« ថ្ងៃទី ២៣–២៩ ខែ មិថុនា ៖ ‹ តម្លៃ … ទ្រព្យសម្បត្តិនៃផែនដីទាំងមូល › ៖ គោលលទ្ធិ និងសេចក្តីសញ្ញា ៦៧–៧០ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )
« គោលលទ្ធិ និងសេចក្តីសញ្ញា ៦៧–៧០ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥
ថ្ងៃទី ២៣–២៩ ខែ មិថុនា ៖ « តម្លៃ … ទ្រព្យសម្បត្តិនៃផែនដីទាំងមូល »
គោលលទ្ធិ និងសេចក្តីសញ្ញា ៦៧–៧០
ពីឆ្នាំ ១៨២៨ ដល់ឆ្នាំ ១៨៣១ ព្យាការី យ៉ូសែប ស្ម៊ីធ បានទទួលវិវរណៈជាច្រើនមកពីព្រះអម្ចាស់ រួមទាំងការប្រឹក្សាដ៏ទេវភាពសម្រាប់បុគ្គលទាំងឡាយ សេចក្ដីណែនាំស្ដីពីការគ្រប់គ្រងសាសនាចក្រ ការនិមិត្តអំពីពួកបរិសុទ្ធថ្ងៃចុងក្រោយ និងសេចក្តីពិតដ៏បំផុសគំនិតជាច្រើនទៀតនៃភាពអស់កល្បជានិច្ច ។ ប៉ុន្តែពួកបរិសុទ្ធជាច្រើនមិនបានអានវាទេ ។ វិវរណៈទាំងនោះមិនទាន់បានបោះពុម្ពនៅឡើយ ហើយមានច្បាប់ចម្លងតិចតួចណាស់ដែលសរសេរដោយដៃនៅលើក្រដាសដាច់ពីគ្នា ហើយចែកបន្ដគ្នាក្នុងចំណោមសមាជិកឲ្យ និងយកតាមខ្លួនដោយពួកអ្នកផ្សព្វផ្សាយសាសនា ។
បន្ទាប់មកនៅខែ វិច្ឆិកា ឆ្នាំ ១៨៣១ យ៉ូសែបបានហៅក្រុមប្រឹក្សាថ្នាក់ដឹកនាំសាសនាចក្រឲ្យពិភាក្សាអំពីការបោះពុម្ពវិវរណៈទាំងនេះ ។ ក្រោយពីការស្វែងយល់ព្រះទ័យរបស់ព្រះអម្ចាស់ហើយ ថ្នាក់ដឹកនាំទាំងនេះបានដាក់ផែនការបោះពុម្ពព្រះគម្ពីរនៃព្រះបញ្ញត្តិ—ឈ្មោះពីមុននៃព្រះគម្ពីរគោលលទ្ធិ និងសេចក្តីសញ្ញា នាសព្វថ្ងៃនេះ ។ មិនយូរប៉ុន្មាន គ្រប់គ្នាអាចអានដោយខ្លួនឯងនូវបន្ទូលរបស់ព្រះ ដែលបានបើកសម្ដែងតាមរយៈព្យាការីនៅរស់ ជាភស្តុតាងជាក់ស្ដែងថា « កូនសោនៃសេចក្ដីអាថ៌កំបាំងទាំងឡាយក្នុងនគររបស់ព្រះអង្គសង្គ្រោះរបស់យើង ត្រូវបានផ្ទុកផ្ដាក់ដល់មនុស្សទៀតហើយ » ។ ដោយសារមូលហេតុទាំងនេះ និងមូលហេតុផ្សេងទៀតជាច្រើន ពួកបរិសុទ្ធនាពេលនោះ និងពេលនេះពិចារណាអំពីវិវរណៈទាំងនេះថា « តម្លៃ … ទ្រព្យសម្បត្តិនៃផែនដីទាំងមូល » ( គោលលទ្ធិ និង សេចក្តីសញ្ញា ៧០ ក្បាលកណ្ឌ ) ។
សូមមើល ពួកបរិសុទ្ធ ១:១៤០–៤៣
គំនិតសម្រាប់ការរៀនសូត្រនៅឯគេហដ្ឋាន និងនៅឯព្រះវិហារ
