« ថ្ងៃទី ១៦–២២ ខែ មិថុនា ៖ ‹ ព្រះអម្ចាស់ទ្រង់តម្រូវចិត្ត និងគំនិតដែលស្ម័គ្រតាម › ៖ គោលលទ្ធិ និងសេចក្តីសញ្ញា ៦៤–៦៦ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

« គោលលទ្ធិ និងសេចក្តីសញ្ញា ៦៤–៦៦ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

ខោនធី ដាវីស មិសសួរី

ថ្ងៃទី ១៦–២២ ខែ មិថុនា ៖ « ព្រះអម្ចាស់ទ្រង់តម្រូវចិត្ត និងគំនិតដែលស្ម័គ្រតាម »

គោលលទ្ធិ និងសេចក្តីសញ្ញា ៦៤–៦៦

នៅក្នុងកម្តៅដ៏ក្តៅហែងនាខែ សីហា ឆ្នាំ ១៨៣១ ពួកអែលឌើរមួយចំនួនបានកំពុងធ្វើដំណើរត្រឡប់ទៅទីក្រុងខឺតឡង់វិញ ពីដែនដីស៊ីយ៉ូន ក្នុងរដ្ឋមិសសួរី ។ អ្នកធ្វើដំណើរមានអារម្មណ៍ក្ដៅ និងអស់កម្លាំង ហើយអារម្មណ៍តានតឹងបានក្លាយទៅជាជម្លោះភ្លាម ។ វាអាចហាក់ដូចជាការកសាងក្រុងស៊ីយ៉ូន ទីក្រុងនៃសេចក្ដីស្រឡាញ់ សាមគ្គីភាព និងសេចក្ដីសុខសាន្ដដែលនឹងត្រូវចំណាយពេលដ៏យូរ ។

ជាភ័ព្វសំណាង ការកសាងក្រុងស៊ីយ៉ូន—ក្នុងរដ្ឋមិសសួរីនៅឆ្នាំ ១៨៣១ ឬក្នុងដួងចិត្ត ក្រុមគ្រួសារ និងវួដយើងសព្វថ្ងៃនេះ—មិនតម្រូវឲ្យយើងល្អឥតខ្ចោះនោះទេ ។ ផ្ទុយទៅវិញព្រះអម្ចាស់បានមានបន្ទូលថា « រីឯអ្នកវិញ គឺតម្រូវឲ្យអត់ទោស » ( គោលលទ្ធិ និង សេចក្តីសញ្ញា ៦៤:១០ ) ។ ទ្រង់តម្រូវឲ្យមាន « ចិត្ត និងគំនិតដែលស្ម័គ្រតាម » ( ខទី ៣៤ ) ។ ហើយទ្រង់តម្រូវឲ្យមានអំណត់ និងភាពឧស្សាហ៍ព្យាយាម ដោយសារក្រុងស៊ីយ៉ូនត្រូវសង់នៅលើគ្រឹះនៃ « ការណ៍ដ៏តូចតាច » ដែលសម្រេចបានដោយអស់អ្នកដែលមិន « ណាយចិត្តនឹងធ្វើការល្អឡើយ » ( ខទី ៣៣ ) ។

សូមមើលផងដែរ Saints, ១:១៣៣–១៣៤, ១៣៦–១៣៧ ។

គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ

គោលលទ្ធិ និងសេចក្ដីសញ្ញា ៦៤:១–១១

« អត់ទោសគ្នាទៅវិញទៅមក » ។

សូមពិចារណាអំពីសំនួរខាងក្រោម នៅពេលបងប្អូនសិក្សា គោលលទ្ធិ និង សេចក្តីសញ្ញា ៦៤:១–១១ ៖

សូមគិតអំពីគ្រាមួយដែលព្រះអម្ចាស់អត់ទោសឲ្យបងប្អូន ។ តើបងប្អូនមានអារម្មណ៍យ៉ាងណាដែរ ?
តើមាននរណាម្នាក់ ដែលបងប្អូនចាំបាច់ត្រូវអភ័យទោសឲ្យដែរឬទេ ? ហេតុអ្វីបានជាការអត់ទោសឲ្យអ្នកដទៃអាចជារឿងពិបាកម្ល៉េះ ? តើអ្វីជួយបងប្អូនឲ្យជម្នះលើការលំបាកទាំងនេះបាន ?
តើសេចក្ដីពិតអ្វីខ្លះអំពីការអភ័យទោសនៅក្នុង គោលលទ្ធិ និងសេចក្តីសញ្ញា ៦៤:១–១១ ទំនងជាសំខាន់ចំពោះបងប្អូន ? តើបងប្អូនគិតថាហេតុអ្វី ព្រះអម្ចាស់បង្គាប់យើងឲ្យ « អត់ទោសដល់មនុស្សទាំងអស់ » ? ( ខទី ១០ ) ។

