“Juun 30–Juļae 6: ‘Ejjeļo̧k Kein Tariņae Kōm̧anm̧an ņae Kom̧ro Enaaj Jeraam̧m̧an’: Katak im Bujen Ko 71–75,” Itok, Ļoor Eō—N̄an M̧weeo im Kabun̄ in: Katak im Bujen Ko 2025 (2025)
“Katak im Bujen Ko 71–75,” Itok, Ļoor Eō—N̄an M̧weeo im Kabun̄ in: 2025
Inaaj Keememej Bujen eo, jān Enrique Manuel Garcia
Juun 30–Juļae 6: “Ejjeļo̧k Kein Tariņae Kōm̧anm̧an ņae Kom̧ro Enaaj Jeraam̧m̧an”
Katak im Bujen Ko 71–75
Jān ke ekar juon ļaddik, Josep Smith ekar jelm̧ae kōraat ko—em̧ool rikōjedāt ro—ke e ekar kajjieon̄ kōm̧m̧ane jerbal eo an Anij. Bōtaab emaron̄ kar lukkuun pen ilo jem̧ļo̧kin 1831 eo ke Ezra Booth eaar jino kōknanaik Kabun̄ in ilo̧bwilej, kōnke ilo jekjek in rikenana eo ekar juon kar ritōmak. Ezra eaar loe an Josep kōjerbal kajoor eo an Anij n̄an kemour juon kōrā. Kar kajjitōk ippān n̄an etal ippān Josep ilo iien jon̄ak eo kein kajuon an bwidej eo an Zaion ilo Missouri. Bōtaab jān iien eo ekar jerwane tōmak eo an im, ilo an kar kajjieon̄ in kariab Rikanaan eo, kar je jet leta ko ilo juon nuujpeba ilo Ohio. Im kijejeto ko an āinwōt raar jerbal, kōnke “en̄jake ko rej jab em̧m̧an … rekar jebar ņae Kabun̄” ilo eria eo (Katak im Bujen Ko 71, kōmeļeļe eo an jekjōn in). Ta eo rittōmak ro rej aikuj kōm̧m̧ane ilo juon jekjek āinwōt in? Ilo an ejjeļo̧k uwaak en ejim̧we n̄an aolep jekjek, āinwōt emakijkij ilo jekjek in—ekoba ilo jekjek in ilo 1831 eo—m̧ōttan uwaak eo an Irooj ej n̄an bōbrae m̧ool eo im kajim̧we bōd ko n̄an “kabun̄bun̄ļo̧k gospel [eo]” (eoon 1). Aaet, jerbal eo an Irooj enaaj iien otemjej wōr an rikenana, ijoke ilo jem̧lo̧kin, “ejjeļo̧k kein tariņae kōm̧anm̧an ņae [e] enaaj jeraam̧m̧an” (eoon 9).
Lale “Ezra Booth and Isaac Morley,” ilo Revelations in Context,, 134.
Ļōmnak ko n̄an Ekkatak ilo M̧weeo im ilo Kabun̄ in
Jetōb enaaj tōl eō ilo aō kwaļo̧k kōn gospel an Rilo̧mo̧o̧r.
Emaron̄ juon mennin jorrāān n̄e armej rej kōnanaik ak kajejtokjen tōmak eo am̧ ilo Rilo̧mo̧o̧r, gospel eo An, im Kabun̄ eo An. N̄e enaaj waļo̧k āindein, ta eo kwoj kōm̧m̧ane? Ejja wōt ilo jekjekin eaar waļo̧k ilo Ohio ilo 1831 eo (lale kōmeleļe eo an jekjōn in Katak im Bujen Ko 71). Ta eo Irooj eaar jiron̄ Josep Smith im Sidney Rigdon n̄an kōm̧m̧ane kōn jekjek in ilo Katak im Bujen Ko 71? Bōlen kwomaron̄ kalaajrake kōmeļeļe ko Irooj eaar leļo̧ki n̄an er im kōjeraam̧m̧an ko E ekar kallim̧ur kaki.
N̄an kakobaba n̄an ekkatak jekjōn 71, kwomaron̄ bar kappukot wāween an Irooj kar uwaak n̄an rijum̧ae ro An ilo jerbal eo An ioon laļin. Erkein jet iaan waanjon̄ak ko: Matu 22:15–22; 26:59–64; Jon 10:37–38. Ta eo kwoj ekkatak jān E? Ta ļōmņak ko jet kwoj boki jān Matu 18:15; Epesōs 4:31–32; 2 Timote 3:12; Jemes 1:19?
