eaar kōnono n̄an eok jān juon iaan rijerbal ro An (lale Katak im Bujen Ko 68:4). N̄āāt eo em̧ōj am̧ kar en̄jake “kōm̧akūtkūt jān Jetōb Kwōjarjar” (eoon 3) n̄an ba juon men? Ekōjkan an kar Irooj “jutak ippemi”? (eoon 6).

M̧okta jān an kar būriin Bok in Kien ko, ritōl ro jet an Kabun̄ in raar jaini juon naan in kam̧ool kar je bwe revelesōn ko ilo bok eo raar m̧ool. N̄an lale kape in naan in kam̧ool ko aer, lale “Testimony, circa 2 November 1831,” Revelation Book 1, 121, josephsmithpapers.org.

Katak im Bujen Ko 67:10–14

“Wōņm̧aanļo̧k ilo kijenmij.”

Ekōjkan an junm̧aad, mijak, im utiej bōro bōbrae kōj jān eddōk ļo̧k im epaakeļo̧k Irooj? Elmen ad anjo̧ jān “armej ilo lukkuun paotokin” ak “jab ekkar n̄an ļōmņak” bwe jen maron̄ “loe [E] im jeļā bwe [E ej]”? (eoon 12; bar lale Mosaia 3:19). Ta eo kwoj loe ilo eoon kein me ej im̧we eok n̄an “wōnm̧aanļo̧k wōt ilo kijenmej m̧ae ami weeppān”? (eoon 13).

Katak im Bujen Ko 68:25–31

Imaron̄ jipan̄ bwe m̧weeo m̧ō en pedped ioon Jisōs Kraist.

Naan ko an Irooj ilo Katak im Bujen Ko 68:25–31 ej iokļo̧k m̧am̧a im baba ro, ijoke men̄e kwe juon m̧am̧a/baba ak jaab, kwomaron̄ kōjerbal kapilōk eo An n̄an kōm̧m̧ane ijo koņaam̧ n̄an kōm̧m̧an bwe m̧weeo m̧ōm̧ en pād ie katak ko Jisōs Kraist. Laajrak in ijin ilaļ ej jet pedped in katak ko Irooj ej ba rej aikuj katakin ilo m̧weeo. Ļōmņak kōn ekōjkan am̧ maron̄ kōm̧m̧an bwe kajjojo jen men kein ren m̧ōttan m̧weeo ej pedped ioon Kraist—m̧weeo kwoj jokwe ie kiiō m̧weeo im̧ōm̧ jekļaj. Kein jipan̄ ko im kajjitōk kein kar litok remaron̄ jipan̄.

• Ukeļo̧k: Ekkatak Alma 36:17–20, im lale ewi wāween kar kōjeraam̧m̧ane Alma ilo juon iien ekar aorōk kōnke jemān ekar katakini e kōn mijen in pinmuur eo an Rilo̧mo̧o̧r. Ekōjkan am̧ maron̄ jipan̄ im̧we baam̧le eo am̧ n̄an aer oktakļo̧k n̄an Jisōs Kraist im ukweļo̧k (bar lale 2 Nipai 25:26).

• Tōmak ilo Kraist: Riiti ļōmņak ko ļalem an Būreejtōn Russell M. Nelson n̄an kōļapļo̧k tōmak ilo “Kraist Em̧ōj an Jerkakpeje; Tōmak ilo E Enaaj Kōm̧akūt Toļ ko” (Liaona, Māe 2021, 103). Kōļmenļo̧kjeņ kōn an ļōmņak kein maron̄ ejaak e juon m̧antin tōmak ilo baam̧le eo am̧.

• Peptaij: Bar etale bujen peptaij eo āinwōt kar kōmeļeļeiki ilo Mosaia 18:8–10, 13. Ekōjkan an kijejeto ko am̧ n̄an dāpiji bujen in maron̄ kōkajoorļo̧k baam̧le eo am̧?

• Mennin Letok eo an Jetōb Kwojarjar: Ekkatak kōn karuwainene eo ilo peij 17–19 in N̄an Kōkajoorļo̧k Jodikdik ro: Juon Tōl n̄an Kōm̧m̧ani Kālet Ko. Ta eo kwoj en̄jake n̄an kom̧m̧ane n̄an karuwaineneik Jetōb Kwojarjar ilo m̧weeo imōm̧?

• Jar: Ta eo kwoj ekkatak kake kōn kajoor in jar ilo im̧weeo ilo “Love Is Spoken Here”? (Children’s Songbook, 190–91). Ta kōjeraam̧m̧an ko Irooj ej kallim̧ur kaki ilo 3 Nipai 18:15–21?

• Ta pedped in katak ko jet kwoj loi ilo Katak im Bujen Ko 68:25–31:

Ta kakpilōlōk ko kwomaron̄ leļo̧k n̄an juon eo me baam̧le eo an ejjab rie kijejeto ko aer n̄an kalōk tōmak ilo Kraist?