ប្រសិនបើបងប្អូនពិបាកអត់ទោស សូមពិចារណាសិក្សាសារលិខិតរបស់អែលឌើរ ជែហ្វ្រី អ័រ ហូឡិន « The Ministry of Reconciliation » ( Liahona ខែ វិច្ឆិកា ឆ្នាំ ២០១៨ ទំព័រ ៧៧–៧៩ ) ឬ សារលិខិតរបស់ គ្រីស្ទីន អិម យី « ភួងលម្អជំនួសផេះ ៖ គន្លងព្យាបាលនៃការអភ័យទោស » ( លីអាហូណា ខែ វិច្ឆិកា ឆ្នាំ ២០២២ ទំព័រ ៣៦–៣៨ ) ។ តើបងប្អូនរៀនអ្វីខ្លះអំពីរបៀបដែលព្រះគ្រីស្ទអាចជួយបងប្អូនឲ្យចេះអភ័យទោស ?

ទំនាក់ទំនងគ្រួសារអាចផ្តល់ឱកាសជាច្រើនដើម្បីអភ័យទោស ។ សូមគិតអំពីសមាជិកគ្រួសាររបស់បងប្អូន ។ តើបងប្អូនត្រូវការអភ័យទោសដល់អ្នកណាខ្លះ ? តើយើង « បានរងទុក្ខ » ( ខទី ៨ ) នៅពេលយើងមិនអភ័យទោសដល់គ្នាទៅវិញទៅមកដោយរបៀបណា ? តើការអភ័យទោសប៉ះពាល់ដល់ទំនាក់ទំនងគ្រួសាររបស់បងប្អូនយ៉ាងដូចម្តេច ?

សូមមើលផងដែរ Topics and Questions « Forgiveness » នៅលើបណ្ណាល័យដំណឹងល្អ « Forgiveness: My Burden Was Made Light » ( វីដេអូ ) នៅលើបណ្ណាល័យដំណឹងល្អ ។

ឪពុក និងកូនឱបគ្នា — « អ្នកត្រូវអត់ទោសដល់គ្នាទៅវិញទៅ » ( គោលលទ្ធិ និងសេចក្តីសញ្ញា ៦៤:៩ ) ។

គោលលទ្ធិ និងសេចក្ដីសញ្ញា ៦៤:៣១–៣៤

ព្រះអម្ចាស់ សូមខ្ញុំឲ្យមាន « ចិត្ត និងគំនិតដែលស្ម័គ្រតាម » ។

តើបងប្អូនធ្លាប់មានអារម្មណ៍ « ណាយចិត្ត » នឹង « ធ្វើការល្អ » ដែលបងប្អូនព្យាយាមធ្វើដែរឬទេ ? សូមរកមើលសារលិខិតរបស់ព្រះអម្ចាស់ទៅកាន់បងប្អូននៅក្នុង គោលលទ្ធិ និងសេចក្ដីសញ្ញា ៦៤:៣១–៣៤ ។ តើព្រះអម្ចាស់ចង់ឲ្យបងប្អូនធ្វើអ្វីដើម្បីនាំមកនូវ « កិច្ចការដ៏អស្ចារ្យ » របស់ទ្រង់ ?

សូមគិតអំពីកម្មវត្ថុមេរៀនដែលនឹងបង្ហាញ ខទី ៣៣—អ្វីមួយដែលធំ ដែលផ្សំឡើងពីរបស់តូចៗ ដូចជា គំនូរដែលផ្ដុំរូបតូចៗ ឬអគារដែលសង់ឡើងពីឥដ្ឋ ។ តើ « ការណ៍ដ៏តូចតាច » អ្វីខ្លះដែលបងប្អូនអាចធ្វើរាល់ថ្ងៃដើម្បី [ ចាក់ ] គ្រឹះនៃកិច្ចការដ៏ធំ » នៃកិច្ចការដ៏អស្ចារ្យរបស់ព្រះ ? តើឧទាហរណ៍មួយចំនួនអ្វីខ្លះនៃ « ការណ៍ដ៏ធំធេង » ដែលព្រះអម្ចាស់បានប្រទានដល់បងប្អូន ?