Ekōjkan an jerbal kapilōk eo An ilo jekjek ko kwoj jelm̧ae rainin? Kwomaron̄ ļōmņak kōn wāween ko n̄an kajim̧we riab ko ilo inem̧m̧an ilo naan ko am̧ make. N̄an waanjon̄ak, kwomaron̄ jinoe ilo am̧ kwaļo̧k kautiej kōn tōmak eo an armej eo juon innām kwomaron̄ kiiō jeere ilo juon wāween ettā im jouj ta eo kwoj tōmak kōn Jisōs Kraist im katak ko An. N̄an keppopo n̄an iien kein, bōlen kwomaron̄ kamelmel e kepaake ro m̧ōttam̧ ak baam̧le eo am̧.
Bar lale Topic and Questions, “Helping Others with Questions,” Gospel Library; Dallin H. Oaks, “Loving Others and Living with Differences,” Liahona, Nov. 2014, 25–28; Jörg Klebingat, “Mour in Rikaļoor ro Rekajoor ilo Raan Ko Āliktata,” Liaona, Māe 2022, 107–10.
Irooj ej kōjeraam̧m̧an eō jān jerbal ko an ritōl ro āinwōt bisop ro.
Ke Newel K. Whitney ekar kūr n̄an jerbal āinwōt juon bisop an Kabun̄ in, jerbal ko an raar jidik wōt aer oktakļo̧k jān ko an bisop ro rainin. N̄an waanjon̄ak, Bisop Whitney ekar lale m̧weiuk in wujlepļ̧o̧k ko im mālim n̄an jekjek im mour ilo āne eo an Zaion ilo Missouri. Bōtaab ilo am̧ riit kōn kūr eo an ilo Katak im Bujen Ko 72, kwomaron̄ jeļā jet kōkkeitaak ko n̄an ta eo bisop ro rainin rej kōm̧m̧ane—ilo jetōb, eļan̄n̄e ejjab alikkar, kōn jerbal ko aer.
N̄an waanjon̄ak, ilo wāween rot kwoj “leļo̧k juon ellaajrak” n̄an bisop eo am? (eoon 5). Ilo raan kein ad, “im̧ōn ko̧koņ eo an Irooj;” emaron̄ koba mennin leļo̧k ko, jerbal in jipan̄ ko, im kapeel ko an membōr in ward eo (lale eoon 10, 12). Ekōjkan am̧ leļo̧k ijo ko̧ņaam̧ n̄an im̧ōn ko̧koņ in?
Ewi wāween an Irooj kar kōjeraam̧m̧an kwe im baam̧le eo am̧ jān jerbal in jipan̄ eo an juon bisop?
Bar lale Quentin L. Cook, “Bisop ro—Seperd ro n̄an Siip ko an Irooj,” Liaona, Māe 2021, 56–60.
Ewōr aō iien n̄an jeere gospel eo an Rilo̧mo̧o̧r.
Ke Joseph Smith im Sidney Rigdon raar jepļaak jān jerbal in mijenede ko aerro (lale Katak im Bujen Ko 71), Irooj eaar jiron̄ er n̄an aer wōnm̧aanļo̧k kōn ukook eo an Baibōļ (lale Unin Tōl eo an Jeje ko Rekwojarjar, “Joseph Smith Translation (JST),” Gospel Library). Bōtaab menin ejjab meļeļein bwe E ekar kōnaan bwe en bōjrak aer jeere gospel eo. Eļaptata, ej m̧ōttan wōt mour eo an juon rijilōk.
Ilo am̧ riiti Katak im Bujen Ko 73, ļōmņak kōn am̧ maron̄ kōm̧m̧an bwe kwaļo̧k gospel eo en juon, “ekkar” en wōnm̧aanļo̧k wōt (eoon 4—ak m̧ool kwaļo̧ke—m̧ōttan mour eo am̧ ilubwilijin eddo ko jet am̧.
Kwaļo̧k gospel eo an Jisōs Kraist emaron̄ in ekkā im make waļo̧k.
“Jerbal kōn ami kajoor … kabun̄bun̄ļo̧k m̧ool eo.”
Revelesōn eo ilo jekjōn 75 kar kōnono n̄an armej ro “rekar letok āt ko [etaer] n̄an ilo̧k n̄an kabun̄bun̄ļo̧k gospel eo [an Rilo̧mo̧o̧r],” (eoon 2). Juon wāween n̄an ekkatak revelesōn in ej n̄an kōm̧m̧ne 2 laajrak ko: (1) jeere gospel eo ilo wāween eo ejejjet im (2) wāween an Irooj kōjeraam̧m̧an im jipan̄ kōj n̄e jej kōm̧m̧ane.
Ilo ļōmņak eo am̧, ta meļelein “pād” ak “jowan” ilo kwaļo̧k gospel eo? Ilo wāween rot “jerbal kōn ami kajoor”? (eoon 3).
Bar lale “Emaron̄ Jab Ion Tōl Eutiej,” Al, nō. 36.
N̄an ļōmņak ko reļļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Ļōmņak ko n̄an Katakin Ajri ro
Imaron̄ bōbrae m̧ool eo jān kwaļo̧k naan in kam̧ool eo aō.