គោលលទ្ធិ និងសេចក្ដីសញ្ញា ៦៧:១–៩; ៦៨:៣–៦
អ្នកបម្រើរបស់ព្រះអម្ចាស់និយាយអំពីព្រះហឫទ័យរបស់ទ្រង់ នៅពេលព្រះវិញ្ញាណបរិសុទ្ធជំរុញចិត្ត ។
ការសម្រេចចិត្តដើម្បីបោះពុម្ពវិវរណៈដែលបានទទួលដោយ យ៉ូសែប ស្ម៊ីធ មើលទៅហាក់ដូចជាការសម្រេចចិត្តដ៏ងាយមួយ ប៉ុន្ដែថ្នាក់ដឹកនាំសាសនាចក្រពីដើមមួយចំនួនមិនប្រាកដថា វាគឺជាគំនិតដ៏ល្អមួយនោះទេ ។ មានការបារម្ភមួយអំពីភាពមិនឥតខ្ចោះក្នុងរបៀប យ៉ូសែប ស្ម៊ីធ បានសរសេរវិវរណៈ ។ វិវរណៈក្នុង កណ្ឌទី ៦៧ កើតមានជាចម្លើយចំពោះការបារម្ភនោះ ។ តើបងប្អូនរៀនអ្វីខ្លះអំពីព្យាការីរបស់ព្រះអម្ចាស់ និងវិវរណៈមកពី ខទី ១–៩ ? តើបងប្អូនទទួលបានការយល់ដឹងបន្ថែមអ្វីខ្លះមកពី ៦៨:៣–៦ ?
តើបងប្អូនដឹងដោយខ្លួនឯងតាមរបៀបណាថា វិវរណៈដែលព្រះប្រទានដល់ពួកអ្នកបម្រើរបស់ទ្រង់គឺជាការពិត ? បងប្អូនក៏អាចនឹងជញ្ជឹងគិតអំពីបទពិសោធន៍នានា នៅពេលបងប្អូនមានអារម្មណ៍ថាព្រះអម្ចាស់កំពុងមានព្រះបន្ទូលទៅកាន់បងប្អូន តាមរយៈអ្នកបម្រើម្នាក់របស់ទ្រង់ ( សូមមើល គោលលទ្ធិ និងសេចក្តីសញ្ញា ៦៨:៤ ) ។ តើនៅពេលណាដែលបងប្អូនទទួលអារម្មណ៍ « ដូចដែលបានបណ្ដាលដោយព្រះវិញ្ញាណបរិសុទ្ធ » ( ខទី ៣ ) ឲ្យនិយាយអ្វីមួយ ? តើព្រះអម្ចាស់ « ឈរនៅក្បែរអ្នក » ? ( ខទី ៦ ) ។
ពីមុនព្រះគម្ពីរនៃព្រះបញ្ញត្តិត្រូវបានបោះពុម្ព ថ្នាក់ដឹកនាំសាសនាចក្រមួយចំនួនបានចុះហត្ថលេខាលើទីបន្ទាល់ជាលាយលក្ខណ៍អក្សរមួយថា វិវរណៈនៅក្នុងគម្ពីរនេះគឺពិត ។ ដើម្បីមើលច្បាប់ចម្លងនៃទីបន្ទាល់របស់ពួកគេ សូមមើល « Testimony, circa 2 November 1831 » Revelation Book 1 ទំព័រ ១២១ នៅលើគេហទំព័រ josephsmithpapers.org ។
គោលលទ្ធិ និងសេចក្ដីសញ្ញា ៦៧:១០–១៤
« ចូរស៊ូនៅក្នុងសេចក្ដីអត់ធន់ចុះ » ។
តើការច្រណែន ការខ្លាច និងអំនួតរារាំងយើងមិនឲ្យខិតកាន់តែជិតព្រះអម្ចាស់តាមរបៀបណា ? តើយើងយកឈ្នះ « មនុស្សខាងសាច់ឈាម » ឬ « តាមគំនិតខាងរូបកាយ » ដើម្បីយើងអាច « ឃើញ [ ទ្រង់ ] ហើយដឹងថា [ ជាទ្រង់ ] ដោយរបៀបណា ? ( ខទី ១២; សូមមើលផងដែរ ម៉ូសាយ ៣:១៩ ) ។ តើបងប្អូនរកឃើញអ្វីខ្លះនៅក្នុងខគម្ពីរទាំងនេះ ដែលបំផុសគំនិតបងប្អូនឲ្យ « ស៊ូនៅក្នុងសេចក្ដីអត់ធន់ចុះ រហូតដល់អ្នករាល់គ្នាបានល្អឥតខ្ចោះ » ? ( ខទី ១៣ ) ។