គោលលទ្ធិ និងសេចក្ដីសញ្ញា ៦៤:៣១–៣៤

« ចិត្ត និង គំនិតដែលស្ម័គ្រតាម »

អែលឌើរ ដូណល អិល ហលស្ត្រម បានផ្តល់យោបល់ចំពោះអត្ថន័យនៃឃ្លា « ចិត្ត និងគំនិតដែលស្ម័គ្រតាម » ។

« ចិត្តគឺជានិមិត្តរូបនៃសេចក្តីស្រឡាញ់ និងការតាំងចិត្ត ។ យើងពលិកម្ម ហើយរែកបន្ទុកសម្រាប់ជនដែលយើងស្រឡាញ់ គ្មានហេតុផលណាដែលធ្វើឲ្យយើងស៊ូទ្រាំក្រៅពីសេចក្តីស្រឡាញ់នោះទេ ។ ប្រសិនបើគ្មានសេចក្តីស្រឡាញ់ទេ នោះការតាំងចិត្តរបស់យើងកាន់តែចុះខ្សោយ ។…

« ការមាន ‹ គំនិតដែលស្ម័គ្រតាម › បញ្ជាក់ថា យើងផ្តល់ឲ្យចិត្តយើងនូវការប្រឹងប្រែងដោយអស់ពីចិត្ត និងគំនិតល្អៗ ហើយស្វែងរកព្រះប្រាជ្ញារបស់ព្រះ ។ វាបង្ហាញថា ការសិក្សាពេញមួយជីវិតដែលត្រូវលះបង់យ៉ាងច្រើនបំផុតរបស់យើងគួរតែជារបស់ដែលមាននិស្ស័យដ៏អស់កល្បជានិច្ច ។ វាមានន័យថា ទំនាក់ទំនងដ៏អស្ចារ្យរវាងការស្តាប់ព្រះបន្ទូលរបស់ព្រះ និងការគោរពតាមព្រះបន្ទូលមិនអាចបំបែកគ្នាបានទេ » ( « The Heart and a Willing Mind » Ensign ខែ មិថុនា ឆ្នាំ ២០១១ ទំព័រ ៣១–៣២ ) ។

គោលលទ្ធិ និងសេចក្ដីសញ្ញា ៦៤:៤១–៤៣

ស៊ីយ៉ូនគួរតែជា « ទង់មួយដល់ប្រជាជន » ។

ទង់គឺជា « ទង់ជាតិ ឬបទដ្ឋានមួយដែលប្រជាជនប្រមូលគ្នាមករួមជុំវិញជាក្រុមចំពោះគោលបំណង ឬអត្តសញ្ញាណមួយ » ( សេចក្ដីណែនាំដល់បទគម្ពីរទាំងឡាយ « ទង់ » នៅលើបណ្ណាល័យដំណឹងល្អ ) ។ តើស៊ីយ៉ូន—ឬ សាសនាចក្ររបស់ព្រះអម្ចាស់—ដូចជាទង់មួយដល់បងប្អូនដោយរបៀបណា ? សូមពិចារណាអំពីគំរូផ្សេងទៀតទាំងនេះអំពីអ្វីៗដែលគេលើកឡើង ដូចជាទង់មួយដើម្បីផ្ដល់ពរដល់ប្រជាជន ៖ ជនគណនា ២១:៦–៩; ម៉ាថាយ ៥:១៤–១៦; អាលម៉ា ៤៦:១១–២០ ។ សូមរកមើលរបៀបផ្សេងទៀត ដែលព្រះអម្ចាស់ពិពណ៌នាស៊ីយ៉ូននៅក្នុង គោលលទ្ធិ និងសេចក្ដីសញ្ញា ៦៤:៤១–៤៣ ។