-
Kwomaron̄ kōjerbal kōmelele eo an jekjōn in ilo Katak im Bujen Ko 71 ak “Jebt 25: Josep Smith im Sidney Rigdon rej Etal n̄an juon Mijen” (ilo Bwebwenato ko jān Katak im Bujen Ko, 96, ak pija eo ej ekkeijel ilo Gospel Library) n̄an katakin ajri ro nejūm̧ kōn jekjek ko me raar im̧we jekjōn 71. Jipan̄ er kappukot ilo eoon 1 ta eo Irooj ekōņaan bwe Josep im Sidney ren kōm̧m̧ane kōn “en̄jake ko rej jab em̧m̧an” kōn Kabun̄ in. Elmen An kar ba E enaaj kar jipan̄ er? Ekōjkan ad maron̄ erom āinwōt Josep im Sidney?
0:45Chapter 25: Joseph Smith and Sidney Rigdon Go on a Mission: December 1831–January 1832
-
Kwomaron̄ al juon al eo me ej im̧we ajri ro nejūm̧ bwe ren m̧ool n̄an Rilo̧mo̧o̧r, āinwōt “Stand for the Right” (Children’s Songbook, 159). Jipan̄ ajri ro nejūm̧ ekkatak kilen jeere ta ko rejeļā kōn Jisōs Kraist.
Irooj eaar kūr juon bisop n̄an jipan̄ eō.
-
Riiti Katak im Bujen Ko 72:2 ippān doon emaron̄ ejake juon iien em̧m̧an n̄an kōnono kake etke Irooj ej letok bisop ro (bar lale “Jebta 17: Bisop ro M̧okta an Kabun̄ in,” in Bwebwenato ko jān Katak im Bujen Ko, 64–66, ak pija eo ej ekkeijel ippān ilo Gospel Library). Kwe im ajri ro nejūm̧ maron̄ kappok pija ko ak kein ekkatak ko me rej kwaļo̧k jerbal ko an juon bisop. Pija eo ilo peij in makūkūt eo ilo jem̧ļo̧kin elmakot in ej letok jet ļōmņak ko. Innām kom maron̄ kōnono ippān doon kōn bisop ro em̧ōj am̧ jeļā kajjeer im wāween ko Irooj ekar kōjeraam̧m̧an baam̧le eo am̧ jān jerbal ko aer.
1:45Chapter 17: The First Bishops of the Church: February and December 1831
Aolep iien kwaļo̧k kōn Jisōs Kraist. “Jekdoon ta eo kwoj katakin, keememej bwe kwon lukkuun katakin kōn Jisōs Kraist im elmen erom āinwōt E” (Katakin ilo Wāween eo an Rilo̧mo̧o̧r, 6). N̄an waanjon̄ak, n̄e kwoj katakin ajri ro nejūm̧ kōn bisop ro, kwaļo̧k bwe er ro rej pinej jenkwan Jisōs Kraist, kar kūr jān E n̄an kōm̧m̧ane jerbal eo An (lale 1 Piter 2:25).
Irooj ej kajjitōk bwe bisop ro ren lale armej ro rej aikuj.
Imaron̄ leļo̧k ijo em̧m̧antata ippa n̄an Irooj.
-
Kōnono kōn oktak eo ikōtaan “jowan” im “jerbal kōn [ad] kajoor,” bōlen komaron̄ kāālet jet jerbal in jipan̄ ko ak jerbal ko ilo m̧ōko im kipel ajri ro nejūm̧ n̄an kwaļo̧k aer kōm̧m̧ane ilo jowan innām kōn aolepen aer kajoor. Ilo am̧ riiti “ak jab jowan” ilo Katak im Bujen Ko 75:3, ajri ro nejūm̧ remaron̄ kwaļo̧k kilen aer kōm̧m̧ani jerbal ko ilo adimemej. N̄e kwoj riiti “ak jerbal kōn ami kajoor,” remaron̄ kwaļo̧k aer lukkuun jerbal. Etke eaorōk bwe jen kōm̧m̧ane ijo em̧m̧an tata ippād n̄e jej jerbal n̄an Irooj?
-
Ilo enaan eo an “Two Principles for Any Economy” (Liahona, Nov. 2009, 55–58), Būreejtōn Dieter F. Uchtdorf ekar kwaļo̧k ruo bwebwenato ko kōn jerbal. Bōlen kwomaron̄ jeere ippān ajri ro nejūm̧ im kōnono elmen en̄jake menin n̄an jeļā ke jaar lukkuun jerbal im kōm̧m̧an jon̄an wōt ad maron̄.
N̄an ļōmņak ko reļļapļo̧k, lale ennaan eo an allōn̄ in ilo eo Jera māākjin.
Recognizing the Tender Mercies in Your Life, jān Keith Larson