គោលលទ្ធិ និងសេចក្ដីសញ្ញា ៦៨:២៥–៣១
ខ្ញុំអាចជួយគេហដ្ឋានរបស់ខ្ញុំផ្តោតលើព្រះយេស៊ូវគ្រីស្ទ ។
ព្រះបន្ទូលរបស់ព្រះអម្ចាស់នៅក្នុង គោលលទ្ធិ និងសេចក្តីសញ្ញា ៦៨:២៥–៣១ សំដៅជាពិសេសទៅកាន់ឪពុកម្តាយ ប៉ុន្តែទោះបីជាបងប្អូនជាឪពុកម្តាយ ឬមិនមែនជាឪពុកម្តាយក៏ដោយ បងប្អូនអាចប្រើការប្រឹក្សារបស់ទ្រង់ ដើម្បីបំពេញផ្នែករបស់បងប្អូន ដើម្បីផ្ដោតលើគេហដ្ឋានរបស់បងប្អូនទៅលើគោលលទ្ធិនៃព្រះយេស៊ូវគ្រីស្ទ ។ បញ្ជីរខាងក្រោមនេះគឺជាគោលការណ៍មួយចំនួនដែលព្រះអម្ចាស់មានបន្ទូលថា គួរតែត្រូវបានបង្រៀននៅក្នុងផ្ទះ ។ សូមពិចារណាអំពីរបៀបដែលបងប្អូនអាចធ្វើឲ្យផ្នែកនីមួយៗនៃផ្នែកទាំងនេះជាគ្រឹះនៃគេហដ្ឋានដែលផ្តោតលើព្រះគ្រីស្ទ—ជាគេហដ្ឋានដែលបងប្អូនរស់នៅឥឡូវនេះ ឬគេហដ្ឋាននាពេលអនាគតរបស់បងប្អូន ។ ធនធាន និងសំណួរទាំងឡាយដែលបានផ្តល់អាចជួយបាន ។
-
ការប្រែចិត្ត ៖ សូមសិក្សា អាលម៉ា ៣៦:១៧–២០ ហើយកត់សម្គាល់អំពីរបៀបដែលអាលម៉ាត្រូវបានប្រទានពរនៅគ្រាដ៏លំបាក ដោយសារឪពុករបស់លោកបានបង្រៀនលោកអំពីបេសកកម្មធួនរបស់ព្រះអង្គសង្គ្រោះ ។ តើបងប្អូនអាចជួយបំផុសគំនិតគ្រួសាររបស់បងប្អូនឲ្យងាកមករកព្រះយេស៊ូវគ្រីស្ទ ហើយប្រែចិត្តដោយរបៀបណា ? ( សូមមើលផងដែរ នីហ្វៃទី២ ២៥:២៦ ) ។
-
សេចក្តីជំនឿលើព្រះគ្រីស្ទ ៖ សូមអានយោបល់ចំនួនប្រាំរបស់ប្រធាន រ័សុល អិម ណិលសុន សម្រាប់ការអភិវឌ្ឍន៍សេចក្តីជំនឿ « ព្រះគ្រីស្ទមានព្រះជន្មរស់ឡើងវិញ សេចក្តីជំនឿលើទ្រង់នឹងរើភ្នំចេញបាន » ( លីអាហូណា ខែ ឧសភា ឆ្នាំ ២០២១ ទំព័រ ១០៣ ) ។ សូមជញ្ជឹងគិតអំពីរបៀបដែលការផ្តល់យោបល់ទាំងនេះអាចបង្កើតវប្បធម៌នៃសេចក្តីជំនឿនៅក្នុងគ្រួសាររបស់បងប្អូន ។
-
ពិធីបុណ្យជ្រមុជទឹក ៖ ពិនិត្យមើលសេចក្តីសញ្ញានៃពិធីបុណ្យជ្រមុជទឹកដូចដែលបានពិពណ៌នានៅក្នុង ម៉ូសាយ ១៨:៨–១០, ១៣ ។ តើការខិតខំរបស់បងប្អូនដើម្បីគោរពតាមសេចក្ដីសញ្ញានេះ អាចពង្រឹងដល់គ្រួសាររបស់បងប្អូនយ៉ាងដូចម្ដេច ?