សូមមើលផងដែរ « Let Zion in Her Beauty Rise » Hymns ល.រ. ៤១ ។

គោលលទ្ធិ និងសេចក្តីសញ្ញា ៦៥

នគររបស់ព្រះនៅលើផែនដីរៀបចំពិភពលោកសម្រាប់ការយាងមករបស់ព្រះអង្គសង្រ្គោះ ។

គោលលទ្ធិ និងសេចក្តីសញ្ញា ៦៥ ផ្តល់ឲ្យនូវការពិពណ៌នាដ៏បំផុសគំនិត អំពីបេសកកម្មនៃសាសនាចក្ររបស់ព្រះអម្ចាស់នៅក្នុងថ្ងៃចុងក្រោយ ។ សូមពិចារណាស្វែងរកនៅក្នុងផ្នែកនេះ នូវចម្លើយចំពោះសំណួរដូចនេះ ៖ តើព្រះអម្ចាស់ចង់ឲ្យនគររបស់ទ្រង់សម្រេចអ្វីខ្លះនៅលើផែនដី ? តើទ្រង់ចង់ឲ្យខ្ញុំធ្វើអ្វីខ្លះដើម្បីជួយ ?

សូមមើលផងដែរ « Prepare Today for the Second Coming » ( វីដេអូ ) នៅលើគេហទំព័រ ChurchofJesusChrist.org ។

គោលលទ្ធិ និងសេចក្តីសញ្ញា ៦៦

ព្រះអម្ចាស់ជ្រាបដឹងពីគំនិតក្នុងដួងចិត្តរបស់ខ្ញុំ ។

មិនយូរប៉ុន្មានក្រោយពីចូលរួមក្នុងសាសនាចក្រ វិល្លាម អ៊ី ម៉័កខ្លេលិន បានសូមឲ្យយ៉ូសែប ស្ម៊ីធ បើកសម្ដែងព្រះទ័យរបស់ព្រះសម្រាប់គាត់ ។ យ៉ូសែបមិនបានដឹងពីការណ៍នេះទេ ប៉ុន្ដែ វិល្លាមមានសំណួរផ្ទាល់ខ្លួនចំនួនប្រាំ ដែលគាត់សង្ឃឹមថា ព្រះអម្ចាស់នឹងឆ្លើយតបតាមរយៈព្យាការីរបស់ទ្រង់ ។ យើងមិនដឹងពីសំណួររបស់វិល្លាមទេ ប៉ុន្ដែវិរណៈនេះបានថ្លែងទៅកាន់គាត់ ហើយឥឡូវនេះ គោលលទ្ធិ និងសេចក្ដីសញ្ញា ៦៦ បានឆ្លើយតបនឹងសំណួរនីមួយៗរបស់វិល្លាម « យ៉ាងពេញលេញ និងដោយពេញចិត្តបំផុត » ( « William McLellin’s Five Questions » Revelations in Context ទំព័រ ១៣៨ ) ។

នៅពេលបងប្អូនអាន កណ្ឌទី ៦៦ សូមគិតអំពីអ្វីដែលព្រះអម្ចាស់ជ្រាបពី វិល្លាម អ៊ី ម៉័កខ្លេលិន និងកង្វល់ ក៏ដូចជាបំណងក្នុងដួងចិត្តរបស់គាត់ ។ តើព្រះអម្ចាស់បានបង្ហាញបងប្អូនថាទ្រង់ស្គាល់បងប្អូនដោយរបៀបណា ? ប្រសិនបើបងប្អូនមានពរលោកអយ្យកោមួយ សូមពិចារណាសិក្សាវា ។ កាលបងប្អូនធ្វើដូច្នេះ តើព្រះវិញ្ញាណបរិសុទ្ធជួយបងប្អូនឲ្យយល់អ្វីខ្លះ អំពីព្រះទ័យរបស់ព្រះសម្រាប់បងប្អូន ?