Bar lale “Baam̧le Eo: Juon Naan in Kean̄ n̄an Laļ in,” Gospel Library; Topics and Questions, “Parenting,” Gospel Library; Dieter F. Uchtdorf, “Jisōs Kraist Ej Kajoor n̄an Pāāren Ro,” Liaona, Māe 2023, 55–59.

Katak im Bujen Ko 69:1

Ro m̧ōtta re “m̧ool im tiljek” rej jipan̄ eō ļoor Jisōs Kraist.

Etke kwoj ļōmņak ekar “mālōtlōt ilo [Irooj]” n̄an juon eo me e “mool im tiljek” n̄an etal ippān Oliver Cowdery ilo kūr eo kar kōmeļeļeki ilo eoon in? Elmen an pedped in katak in jerbal n̄an kwe?

Jipan̄ rūkkatak ro ļōn̄aj doon. Kajjojo armej ilo kūlaaj ak baam̧le eo am̧ ej juon jipan̄ eļap in naan in kam̧ool, ļōm̧ņak ko, im iien em̧m̧an ko n̄an mour kōn gospel. Kajjitōk ippāer n̄an kwaļo̧k ippān doon im ļōn̄aj doon.

Katak im Bujen Ko 70:1–4

Ij eddoon revelesōn ko Irooj eaar letok.

Irooj ekar leļo̧k n̄an elder ro jet eddo ko n̄an bōk eddo in likūti ilo bok revelesōn ko. Mekarta ejjeļo̧k am̧ eddo, ta eo am̧ jerbal ak eddo “ioon revelesōn ko im kien ko”? (eoon 3).

N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.

Ļōmņak ko n̄an Katakin Ajri ro

Katak im Bujen Ko 67

Katak im Bujen Ko ej katakin eō kōn Jisōs Kraist.

• Jiron̄ ajri ro kōn ewi wāween an revelesōn ko an Joseph Smith kar kōm̧m̧an bwe ren būriin ilo juon bok (lale “Jebta 23: Katak im Bujen Ko,” ilo Bwebwenato ko jān Katak im Bujen Ko, 90–92, ak pija in alooj eo ej iookļo̧k ilo Gospel Library). Jipan̄ er keememej jet iaan men ko kom kar ekkatak kōn Jisōs Kraist jān Katak im Bujen Ko iiō in. Kwomaron̄ bar jeere n̄an doon jet iaan eoon ko rem̧m̧antata ippemi jān Katak im Bujen Ko.

  Chapter 23: The Doctrine and Covenants: August–November 1831

• Kwomaron̄ bar kwaļo̧k n̄an ajri ro nejūm̧ Baibōļ eo, Bok in Mormon, Katak im Bujen Ko, im Bōōr eo Eļap Wōņāān im kōnono ippāer wāween aer oktak ak āinwōt aer juon wōt (lale kōmeļeļe ko an bok kein ilo Unin Tōl eo n̄an Jeje ko Rekwojarjar). Ewi wāween ad maron̄ jeļā ke jeje ko rekwojarjar rej m̧ool? Ta eo jej ekkatak jān Katak im Bujen Ko 67:4, 9 kōn revelesōn ko Irooj eaar lelo̧k n̄an Joseph Smith?

Katak im Bujen Ko 68:25–31

Imaron̄ peptaij n̄e ij ruwalitōk aō iiō.

• Ilo Katak im Bujen Ko 68:27, Irooj eaar kwaļo̧k ewi rūttoon juon armej bwe en aikuj maron̄ peptaij. Jipan̄ ajri ro nejūm̧ kappukot ta eo Ekar ba. Etke Jisōs ekōņaan bwe in peptaij? Al ko āinwōt “Baptism” (Children’s Songbook, 100–101) emaron̄ jipan̄. Kōjerbal pija ko ak eoon 25–31 (ak aolepāer), n̄an jipan̄ ajri ro kappukot men ko Irooj ej kōņaan bwe ajri ro ren ekkatak.

• Riit ippān ajri ro nejūm̧ kōn eddo eo Irooj eaar leļo̧k n̄an Oliver Cowdery ilo komeļeļe in jekjōn eo ilo Katak im Bujen Ko 69. Ta kapilōk ko Irooj eaar leļo̧k ilo eoon 1? Etke eaorōk n̄an pād ippān armej “eo enaaj m̧ool im tiljek.”? Bōlen ajri ro rej maron̄ kōnono kōn juon eo me rejeļā e “m̧ool im tiljek.” Al ippān doon juon al me ej kōketak armej ro n̄an m̧ool im tiljek āinwōt Rilo̧mo̧o̧r eo, āinwōt “I’m Trying to Be like Jesus” (Children’s Songbook, 78–79). Ekōjkan ad lukkun lale bwe jen m̧ool im tiljek n̄an Irooj? Ekōjkan An kōjerbal kōj n̄an kōjeraam̧m̧an ro jet n̄e jej m̧ool im tiljek?

N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.

Bok in Kien ko, eo ekar itok m̧okta n̄an Katak im Bujen Ko, kar būriini ilo jupn prress āinwōt in