-
អំណោយទានជាព្រះវិញ្ញាណបរិសុទ្ធ ៖ សិក្សាការអញ្ជើញនៅ ទំព័រ ១៧–១៩ នៃ ដើម្បីកម្លាំងនៃយុវជន ៖ សេចក្តីណែនាំសម្រាប់ធ្វើការជ្រើសរើស ។ តើបងប្អូនបានទទួលអារម្មណ៍បំផុសគំនិតឲ្យធ្វើអ្វីខ្លះ ដើម្បីអញ្ជើញយាងឥទ្ធិពលនៃព្រះវិញ្ញាណបរិសុទ្ធឲ្យមកនៅក្នុងគេហដ្ឋានរបស់បងប្អូន ?
-
ការអធិស្ឋាន ៖ តើបងប្អូនរៀនអ្វីខ្លះអំពីឥទ្ធិពលនៃការអធិស្ឋាននៅក្នុងគេហដ្ឋាននៅក្នុងបទ « យើងនិយាយដោយស្នេហ៍ » ? ( សៀវភៅចម្រៀងកុមារ ទំព័រ ១០២–១០៣ ) ។ តើពរជ័យអ្វីដែលព្រះអង្គសង្គ្រោះសន្យានៅក្នុង នីហ្វៃទី៣ ១៨:១៥–២១ ?
-
គោលការណ៍ផ្សេងទៀតដែលបងប្អូនរកឃើញនៅក្នុង គោលលទ្ធិ និងសេចក្តីសញ្ញា ៦៨:២៥–៣១ ៖
តើបងប្អូននឹងផ្តល់ដំបូន្មានអ្វីដល់បុគ្គលម្នាក់ ដែលសមាជិកគ្រួសារមិនគាំទ្រដល់ការខិតខំរបស់ពួកគេដើម្បីកសាងសេចក្តីជំនឿលើព្រះគ្រីស្ទ ?
សូមមើលផងដែរ « ក្រុមគ្រួសារ ៖ ការប្រកាសដល់ពិភពលោក » បណ្ណាល័យដំណឹងល្អ ; Topics and Questions « Parenting » នៅលើបណ្ណាល័យដំណឹងល្អ ឌៀថើរ អេហ្វ អុជដូហ្វ « ព្រះយេស៊ូវគ្រីស្ទគឺជាកម្លាំងរបស់ឪពុកម្ដាយ » លីអាហូណា ខែ ឧសភា ឆ្នាំ ២០២៣ ទំព័រ ៥៥–៥៩ ។
គោលលទ្ធិ និងសេចក្តីសញ្ញា ៦៩:១
មិត្ដភក្ដិ « ពិតហើយស្មោះត្រង់ » ជួយខ្ញុំដើរតាមព្រះយេស៊ូវគ្រីស្ទ ។
តើបងប្អូនគិតថា ហេតុអ្វីបានជាវាជា « ប្រាជ្ញានៅក្នុង [ ព្រះអម្ចាស់ ] » សម្រាប់នរណាម្នាក់ដែល « ពិត ហើយស្មោះត្រង់ » ដើម្បីអមដំណើរ អូលីវើរ ខៅឌើរី ធ្វើកិច្ចការដែលបានពិពណ៌នានៅក្នុងខគម្ពីរនេះ ? តើគោលការណ៍នេះអនុវត្តចំពោះបងប្អូនដោយរបៀបណា ?