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

គោលលទ្ធិ និងសេចក្ដីសញ្ញា ៦៤:៧–១០

ព្រះយេស៊ូវគ្រីស្ទសព្វព្រះទ័យឲ្យខ្ញុំអភ័យទោសដល់មនុស្សគ្រប់រូប ។

កំណត់ចំណាំ ៖ នៅពេលបងប្អូនបង្រៀនកូនៗរបស់បងប្អូនអំពីបទបញ្ញត្តិរបស់ព្រះអម្ចាស់ « ឲ្យអត់ទោសដល់មនុស្សទាំងអស់ » បងប្អូនអាចនឹងបញ្ជាក់ច្បាស់ថា ការអភ័យទោសមិនមែនមានន័យថាអនុញ្ញាតឲ្យគេធ្វើឲ្យយើងឈឺចាប់នោះទេ ។ សូមលើកទឹកចិត្តពួកគេឲ្យប្រាប់មជ្ឈិមវ័យដែលពួកគេទុកចិត្ត ប្រសិនបើនរណាម្នាក់ធ្វើបាបពួកគេ ឬប៉ះពួកគេដោយមិនសមរម្យ ។

បន្ទាប់ពីអាន គោលលទ្ធិ និងសេចក្តីសញ្ញា ៦៤:១០ ជាមួយកូនៗរបស់បងប្អូន សូមនិយាយជាមួយពួកគេអំពីអត្ថន័យនៃអភ័យទោសដល់នរណាម្នាក់ ។ បងប្អូនអាចចែកចាយឧទាហរណ៍សាមញ្ញមួយចំនួន ។ ប្រហែលជាពួកគេអាចសម្តែងតាមឧទាហរណ៍ទាំងនេះ ដើម្បីអនុវត្តការអភ័យទោស ។
បងប្អូនអាចសុំឲ្យកូនរបស់បងប្អូនដាក់ផែនការអំពីរបៀបដែលពួកគេនឹងបង្រៀននរណាម្នាក់—ដូចជាប្អូនស្រី—អំពីការអភ័យទោសដល់អ្នកដទៃ ។ សូមជួយពួកគេស្វែងរកឃ្លានៅក្នុង គោលលទ្ធិ និងសេចក្តីសញ្ញា ៦៤:៧–១០ ដែលពួកគេអាចប្រើនៅពេលពួកគេបង្រៀន ។
សូមច្រៀងចម្រៀងអំពីការអភ័យទោស ដូចជា « បិតាសូមជួយកូន » ( សៀវភៅចម្រៀងកុមារ ទំព័រ ៥២ ) ។ តើបទចម្រៀងនេះបង្រៀនយើងអំពីការអភ័យទោសឲ្យអ្នកដទៃអ្វីខ្លះ ?

គោលលទ្ធិ និងសេចក្តីសញ្ញា ៦៤:៣៣

« កិច្ចការដ៏ធំ » របស់ព្រះ គឺស្ថាបនានៅលើ « ការណ៍ដ៏តូចតាច » ។

បងប្អូនអាចបង្ហាញកូនៗរបស់បងប្អូននូវអ្វីដែលបង្កើតឡើងដោយផ្នែកតូចៗជាច្រើន ដូចជា ល្បែងតម្រាបរូប ឬ កន្ទេល ។ បន្ទាប់មក បងប្អូនអាចអាន គោលលទ្ធិ និងសេចក្ដីសញ្ញា ៦៤:៣៣ ជាមួយគ្នា ។ តើអ្វីជា « កិច្ចការដ៏ធំ » របស់ព្រះ ? តើ « ការណ៍ដ៏តូចតាច » អ្វីខ្លះដែលយើងអាចធ្វើ ដែលនឹងជួយទ្រង់ ?

គោលលទ្ធិ និងសេចក្តីសញ្ញា ៦៤:៣៤

ខ្ញុំអាចធ្វើតាមព្រះយេស៊ូវដោយអស់ពីចិត្ត និងគំនិតរបស់ខ្ញុំ ។

នៅពេលបងប្អូនអានឲ្យកូនៗបងប្អូនស្ដាប់ចេញពី គោលលទ្ធិ និងសេចក្តីសញ្ញា ៦៤:៣៤ បងប្អូនអាចចង្អុលទៅបេះដូង និងក្បាលរបស់បងប្អូននៅពេលបងប្អូនអាន « ចិត្ត » និង « គំនិត » ហើយអញ្ជើញកូនៗឲ្យធ្វើជាមួយបងប្អូន ។ តើយើងអាចឲ្យចិត្តរបស់យើង ( សេចក្តីប្រាថ្នា ) និងគំនិត ( គិត ) ដល់ព្រះអង្គសង្រ្គោះដោយរបៀបណា ?