ជួយសិស្សឲ្យលើកស្ទួយគ្នាទៅវិញទៅមក ។ បុគ្គលម្នាក់ៗនៅក្នុងថ្នាក់ ឬគ្រួសាររបស់បងប្អូន គឺជាធនធានដ៏បរិបូរមួយនៃទីបន្ទាល់ គំនិតយោបល់ និងបទពិសោធន៍អំពីការរស់នៅតាមដំណឹងល្អ ។ សូមអញ្ជើញពួកគេឲ្យចែកចាយ និងលើកតម្កើងគ្នាឡើង ។
គោលលទ្ធិ និងសេចក្ដីសញ្ញា ៧០:១–៤
ខ្ញុំទទួលខុសត្រូវចំពោះវិវរណៈដែលព្រះអម្ចាស់បានប្រទាន ។
ព្រះអម្ចាស់បានប្រទានការទទួលខុសត្រូវដល់ពួកអែលឌើរមួយចំនួន ឲ្យមើលការខុសត្រូវលើការបោះពុម្ពវិវរណៈទាំងនេះ ។ ទោះបីជាបងប្អូនមិនមានទំនួលខុសត្រូវលើអ្វីដែលជាក់លាក់នោះក៏ដោយ តើអ្វីជាការគ្រប់គ្រង ឬការទទួលខុសត្រូវរបស់បងប្អូន « លើវិវរណៈ និងព្រះបញ្ញត្តិទាំងឡាយ » ? ( ខទី ៣ ) ។
សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។
គំនិតសម្រាប់បង្រៀនកុមារ
គោលលទ្ធិ និងសេចក្តីសញ្ញាបង្រៀនខ្ញុំអំពីព្រះយេស៊ូវគ្រីស្ទ ។
-
សូមប្រាប់កូនៗរបស់បងប្អូនអំពីរបៀបដែលវិវរណៈរបស់ យ៉ូសែប ស្ម៉ីធ បានត្រូវបោះពុម្ពជាសៀវភៅ ( សូមមើល « ជំពូក ២៣ ៖ គោលលទ្ធិ និងសេចក្តីសញ្ញា » នៅក្នុង ដំណើររឿងព្រះគម្ពីរគោលលទ្ធិ និងសេចក្តីសញ្ញា ទំព័រ ៩០–៩២ ឬវីដេអូដូចគ្នានេះនៅលើបណ្ណាល័យដំណឹងល្អ ) ។ សូមជួយពួកគេចងចាំរឿងមួយចំនួនដែលបងប្អូនបានរៀនអំពីព្រះយេស៊ូវគ្រីស្ទអំពីគោលលទ្ធិ និងសេចក្តីសញ្ញារហូតមកដល់ពេលនេះក្នុងឆ្នាំនេះ ។ បងប្អូនក៏អាចនឹងចែកចាយជាមួយគ្នាទៅវិញទៅមក នូវខគម្ពីរមួយចំនួនដែលបងប្អូនចូលចិត្តចេញពីគោលលទ្ធិ និងសេចក្ដីសញ្ញាផងដែរ ។
2:2Chapter 23: The Doctrine and Covenants: August–November 1831
-
បងប្អូនក៏អាចបង្ហាញកូនៗរបស់បងប្អូននូវព្រះគម្ពីរប៊ីប ព្រះគម្ពីរមរមន គោលលទ្ធិ និងសេចក្តីសញ្ញា និងមុក្តាដ៏មានតម្លៃមហិមា ហើយនិយាយជាមួយពួកគេអំពីរបៀបដែលព្រះគម្ពីរទាំងនេះខុសគ្នា និងរបៀបដែលព្រះគម្ពីរទាំងនេះស្រដៀងគ្នា ( សូមមើលការពិពណ៌នានៃគម្ពីរទាំងនេះនៅក្នុង សេចក្ដីណែនាំដល់បទគម្ពីរទាំងឡាយ ) ។ តើយើងអាចដឹងថាព្រះគម្ពីរពិតដោយរបៀបណា ? តើយើងរៀនបានអ្វីខ្លះមកពី គោលលទ្ធិ និងសេចក្ដីសញ្ញា ៦៧:៤, ៩ អំពីវិវរណៈដែលព្រះអម្ចាស់បានប្រទានដល់ យ៉ូសែប ស្ម៉ីធ ?