សង្កត់ធ្ងន់ទៅលើគំរូរបស់ព្រះយេស៊ូវគ្រីស្ទ ។ សូមពិចារណាអំពីរបៀបដែលបងប្អូនអាចសង្កត់ធ្ងន់លើគំរូរបស់ព្រះអង្គសង្គ្រោះ នៅពេលបងប្អូនសិក្សា ឬបង្រៀន ។ ឧទាហរណ៍ នៅពេលបងប្អូនបង្រៀនអំពី គោលលទ្ធិ និងសេចក្តីសញ្ញា ៦៤:៣៤ បងប្អូនអាចនិយាយជាមួយកូនៗរបស់បងប្អូនអំពីរបៀបដែលព្រះអង្គសង្គ្រោះបានប្រទានចិត្ត ( សេចក្តីប្រាថ្នា ) និងគំនិត ( គិត ) ទៅដល់ព្រះបិតារបស់ទ្រង់នៅស្ថានសួគ៌ ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះទំព័រ ៦ ) ។

គោលលទ្ធិ និងសេចក្តីសញ្ញា ៦៦

ព្រះអម្ចាស់ជ្រាបដឹងថា ខ្ញុំជានរណា ហើយស្រឡាញ់ខ្ញុំ ។

សូមជួយកូនៗរបស់បងប្អូនយល់ថា វិល្លាម អ៉ី ម៉័កខ្លេលិន មានសំណួរប្រាំដើម្បីទូលសួរព្រះអម្ចាស់ ។ យ៉ូសែប ស្ម៉ីធ បានទទួលចម្លើយចំពោះសំណួរទាំងនេះ ទោះបីជាលោកមិនបានដឹងពីសំណួររបស់វិល្លាមមានអ្វីខ្លះក្តី ។ សូមប្រាប់កូនៗបងប្អូនអំពីគ្រាមួយដែលព្រះអម្ចាស់បានបង្ហាញបងប្អូនអំពីអ្វីដែលទ្រង់ចង់ឲ្យបងប្អូនធ្វើ ហើយនិយាយអំពីពរជ័យដែលមកពីការធ្វើតាមការដឹកនាំរបស់ទ្រង់ ។ បន្ទាប់មក បងប្អូនអាចអាន គោលលទ្ធិ និងសេចក្តីសញ្ញា ៦៦:៤ ជាមួយគ្នា ហើយអញ្ជើញកូនៗបងប្អូនឲ្យស្វែងរកឱកាសដើម្បីយល់អំពីអ្វីដែលព្រះអម្ចាស់ចង់ឲ្យពួកគេធ្វើ ។

សេចក្តីលម្អិត The Second Coming [ ការយាងមកជាលើកទីពីរ ] ដោយ ខេវិន ខេល

គោលលទ្ធិ និងសេចក្តីសញ្ញា ៦៥

ខ្ញុំអាចជួយរៀបចំពិភពលោកដើម្បីទទួលព្រះយេស៊ូវគ្រីស្ទ ។

នៅពេលកូនៗរបស់បងប្អូនមើលរូបភាពនៃការយាងមកជាលើកទីពីររបស់ព្រះអង្គសង្គ្រោះ សូមសុំឲ្យពួកគេពិពណ៌នាអំពីអ្វីដែលពួកគេមើលឃើញ ឬអ្វីដែលពួកគេដឹងអំពីព្រឹត្តិការណ៍នេះ ។ បងប្អូនក៏អាចផ្តល់ឲ្យកូនៗបងប្អូននូវពាក្យ និងឃ្លាអំពីការយាងមកជាលើកទីពីរដើម្បីស្វែងរកនៅក្នុង គោលលទ្ធិ និងសេចក្តីសញ្ញា ៦៥ ។ តើពាក្យ និងឃ្លាទាំងនេះបង្រៀនអ្វីខ្លះដល់យើង ? តើយើងអាចរៀបចំខ្លួនសម្រាប់ការយាងមករបស់ព្រះអង្គសង្រ្គោះដោយរបៀបណា ?

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

ព្រះអង្គសង្គ្រោះកំពុងអភ័យទោសដល់ស្រ្តីម្នាក់ — Forgiven [ បានអភ័យទោសឲ្យ ]ដោយ ហ្គ្រេក អូលសិន ។