គោលលទ្ធិ និងសេចក្ដីសញ្ញា ៦៨:២៥–៣១
ខ្ញុំអាចជ្រមុជទឹកបាន ពេលខ្ញុំអាយុប្រាំបីឆ្នាំ ។
-
នៅក្នុង គោលលទ្ធិ និងសេចក្តីសញ្ញា ៦៨:២៧ ព្រះអម្ចាស់បានបញ្ជាក់ថាតើមនុស្សម្នាក់ត្រូវមានអាយុប៉ុន្មានដើម្បីទទួលបុណ្យជ្រមុជទឹក ។ សូមជួយកូនៗរបស់បងប្អូនស្វែងយល់អំពីអ្វីដែលទ្រង់មានព្រះបន្ទូល ។ ហេតុអ្វីបានជាព្រះសព្វព្រះទ័យឲ្យយើងទទួលពិធីបុណ្យជ្រមុជទឹក ? បទចម្រៀងដូចជាបទ « ពិធីបុណ្យជ្រមុជទឹក » ( សៀវភៅចម្រៀងកុមារ ទំព័រ ៥៤–៥៥ ) អាចជួយបាន ។ ការប្រើប្រាស់រូបភាព ឬ ខទី ២៥–៣១ ( ឬ ទាំងពីរ ) ជួយកូនៗរបស់បងប្អូនរកឃើញអ្វីដែលព្រះអម្ចាស់ចង់ឲ្យកុមាររៀន ។
-
សូមអានជាមួយកូនៗរបស់បងប្អូនអំពីកិច្ចការដែលព្រះអម្ចាស់បានប្រទានដល់ អូលីវើរ ខៅឌើរី នៅក្នុងផ្នែកដែលមានចំណងជើង គោលលទ្ធិ និងសេចក្តីសញ្ញា ៦៩ ។ តើព្រះអម្ចាស់ប្រទានដំបូន្មានអ្វីខ្លះនៅក្នុង ខទី ១ ? ហេតុអ្វីវាសំខាន់ដើម្បីនៅជាមួយមនុស្សដែល « ពិតហើយស្មោះត្រង់ » ? ប្រហែលជាកូនៗរបស់បងប្អូនអាចប្រាប់អំពីនរណាម្នាក់ដែលពួកគេស្គាល់ថាជាមនុស្ស « ពិត ហើយស្មោះត្រង់ » ។ សូមច្រៀងជាមួយកុមារនូវចម្រៀងមួយដែលលើកទឹកចិត្តដល់កុមារឲ្យធ្វើជាមនុស្សពិត និងស្មោះត្រង់ដូចជាព្រះអង្គសង្រ្គោះ ដូចជាបទ « ខ្ញុំព្យាយាមក្លាយដូចព្រះយេស៊ូវ » ( សៀវភៅចម្រៀងកុមារ ទំព័រ ៤០–៤១ ) ។ តើយើងអាចប្រាកដថា យើងពិត ហើយស្មោះត្រង់ចំពោះព្រះអម្ចាស់ដោយរបៀបណា ? តើទ្រង់អាចប្រើយើងដើម្បីប្រទានពរដល់អ្នកដទៃដោយរបៀបណា ពេលយើងពិត ហើយស្មោះត្រង់ ?
សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។
ព្រះគម្ពីរនៃព្រះបញ្ញត្តិ ឈ្មោះគម្ពីរមុនហៅថាជា ព្រះគម្ពីរគោលលទ្ធិ និង សេចក្តីសញ្ញា ត្រូវបានបោះពុម្ពនៅលើកាសែតដូចជាកាសែតមួយនេះ ។